ਮੋਹਾਲੀ -  26 ਜੂਨ, 17: ਕਵੀ ਮੰਚ ਮੋਹਾਲੀ ਵੱਲੋਂ ਸ਼ਾਸਤਰੀ ਮਾਡਲ ਸਕੂਲ ਫੇਜ਼-1, ਮੋਹਾਲੀ ਵਿਖੇ ਇੱਕ ਸ਼ਾਨਦਾਰ ਗੀਤ ਮਹਿਫ਼ਲ ਅਤੇ ਸਨਮਾਨ ਸਮਾਗਮ ਆਯੋਜਿਤ ਕੀਤਾ ਗਿਆ, ਜਿਸ ਵਿੱਚ ਮੁੱਖ ਤੌਰ ਤੇ ਪ੍ਰਸਿੱਧ ਬਾਲ ਸਾਹਿਤਕਾਰ, ਸਮਾਜ ਸੇਵੀ ਅਤੇ ਸਿੱਖਿਆ ਸ਼ਾਸਤਰੀ ਪ੍ਰਿੰ. ਬਹਾਦਰ ਸਿੰਘ ਗੋਸਲ ਨੂੰ ਸਾਹਿਤ, ਸਮਾਜ ਸੇਵਾ ਅਤੇ ਸਿੱਖਿਆ ਖੇਤਰ ਵਿੱਚ ਜੀਵਨ ਭਰ ਦੀਆਂ ਅਨੇਕਾਂ ਪ੍ਰਾਪਤੀਆਂ ਲਈ 'ਲਾਈਫ਼-ਟਾਈਮ ਅਚੀਵਮੈਂਟ ਅਵਾਰਡ' ਨਾਲ ਸਨਮਾਨਿਤ ਕੀਤਾ ਗਿਆ। ਪ੍ਰੋਗਰਾਮ ਦੀ ਸ਼ੁਰੂਆਤ ਵਿੱਚ ਨਾਮਵਰ ਲੇਖਕ ਅਜਮੇਰ ਸਿੰਘ ਔਲਖ ਦੀ ਮੌਤ ਤੇ ਦੁੱਖ ਦਾ ਪ੍ਰਗਟਾਵਾ ਕੀਤਾ ਗਿਆ ਅਤੇ ਦੋ ਮਿੰਟ ਮੋਨ ਰੱਖ ਕੇ ਸ਼ਰਧਾਂਜਲੀ ਭੇਂਟ ਕੀਤੀ ਗਈ।

ਇਸ ਸਮਾਗਮ ਦੇ ਮੁੱਖ ਮਹਿਮਾਨ ਡੌਲੀ ਮਲਕੀਅਤ ਪ੍ਰਸਿੱਧ ਸਿਨੇਮਾ ਅਤੇ ਟੀ. ਵੀ. ਕਲਾਕਾਰ (ਗੀਤਾਂ ਅਤੇ ਗਿੱਧਿਆਂ ਦੀ ਰਾਣੀ) ਸਨ, ਜਦੋਂ ਕਿ ਸਮਾਗਮ ਦੀ ਪ੍ਰਧਾਨਗੀ ਉਸਤਾਦ ਸ਼ਾਇਰ ਬਲਬੀਰ ਸਿੰਘ ਸੈਣੀ, ਮੁੱਖ ਸੰਪਾਦਕ ਸੂਲ ਸੁਰਾਹੀ ਮੈਗਜ਼ੀਨ, ਨੰਗਲ ਨੇ ਕੀਤੀ। ਪ੍ਰਧਾਨਗੀ ਮੰਡਲ ਵਿੱਚ ਆਰ.ਐਲ. ਸੇਵਕ ਡਾਇਰੈਕਟਰ ਸ਼ਾਸਤਰੀ ਮਾਡਲ ਸਕੂਲ, ਭਗਤ ਰਾਮ ਰੰਗਾੜਾ ਪ੍ਰਧਾਨ ਕਵੀ ਮੰਚ ਮੋਹਾਲੀ ਅਤੇ ਪ੍ਰਿੰਸੀਪਲ ਬਹਾਦਰ ਸਿੰਘ ਗੋਸਲ ਸ਼ਾਮਲ ਸਨ।

ਮੰਚ ਵੱਲੋਂ ਪ੍ਰਿੰ. ਬਹਾਦਰ ਸਿੰਘ ਗੋਸਲ ਨੂੰ ਇੱਕ ਕਿਰਪਾਨ, ਮੋਮੈਂਟੋ, ਇੱਕ ਸ਼ਾਲ, ਸਨਮਾਨ ਪੱਤਰ ਅਤੇ ਇੱਕ ਮੈਡਲ ਭੇਟ ਕਰਕੇ ਸਨਮਾਨਿਤ ਕੀਤਾ ਗਿਆ। ਇਸ ਮੌਕੇ ਪ੍ਰਿੰ. ਗੋਸਲ ਤੋਂ ਇਲਾਵਾ ਪ੍ਰਸਿੱਧ ਗਾਇਕ ਜਗਤਾਰ ਸਿੰਘ ਜੋਗ ਅਤੇ ਗਾਇਕ ਸਰਬਜੀਤ ਸਾਗਰ ਨੂੰ ਵੀ ਉਹਨਾਂ ਦੀ ਸੁੱਚੀ ਅਤੇ ਵਧੀਆ ਗਾਇਕੀ ਲਈ ਸਨਮਾਨ ਪੱਤਰ, ਮੋਮੈਂਟੋ  ਅਤੇ ਸ਼ਾਲ ਦੇ ਕੇ ਸਨਮਾਨਿਤ ਕੀਤਾ ਗਿਆ।

ਇਸ ਸਮਾਗਮ ਦੀ ਸ਼ੁਰੂਆਤ ਜਗਤਾਰ ਜੋਗ ਦੇ ਧਾਰਮਿਕ ਗੀਤ ਨਾਲ ਕੀਤੀ ਗਈ। ਬਾਅਦ ਵਿੱਚ ਸ਼ਾਨਦਾਰ ਗੀਤ ਮਹਿਫ਼ਲ ਵਿੱਚ ਨਾਮੀ ਗਾਇਕਾਂ ਨੇ ਆਪਣੀ ਕਲਾ ਦੇ ਜੌਹਰ ਦਿਖਾਏ। ਸ੍ਰੀ ਜੋਗ ਵੱਲੋਂ ਪ੍ਰਿੰ. ਗੋਸਲ ਰਚਿਤ ਗੀਤ 'ਮਾਂ ਤੋਂ ਦੂਰ' ਗਾ ਕੇ ਸਭ ਨੂੰ ਮੰਤਰ-ਮੁਗਧ ਕੀਤਾ। ਇਸ ਤੋਂ ਪਹਿਲਾਂ ਭਗਤ ਰਾਮ ਰੰਗਾੜਾ, ਡਾ. ਹਰਦੀਪ ਸਿੰਘ ਲੌਂਗੀਆ, ਆਰ.ਐਲ. ਸੇਵਕ ਅਤੇ ਪਰਮਜੀਤ ਕੌਰ ਪਰਮ ਵੱਲੋਂ ਪ੍ਰਿੰ. ਗੋਸਲ ਦੀਆਂ ਸਮਾਜ ਸੇਵੀ ਗਤੀ-ਵਿਧੀਆਂ ਬਾਰੇ ਵਿਸਥਾਰ-ਪੂਰਵਕ ਦੱਸਿਆ ਗਿਆ ਅਤੇ ਉਹਨਾਂ ਵੱਲੋਂ ਰਚਿਤ ਵੱਖ-ਵੱਖ ਕਿਤਾਬਾਂ ਦਾ ਵਰਨਣ ਕੀਤਾ।

ਮੁੱਖ ਮਹਿਮਾਨ ਡੌਲੀ ਮਲਕੀਅਤ ਨੇ ਕਿਹਾ ਕਿ ਪ੍ਰਿੰ. ਗੋਸਲ ਵਰਗੇ ਪ੍ਰਸਿੱਧ ਬਾਲ-ਸਾਹਿਤਕਾਰ ਅਤੇ ਸਮਾਜ ਸੇਵੀ ਨੂੰ ਸਨਮਾਨਿਤ ਕਰਕੇ ਉਹਨਾਂ ਨੂੰ ਬਹੁਤ ਖ਼ੁਸ਼ੀ ਮਹਿਸੂਸ ਹੋ ਰਹੀ ਹੈ। ਉਹਨਾਂ ਨੇ ਗੋਸਲ ਜੀ ਦੀਆਂ ਪੁਸਤਕਾਂ 'ਝਲਕ ਪੰਜਾਬੀ ਵਿਰਸੇ ਦੀ' ਅਤੇ 'ਰੰਗ ਪੰਜਾਬੀ ਵਿਰਸੇ' ਨੂੰ ਪੰਜਾਬ, ਪੰਜਾਬੀ ਅਤੇ ਪੰਜਾਬੀਅਤ ਲਈ ਬੜਾ ਯੋਗਦਾਨ ਦੱਸਿਆ। ਡੌਲੀ ਮਲਕੀਅਤ ਜੀ ਵੱਲੋਂ ਗਾਏ ਗੀਤਾਂ ਨੇ ਵੀ ਸਮਾਗਮ ਵਿੱਚ ਖੂਬ ਰੰਗ ਬੰਨਿਆ ਅਤੇ ਸਰੋਤਿਆਂ ਦੇ ਦਿਲਾਂ ਤੇ ਚੰਗੀ ਛਾਪ ਲਗਾਈ।

ਇਸ ਸਮਾਗਮ ਨੂੰ ਚਾਰ ਚੰਨ ਲਗਾਉਣ ਵਾਲਿਆਂ ਵਿੱਚ ਅਮਰ ਵਿਰਦੀ, ਸਰਦੂਲ ਸਿੰਘ ਪਪੀਹਾ, ਬਲਵਿੰਦਰ ਸਿੰਘ ਆਈਡੀਆ, ਸਰਬਜੀਤ ਕੌਰ, ਸਰਬਜੀਤ ਸਾਗਰ, ਦਰਸ਼ਨ ਤਿਓਣਾ ਤੋਂ ਇਲਾਵਾ ਹਾਜ਼ਰ ਪੱਤਵੰਤਿਆਂ ਵਿੱਚ ਜਗਪਾਲ ਸਿੰਘ ਆਈ. ਏ. ਐਫ., ਪ੍ਰੀਤਮ ਸਿੰਘ ਭੂਪਾਲ, ਬੀ.ਐਸ. ਬੀਰ, ਮਨਜੀਤ ਕੌਰ ਮੋਹਾਲੀ, ਕਸ਼ਮੀਰ ਕੌਰ ਸੰਧੂ, ਬਿਮਲਾ ਗੁਗਲਾਨੀ, ਸੇਵੀ ਰਾਇਤ, ਮਨਮੋਹਨ ਸਿੰਘ ਦਾਊਂ, ਬੀਬੀ ਦਲਜੀਤ ਕੌਰ ਦਾਊਂ, ਗੁਰਦਰਸ਼ਨ ਮਾਵੀ, ਪਰਸ ਰਾਮ ਸਿੰਘ ਬੱਧਣ, ਤੇਜਾ ਸਿੰਘ, ਸਰਵਹਿੱਤਕਾਰ ਸਿੰਘ, ਬਲਵਿੰਦਰ ਕੌਰ, ਨਰਿੰਦਰ ਕੌਰ, ਸਤਿੰਦਰ ਕੌਰ, ਸ਼ਮਸ਼ੇਰ ਕੌਰ, ਸੰਤੋਖ ਸਿੰਘ ਚਾਵਲਾ, ਜਗਦੀਸ਼ ਜਲੋਟਾ, ਜੋਗਿੰਦਰ ਸਿੰਘ ਜਨਰਲ ਸਕੱਤਰ ਪੰਜਾਬੀ ਮੰਚ ਚੰਡੀਗੜ ਆਦਿ ਸਨ।

26/06/17