ਕੈਪਟਨ ਅਮਰਿੰਦਰ ਸਿੰਘ ਦੀ ਮੌਜੂਦਾ ਹਾਲਤ 'ਤੇ ਕਵਿੱਤਰੀ 'ਸਬੀਹਾ ਸਦਫ਼' ਦਾ ਇਹ ਸ਼ਿਅਰ ਬਹੁਤ ਢੁਕਦਾ ਹੈ,

ਨਾ ਕੋਈ ਉਲਝਣ ਨਾ ਦਿਲ ਪ੍ਰੇਸ਼ਾਂ,
ਨਾ ਕੋਈ ਦਰਦ-ਏ-ਨਿਹਾਂ ਥਾ ਪਹਿਲੇ।
ਹਮਾਰੇ ਹਾਥੋਂ ਮੇਂ ਤਿਤਲੀਆਂ ਥੀਂ,
ਯੇ ਦਿਲ ਸ਼ਾਦਮਾ ਥਾ ਪਹਿਲੇ।

ਪਰ ਹੁਣ ਹਾਲਾਤ ਉਹ ਨਹੀਂ ਰਹੇ, ਹੁਣ ਕੈਪਟਨ ਅਮਰਿੰਦਰ ਸਿੰਘ ਲਈ ਉਲਝਣਾਂ ਹੀ ਉਲਝਣਾਂ ਨੇ ਤੇ 'ਆਪਣਿਆਂ' ਦੇ ਛੱਡ ਜਾਣ ਤੋਂ ਪ੍ਰੇਸ਼ਾਨ ਵੀ ਨੇ ਤੇ ਨਾਖੁਸ਼ ਵੀ। ਪਰ ਖ਼ੈਰ ਇਸ ਵੇਲੇ ਉਨ੍ਹਾਂ ਦੀ ਸਭ ਤੋਂ ਪਹਿਲੀ ਕੋਸ਼ਿਸ਼ ਕਿਸਾਨ ਅੰਦੋਲਨ ਤੇ ਕੇਂਦਰ ਸਰਕਾਰ ਦਰਮਿਆਨ ਸਮਝੌਤਾ ਕਰਵਾਉਣ ਦਾ ਕ੍ਰੈਡਿਟ ਲੈਣ ਦੀ ਹੈ।

ਅਸੀਂ ਇਨ੍ਹਾਂ ਕਾਲਮਾਂ ਵਿਚ ਪਹਿਲਾਂ ਵੀ ਲਿਖਿਆ ਹੈ ਕਿ ਕੇਂਦਰ ਸਰਕਾਰ ਤੇ 'ਸੰਯੁਕਤ ਕਿਸਾਨ ਮੋਰਚੇ' ਵਿਚ ਸਮਝੌਤੇ ਦੀ ਗੱਲ ਬਹੁਤ ਨੇੜੇ ਲੱਗ ਚੁੱਕੀ ਹੈ। ਪਰ ਕੁਝ ਅਚਾਨਕ ਵਾਪਰੀਆਂ ਘਟਨਾਵਾਂ ਕਾਰਨ ਸਮਝੌਤੇ ਦਾ ਐਲਾਨ ਲਟਕਦਾ ਰਿਹਾ ਹੈ। ਸਾਡੀ ਜਾਣਕਾਰੀ ਅਨੁਸਾਰ ਪਹਿਲਾਂ ਪਹਿਲ 'ਲਖੀਮਪੁਰ ਖੀਰੀ' ਕਾਂਡ ਤੇ ਕਿਸਾਨ ਆਗੂ ਰਾਕੇਸ਼ ਟਿਕੈਤ ਵਲੋਂ ਛੇਤੀ-ਛੇਤੀ ਸਮਝੌਤਾ ਕਰਵਾਉਣ ਦਾ ਕਾਰਨ ਵੀ ਇਹ ਸੀ ਕਿ ਕਿਸਾਨਾਂ ਤੇ ਸਰਕਾਰ ਦਾ ਟਕਰਾਅ ਕੰਟਰੋਲ ਤੋਂ ਬਾਹਰ ਨਾ ਹੋ ਜਾਵੇ।

ਲਖੀਮਪੁਰ ਖੀਰੀ ਘਟਨਾ ਤੋਂ ਬਾਅਦ ਸਿੰਘੂ ਬਾਰਡਰ 'ਤੇ ਵਾਪਰਿਆ ਕਾਂਡ ਵੀ ਸਮਝੌਤੇ ਦੇ ਰਾਹ ਵਿਚ ਰੋੜਾ ਬਣਿਆ। ਸਾਡੀ ਜਾਣਕਾਰੀ ਅਨੁਸਾਰ ਕੇਂਦਰ ਸਰਕਾਰ ਇਸ ਵੇਲੇ ਕਿਸਾਨ ਅੰਦੋਲਨ ਨੂੰ ਸੰਭਾਲਦੀ-ਸੰਭਾਲਦੀ ਥੱਕ ਚੁੱਕੀ ਹੈ ਅਤੇ ਉੱਤਰ ਪ੍ਰਦੇਸ਼ ਦੀਆਂ ਚੋਣਾਂ ਕਾਰਨ ਦੀਵਾਲੀ ਤੋਂ ਪਹਿਲਾਂ ਮਾਮਲੇ ਨੂੰ ਹੱਲ ਕਰਨ ਦੀ ਗੱਲ ਲਗਭਗ ਸਿਰੇ ਚੜ੍ਹ ਚੁੱਕੀ ਹੈ। ਪਰ ਇਸ ਵਿਚ ਕੋਈ ਸ਼ੱਕ ਨਹੀਂ ਕਿ ਭਾਜਪਾ ਇਸ ਸਮਝੌਤੇ ਨੂੰ ਉੱਤਰ ਪ੍ਰਦੇਸ਼ ਅਤੇ ਪੰਜਾਬ ਵਿਚ ਚੋਣ ਫਾਇਦੇ ਲਈ ਵਰਤਣਾ ਚਾਹੁੰਦੀ ਹੈ।

ਸਾਬਕ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਕਾਂਗਰਸੀ ਮੁੱਖ ਮੰਤਰੀ ਹੁੰਦੇ ਹੋਏ ਵੀ ਕਈ ਵਾਰ ਕਾਂਗਰਸ ਦੇ ਅਧਿਕਾਰਤ ਸਟੈਂਡ ਤੋਂ ਉਲਟ ਜਾ ਕੇ ਭਾਜਪਾ ਅਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਬੋਲੀ ਬੋਲਦੇ ਰਹੇ ਹਨ। ਉਹ ਪ੍ਰਧਾਨ ਮੰਤਰੀ ਦੇ ਸੁਰੱਖਿਆ ਸਲਾਹਕਾਰ 'ਅਜੀਤ ਡੋਵਾਲ' ਦੇ ਕਾਫੀ 'ਨੇੜੇ' ਦੱਸੇ ਜਾਂਦੇ ਹਨ। ਇਸ ਲਈ ਜਦੋਂ ਹੁਣ ਉਨ੍ਹਾਂ ਦੇ ਆਪਣੇ ਲਫਜ਼ਾਂ ਵਿਚ ਕਿ ਉਨ੍ਹਾਂ ਨੂੰ ਬੇਇੱਜ਼ਤੀ ਕਰਕੇ ਕਾਂਗਰਸ ਵਿਚੋਂ ਜਾਣ ਲਈ ਮਜਬੂਰ ਕੀਤਾ ਗਿਆ ਤਾਂ 'ਭਾਜਪਾ' ਜੋ ਅਕਾਲੀ ਦਲ ਨਾਲ ਸਮਝੌਤਾ ਟੁੱਟਣ ਤੋਂ ਬਾਅਦ 'ਅਛੂਤ' ਬਣ ਕੇ ਰਹਿ ਗਈ ਸੀ, ਲਈ ਕੈਪਟਨ ਤੋਂ ਵਧੀਆ ਹੋਰ ਕੋਈ ਵੀ ਧਿਰ ਸਮਝੌਤਾ ਕਰਨ ਲਈ ਨਹੀਂ ਹੋ ਸਕਦੀ। ਇਸੇ ਲਈ ਭਾਜਪਾ ਕਿਸਾਨਾਂ ਨਾਲ ਸਮਝੌਤਾ ਕਰਵਾਉਣ ਦਾ ਸਿਹਰਾ ਕੈਪਟਨ ਸਿਰ ਬੰਨ੍ਹ ਕੇ ਆਪਣੀ ਬੇੜੀ ਪਾਰ ਲਾਉਣ ਦੀ ਕੋਸ਼ਿਸ਼ ਵਿਚ ਹੈ।

ਉਹ ਕੈਪਟਨ ਨੂੰ ਪੰਜਾਬ ਵਿਚ ਹੀ ਨਹੀਂ, ਪੱਛਮੀ ਉੱਤਰ ਪ੍ਰਦੇਸ਼ ਵਿਚ ਵੀ ਵਰਤ ਸਕਦੀ ਹੈ। ਪਰ ਸਾਡੀ ਜਾਣਕਾਰੀ ਅਨੁਸਾਰ ਕਿਸਾਨ ਨੇਤਾ ਕਿਸੇ ਕੀਮਤ 'ਤੇ ਸਮਝੌਤਾ ਕਰਵਾਉਣ ਦਾ ਸਿਹਰਾ ਕੈਪਟਨ ਅਮਰਿੰਦਰ ਸਿੰਘ ਨੂੰ ਨਹੀਂ ਲੈਣ ਦੇਣਗੇ, ਕਿਉਂਕਿ ਚਾਹੇ ਕਿਸਾਨ ਨੇਤਾ ਅਜੇ ਮੰਨਣ ਜਾਂ ਨਾ ਮੰਨਣ, ਪਰ ਸਚਾਈ ਇਹੀ ਹੈ ਕਿ ਮੋਰਚੇ ਵਿਚ ਜਿੱਤ ਤੋਂ ਬਾਅਦ ਕਿਸਾਨ ਨੇਤਾਵਾਂ ਦੀਆਂ ਆਪਣੀਆਂ ਰਾਜਨੀਤਕ ਇੱਛਾਵਾਂ ਵੀ ਘੱਟ ਨਹੀਂ। ਇਸ ਲਈ ਕੈਪਟਨ ਨੂੰ ਕਿਸੇ ਸਮਝੌਤੇ ਦਾ ਸਿਹਰਾ ਲੈਣ ਦੇਣਾ ਉਨ੍ਹਾਂ ਨੂੰ ਸੂਤ ਨਹੀਂ ਬੈਠਦਾ।

ਸਿਆਸਤ ਮੇਂ ਅਦਾਕਾਰੀ ਤੋ ਪਹਿਲੇ ਸੇ ਭੀ ਬੜ ਕਰ ਹੈ।
ਹਰ ਲੀਡਰ ਮੇਂ ਮੱਕਾਰੀ ਤੋ ਪਹਿਲੇ ਸੇ ਭੀ ਬੜ੍ਹ ਕਰ ਹੈ। (ਕ੍ਰਿਸ਼ਨ ਪ੍ਰਵੇਜ਼)

ਪੰਜਾਬ ਦੀ ਰਾਜਨੀਤੀ ਦਾ ਭੰਬਲਭੂਸਾ
ਵਕਤ ਔਰ ਹਾਲਾਤ ਕਾ ਕਯਾ  ਤਬਸਿਰਾ ਕੀਜੇ ਕਿ ਜਬ,
ਏਕ ਉਲਝਣ ਦੂਸਰੀ ਉਲਝਣ ਕੋ ਸੁਲਝਾਨੇ ਲਗੇ।

ਪੰਜਾਬ ਦੀ ਸਿਆਸਤ ਇਸ ਵੇਲੇ ਜਿੰਨੀ ਉਲਝਣ ਭਰੀ ਹੈ ਸ਼ਾਇਦ ਇਸ ਤੋਂ ਪਹਿਲਾਂ ਚੋਣਾਂ ਦਰਮਿਆਨ ਏਨੀ ਭੰਬਲਭੂਸੇ ਵਾਲੀ ਸਥਿਤੀ ਕਦੇ ਵੀ ਨਹੀਂ ਸੀ। ਹੁਣ ਜਦੋਂ ਕੈਪਟਨ ਨੇ ਨਵੀਂ ਪਾਰਟੀ ਬਣਾ ਕੇ ਭਾਜਪਾ ਨਾਲ ਸੰਭਾਵਿਤ ਸਮਝੌਤੇ ਦਾ ਐਲਾਨ ਕਰ ਦਿੱਤਾ ਹੈ, ਤਾਂ ਇਹ ਵੀ ਸਪੱਸ਼ਟ ਹੈ ਕਿ ਜੇ ਕਿਸਾਨਾਂ ਦਾ ਕੇਂਦਰ ਸਰਕਾਰ ਨਾਲ ਸਮਝੌਤਾ ਹੋ ਜਾਂਦਾ ਹੈ ਤਾਂ ਸੁਖਦੇਵ ਸਿੰਘ ਢੀਂਡਸਾ ਅਤੇ ਰਵੀਇੰਦਰ ਸਿੰਘ ਦੀ ਅਗਵਾਈ ਵਾਲੇ ਗੁੱਟ ਵੀ ਇਸ ਗੱਠਜੋੜ ਦਾ ਹਿੱਸਾ ਬਣ ਸਕਦੇ ਹਨ। ਇਸ ਤਰ੍ਹਾਂ ਪੰਜਾਬ ਵਿਚ ਸਿੱਧੇ ਰੂਪ ਵਿਚ ਹਰ ਸੀਟ 'ਤੇ ਚੌਕੋਨੇ ਮੁਕਾਬਲੇ ਤਾਂ ਹੋਣਗੇ ਹੀ, ਪਰ ਜਿੱਥੇ ਕੋਈ ਚੰਗਾ ਆਜ਼ਾਦ ਉਮੀਦਵਾਰ ਹੋਵੇਗਾ, ਉਥੇ 5 ਕੋਨੇ ਮੁਕਾਬਲੇ ਵੀ ਦਿਖਾਈ ਦੇਣਗੇ। ਉਂਜ ਹੈਰਾਨੀ ਵਾਲੀ ਗੱਲ ਹੈ ਕਿ ਕੈਪਟਨ ਦਾ ਮੁੱਖ ਨਿਸ਼ਾਨਾ ਨਵਜੋਤ ਸਿੰਘ ਸਿੱਧੂ ਅਤੇ ਕਾਂਗਰਸ ਨੂੰ ਹਰਾਉਣਾ ਹੈ, ਜਦੋਂ ਕਿ ਢੀਂਡਸਾ ਤੇ ਰਵੀਇੰਦਰ ਲਈ ਮੁੱਖ ਦੁਸ਼ਮਣ ਅਕਾਲੀ ਦਲ ਬਾਦਲ ਹੈ। ਪਰ ਇਨ੍ਹਾਂ ਵਿਰੋਧੀ ਨਿਸ਼ਾਨਿਆਂ ਵਾਲਿਆਂ ਦਾ ਗੱਠਜੋੜ ਹੋਣ 'ਤੇ ਕੀ ਹੋਵੇਗਾ, ਇਸ ਬਾਰੇ ਅਜੇ ਕੁਝ ਨਹੀਂ ਕਿਹਾ ਜਾ ਸਕਦਾ। ਉਂਜ ਕੈਪਟਨ ਵਲੋਂ ਢੀਂਡਸਾ ਅਤੇ ਬ੍ਰਹਮਪੁਰਾ ਦਾ ਨਾਂਅ ਲੈ ਕੇ ਗੱਠਜੋੜ ਕਰਨ ਦੇ ਬਿਆਨ ਨੇ ਇਕ ਵਾਰ ਫਿਰ 'ਆਮ ਆਦਮੀ ਪਾਰਟੀ' ਨੂੰ ਢੀਂਡਸਾ ਨਾਲ ਸਮਝੌਤੇ ਦੀ ਪਹਿਲ ਕਰਨ ਲਈ ਵੀ ਉਕਸਾ ਦਿੱਤਾ ਹੈ। ਪਰ ਅਸਲ ਵਿਚ ਕੀ ਹੋਵੇਗਾ ਅਜੇ ਕਿਸੇ ਨੂੰ ਨਹੀਂ ਪਤਾ।

ਬੀਰ ਦਵਿੰਦਰ ਅਤੇ ਨਿਧੜਕ ਬਰਾੜ
ਇਸ ਦਰਮਿਆਨ 'ਸੰਯੁਕਤ ਅਕਾਲੀ ਦਲ' ਦੇ ਕੈਪਟਨ ਨਾਲ ਜਾਣ ਦੇ ਚਰਚਿਆਂ ਨੇ ਇਸ ਪਾਰਟੀ ਦੇ ਦੋ ਪ੍ਰਮੁੱਖ ਨੇਤਾਵਾਂ ਬੀਰ ਦਵਿੰਦਰ ਸਿੰਘ ਅਤੇ ਨਿਧੜਕ ਸਿੰਘ ਬਰਾੜ ਦੇ ਸੰਯੁਕਤ ਅਕਾਲੀ ਦਲ ਨੂੰ ਅਲਵਿਦਾ ਕਹਿਣ ਦੀਆਂ ਸੰਭਾਵਨਾਵਾਂ ਨੂੰ ਕਾਫੀ ਹਵਾ ਦੇ ਦਿੱਤੀ ਹੈ। ਅਸਲ ਵਿਚ ਬੀਰ ਦਵਿੰਦਰ ਤਾਂ ਕੈਪਟਨ ਦੇ ਮਾਰੇ ਹੀ ਰਾਜਨੀਤਕ ਹਾਸ਼ੀਏ 'ਤੇ ਪਹੁੰਚੇ ਸਨ। ਇਸ ਲਈ ਉਹ ਕੈਪਟਨ ਨਾਲ ਜਾਣ ਲਈ ਕਦਾਚਿਤ ਤਿਆਰ ਨਹੀਂ ਹੋਣਗੇ। ਉਂਜ ਵੀ ਉਹ ਮੌਜੂਦਾ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਦੇ ਕਾਫੀ ਨੇੜੇ ਰਹੇ ਹਨ।

ਸਚਾਈ ਤਾਂ ਇਹੀ ਹੈ ਕਿ ਚੰਨੀ, ਬੀਰ ਦਵਿੰਦਰ ਦੇ ਡਿਪਟੀ ਸਪੀਕਰ ਹੋਣ ਵੇਲੇ ਹੀ ਕਾਂਗਰਸ ਵਿਚ ਉੱਭਰਨੇ ਸ਼ੁਰੂ ਹੋਏ ਸਨ। ਸਾਡੀ ਜਾਣਕਾਰੀ ਅਨੁਸਾਰ ਹੁਣ ਵੀ ਚੰਨੀ ਅਤੇ ਬੀਰ ਦਵਿੰਦਰ ਸੰਪਰਕ ਵਿਚ ਹਨ। ਫਿਰ ਬੀਰ ਦਵਿੰਦਰ ਕਾਂਗਰਸ ਪ੍ਰਧਾਨ ਸੋਨੀਆ ਗਾਂਧੀ ਦੇ ਸਿੱਧੇ ਸੰਪਰਕ ਵਿਚ ਵੀ ਰਹੇ ਹਨ। ਪਰ ਕੈਪਟਨ ਖਿਲਾਫ਼ ਜੋ ਇਲਜ਼ਾਮ ਕੈਪਟਨ ਵਿਰੋਧੀ ਹੁਣ ਲਾ ਰਹੇ ਹਨ, ਲਗਭਗ ਉਹੀ ਇਲਜ਼ਾਮ ਬੀਰ ਦਵਿੰਦਰ ਨੇ ਕਈ ਸਾਲ ਪਹਿਲਾਂ ਲਾਏ ਸਨ ਤੇ ਨਤੀਜੇ ਵਜੋਂ ਉਹ ਇਕੱਲੇ ਪੈ ਗਏ ਸਨ ਤੇ ਅਖੀਰ ਉਨ੍ਹਾਂ ਨੂੰ ਕਾਂਗਰਸ ਦੀ ਟਿਕਟ ਤੋਂ ਇਨਕਾਰ ਕਰ ਦਿੱਤਾ ਗਿਆ ਤੇ ਉਨ੍ਹਾਂ ਨੂੰ ਬਾਹਰ ਦਾ ਰਸਤਾ ਵੇਖਣਾ ਪੈ ਗਿਆ ਸੀ।

ਸਾਡੀ ਜਾਣਕਾਰੀ ਅਨੁਸਾਰ ਤਾਜ਼ਾ ਰਾਜਨੀਤਕ ਸਥਿਤੀ ਵਿਚ ਬੀਰ ਦਵਿੰਦਰ ਸਿੰਘ ਦੀ ਘਰ ਵਾਪਸੀ ਦਾ ਰਸਤਾ ਖੁੱਲ੍ਹ ਸਕਦਾ ਹੈ। ਇਸੇ ਤਰ੍ਹਾਂ ਸੰਯੁਕਤ ਅਕਾਲੀ ਦਲ ਦੇ 'ਛੁੱਟੀ' 'ਤੇ ਚੱਲ ਰਹੇ ਤੇਜ਼-ਤਰਾਰ ਨੇਤਾ ਬਾਰੇ ਮਿਲੀ ਜਾਣਕਾਰੀ ਅਨੁਸਾਰ ਉਹ ਅੱਜਕਲ੍ਹ 'ਰਾਸ਼ਟਰੀ ਸੋਇਮ ਸੇਵਕ ਸੰਘ' ਦੇ ਇਕ ਬਹੁਤ ਸੀਨੀਅਰ ਨੇਤਾ ਦੇ ਸੰਪਰਕ ਵਿਚ ਹਨ। ਉਹ ਭਾਜਪਾ ਨਾਲ ਵਾਇਆ ਸੰਯੁਕਤ ਅਕਾਲੀ ਦਲ ਜਾਂ ਕੈਪਟਨ ਅਮਰਿੰਦਰ ਸਿੰਘ ਰਾਹੀਂ ਜਾਣ ਨਾਲੋਂ ਸਿੱਧਾ ਭਾਜਪਾ ਵਿਚ ਹੀ ਸ਼ਾਮਿਲ ਹੋਣ ਨੂੰ ਤਰਜੀਹ ਦੇਣਗੇ। ਉਂਜ ਵੀ ਜੇਕਰ ਕਿਸਾਨਾਂ ਤੇ ਕੇਂਦਰ ਵਿਚ ਸਮਝੌਤਾ ਹੋ ਜਾਂਦਾ ਹੈ ਤਾਂ ਭਾਜਪਾ ਸ਼ਾਇਦ ਅਛੂਤ ਵੀ ਨਹੀਂ ਰਹੇਗੀ ਤੇ ਭਾਜਪਾ ਨੂੰ ਵੀ ਪੰਜਾਬ ਵਿਚ ਪੈਰ ਲਾਉਣ ਲਈ ਕੁਝ ਨਵੇਂ ਸਿੱਖ ਚਿਹਰਿਆਂ ਦੀ ਲੋੜ ਮਹਿਸੂਸ ਹੋਵੇਗੀ।

ਚੰਨੀ ਤੇ ਸਿੱਧੂ
ਇਸ ਸਾਦਗੀ ਪੇ ਕੌਨ ਨਾ ਮਰ ਜਾਏ ਏ ਖ਼ੁਦਾ,
ਲੜਤੇ ਹੈਂ ਔਰ ਹਾਥ ਮੇਂ ਤਲਵਾਰ ਭੀ ਨਹੀਂ।

'ਮਿਰਜ਼ਾ ਗ਼ਾਲਿਬ' ਦਾ ਇਹ ਮਸ਼ਹੂਰ ਸ਼ਿਅਰ ਇਸ ਵੇਲੇ ਅੰਦਰਖਾਤੇ ਤੇ ਬਾਹਰ ਚੱਲ ਰਹੀ 'ਸਿੱਧੂ' ਅਤੇ 'ਚੰਨੀ' ਦੀ ਲੜਾਈ 'ਤੇ ਹਰ ਤਰ੍ਹਾਂ ਢੁਕਦਾ ਹੈ। ਸਿੱਧੂ ਨੇ ਭਾਵੇਂ ਸਿੱਧੇ ਤੌਰ 'ਤੇ ਦੋਸ਼ ਨਹੀਂ ਲਾਇਆ ਕਿ ਸਾਨੂੰ ਭਰੋਸਾ ਨਹੀਂ ਕਿ ਚੰਨੀ ਚੋਣਾਂ ਤੋਂ ਪਹਿਲਾਂ-ਪਹਿਲਾਂ 18 ਨੁਕਾਤੀ, 5 ਨੁਕਾਤੀ ਜਾਂ ਹੁਣ ਵਾਲੇ 13 ਨੁਕਾਤੀ ਪ੍ਰੋਗਰਾਮਾਂ 'ਤੇ ਅਮਲ ਕਰਨਗੇ। ਪਰ ਜਿਸ ਤਰ੍ਹਾਂ ਦੇ ਹਾਲਾਤ ਦਿਖਾਈ ਦੇ ਰਹੇ ਹਨ, ਉਹ ਇਹੀ ਇਸ਼ਾਰਾ ਕਰਦੇ ਹਨ ਕਿ ਨਵੇਂ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਮੁਫ਼ਤ ਸਹੂਲਤਾਂ ਦੇ ਕੇ 'ਆਮ ਆਦਮੀ ਪਾਰਟੀ' ਅਤੇ 'ਅਕਾਲੀ ਦਲ ਬਾਦਲ' ਦੇ ਵਾਅਦਿਆਂ ਦੀ ਫੂਕ ਕੱਢਣ ਦੀ ਰਣਨੀਤੀ 'ਤੇ ਤਾਂ ਚੱਲ ਰਹੇ ਹਨ ਪਰ ਉਨ੍ਹਾਂ ਦਾ ਸਿੱਧੂ ਦੇ ਮੁੱਦਿਆਂ ਜਾਂ ਪੰਜਾਬ ਵਿਜ਼ਨ 'ਤੇ ਚੱਲਣ ਦਾ ਕੋਈ ਇਰਾਦਾ ਨਹੀਂ।

ਚਰਚਾ ਤਾਂ ਇਥੋਂ ਤੱਕ ਹੈ ਕਿ ਇਕ ਮੀਟਿੰਗ ਵਿਚ ਚੰਨੀ ਨੇ ਇਥੋਂ ਤੱਕ ਵੀ ਕਹਿ ਦਿੱਤਾ ਕਿ ਮੈਂ 'ਮੁੱਖ ਮੰਤਰੀਸ਼ਿਪ' ਛੱਡ ਦਿੰਦਾ ਹਾਂ, ਤੁਸੀਂ ਆਪ ਕਰ ਲਵੋ ਜੋ ਹੁੰਦਾ ਹੈ। ਬੇਸ਼ੱਕ ਇਸ ਦੀ ਪੁਸ਼ਟੀ ਨਹੀਂ ਹੋਈ ਪਰ ਇਹ ਪ੍ਰਭਾਵ ਜ਼ਰੂਰ ਬਣ ਰਿਹਾ ਹੈ ਕਿ ਚੰਨੀ ਇਨ੍ਹਾਂ ਮੁੱਦਿਆਂ 'ਤੇ ਕੁਝ ਨਹੀਂ ਕਰਨਗੇ, ਕਿਉਂਕਿ ਅਜੇ ਤੱਕ ਸ਼ਰਾਬ ਜਾਂ ਰੇਤਾ ਲਈ ਕਾਰਪੋਰੇਸ਼ਨ ਬਣਾਉਣ ਵੱਲ ਕੋਈ ਕਦਮ ਨਹੀਂ ਪੁੱਟਿਆ ਗਿਆ।

ਹੋਰ ਮਾਮਲਿਆਂ ਵਿਚ ਵੀ ਨਵੇਂ ਮੁੱਖ ਮੰਤਰੀ ਕੁਝ ਵਿਸ਼ੇਸ਼ ਕਰਦੇ ਨਜ਼ਰ ਨਹੀਂ ਆ ਰਹੇ। ਪਰ ਬਿਜਲੀ ਤੇ ਪਾਣੀ ਦੇ ਬਕਾਇਆਂ ਦੀ ਮੁਆਫ਼ੀ ਅਤੇ ਪੰਜਾਬ ਦਾ ਖਜ਼ਾਨਾ ਖਾਲੀ ਦੱਸਣ ਵਾਲੇ ਖਜ਼ਾਨਾ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਦੀ ਚੁੱਪੀ ਇਹ ਜ਼ਰੂਰ ਪ੍ਰਭਾਵ ਦੇ ਰਹੀ ਹੈ ਕਿ ਸਿੱਧੂ ਬੇਸ਼ੱਕ ਸੁਪਰ ਮੁੱਖ ਮੰਤਰੀ ਨਹੀਂ ਬਣ ਸਕੇ ਪਰ ਮਨਪ੍ਰੀਤ ਸਿੰਘ ਬਾਦਲ ਜ਼ਰੂਰ ਇਸ ਸਰਕਾਰ ਵਿਚ ਸਭ ਤੋਂ ਵੱਧ ਪ੍ਰਭਾਵਸ਼ਾਲੀ ਮੰਤਰੀ ਦੀ ਸਥਿਤੀ ਵਿਚ ਆ ਗਏ ਹਨ। ਇਸ ਤਰ੍ਹਾਂ ਮਹਿਸੂਸ ਹੋ ਰਿਹਾ ਹੈ ਕਿ ਕਾਂਗਰਸ ਨੂੰ ਚੋਣ ਪ੍ਰਚਾਰ ਲਈ ਸਿੱਧੂ ਤਾਂ ਚਾਹੀਦਾ ਹੈ ਪਰ ਉਸ ਦਾ ਏਜੰਡਾ ਨਹੀਂ। ਬੇਸ਼ੱਕ ਸਿੱਧੂ ਅਜੇ ਝੁਕੇ ਨਹੀਂ ਪਰ ਇਹ ਸਪੱਸ਼ਟ ਨਜ਼ਰ ਆ ਰਿਹਾ ਹੈ ਕਿ ਨਵਜੋਤ ਸਿੰਘ ਸਿੱਧੂ, 'ਚੰਨੀ-ਬਾਦਲ' ਜੋੜੀ ਦੇ ਮੁਕਾਬਲੇ ਹੌਲੀ-ਹੌਲੀ ਇਕੱਲੇ ਪੈਂਦੇ ਜਾ ਰਹੇ ਹਨ ਕਿਉਂਕਿ ਉਨ੍ਹਾਂ ਦੀ ਆਪਣੇ ਸਾਥੀਆਂ ਨੂੰ ਵੀ ਵਿਸ਼ਵਾਸ ਵਿਚ ਨਾ ਲੈਣ ਦੀ ਆਦਤ ਹੌਲੀ-ਹੌਲੀ ਉਨ੍ਹਾਂ ਨੂੰ ਉਨ੍ਹਾਂ ਤੋਂ ਦੂਰ ਕਰਦੀ ਜਾ ਰਹੀ ਹੈ।

ਫੋਨ : 92168-60000
E. mail : hslall@ymail.com