ਚੰਡੀਗੜ (ਲੁਧਿਆਣਵੀ) 21 ਅਪ੍ਰੈਲ, 17: ਸਥਾਨਕ ਸ਼ਿਵਾਲਿਕ ਪਬਲਿਕ ਸਕੂਲ, ਸੈਕਟਰ-41 ਵਿਖੇ ਕੌਮਾਂਤਰੀ ਸਾਹਿਤਕ ਮੰਚ (ਰਜਿ:) ਮੁਹਾਲੀ ਵਲੋਂ ਪ੍ਰਵਾਸੀ ਸ਼ਾਇਰ ਸ੍ਰੀ ਪ੍ਰਕਾਸ਼ ਸੋਹਲ ਯੂ.ਕੇ. ਦੇ ਗ਼ਜ਼ਲ-ਸੰਗ੍ਰਹਿ ਉਫਕ ਦੇ ਪਾਰ ਅਤੇ ਸੁਲੱਖਣ ਸਰਹੱਦੀ ਦੀ ਸਮਾਲੋਚਨਾ ਪੁਸਤਕ ਪੰਜਾਬੀ ਗ਼ਜ਼ਲ ਗਲੋਬਲੀ ਸਮੀਖਿਆ ਤੇ ਪੰਜਾਬੀ ਮਾਂ-ਬੋਲੀ ਦਾ ਸਪੂਤ-ਗਿੱਲ ਮੋਰਾਂਵਾਲੀ ਰਿਲੀਜ਼ ਕੀਤੀਆਂ ਗਈਆਂ। ਪ੍ਰਧਾਨਗੀ ਮੰਡਲ ਵਿੱਚ ਡਾ: ਸਰਬਜੀਤ ਸਿੰਘ ਛੀਨਾ, ਸ੍ਰੀ ਪ੍ਰਕਾਸ਼ ਸੋਹਲ, ਸਿਰੀ ਰਾਮ ਅਰਸ਼, ਸੁਲੱਖਣ ਸਰਹੱਦੀ ਤੇ ਮੰਚ ਦੇ ਜਨਰਲ ਸਕੱਤਰ ਭੁਪਿੰਦਰ ਸਿੰਘ ਬੇਕਸ ਸ਼ਾਮਿਲ ਹੋਏ। ਪੁਸਤਕਾਂ 'ਤੇ ਪੇਪਰ ਡਾ: ਬਲਜੀਤ ਸਿੰਘ ਤੇ ਦੀਪਕ ਚਨਾਰਥਲ ਨੇ ਪੜੇ। ਬਹਿਸ ਦਾ ਅਰੰਭ ਕਰਦਿਆਂ ਡਾ: ਸੁਰਿੰਦਰ ਗਿੱਲ ਨੇ ਕਿਹਾ ਕਿ ਉਹ ਪ੍ਰਕਾਸ਼ ਦੇ ਪਲੇਠੇ ਗ਼ਜ਼ਲ-ਸੰਗ੍ਰਹਿ ਦੀ ਸਰਾਹਣਾ ਕਰਦੇ ਹਨ। ਡਾ: ਸਵੈਰਾਜ ਸੰਧੂ ਨੇ ਕਿਹਾ ਕਿ ਗ਼ਜ਼ਲ ਵਿਧਾ ਅੱਜ ਬੇਹੱਦ ਹਰਮਨ ਪਿਆਰੀ ਹੋ ਗਈ ਹੈ ਤੇ ਪ੍ਰਕਾਸ਼ ਸੋਹਲ ਨੇ ਵੀ ਇਸ ਵੱਲ ਕਦਮ ਵਧਾਇਆ ਹੈ ਜੋ ਸਵਾਗਤਯੋਗ ਹੈ। ਪ੍ਰੋ: ਜੀਤ ਦਵਿੰਦਰ ਨੇ ਕਿਹਾ ਕਿ ਪ੍ਰਕਾਸ਼ ਸੋਹਲ ਦਾ ਨਾਵਲ ਤੋਂ ਪੰਜਾਬੀ ਗ਼ਜ਼ਲ ਵੱਲ ਆਉਣਾ ਸ਼ੁਭ ਸ਼ਗਨ ਹੈ। ਕਸ਼ਮੀਰ ਕੌਰ ਸੰਧੂ ਨੇ ਪ੍ਰਕਾਸ਼ ਸੋਹਲ ਨੂੰ ਨਿਵੇਕਲਾ ਸ਼ਾਇਰ ਬਿਆਨਣ ਲਈ ਇਸ ਸ਼ਿਅਰ ਦਾ ਸਹਾਰਾ ਲਿਆ ਕਦ ਕਿਹਾ ਮੈਂ ਸਾਰਿਆਂ ਵਰਗਾ ਹੈਂ ਤੂੰ, ਫੁੱਲ, ਬੂਟੇ, ਨਦੀ, ਝਰਨੇ ਤਾਰਿਆਂ ਵਰਗਾ ਹੈਂ ਤੂੰ। ਪ੍ਰਕਾਸ਼ ਸੋਹਲ ਨੇ ਸੁਲੱਖਣ ਸਰਹੱਦੀ ਨੂੰ ਦਸਤਾਰ ਭੇਂਟ ਕਰਕੇ ਉਸਤਾਦ ਧਾਰਨ ਕੀਤਾ ਤੇ ਆਪਣੀ ਰਚਨ ਪ੍ਰਕਿਰਿਆ ਬਾਰੇ ਚਰਚਾ ਕਰਦਿਆਂ ਆਪਣੀਆਂ ਕੁਝ ਰਚਨਾਵਾਂ ਵੀ ਸਾਂਝੀਆਂ ਕੀਤੀਆਂ ਤੇ ਆਪਣੀ ਜੀਵਨ ਸਾਥਣ ਹਰਜਿੰਦਰ ਕੌਰ ਵਲੋਂ ਮਿਲਦੇ ਸਹਿਯੋਗ ਲਈ ਉਸਦਾ ਧੰਨਵਾਦ ਵੀ ਕੀਤਾ। ਬਹਿਸ ਨੂੰ ਸਮੇਟਦਿਆਂ ਸਿਰੀ ਰਾਮ ਅਰਸ਼ ਨੇ ਸੋਹਲ ਬਾਰੇ ਕਿਹਾ ਕਿ ਇਹ ਬਰਤਾਨੀਆਂ ਵਿਚ ਪੰਜਾਬੀ ਸੱਭਿਆਚਾਰ ਦੇ ਝੰਡਾ ਬਰਦਾਰ ਬਣ ਕੇ ਵਿਚਰ ਰਹੇ ਹਨ ਤੇ ਸੁਲੱਖਣ ਸਰਹੱਦੀ ਦੀ ਸ਼ਗਿਰਦੀ ਵਿਚ ਆਉਣ ਨਾਲ ਸੋਹਲ ਦੀ ਗ਼ਜ਼ਲਕਾਰੀ ਦੀ ਧਾਰ ਹੋਰ ਤਿਖੇਰੀ ਹੋ ਜਾਵੇਗੀ। ਉਨਾਂ ਕਿਹਾ ਕਿ ਸਮਾਲੋਚਨਾ ਪੁਸਤਕ 'ਚ ਸਰਹੱਦੀ ਹੋਰਾਂ ਨੇ ਗ਼ਜ਼ਲ ਦੀਆਂ ਪੁਰਾਣੀਆਂ ਮਿੱਥਾਂ ਨੂੰ ਤੋੜ ਕੇ ਗ਼ਜ਼ਲ ਨੂੰ ਪੰਜਾਬੀ ਸੱਭਿਆਚਾਰ ਦੀ ਰੂਹ ਨਾਲ ਜੋੜਨ ਦੀ ਸਫਲ ਕੋਸ਼ਿਸ਼ ਕੀਤੀ ਹੈ। ਇਸ ਪੁਸਤਕ ਰਾਹੀਂ ਗ਼ਜ਼ਲ ਵਿਧਾ ਵਿੱਚ ਨਵ ਚੇਤਨਾ ਦਾ ਸੰਚਾਰ ਹੋਵੇਗਾ। ਉਨਾਂ ਹੋਰ ਕਿਹਾ ਕਿ ਗਿੱਲ ਮੋਰਾਂਵਾਲੀ ਪੰਜਾਬੀ ਮਾਂ ਬੋਲੀ ਦਾ ਸੱਚਾ ਸਪੂਤ ਹੈ ਤੇ ਪੰਜਾਬੀ ਦਾ ਇਕ ਸਿਰੜੀ ਸ਼ਾਇਰ ਹੈ। ਮੰਚ ਵਲੋਂ ਗਿੱਲ ਮੋਰਾਂਵਾਲੀ ਨੂੰ ਲਾਈਫ ਟਾਇਮ ਅਚੀਵਮੈਂਟ ਸਨਮਾਨ ਪੱਤਰ ਦੇਣਾ ਇੱਕ ਸਹੀ ਚੋਣ ਹੈ। ਮੁੱਖ ਮਹਿਮਾਨ ਡਾ: ਸਰਬਜੀਤ ਸਿੰਘ ਛੀਨਾ ਨੇ ਮੰਚ ਦੇ ਉਦਮ ਦੀ ਸਰਾਹਣਾ ਕਰਦਿਆਂ ਅਗਲੇਰੇ ਪ੍ਰੋਗਰਾਮਾਂ ਲਈ ਹਰ ਤਰਾਂ ਦੇ ਸਹਿਯੋਗ ਦੀ ਪੇਸ਼ਕਸ਼ ਕੀਤੀ। ਮੰਚ ਵਲੋਂ ਪ੍ਰਕਾਸ਼ ਸੋਹਲ ਤੇ ਮਿਸਿਜ਼ ਸੋਹਲ, ਡਾ: ਸਰਬਜੀਤ ਸਿੰਘ ਛੀਨਾ ਨੂੰ ਸਨਮਾਨਿਤ ਕੀਤਾ ਗਿਆ। ਡਾ: ਬਲਜੀਤ ਸਿੰਘ, ਦੀਪਕ ਚਨਾਰਥਲ ਤੇ ਸ੍ਰੀ ਸਬਦੀਸ਼ ਨੂੰ ਸਨਮਾਨ ਚਿੰਨ ਦਿੱਤੇ ਗਏ। ਮੰਚ ਵਲੋਂ ਪ੍ਰਕਾਸ਼ ਸੋਹਲ ਨੂੰ ਬਰਤਾਨੀਆ ਇਕਾਈ ਦਾ ਸੰਚਾਲਕ ਨਿਯੁਕਤ ਕੀਤਾ ਗਿਆ। ਇਸ ਮੌਕੇ ਹੋਏ ਕਵੀ-ਦਰਬਾਰ ਦਾ ਆਰੰਭ ਸਿਮਰਜੀਤ ਕੌਰ ਦੇ ਸਰੋਦੀ ਗੀਤ ਨਾਲ ਹੋਇਆ। ਉਪਰੰਤ ਸਤਪਾਲ ਚਹਿਲ, ਸੁਖਵਿੰਦਰ ਆਹੀ, ਪਰਮਜੀਤ ਕੌਰ ਮਹਿਕ, ਸੁਰਿੰਦਰ ਕੰਵਲ, ਮਨਜੀਤ ਕੌਰ ਮੋਹਾਲੀ, ਰਮਨ ਸੰਧੂ, ਨਰਿੰਦਰ ਨਸਰੀਨ, ਹਰਪ੍ਰੀਤ ਕੌਰ ਪ੍ਰੀਤ, ਸ਼ਿੰਦਰ ਕੌਰ ਸਿਰਸਾ ਅਤੇ ਰਣਜੀਤ ਕੌਰ ਸਵੀ ਨੇ ਆਪਣੀਆਂ ਰਚਨਾਵਾਂ ਸਾਂਝੀਆਂ ਕੀਤੀਆਂ। ਇਸ ਮੌਕੇ ਅਮਰਜੀਤ ਪਟਿਆਲਵੀ, ਬਾਬੂ ਰਾਮ ਦੀਵਾਨਾ, ਹਰਬੰਸ ਪ੍ਰੀਤ, ਗੁਰਤੇਜ ਪਾਰਸਾ, ਕਮਲ ਦੁਸਾਂਝ, ਸਰਵਣ ਰਾਹੀ, ਸੁਖਦੇਵ ਨਿਰਮੋਹੀ, ਅਜੀਤ ਸਿੰਘ ਸੰਧੂ, ਅਨਿਲ ਬਹਿਲ, ਡਾ: ਦਲਜੀਤ ਕੌਰ, ਡਾ: ਕੁਲਬੀਰ ਕੌਰ, ਬਲਬੀਰ ਸਿੰਘ ਐਡਵੋਕੇਟ, ਰਘਬੀਰ ਵੜੈਚ ਕੈਨੇਡਾ ਤੇ ਕਰਨੈਲ ਸ਼ਬਦਲਪੁਰੀ ਆਦਿ ਨੇ ਸ਼ਿਰਕਤ ਕੀਤੀ। ਮੰਚ ਸੰਚਾਲਨ ਸ੍ਰੀ ਸਬਦੀਸ਼ ਨੇ ਬਾਖੂਬੀ ਕੀਤਾ। ਇਹ ਜਾਣਕਾਰੀ ਮੰਚ ਦੇ ਜਨਰਲ ਸਕੱਤਰ ਭੁਪਿੰਦਰ ਸਿੰਘ ਬੇਕਸ ਨੇ ਪ੍ਰੈਸ ਨੋਟ ਰਾਹੀਂ ਦਿੱਤੀ। ਕੁਲ ਮਿਲਾ ਕੇ ਸਮਾਗਮ ਯਾਦਗਾਰੀ ਪੈੜਾਂ ਛੱਡ ਗਿਆ। ਜਿਸ ਦੇ ਲਈ ਮੰਚ ਦੇ ਸਮੂਹ ਅਹੁੱਦੇਦਾਰ ਵਧਾਈ ਦੇ ਪਾਤਰ ਬਣਦੇ ਹਨ।

24/04/17