ਚੰਡੀਗੜ -  21 ਨਵੰਬਰ, 17 : ਚੰਡੀਗੜ: 'ਸਰਵੈਂਟਸ ਆਫ਼ ਦੀ ਪੀਪਲ ਸੁਸਾਇਟੀ' ਚੰਡੀਗੜ ਵੱਲੋਂ 'ਅਖਿਲ ਭਾਰਤੀਯ ਸਾਹਿਤ ਪ੍ਰੀਸ਼ਦ' ਦੇ ਸਹਿਯੋਗ ਨਾਲ ਸ਼ੇਰ-ਏ-ਪੰਜਾਬ ਲਾਲਾ ਲਾਜਪਤ ਰਾਏ ਦੇ ਸ਼ਹੀਦੀ ਦਿਹਾੜੇ ਨੂੰ ਸਮਰਪਿਤ ਤ੍ਰੈਭਾਸ਼ੀ ਕਵੀ ਦਰਬਾਰ ਅਤੇ ਸਨਮਾਨ ਸਮਾਗਮ ਲਾਜਪਤ ਰਾਏ ਭਵਨ ਸੈਕਟਰ-15 ਚੰਡੀਗੜ ਵਿਖੇ ਆਯੋਜਿਤ ਕੀਤਾ ਗਿਆ  ਜਿਸ ਦੀ ਪ੍ਰਧਾਨਗੀ ਨਾਮਵਰ ਸ਼ਾਇਰ ਭਗਤ ਰਾਮ ਰੰਗਾੜਾ ਨੇ ਕੀਤੀ । ਰਾਜਿੰਦਰ ਟੋਕੀ ਮੁੱਖ ਮਹਿਮਾਨ ਦੇ ਤੌਰ ਤੇ, ਉਂਕਾਰ ਚੰਦ ਚੇਅਰਮੈਨ 'ਸਰਵੈਂਟਸ ਆਫ਼ ਦੀ ਪੀਪਲ ਸੁਸਾਇਟੀ' ਅਤੇ ਪੰਕਜ ਅਨੇਜਾ ਪ੍ਰਧਾਨ 'ਅਖਿਲ ਭਾਰਤੀਯ ਸਾਹਿਤ ਪ੍ਰੀਸ਼ਦ' ਪੰਜਾਬ ਚੰਡੀਗੜ ਪ੍ਰਧਾਨਗੀ ਮੰਡਲ ਵਿੱਚ ਸੁਸੋਭਿਤ ਹੋਏ ।

ਉਂਕਾਰ ਚੰਦ ਨੇ ਆਏ ਹੋਏ ਮਹਿਮਾਨਾਂ ਨੂੰ ਜੀ ਆਇਆਂ ਕਿਹਾ ਅਤੇ ਲਾਲਾ ਜੀ ਦੇ ਜੀਵਨ ਬਾਰੇ ਸੰਖੇਪ ਵਿੱਚ ਜਾਣਕਾਰੀ ਦਿੱਤੀ । ਪ੍ਰਸਿੱਧ ਸ਼ਾਇਰ ਅਸ਼ਕ ਅੰਮ੍ਰਿਤਸਰੀ ਦੀ ਕਵਿਤਾ 'ਲਾਲਾ ਲਾਜਪਤ ਰਾਏ ਦੀ ਬੜਕ ਸੁਣਕੇ ਇੰਗਲਿਸ਼ ਰਾਜ ਦੀ ਹਿੱਲ ਗਈ ਜੜ ਬੇਲੀ' ਨਾਲ ਕਵੀ ਦਰਬਾਰ ਦਾ ਆਗਾਜ਼ ਹੋਇਆ । ਚਮਨ ਲਾਲ ਚਮਨ ਦੇ ਬੋਲ ਸਨ 'ਮੁਸਕਰਾ ਕੇ ਦੇਸ਼ ਪਰ ਕੁਰਬਾਨ ਹੋਨਾ ਚਾਹੀਏ, ਸ਼ਾਹਿਦ ਹਸਨ ਸ਼ਾਹਿਦ ਦੀ ਗ਼ਜ਼ਲ ਦਾ ਸ਼ਿਅਰ ਸੀ 'ਉਲਝ ਕਰ ਰਹਿ ਗਏ ਹੈਂ ਲੋਗ ਮਕੜੀ ਕੇ ਜਾਲੋਂ ਮੇਂ' ।

ਪ੍ਰੋਗਰਾਮ ਵਿੱਚ ਸਲੀਮ ਅਨਸਾਰੀ ਜਲੰਧਰ, ਪ੍ਰੋ. ਬਲਵਿੰਦਰ ਸਿੰਘ, ਪਰਸ ਰਾਮ ਸਿੰਘ ਬੱਧਣ, ਸੁਲਤਾਨ ਮੁਹੰਮਦ ਅੰਜਮ, ਜਗਤਾਰ ਸਿੰਘ ਜੋਗ, ਸ਼ੁਸ਼ੀਲ ਹਸਰਤ ਨਰੇਲਵੀ, ਦੀਪਕ ਸ਼ਰਮਾ ਚਨਾਰਥਲ, ਦੀਪਕ ਖੇਤਰਪਾਲ, ਧਿਆਨ ਸਿੰਘ ਕਾਹਲੋਂ ਤੇ ਰਾਣੀ ਕੌਸ਼ੱਲਿਆ ਭਾਟੀਆ ਆਦਿ ਨੇ ਭਾਗ ਲਿਆ ।

ਪ੍ਰਸਿੱਧ ਕਵੀਆਂ ਸਲੀਮ ਅੰਸਾਰੀ ਜਲੰਧਰ, ਸ਼ਾਹਿਦ ਹਸਨ ਸ਼ਾਹਿਦ ਪੱਤਰਕਾਰ ਜਲੰਧਰ, ਰਾਜਿੰਦਰ ਟੋਕੀ ਖੰਨਾ, ਸੁਲਤਾਨ ਮੁਹੰਮਦ ਅੰਜਮ, ਭਗਤ ਰਾਮ ਰੰਗਾੜਾ, ਸ਼ੁਸ਼ੀਲ ਹਸਰਤ ਨਰੇਲਵੀ ਅਤੇ ਪ੍ਰੋ. ਬਲਵਿੰਦਰ ਸਿੰਘ ਹੁਰਾਂ ਨੂੰ ਉਨਾਂ ਦੀਆਂ ਸਾਹਿਤ ਪ੍ਰਤੀ ਸੇਵਾਵਾਂ ਨੂੰ ਮੁੱਖ ਰੱਖਦੇ ਹੋਏ ਸਨਮਾਨਿਤ ਕੀਤਾ ਗਿਆ । ਪ੍ਰੋਗਰਾਮ ਦੀ ਕਾਰਵਾਈ ਸ਼ੁਸ਼ੀਲ ਹਸਰਤ ਨਰੇਲਵੀ ਨੇ ਬਾਖੂਬੀ ਨਿਭਾਈ। ਕੁੱਲ ਮਿਲਾ ਕੇ ਸਮਾਗਮ ਯਾਦਗਾਰੀ ਪੈੜਾਂ ਛੱਡ ਗਿਆ ।