ਪਿਛਲੇ ਦਿਨੀਂ "ਪੰਜਾਬੀ ਸਾਹਿਤ ਅਕੈਡਮੀ ਨੌਟਿੰਘਮ" ਦਾ ਸਾਲਾਨਾ ਸਮਾਗਮ ਸਫਲਤਾ ਸਹਿਤ ਸੰਪੂਰਨ ਹੋਇਆ ਜਿਸ ਵਿਚ ਬਰਤਾਨੀਆ ਭਰ ਦੇ ਬਹੁਤ ਸਾਰੇ ਪੰਜਾਬੀ ਸਹਿਤਕਾਰਾਂ ਨੇ ਹਿੱਸਾ ਲਿਆ। ਸੰਤੋਖ ਧਾਲੀਵਾਲ ਨੇ ਸਭ ਤੋਂ ਪਹਿਲਾਂ ਵਿਛੜ ਗਈ ਕਵਿਤਰੀ ਪ੍ਰਭਜੋਤ ਕੌਰ ਜੀ ਨੂੰ ਯਾਦ ਕਰਦਿਆਂ, ਵਾਰੇ ਸ਼ਰਧਾ ਭਰੇ ਸ਼ਬਦ ਕਹੇ। ਆਪ ਜੀ ਦੀ ਆਯੂ 92 ਵਰ੍ਹਿਆਂ ਦੀ ਸੀ ਅਤੇ ਆਪ ਨੇ 1964 ਵਿਚ ਸਾਹਿਤ ਅਕੈਡਮੀ ਦਾ ਇਨਾਮ ਪ੍ਰਾਪਤ ਕੀਤਾ ਸੀ। ਪ੍ਰਭਜੋਤ ਕੌਰ ਕਰਨਲ ਨਰਿੰਦਰਪਾਲ ਸਿੰਘ ਜੀ ਦੀ ਧਰਮ ਪਤਨੀ ਸਨ ਜਿਹੜੇ ਖੁਦ ਵੀ ਸਾਹਿਤ ਅਕੈਡਮੀ ਦੇ ਇਨਾਮ ਵਿਜੇਤਾ ਸਨ । ਅੱਜਕਲ ਉਹ ਵੀ ਇਸ ਫਾਨੀ ਦੁਨੀਆਂ ਵਿਚ ਨਹੀਂ ਹਨ..।

ਨੌਟਿੰਘਮ ਅਕੈਡਮੀ ਨੇ ਹਮੇਸ਼ਾ ਵਾਂਗ ਇਸ ਵਰ੍ਹੇ ਵੀ ਆਪਣੀਆਂ ਕਿਤਾਬਾਂ ਤੇ ਸ਼ਲਾਘਾ ਭਰਪੂਰ ਪਰਚੇ ਪੜ੍ਹਾਉਣ ਦੀ ਬਜਾਏ ਪਹਿਲੀ ਵਾਰ ਇਕ ਵਖਰੇ ਹੀ ਢੰਗ ਦਾ ਪ੍ਰੋਗਰਾਮ ਅਤੇ ਇਸ ਦੀ ਵੱਖਰੀ ਰੂਪ ਰੇਖਾ ਉਲੀਕਣ ਦਾ ਹੰਭਲਾ ਮਾਰਿਆ। ਪਹਿਲੇ ਸੈਸ਼ਨ ਵਿਚ ਬਰਤਾਨੀਆ ਦੇ 6 ਵਿਦਵਾਨਾਂ ਨੇ ਘੱਟ ਗਿਣਤੀ ਭਾਸ਼ਾਵਾਂ ਦਾ (ਖਾਸ ਕਰਕੇ ਪੰਜਾਬੀ) ਦਾ ਬਰਤਾਨੀਆ ਵਿਚ ਭਵਿਖ ਤੇ ਚਣੌਤੀਆਂ ਦੇ ਛੇ ਵੱਖ ਵੱਖ ਪਹਿਲੂਆਂ ਵਾਰੇ ਦਸ ਦਸ ਮਿੰਟ ਵਿਚ ਆਪੋ ਆਪਣੇ ਵਿਚਾਰ ਪਰਗਟ ਕੀਤੇ। ਡਾ. ਸਾਥੀ ਲੁਧਿਆਣਵੀ ਨੇ ਬਰਤਾਨੀਆਂ ਦੇ ਬਰੌਡਕਾਸਟਿੰਗ ਅਤੇ ਪਰਿੰਟ ਮੀਡੀਆ ਵਿਚ ਉਚਾਰਣ ਦੀ ਸਮੱਸਿਆ, ਡਾ. ਜਗਤ ਸਿੰਘ ਨਾਗਰਾ ਨੇ ਸਕੂਲਾਂ ਵਿਚ ਪੰਜਾਬੀ ਪੜ੍ਹਉਣ ਲਈ ਸਮਗਰੀ ਤੇ ਅਧਿਆਪਕਾਂ ਦੀਆਂ ਮੁਸ਼ਕਲਾਂ, ਡਾ. ਬਲਦੇਵ ਸਿੰਘ ਕੰਦੋਲਾ ਨੇ ਪੰਜਾਬੀ ਦੇ ਕੰਪੀਊਟਰੀਕਰਣ, ਵੀਰਿੰਦਰ ਪਰਿਹਾਰ ਨੇ ਪੰਜਾਬੀ ਕਵਿਤਾ ’ਚ ਪੰਜਾਬੀ ਭਾਸ਼ਾ ਦੀ ਦੁਰਦਸ਼ਾ, ਡਾ.ਭਾਰਦਵਾਜ ਨੇ ਪੰਜਾਬੀ ਭਾਸ਼ਾ ਅਤੇ ਲਿਟਰੇਚਰ ਵਿਚ ਪ੍ਰਦੂਸ਼ਣ ਦੇ ਵਿਸ਼ੇ, ਅਤੇ ਡਾ. ਦੇਵਿਦਰ ਕੌਰ ਜੀ ਨੇ ਪੰਜਾਬੀ ਭਾਸ਼ਾ ਵਿਚ ਆਲੋਚਨਾ ਦੀ ਸਮੱਸਿਆ ਉੱਤੇ ਆਪਣੇ ਵਿਚਾਰ ਪੇਸ਼ ਕੀਤੇ। ਹਰ ਵਿਦਵਾਨ ਨੂੰ ਆਪਣੀ ਗੱਲ ਕਹਿਣ ਲਈ ਦਸ ਮਿੰਟ ਦਾ ਸਮਾ ਦਿੱਤਾ ਗਿਆ ਸੀ ਤਾਂ ਕਿ ਬੁਲਾਰੇ 'ਪਾਣੀ ’ਚ ਮਧਾਣੀ' ਪਾ ਕੇ ਐਵੇਂ ਖਿਲਾਰਾ ਜਿਹਾ ਨਾ ਪਾ ਸਕਣ। ਪੰਜਾਬੀ ਸੁਭਾ ਮੁਤਾਬਿਕ ਇੱਕ ਦੋਂਹ ਬੁਲਾਰਿਆਂ ਨੇ ਇਸ ਕੜੀ ਬੰਦਸ਼ ਤੇ ਕਿੰਤੂ ਪ੍ਰੰਤੂ ਵੀ ਕੀਤਾ ਪਰ ਪ੍ਰਬੰਧਕਾਂ ਨੇ ਆਪਣੇ ਪ੍ਰੋਗਰਾਮ ਦੇ ਵੇਰਵੇ ਮੁਤਾਬਿਕ ਇਸ ਨੂੰ ਨੇਪਰੇ ਚਾੜ੍ਹਿਆ। ਉਪਰੰਤ ਸੰਬੰਧਿਤ ਵਿਦਵਾਨਾਂ ਨੂੰ ਆਏ ਸਰੋਤਿਆਂ ਨੇ ਉਨ੍ਹਾਂ ਦੇ ਚੁਣੇ ਵਿਸ਼ਿਆਂ ਵਾਰੇ ਸਵਾਲ ਜਵਾਬ ਕੀਤੇ। ਇਸ ਸੈਸ਼ਨ ਦੀ ਪ੍ਰਧਾਨਗੀ ਵੀ ਇਨ੍ਹਾਂ ਸਾਰੇ ਵਿਦਵਾਨਾਂ ਨੇ ਹੀ ਕੀਤੀ । ਸੰਤੋਖ ਧਾਲੀਵਾਲ ਨੇ ਸਟੇਜ ਦੀ ਸੇਵਾ ਸੰਭਾਲੀ।

ਹਰ ਸਾਲ ਦੀ ਤਰ੍ਹਾਂ ਏਸ ਵਰ੍ਹੇ ਵੀ ‘ਕਾਲਵਿੰਦਰਜੀਤ ਧਾਲੀਵਾਲ ਅਵਾਰਡ’ ਇੱਕ ਵਿਲੱਖਣ ਵਿਅਕਤੀ ਨੂੰ ਦਿੱਤਾ ਗਿਆ। ਇਸ ਵੇਰ ਇਹ ਵਿਅਕਤੀ ਸਨ ਪੁਲੀਸ ਇੰਸਪੈਕਟਰ ਗੁਰਮੀਤ ਕੌਰ ਐਮ ਬੀ ਈ, ਕਮਿਊਨਿਟੀ ਕੋਹੀਯਨ ਇੰਸਪੈਕਟਰ, ਨੌਟਿੰਘਮ। MBE  'ਤੇ OBE ਨਾਲ ਹਰ ਵਰ੍ਹੇ ਇੰਗਲੈਂਡ ਦੀ ਮਹਾਂਰਾਣੀ ਦੇ ਜਨਮ ਦਿਨ ਤੇ ਕਮਿਊਨਿਟੀ ’ਚ ਚੰਗਾ ਕੰਮ ਕਰਨ ਵਾਲਿਆਂ ਨੂੰ ਸਨਮਾਨਿਤ ਕੀਤਾ ਜਾਂਦਾ ਹੈ। ਆਪ ਜੀ ਨੂੰ ਇੱਕ ਸ਼ਾਲ ਤੇ ਸ਼ੀਲਡ ਨਾਲ ਨਿਵਾਜਿਆ ਗਿਆ। ਇੰਸਪੈਕਟਰ ਗੁਰਮੀਤ ਕੌਰ ਨੇ ਸਾਡੇ ਸਿਰਫ ਪੰਜਾਬੀ ਹੀ ਨਹੀਂ ਭਾਰਤੀ ਸਮਾਜ ਦੀਆਂ ਕੁੜੀਆਂ ਨੂੰ ਵੀ ਇਨ੍ਹਾਂ ਵਰਜਿੱਤ ਕਿੱਤਿਆਂ ’ਚ ਆ ਕੇ ਨਵੀਆਂ ਲੀਹਾਂ ਉਲੀਕਣ ਲਈ ਪੈੜਾਂ ਪਾਈਆਂ ਹਨ। ਇਹ ਸਾਡੇ ਸਾਰਿਆਂ ਲਈ ਬੜੇ ਹੀ ਮਾਣ ਦੀ ਗੱਲ ਹੈ।

ਦੂਜੇ ਸੈਸ਼ਨ ਦੀ ਪਰਧਾਨਗੀ ਪ੍ਰਸਿਧ ਹਿੰਦੀ ਕਵਿਤਰੀ ਜੈ ਵਰਮਾ, ਡਾ. ਕਰਨੈਲ ਸ਼ੇਰਗਿਲ, ਜਸਵਿੰਦਰ ਮਾਨ, ਵੀਰਿੰਦਰ ਪਰਿਹਾਰ, ਕੌਂਸਲਰ ਮੋਤਾ ਸਿੰਘ ਤੇ ਇੰਡੀਅਨ ਸੈਂਟਰ ਦੇ ਪਰਧਾਨ ਵਿਕਟਰ ਮਾਹਲ ਨੇ ਕੀਤੀ। ਬਰਤਾਨੀਆ ਭਰ ਤੋਂ ਆਏ ਕਵੀਆਂ, ਹਰਮਿੰਦਰ ਨਾਗੀ, ਸੁਰਿੰਦਰ ਰਾਏ, ਹਰਭਜਨ ਸਿੰਘ ਬਾਂਸਲ, ਡਾ. ਦਵਿੰਦਰ ਕੌਰ, ਰਵਿੰਦਰ ਸਿੰਘ ਕੁੰਦਰਾ, ਕੌਂਸਲਰ ਮੋਤਾ ਸਿੰਘ, ਦਵਿੰਦਰ ਨੌਰਾ, ਰਾਜਿੰਦਰ ਕੌਰ, ਅਵਤਾਰ ਸਿੰਘ ਡੋਹਲ, ਡਾ. ਕਰਨੈਲ ਸ਼ੇਰਗਿੱਲ, ਵਰਿੰਦਰ ਪਰਿਹਾਰ, ਸਾਥੀ ਲੁਧਿਆਣਵੀ, ਸੰਤੋਖ ਧਾਲੀਵਾਲ, ਜਸਵਿੰਦਰ ਮਾਨ ਤੇ ਰਾਜਿੰਦਰਜੀਤ ਨੇ ਆਪਣੀਆਂ ਖੂਬਸੂਰਤ ਕਵਿਤਾਵਾਂ ਤੇ ਗ਼ਜ਼ਲਾਂ ਸੁਣਾ ਕੇ 200 ਤੋਂ ਉੱਪਰ ਸਰੋਤਿਆਂ ਨੂੰ 2 ਘੰਟੇ ਕੀਲੀ ਰਖਿਆ। ਕਵੀ ਦਰਬਾਰ ਦੀ ਸਟੇਜ ਦੀ ਜ਼ੁੱਮੇਵਾਰੀ ਰਾਜਿੰਦਰਜੀਤ ਨੇ ਨਿਭਾਈ । ਇਸ ਸੈਸ਼ਨ ਵਿਚ ਹਿੰਦੀ, ਉਰਦੂ ੳਤੇ ਅੰਗ੍ਰੇਜ਼ੀ ਵਿਚ ਕਵਿਤਾਵਾਂ ਵੀ ਸੁਣਾਈਆਂ ਗਈਆਂ ਜਿਸ ਨਾਲ ਇਹ ਮਲਟੀ ਲਿੰਗੂਅਲ ਕਵੀ ਦਰਬਾਰ ਹੋ ਨਿਬੜਿਆ। ਅੰਤ ਵਿਚ ਸੰਤੋਖ ਧਾਲੀਵਾਲ ਨੇ ਆਏ ਮਹਿਮਾਨਾਂ, ਇੰਡੀਅਨ ਸੈਂਟਰ ਦੇ ਬੋਰਡ, 50+ ਅਸੋਸੀਏਸ਼ਨ ਦੇ ਸਾਰੇ ਕਰਕੁਨਾਂ ਦਾ ਧੰਨਵਾਦ ਕੀਤਾ। ਡਾ. ਕੰਦੋਲਾ ਜੀ ਨੇ ਪੰਜਾਬੀ ਨੂੰ ਬੀ.ਬੀ.ਸੀ ਦੀ ਵੈਬਸਾਈਟ ਤੇ ਇਸਦੀ ਬਣਦੀ ਥਾਂ ਦੁਆਉਣ ਲਈ ਵਿੱਢੀ ਪਟੀਸ਼ਨ ਤੇ ਆਪਣੀ ਹਾਜ਼ਰੀ ਲੁਆਉਣ ਲਈ ਪੁਰ ਜ਼ੋਰ ਸ਼ਬਦਾਂ ’ਚ ਅਪੀਲ ਕੀਤੀ। ਇਸ ਨਵੀਂ ਪਿਰਤ ਨਾਲ ਤੇ ਲੈਸਟਰ ਦੀ ਕੇਟਿਰਿੰਗ ਫਰਮ ‘ਸ਼ਿਵਮ’ ਦੇ ਸੁਆਦੀ ਭੋਜਨ ਨਾਲ ਇਹ ਇੱਕ ਯਾਦਗਾਰੀ ਪ੍ਰੋਗ੍ਰਾਮ ਹੋ ਨਿਬੜਿਆ।

ਰੀਪੋਰਟ, ਸੰਤੋਖ ਧਾਲੀਵਾਲ

02/12/16