ਕੈਲਗਰੀ ਲਿਟਰੇਰੀ ਐਂਡ ਸੋਸ਼ਲ ਐਸੋਸੀਏਸ਼ਨ (ਕੈਲਸਾ CALSA) ਦੀ ਇਕੱਤਰਤਾ 18 ਨਵੰਬਰ ਨੂੰ ਜਸਬੀਰ ਚਾਹਲ ਦੀ ਪ੍ਰਧਾਨਗੀ ਹੇਠ ਕੋਸੋ ਦੇ ਹਾਲ ਵਿਚ ਹੋਈ। ਪ੍ਰਧਾਨਗੀ ਮੰਡਲ ਵਿਚ ਉਨ੍ਹਾਂ ਦਾ ਸਾਥ ਅਸਜਦ ਬੁਖਾਰੀ ਜੀ ਅਤੇ ਹਰਜੀਤ ਸਿੰਘ ਜੀ ਨੇ ਦਿੱਤਾ। ਸਕੱਤਰ ਨਵਪ੍ਰੀਤ ਰੰਧਾਵਾ ਨੇ ਹਾਜ਼ਰ ਸਰੋਤਿਆਂ ਦਾ ਸਵਾਗਤ ਕਰਦੇ ਹੋਏ ਦੱਸਿਆ ਕਿ ਇਸ ਵਾਰ ਦੀ ਇਕੱਤਰਤਾ ਖ਼ਾਸ ਤੌਰ ਤੇ “Domestic Violence ਘਰੇਲੂ ਹਿੰਸਾ” ਦੇ ਮੁੱਦੇ ਤੇ ਕੇਂਦਰਿਤ ਹੈ ਪਰ ਇਸ ਦੀ ਸ਼ੁਰੂਆਤ ਹਲਕੀ ਫੁਲਕੀ ਸ਼ਾਇਰੀ ਅਤੇ ਸੰਗੀਤ ਤੋਂ ਕੀਤੀ ਜਾਵੇਗੀ।

ਸ਼ਾਇਰ ਅਹਮਦ ਸ਼ਕੀਲ ‘ਅਹਮਦ’ ਨੇ ਸਮਾਜਿਕ ਬੁਰਾਈਆਂ ਤੇ ਅਧਾਰਿਤ ਅਪਣੀ ਇਕ ਵਿਅੰਗਮਈ ਨਜ਼ਮ ਪੇਸ਼ ਕੀਤੀ। ਉਸ ਤੋਂ ਬਾਅਦ ਬਹੁਤ ਹੀ ਮਿੱਠੀ ਅਵਾਜ਼ ਦੀ ਮਾਲਿਕ ਬੀਬੀ ਸੁਰਭੀ ਸ਼ੀਲ ਨੇ ਕਰਿਓਕੀ (Karaoke) ਤੇ ਬੜੀ ਖ਼ੂਬਸੂਰਤੀ ਨਾਲ ਕੁਝ ਗੀਤ ਅਤੇ ਗਜ਼ਲਾਂ ਗਾਕੇ ਸਰੋਤਿਆਂ ਨੂੰ ਕੀਲ ਹੀ ਲਿਆ। ਉਪਰੰਤ ਜਸਬੀਰ ਚਾਹਲ ਹੋਰਾਂ ਸਰੋਤਿਆਂ ਨਾਲ ਅਪਣੇ ਕੁਝ ਵਿਚਾਰ ਸਾਂਝੇ ਕੀਤੇ ਅਤੇ ਕੈਲਸਾ ਦੀ ਟੀਮ ਵਿੱਚ ਸ਼ਾਮਿਲ ਹੋਏ ਨਵੇਂ ਮੈਂਬਰਾਂ ਦਾ ਤਾੱਰੁਫ਼ ਕਰਵਾਉਂਦਿਆਂ ਦੱਸਿਆ ਕਿ ਅਸਜਦ ਬੁਖਾਰੀ ਜੀ ਕੈਲਸਾ ਦੀ ਐਡਵਾਈਜ਼ਰੀ ਕਮੇਟੀ ਦੇ ਮੈਂਬਰ ਅਤੇ ਬੀਬੀ ਜਤਿੰਦਰ(ਰਿੱਮੀ)ਸੇਖੋਂ ਐਕਸ਼ਨ ਕਮੇਟੀ ਦੇ ਮੈਂਬਰ ਵਜੋਂ ਸਾਡੇ ਨਾਲ ਜੁੜੇ ਹਨ। ਇਹਨਾਂ ਦੋਵਾਂ ਦਾ ਕੈਲਸਾ ਪਰਿਵਾਰ ਵਿੱਚ ਨਿੱਘਾ ਸਵਾਗਤ ਕਰਦਿਆਂ ਪ੍ਰੋਗਰਾਮ ਦੇ ਦੂਜੇ ਹਿੱਸੇ ਦੇ ਸੰਚਾਲਨ ਦੀ ਡੋਰ ਰਿੱਮੀ ਸੇਖੋਂ ਦੇ ਹੱਥ ਦਿੱਤੀ ਗਈ।

“ਘਰੇਲੂ ਹਿੰਸਾ” ਦੇ ਨਾਜ਼ੁਕ ਵਿਸ਼ੇ ਨੂੰ ਸਮਰਪਿੱਤ ਇਸ ਚਰਚਾ ਵਿੱਚ ਭਾਗ ਲੈਣ ਲਈ ਕੁਝ ਖ਼ਾਸ ਬੁਲਾਰੇ ਆਏ ਹੋਏ ਸਨ ਜਿਹਨਾਂ ਨੇ ਇਹ ਮੰਦਭਾਗਾ ਜ਼ੁਲਮ ਅਪਣੇ ਤਨ-ਮਨ ਤੇ ਹੰਡਾਇਆ ਸੀ ਅਤੇ ਜੋ ਅਪਣੀ ਹਿੱਮਤ ਸਦਕਾ ਇਸ ਤੋਂ ਬਾਹਰ ਨਿਕਲ ਅਪਣੀ ਜ਼ਿੰਦਗੀ ਨੂੰ ਬਿਹਤਰ ਬਨਾਉਣ ਵਿੱਚ ਸਫ਼ਲ ਹੋਏ ਹਨ। ਵਰਣਨਯੋਗ ਹੈ ਕਿ ਇਸ ਚਰਚਾ ਵਿੱਚ ਸਾਡੇ ਖ਼ਾਸ ਮਹਿਮਾਨ ਅਲਬਰਟਾ ਦੇ ਮਨਿਸਟਰ ਇਰਫ਼ਾਨ ਸਾਬਿਰ ਅਤੇ ਸਮਾਜਿਕ ਅਤੇ ਰਾਜਨੀਤਕ ਗਤੀਵਿਧੀਆਂ ਵਿੱਚ ਐਕਟਿਵ ਬੀਬੀ ਰੂਪ ਰਾਏ ਵੀ ਸ਼ਾਮਿਲ ਹੋਏ।

ਰਿੱਮੀ ਸੇਖੋਂ ਨੇ ਇਸ ਸੈਮਿਨਾਰ (ਚਰਚਾ) ਦੀ ਪਹਿਲੀ ਸਪੀਕਰ ਬੀਬੀ ਨੀਨਾ ਹਾਰਡਮਨ ਨੂੰ ਸਦਾ ਦਿੱਤਾ। ਨੀਨਾ ਜੀ ਨੇ ਅਪਣੇ ਨਿੱਜੀ ਤਜਰਬਿਆਂ ਬਾਰੇ ਦੱਸਿਆ ਕਿ ਕਿਸ ਤਰ੍ਹਾਂ ਉਹਨਾਂ ਦਾ ਵਿਆਹ ਛੋਟੀ ਉਮਰ ਵਿੱਚ ਹੋ ਗਿਆ ਸੀ ਅਤੇ ਕਿਸ ਤਰ੍ਹਾਂ ਉਹ ਘਰੇਲੂ ਹਿੰਸਾ ਦੀ ਸ਼ਿਕਾਰ ਹੋਈ। ਉਹਨਾਂ ਦੱਸਿਆ ਕਿ ਕੈਨੇਡਾ ਵਿੱਚ ਇਕੱਲੇ ਹੋਣ ਦੇ ਬਾਵਜੂਦ ਅੱਜ ਤੋਂ 22 ਸਾਲ ਪਹਿਲਾਂ ਅਪਣੀਆਂ ਦੋ ਨਿੱਕੀਆਂ ਬੱਚੀਆਂ ਨੂੰ ਲੈ ਕੇ ਉਹ ਕਿਸ ਤਰਾਂ ਉਹਨਾਂ ਦਰਦਨਾਕ ਹਲਾਤਾਂ ਵਿੱਚੋਂ ਬਾਹਰ ਨਿਕਲੀ। ਉਸ ਵਕਤ ਪੁਲਿਸ ਜਾਂ ਸਰਕਾਰ ਵਲੋਂ ਕੁਝ ਖ਼ਾਸ ਮਦਦ ਵੀ ਨਹੀਂ ਸੀ ਕੀਤੀ ਜਾਂਦੀ। ਉਸ ਤੋਂ ਇਲਾਵਾ ਸਮਾਜ ਦੇ ਤਾਨ੍ਹਿਆਂ-ਮੇਹਣਿਆਂ ਦਾ ਵੀ ਸਾਹਮਣਾ ਕਰਨਾ ਕੋਈ ਸੌਖਾ ਕੱਮ ਨਹੀਂ ਸੀ ਪਰ ਉਹਨਾਂ ਖ਼ੁੱਦ ਨੂੰ ਤੇ ਅਪਣੀਆਂ ਬੱਚੀਆਂ ਨੂੰ ਬਿਹਤਰ ਤੇ ਸ਼ਾਂਤਮਈ ਜ਼ਿੰਦਗੀ ਦੇਣ ਦੀ ਠਾਣ ਲਈ ਸੀ ਅਤੇ ਹਿੱਮਤ ਨਹੀਂ ਹਾਰੀ। ਉਹਨਾਂ ਦੀ ਕਹਾਣੀ ਜਿੱਥੇ ਸਭ ਦੀਆਂ ਅੱਖਾਂ ਵਿੱਚ ਨਮੀ ਲੈ ਆਈ ਓਥੇ ਹੀ ਇਕ ਪ੍ਰੇਰਨਾ ਦਾ ਸਰੋਤ ਵੀ ਬਣ ਗਈ। ਨੀਨਾ ਜੀ ਨੇ ਸਰੋਤਿਆਂ ਵਲੋਂ ਪੁੱਛੇ ਗਏ ਕੁਝ ਮੁਸ਼ਕਲ ਸਵਾਲਾਂ ਦੇ ਜਵਾਬ ਵੀ ਦਿੱਤੇ।

ਚਰਚਾ (ਸੈਮਿਨਾਰ) ਦੇ ਦੂਜੇ ਸਪੀਕਰ ਬੀਬੀ ਮਾਨਵੀ ਧੂਪਰ ਨੇ ਅਪਣੇ ਨਿੱਜੀ ਜੀਵਨ ਵਿੱਚ ਪੇਸ਼ ਆਇਆਂ ਦੁਖ਼ਦਾਈ ਅਤੇ ਗੰਭੀਰ ਸਮੱਸਿਆਵਾਂ ਬਾਰੇ ਚਰਚਾ ਕੀਤੀ। ਉਹਨਾਂ ਦੱਸਿਆ ਕਿ ਕਿਵੇਂ ਉਹ ਅਪਣੇ ਸਹੁਰੇ ਪਰਿਵਾਰ ਵਲੋਂ ਦਿੱਤੀ ਗਈ ਤਸ਼ੱਦਦ ਚੋਂ ਬਾਹਰ ਨਿਕਲੀ ਅਤੇ ਅਪਣੀ ਜਾਨ ਬਚਾ ਕੇ ਇੰਡੀਆ ਤੋਂ ਏਥੇ ਪਹੁੰਚੀ। ਸਹੁਰੇ ਪਰਿਵਾਰ ਨੇ ਉਹਨਾਂ ਦਾ ਪਾਸਪੋਰਟ ਹੀ ਗਾਇਬ ਕਰ ਦਿੱਤਾ ਸੀ। ਮਾਨਵੀ ਨੇ ਸਰੋਤਿਆਂ ਦੇ ਸਵਾਲਾਂ ਦੇ ਜਵਾਬ ਦਿੰਦਿਆਂ ਕੁਝ ਤਰੀਕੇ ਵੀ ਦੱਸੇ ਜਿਸ ਨਾਲ ਅਸੀਂ ਸਭ ਇਹੋ ਜੇਹੀ ਹਿੰਸਾ ਦੇ ਸ਼ਿਕਾਰ ਲੋਕਾਂ ਦੀ ਮਦਦ ਕਰ ਸਕਦੇ ਹਾਂ ਜਾਂ ਫਿਰ ਖ਼ੁਦ ਅਪਣੀ ਮਦਦ ਆਪ ਵੀ ਕਰ ਸਕਦੇ ਹਾਂ। ਉਪਰੰਤ ਬੀਬੀ ਰੂਪ ਰਾਏ ਨੇ ਸਰੋਤਿਆਂ ਨੂੰ ਕਈ ਏਜੰਸੀਆਂ ਦਾ ਪਤਾ ਤੇ ਨੰਬਰ ਦੱਸ ਕੇ ਬਹੁਤ ਹੀ ਵਧੀਆ ਜਾਣਕਾਰੀ ਸਾਂਝੀ ਕੀਤੀ ਅਤੇ ਚਰਚਾ ਨੂੰ ਇਕ ਸਾਰਥਕ ਮੋੜ ਦਿੱਤਾ।

ਖ਼ਾਸ ਮਹਿਮਾਨ ਮੰਤਰੀ ਇਰਫ਼ਾਨ ਸਾਬਿਰ ਨੇ ਸਰਕਾਰ ਵਲੋਂ ਘਰੇਲੂ ਹਿੰਸਾ ਜੇਹੀ ਸਮਾਜਿਕ ਬੁਰਾਈ ਨੂੰ ਦੂਰ ਕਰਨ ਲਈ ਚੁੱਕੇ ਕਦਮਾਂ ਦੀ ਜਾਣਕਾਰੀ ਦਿੱਤੀ ਤੇ ਦੱਸਿਆ ਕਿ ਸਰਕਾਰ ਵਲੋਂ ਕਿਸ-ਕਿਸ ਤਰ੍ਹਾਂ ਦੀ ਮਦਦ ਪ੍ਰਦਾਨ ਕੀਤੀ ਜਾਂਦੀ ਹੈ।

ਉਹਨਾਂ ਇਸ ਚਰਚਾ ਨੂੰ ਬਹੁਤ ਹੀ ਸੁਚਾਰੂ ਤੇ ਪੌਜ਼ਿਟਿਵ ਦੱਸਿਆ ਅਤੇ ਕੈਲਸਾ ਨੂੰ ਇਸ ਉੱਦਮ ਲਈ ਵਧਾਈ ਦਾ ਹੱਕਦਾਰ ਕਿਹਾ ਤੇ ਭਵਿੱਖ ਵਿੱਚ ਵੀ ਕੈਲਸਾ ਦੇ ਇਸ ਤਰ੍ਹਾਂ ਦੇ ਸੈਮਿਨਾਰ ਵਿੱਚ ਹਾਜ਼ਰੀ ਲਵਾਉਂਦੇ ਰਹਿਣ ਦਾ ਵਾਅਦਾ ਕੀਤਾ। ਇਸ ਮੌਕੇ ਤੇ ਮੰਤਰੀ ਇਰਫ਼ਾਨ ਸਾਬਿਰ ਹੋਰਾਂ ਕੈਲਸਾ ਸੰਸਥਾ ਨੂੰ ਮਿਨਿਸਟਰੀ ਵਲੋਂ ਮਾਨ-ਪੱਤਰ ਪੇਸ਼ ਕੀਤਾ ਜੋ ਕਿ ਪ੍ਰਧਾਨ ਜਸਬੀਰ ਚਾਹਲ ਨੇ ਬੜੀ ਨਿਮਰਤਾ ਨਾਲ ਸਵੀਕਾਰ ਕੀਤਾ। ਕੈਲਸਾ ਵਲੋਂ ਸਪੀਕਰ ਨੀਨਾ ਹਾਰਡਮਨ, ਮਾਨਵੀ ਧੂਪਰ ਅਤੇ ਸੁਰੀਲੀ ਗਾਇਕਾ ਸੁਰਭੀ ਸ਼ੀਲ ਨੂੰ “ਸਰਟੀਫਿਕੇਟ ਆਫ ਐਪਰਿਸਿਏਸ਼ਨ” ਦਿੱਤੇ ਗਏ ਜੋ ਕਿ ਇਰਫ਼ਾਨ ਸਾਬਿਰ ਜੀ ਹੱਥੋਂ ਦਵਾਏ ਗਏ।

ਅਖੀਰ ਵਿੱਚ ਜਸਬੀਰ ਚਾਹਲ ਨੇ ਸਰੋਤਿਆਂ, ਸਪੀਕਰਾਂ, ਵੋਲੰਟੀਅਰਸ ਲੱਕੀ ਚੀਮਾ, ਸੱਨੀ ਸੱਵੈਚ, ਵਿੱਕ ਚਾਹਲ ਅਤੇ ਖ਼ਾਸ ਮਹਿਮਾਨਾਂ ਦਾ ਧੰਨਵਾਦ ਕੀਤਾ। ਸੁਰਭੀ ਸ਼ੀਲ ਦੇ ਗਾਏ ਇਕ ਖ਼ੂਬਸੂਰਤ ਤੇ ਪ੍ਰੇਰਣਾ ਭਰੇ ਗੀਤ ਜੋ ਕਿ ਔਰਤ ਦੇ ਸਵਭਿਮਾਨ ਤੇ ਆਜ਼ਾਦ ਅਗਾਂਹ ਵਧੂ ਸੋਚ ਨੂੰ ਦਰਸ਼ਾਉਦਾ ਹੈ, ਨਾਲ ਇਸ ਇੱਕਤਰਤਾ ਨੂੰ ਸੁਰਮਈ ਅੰਜ਼ਾਮ ਦਿੱਤਾ ਗਿਆ –

“ਦੀਵਾਰੇਂ ਉਂਚੀਂ ਹੈਂ ਗਲਿਯਾਂ ਹੈਂ ਤੰਗ, ਲੰਬੀ ਡਗਰ ਹੈ ਪਰ ਹਿੱਮਤ ਹੈ ਸੰਗ
ਪਾਂਵੋਂ ਮੇਂ ਛਾਲੇ ਹੈਂ ਸਾਂਸੇਂ ਬੁਲੰਦ, ਲੜਨੇ ਚਲੀ ਹੂੰ ਆਜ਼ਾਦੀ ਕੀ ਜੰਗ
ਬੇਖ਼ੌਫ਼ ਆਜ਼ਾਦ ਹੈ ਜੀਨਾ ਮੁਝੇ, ਬੇਖ਼ੌਫ਼ ਆਜ਼ਾਦ ਹੈ ਰਹਨਾ ਮੁਝੇ”

ਇਸ ਤਰਾਂ ਇਹ ਸੈਮਿਨਾਰ ਅਪਣੇ ਮਕਸਦ ਨੂੰ ਬਾਖ਼ੂਬੀ ਨਿਭਾਉਂਣ ਵਿੱਚ ਪੂਰੀ ਤਰ੍ਹਾਂ ਸਫਲ ਰਿਹਾ। । ਹੋਰ ਜਾਣਕਾਰੀ ਲਈ ਤੁਸੀਂ ਜਸਬੀਰ (ਜੱਸ) ਚਾਹਲ ਨਾਲ 403-667-0128 ਤੇ ਸੰਪਰਕ ਕਰ ਸਕਦੇ ਹੋ ਜਾਂ ਫੇਸ ਬੁਕ ਤੇ Calgary Literary & Social Association (CALSA) ਤੇ ਜਾ ਸਕਦੇ ਹੋ।