ਰਾਈਟਰਜ਼ ਫੋਰਮ, ਕੈਲਗਰੀ ਦੀ ਮਾਸਿਕ ਇਕੱਤਰਤਾ 4 ਮਾਰਚ 2017 ਦਿਨ ਸਨਿੱਚਰਵਾਰ 2 ਵਜੇ ਕਾਊਂਸਲ ਆਫ ਸਿੱਖ ਆਰਗੇਨਾਈਜ਼ੇਸ਼ਨਜ਼ (COSO ਕੋਸੋ) ਦੇ ਹਾਲ ਵਿਚ ਸਭਾ ਦੇ ਪ੍ਰਧਾਨ ਪ੍ਰੋ. ਸ਼ਮਸ਼ੇਰ ਸਿੰਘ ਸੰਧੂ ਅਤੇ ਬੀਬੀ ਸੁਰਿੰਦਰ ਗੀਤ ਹੋਰਾਂ ਦੀ ਪ੍ਰਧਾਨਗੀ ਵਿੱਚ ਹੋਈ। ਜਨਰਲ ਸਕੱਤਰ ਜਸਬੀਰ (ਜੱਸ) ਚਾਹਲ ਨੇ ਸਟੇਜ ਸਕੱਤਰ ਦੀ ਜੁੱਮੇਂਵਾਰੀ ਨਿਭਾਂਦਿਆਂ ਅੱਜ ਦਾ ਸਾਹਿਤਕ ਦੌਰ ਸ਼ੁਰੂ ਕਰਨ ਲਈ ਪਹਿਲੇ ਬੁਲਾਰੇ ਨੂੰ ਸਟੇਜ ਤੇ ਆਉਣ ਦਾ ਸੱਦਾ ਦਿੱਤਾ –
ਰਫ਼ੀ ਅਹਮਦ ਨੇ, ਜੋ ਉਰਦੂ ਦੇ ਬੜੇ ਅੱਛੇ ਬੁਲਾਰੇ ਹਨ, ਇਕ ਕਹਾਣੀ “ਸ਼ੱਬੋ” ਅਪਣੇ ਖ਼ਾਸ ਅੰਦਾਜ਼ ‘ਚ ਸੁਣਾ ਕੇ ਸਭਾ ਨੂੰ ਕਾਯਲ ਕਰ ਦਿੱਤਾ।

ਹਰਨੇਕ ਬੱਧਣੀ ਹੋਰਾਂ ਸਮਾਜ ਵਿੱਚ ਧੀਆਂ ਨਾਲ ਹੁੰਦੇ ਵਿਤਕਰੇ ਤੇ ਚੋਟ ਕਰਦੀ ਅਪਣੀ ਰਚਨਾ ਨਾਲ ਸਭਨੂੰ ਤੇ ਖ਼ਾਸ ਕਰਕੇ ਲਿਖਾਰੀਆਂ ਨੂੰ ਇਹ ਸੁਨੇਹਾ ਦਿੱਤਾ –

“ਰਾਜੇ ਜੱਮਣ ਵਾਲੀਆਂ, ਧੀਆਂ ਦੇ ਹੱਕ ‘ਚ ਬੋਲਣ ਵੇਲੇ
ਦਾਨਸ਼-ਮੰਦ ਕਵੀਓ, ਕਰਿਓ ਨਾ ਕਦੀ ਸੰਕੋਚ”

ਬੀਬੀ ਸੁਰਿੰਦਰ ਗੀਤ ਨੇ ਅਪਣੀ ਇਕ ਕਵਿਤਾ ਤੇ ਗੀਤ ਪੇਸ਼ ਕਰਕੇ ਤਾੜੀਆਂ ਲੈ ਲਈਆਂ-

1-“ਬਾਗਾਂ ਦੀ ਰਾਣੀ ਬਣਕੇ ਆਵੇ ਕਿਵੇਂ ਉਹ ਤਿਤਲੀ
ਰੰਗ ਡੀਕ ਜਿਸਦੇ ਹੋਇਆ ਰੰਗੀਨ ਇਹ ਚੁਫੇਰਾ
ਔਖਾ ਬੜਾ ਸੀ ਚੁੱਕਣਾ ਤਿਤਲੀ ਦਾ ਭਾਰ ਉਸਨੂੰ
ਸਿਰ ਤੇ ਜੋ ਰੋਜ਼ ਢੋਂਦਾ ਦਿਨ ਰਾਤ ਹੈ ਹਨੇਰਾ”

2-“ਮੈਂ ਜ਼ਿੰਦਗੀ ਦਾ ਓਹ ਗੀਤ ਪੂਜਾਂ, ਜੋ ਸੱਚ ਹੋਵੇ ਜੋ ਰੱਬ ਹੋਵੇ
ਲਹੂ ‘ਚ ਧੋਤੀ ਓਹ ਤੇਗ ਹੋਵੇ, ਜਾਂ ਸੱਚ ਗਾਓਂਦੀ ਰਬਾਬ ਹੋਵੇ”

ਮਾਸਟਰ ਜੀਤ ਸਿੰਘ ਸਿੱਧੂ ਹੋਰਾਂ ‘ਫ਼ਿਰਾਕ ਗੋਰਖਪੁਰੀ’ ਦੇ ਕੁਝ ਉਰਦੂ ਸ਼ੇ’ਅਰ ਸਾਂਝੇ ਕਰਕੇ ਤਾੜੀਆਂ ਲਈਆਂ –

“ਤਬੀਯਤ ਅਪਨੀ ਘਬਰਾਤੀ ਹੈ ਜਬ ਸੁਨਸਾਨ ਰਾਤੋਂ ਮੇਂ
ਹਮ ਐਸੇ ਮੇਂ ਤੇਰੀ ਯਾਦੋਂ ਕੀ ਚਾਦਰ ਤਾਨ ਲੇਤੇ ਹੈਂ”

ਜਸਵੀਰ ਸਿੰਘ ਸਿਹੋਤਾ ਹੋਰਾਂ ਅਪਣੇ ਦੋਹਿਰਾ ਕਾਵਿ-ਸੰਗ੍ਰਹਿ “ਐ ਮੇਰੇ ਭੋਲੇ ਮਨਾ” ਵਿੱਚੋਂ ਅਪਣੇ ਕੁਝ ਦੋਹੇ ਸਾਂਝੇ ਕਰਕੇ ਵਾਹ-ਵਾਹ ਲੈ ਲਈ –

“ਰਸਤਾ ਰੌਸ਼ਨ ਜੇ ਮਿਲੇ, ਜਾਣੈ ਚੰਗੇ ਭਾਗ।
ਭਰੋਸਾ ਅਤੇ ਦੋਸਤੀ, ਜੀਵਣ ਲਈ ਚਰਾਗ।”

ਸੁਰਿੰਦਰ ਢਿੱਲੋਂ ਹੋਰਾਂ ਇਕ ਮਸ਼ਹੂਰ ਹਿੰਦੀ ਗ਼ਜ਼ਲ ਕਰੋਕੇ ਨਾਲ ਗਾਕੇ ਰੌਣਕ ਲਾ ਦਿੱਤੀ-

“ਖ਼ੁਦਾ ਕਰੇ ਕਿ ਮੁਹੱਬਤ ਮੇਂ ਯੇ ਮੁਕਾਮ ਆਏ
ਕਿਸੀ ਕਾ ਨਾਮ ਲੂੰ ਲਬ ਪੇ ਤੁਮਹਾਰਾ ਨਾਮ ਆਏ”

ਪ੍ਰੋ. ਸ਼ਮਸ਼ੇਰ ਸਿੰਘ ਸੰਧੂ ਹੋਰਾਂ ਅਪਣੀਆਂ ਦੋ ਗ਼ਜ਼ਲਾਂ ਸਾਂਝੀਆਂ ਕਰਕੇ ਭਰਪੂਰ ਤਾਲੀਆਂ ਦੀ ਦਾਦ ਲੈ ਲਈ –

1-“ਵਿੱਚ ਉਡੀਕਾਂ ਸ਼ਾਮੀਂ ਸੂਰਜ ਆ ਢਲਿਆ
ਕੰਧਾਂ ਵਾਂਗੂੰ ਯਾਦਾਂ ਨੇ ਹੈ ਆ ਵਲਿਆ।
ਕਿੰਨੇ ਹੋਰ ਅੰਗੂਠੇ ਲੈਣੇ ਦਛਣਾ ਦੇ
ਹੱਕ ਹੁਨਰ ਨੂੰ ਸਦੀਆਂ ਰੁਤਬੇ ਨੇ ਛਲਿਆ।”

2-“ਬਲਨ ਬਹੂਰੀਂ ਦੀਪਕ ਜੀਕਣ ਸ਼ਾਮ ਢਲੇ
ਯਾਦ ਤਿਰੀ ਨਿਤ ਲਟ ਲਟ ਦੀਪਕ ਵਾਂਗ ਬਲੇ।
ਖੂਨ ਉਬਾਲੇ ਖੂਨੀ ਹੋਲੀ ਨਫ਼ਰਤ ਦੀ
ਦਿਲ ਚਾਹੇ ਕੋ ਅਮਨਾ ਦਾ ਰੰਗ ਆਣ ਮਲੇ।”

ਸੁਖਵਿੰਦਰ ਸਿੰਘ ਤੂਰ ਹੋਰਾਂ ਪੰਮਾ ਡੂਮੇਵਾਲੀਆ ਦਾ ਗਾਇਆ ਗੀਤ “ਸੱਚੇ ਬੋਲ” ਏਨਾਂ ਸੋਹਣਾ ਗਾਇਆ ਕਿ ਸਭ ਝੂਮ ਉੱਠੇ।
ਬੀਬੀ ਨਿਰਮਲ ਕੰਡਾ ਨੇ ਅਪਣੀ ਹਿੰਦੀ ਗ਼ਜ਼ਲ ਸਾਂਝੀ ਕਰਕੇ ਵਾਹ-ਵਾਹ ਲਈ –

“ਜਾਨਾ ਥਾ ਦੂਰ ਹਮਸੇ ਤੋ ਲਾਖੋਂ ਬਹਾਨੇ ਬਨਾ ਲੀਏ
ਮਿਲਾ ਜੋ ਦਰਦ ਸੀਨੇ ਕਾ ਜਹਾਂ ਸੇ ਆਂਸੂ ਛੁਪਾ ਲੀਏ”

ਜਸਬੀਰ ਚਾਹਲ “ਤਨਹਾ” ਹੋਰਾਂ ਇਹ ਚਿੰਤਾ ਦਰਸਾਈ ਕਿ ਅਜੋਕੇ ਸਮੇਂ ਦਾ ਇਹ ਸਾਹਿਤਕ ਮਾਹੋਲ ਤੇ ਸਾਹਿਤਕ ਸਭਾਵਾਂ ਜਲਦੀ ਹੀ ਅਤੀਤ ਦੀ ਇਕ ਗੱਲ ਬਣ ਜਾਣਗੀਆਂ ਜੇ ਅਸੀਂ ਅੱਜਕਲ ਦੇ ਨੋਜਵਾਨ ਤਬਕੇ ਤੇ ਬੱਚਿਆਂ ਨੂੰ ਅਪਣੇ ਨਾਲ ਜੋੜਨ ਵਿੱਚ ਅਸਮਰਥ ਰਹੇ। ਸਾਨੂੰ ਇਸ ਸਮੱਸਿਆ ਤੇ ਗੰਭੀਰਤਾ ਨਾਲ ਵਿਚਾਰ-ਵਡਾਂਤਰਾ ਕਰਨਾ ਪਵੇਗਾ ਤੇ ਵਕਤ ਰਹਿੰਦਿਆਂ ਸਹੀ ਉਪਰਾਲੇ ਕਰਨੇ ਚਾਹੀਦੇ ਹਨ। ਇਕ ਲਿਖਾਰੀ, ਸਾਹਿਤਕਾਰ ਜਾਂ ਸਾਹਿਤ ਪ੍ਰੇਮੀ ਹੋਣ ਦੇ ਨਾਤੇ ਸਾਡਾ ਇਹ ਫ਼ਰਜ਼ ਬਣਦਾ ਹੈ ਕਿ ਅਗਲੀ ਪੀਹੜੀ ਨੂੰ ਵੀ ਇਸ ਰਸਤੇ ਤੇ ਨਾਲ ਚਲਣ ਲਈ ਪ੍ਰੇਰੀਏ।

ਅਮਰੀਕ ਚੀਮਾ ਹੋਰਾਂ ‘ਉਜਾਗਰ ਸਿੰਘ ਕੰਵਲ’ ਦਾ ਲਿਖਿਆ ਗੀਤ ਬੜੀ ਖ਼ੂਬਸੂਰਤੀ ਨਾਲ ਗਾਕੇ ਰੰਗ ਬਨ੍ਹਿਆ –

“ਦੇਸਾਂ ਪਰਦੇਸਾਂ ਵਿੱਚ ਉਸਦੇ, ਕਿਤੇ ਵੀ ਹੋਣ ਟਿਕਾਣੇ
ਇਹ ਨਹੀਂ ਹੋ ਸਕਦਾ, ਉਹ ਮੇਰੀ ਵੇਦਣ ਹੀ ਨਾ ਜਾਣੇ
ਉਸਦੇ ਚੇਹਰੇ ਤੇ ਵੀ ਹੋਣੈ, ਪਛਤਾਵੇ ਦਾ ਸਾਇਆ
ਸਈਓ ਨੀਂ................”

ਜੱਸ ਚਾਹਲ ਨੇ ਰਾਈਟਰਜ਼ ਫੋਰਮ ਦੇ ਪ੍ਰਧਾਨ ਪ੍ਰੋ. ਸ਼ਮਸ਼ੇਰ ਸਿੰਘ ਸੰਧੂ ਅਤੇ ਆਪਣੇ ਵਲੋਂ ਸਾਰੇ ਹਾਜ਼ਰੀਨ ਦਾ ਧੰਨਵਾਦ ਕਰਦੇ ਹੋਏ ਰਾਈਟਰਜ਼ ਫੋਰਮ ਦੀ ਅਗਲੀ ਇਕੱਤਰਤਾ ਲਈ ਕੈਲਗਈ ਦੇ ਸਾਰੇ ਲਿਖਾਰੀਆਂ ਅਤੇ ਸਾਹਿਤ ਪ੍ਰੇਮੀਆਂ ਨੂੰ ਪਿਆਰ ਭਰਿਆ ਸੱਦਾ ਦਿੱਤਾ।

ਰਾਈਟਰਜ਼ ਫੋਰਮ ਦਾ ਮੁੱਖ ਉਦੇਸ਼ ਕੈਲਗਰੀ ਨਿਵਾਸੀ ਪੰਜਾਬੀ, ਹਿੰਦੀ, ਉੁਰਦੂ ਤੇ ਅੰਗ੍ਰੇਜ਼ੀ ਦੇ ਸਾਹਿਤ ਪ੍ਰੇਮੀਆਂ ਤੇ ਲਿਖਾਰੀਆਂ ਨੂੰ ਇਕ ਮੰਚ ਤੇ ਇਕੱਠੇ ਕਰਨਾ ਤੇ ਸਾਂਝਾ ਪਲੇਟਫਾਰਮ ਪ੍ਰਦਾਨ ਕਰਨਾ ਹੈ ਜੋ ਜੋੜਵੇਂ ਪੁਲ ਦਾ ਕੰਮ ਕਰੇਗਾ। ਸਾਹਿਤ/ਅਦਬ ਰਾਹੀਂ ਬਣੀ ਇਹ ਸਾਂਝ, ਮਾਨਵੀ ਤੇ ਅਮਨ ਹਾਮੀਂ ਤਾਕਤਾਂ ਤੇ ਯਤਨਾਂ ਨੂੰ ਵੀ ਮਜ਼ਬੂਤ ਕਰੇਗੀ ਤੇ ਕੈਨੇਡਾ ਦੇ ਜੀਵਣ ਨਾਲ ਵੀ ਸਾਂਝ ਪਾਵੇਗੀ। ਤੁਹਾਡਾ ਸਾਰਿਆਂ ਦਾ ਸਹਿਯੋਗ ਹੀ ਸਾਹਿਤ/ਅਦਬ ਦੀ ਤਰੱਕੀ, ਪਰਚਾਰ ਤੇ ਪਰਸਾਰ ਦਾ ਰਾਜ਼ ਹੈ।

ਰਾਈਟਰਜ਼ ਫੋਰਮ, ਕੈਲਗਰੀ ਦੀ ਅਗਲੀ ਮਾਸਿਕ ਇਕੱਤਰਤਾ ਹਰ ਮਹੀਨੇ ਦੀ ਤਰ੍ਹਾਂ ਮਹੀਨੇ ਦੇ ਪਹਿਲੇ ਸ਼ਨਿੱਚਰਵਾਰ 1 ਅਪ੍ਰੈਲ 2017 ਨੂੰ 2.00 ਤੋਂ 5.00 ਤਕ ਕੋਸੋ ਦੇ ਹਾਲ 102-3208, 8 ਐਵੇਨਿਊ NE ਕੈਲਗਰੀ ਵਿਚ ਹੋਵੇਗੀ। ਕੈਲਗਰੀ ਦੇ ਸਾਰੇ ਸਾਹਿਤਕਾਰਾਂ ਤੇ ਸਾਹਿਤ ਪ੍ਰੇਮੀਆਂ ਨੂੰ ਇਸ ਵੰਨ-ਸਵੰਨੀ ਤੇ ਰੰਗ-ਬਰੰਗੀ ਸਾਹਿਤਕ ਇਕੱਤਰਤਾ ਵਿੱਚ ਸ਼ਾਮਲ ਹੋਣ ਦਾ ਸੱਦਾ ਦਿੱਤਾ ਜਾਂਦਾ ਹੈ। ਹੋਰ ਜਾਣਕਾਰੀ ਲਈ ਤੁਸੀਂ ਪ੍ਰੋ. ਸ਼ਮਸ਼ੇਰ ਸਿੰਘ ਸੰਧੂ (ਪ੍ਰਧਾਨ) ਨਾਲ 403-285-5609 ਜਾਂ 587-716-5609 ਤੇ ਅਤੇ ਜਨਰਲ ਸਕੱਤਰ ਜਸਬੀਰ (ਜੱਸ) ਚਾਹਲ ਨਾਲ 403-667-0128 ਤੇ ਸੰਪਰਕ ਕਰ ਸਕਦੇ ਹੋ। ਤੁਸੀਂ ਫੇਸ ਬੁਕ ਤੇ ਸ਼ਮਸ਼ੇਰ ਸੰਧੂ ਅਤੇ Writers Forum, Calgary ਦੇ ਪੇਜ ਤੋਂ ਵੀ ਜਾਣਕਾਰੀ ਲੈ ਸਕਦੇ ਹੋ ਅਤੇ ਪੇਜ ਨੂੰ ਲਾਈਕ ਵੀ ਕਰ ਸਕਦੇ ਹੋ। ਧੰਨਵਾਦ।

19/03/17