ਕਾਗਜ਼ ਪੇ ਹੂਏ ਮੇਰੇ  ਵਤਨ ਕੇ ਕਈ ਟੁਕੜੇ,
ਪੰਜਾਬ ਕੀ ਬਾਹੋਂ ਕੋ  ਕਟਾ ਦੇਖ ਰਹਾ ਹੂੰ।

ਸ਼ਾਇਰ ਸਾਬਿਰ ਦੱਤ ਨੇ ਸ਼ਾਇਦ ਇਹ ਸ਼ਿਅਰ ਹਿੰਦੁਸਤਾਨ ਪਾਕਿਸਤਾਨ ਦੀ ਵੰਡ ਬਾਰੇ ਲਿਖਿਆ ਹੋਵੇਗਾ ਪਰ ਉਸ ਤੋਂ ਬਾਅਦ ਵੀ ਪੰਜਾਬ ਦੇ ਹੋਰ ਟੁਕੜੇ ਹੋਏ ਤੇ ਅਖ਼ੀਰ ਪੰਜਾਬੀ ਜ਼ਬਾਨ ਦੇ ਆਧਾਰ 'ਤੇ ਇਕ ਛੋਟਾ ਜਿਹਾ ਇਲਾਕਾ 'ਪੰਜਾਬ' ਦੇ ਨਾਂਅ 'ਤੇ ਰਹਿ ਗਿਆ। ਕਦੇ ਪ੍ਰੋ: ਪੂਰਨ ਸਿੰਘ ਨੇ ਲਿਖਿਆ ਸੀ 'ਪੰਜਾਬ ਵਸਦਾ ਗੁਰਾਂ ਦੇ ਨਾਮ 'ਤੇ' ਪਰ ਅਫ਼ਸੋਸ ਕਿ ਅੱਜ ਏਨੇ ਹਿੱਸੇ ਗੁਆ ਕੇ ਵੀ ਬਾਕੀ ਬਚਿਆ ਪੰਜਾਬ ਗੁਰਾਂ ਦੇ ਨਾਂਅ 'ਤੇ ਨਹੀਂ ਵਸਦਾ। ਹੁਣ ਸਿੱਖ, ਹਿੰਦੂ ਤੇ ਮੁਸਲਮਾਨ ਜਾਂ ਸਿੱਖ ਤੇ ਹਿੰਦੂ ਦਾ ਹੀ ਝਗੜਾ ਨਹੀਂ ਰਿਹਾ, ਸਗੋਂ ਪੰਜਾਬ ਜਾਤ ਬਰਾਦਰੀਆਂ ਦੇ ਆਧਾਰ 'ਤੇ ਵੀ ਵੰਡਿਆ ਜਾ ਰਿਹਾ ਹੈ।

ਇਸ ਵਾਰ ਪੰਜਾਬ ਦੇ ਮੁੱਖ ਮੰਤਰੀ ਦੀ ਚੋਣ ਵੇਲੇ ਰਾਜਨੀਤੀ ਵਿਚ ਜਾਤ-ਪਾਤ ਤੇ ਧਰਮ ਦੇ ਨਾਂਅ ਦਾ ਜੋ ਤਮਾਸ਼ਾ ਹੋਇਆ, ਉਹ ਸਾਫ਼ ਦਿਖਾ ਰਿਹਾ ਹੈ ਕਿ ਹੁਣ ਪੰਜਾਬੀ ਬਿਲਕੁਲ ਹੀ ਪੰਜਾਬੀ ਨਹੀਂ ਰਹੇ, ਉਹ ਹਿੰਦੂ ਹਨ, ਸਿੱਖ ਹਨ ਬਲਕਿ ਉਸ ਤੋਂ ਵੀ ਅੱਗੇ ਜਾ ਕੇ ਉਹ ਜੱਟ ਹਨ, ਖ਼ੱਤਰੀ ਹਨ, ਰਵੀਦਾਸੀਏ ਹਨ, ਪੰਡਿਤ ਹਨ, ਰਾਮਗੜ੍ਹੀਏ ਹਨ, ਅਰੋੜੇ ਹਨ, ਬਾਲਮੀਕੀ ਹਨ, ਬਾਣੀਏ ਹਨ, ਮਜ਼੍ਹਬੀ ਸਿੱਖ ਹਨ ਅਤੇ ਹੋਰ ਪਤਾ ਨਹੀਂ ਕੀ ਕੀ ਹਨ, ਪਰ ਪੰਜਾਬੀ ਨਹੀਂ ਹਨ। ਅਸਲ ਵਿਚ ਹੁਣ ਖ਼ਾਸ ਕਰ ਰਾਜਨੀਤੀ ਵਿਚ ਕਬੀਲਾਵਾਦ, ਜਾਤ-ਪਾਤ ਸਿਰਫ ਕਿਸੇ ਇਕ ਸਮੂਹ ਨੂੰ ਨਿੱਜੀ ਲਾਭ ਲਈ ਵਰਤਣ ਦਾ ਪੈਂਤੜਾ ਬਣ ਕੇ ਰਹਿ ਗਏ ਹਨ। ਇਹੀ ਕਾਰਨ ਹੈ ਕਿ 1977 ਤੋਂ ਬਾਅਦ ਪਹਿਲੀ ਵਾਰ ਕੋਈ ਗ਼ੈਰ-ਜੱਟ ਸਿੱਖ ਪੰਜਾਬ ਦਾ ਮੁੱਖ ਮੰਤਰੀ ਬਣਿਆ ਹੈ। ਇਸ ਗ਼ੈਰ-ਜੱਟ ਦਾ 'ਦਾਅ' ਵੀ ਜੱਟ ਸਿੱਖਾਂ ਦੀ ਆਪਸੀ ਲੜਾਈ ਕਾਰਨ ਹੀ ਲੱਗਾ ਹੈ ਅਤੇ ਇਹ ਸਾਬਤ ਕਰਦਾ ਹੈ ਕਿ ਜਿਹੜੇ ਲੋਕ ਬਰਾਦਰੀਵਾਦ ਨੂੰ ਉਭਾਰਦੇ ਹਨ, ਉਹ ਆਪਣੇ ਨਿੱਜੀ ਲਾਭ ਲਈ ਹੀ ਉਭਾਰਦੇ ਹਨ। ਉਂਜ ਪੰਜਾਬੀ ਸੂਬਾ ਬਣਨ ਤੋਂ ਬਾਅਦ ਇਕ ਵਾਰ ਇਕ ਗ਼ੈਰ-ਜੱਟ ਗਿਆਨੀ ਜ਼ੈਲ ਸਿੰਘ ਵੀ ਮੁੱਖ ਮੰਤਰੀ ਬਣੇ ਸਨ।

ਚੰਨੀ ਦੇ ਮੁੱਖ ਮੰਤਰੀ ਬਣਨ ਦੀ ਕਹਾਣੀ
ਰਹਿਮਤ ਕਾ ਤੇਰੀ ਕਿਸ ਕੋ ਪਤਾ ਕਬ ਕਯਾ ਹੋਗਾ,
ਰੁਸਤਮ ਵਹੀ ਨਿਕਲਾ ਜੋ 'ਫਸਾਨੇ ਮੇਂ ਨਹੀ ਥਾ।

ਚਰਨਜੀਤ ਸਿੰਘ ਚੰਨੀ ਪੰਜਾਬ ਦੇ ਮੁੱਖ ਮੰਤਰੀ ਕਿਵੇਂ ਬਣੇ? ਪਰਦੇ ਪਿੱਛੇ ਦੀ ਕਹਾਣੀ ਬੜੀ ਰੌਚਕ ਹੈ।

ਛਣ-ਛਣ ਕੇ ਬਾਹਰ ਆਈਆਂ ਖ਼ਬਰਾਂ ਅਨੁਸਾਰ ਪਹਿਲਾਂ ਨਵਜੋਤ ਸਿੰਘ ਸਿੱਧੂ ਤੇ ਬਾਕੀ ਕੈਪਟਨ ਵਿਰੋਧੀਆਂ ਵਿਚ ਬੈਠ ਕੇ ਫ਼ੈਸਲਾ ਹੋ ਗਿਆ ਕਿ ਹਾਈਕਮਾਨ ਨੂੰ ਕਿਹਾ ਜਾਵੇ ਕਿ ਸੁਨੀਲ ਜਾਖੜ, ਸੁਖਜਿੰਦਰ ਸਿੰਘ ਰੰਧਾਵਾ ਅਤੇ ਨਵਜੋਤ ਸਿੰਘ ਸਿੱਧੂ ਵਿਚੋਂ ਕਿਸੇ ਨੂੰ ਵੀ ਮੁੱਖ ਮੰਤਰੀ ਬਣਾ ਦਿੱਤਾ ਜਾਵੇ। ਪਤਾ ਲੱਗਾ ਹੈ ਕਿ ਇਸ ਦੀ ਸੂਚਨਾ ਦੇਣ ਲਈ ਸਿੱਧੂ ਨੂੰ ਹੀ ਕਿਹਾ ਗਿਆ। ਕਾਂਗਰਸ ਹਾਈਕਮਾਨ ਦੇ ਨੁਮਾਇੰਦਿਆਂ ਵਲੋਂ ਪਹਿਲਾਂ ਸੁਨੀਲ ਜਾਖੜ ਨੂੰ ਪੰਜਾਬ ਦਾ ਮੁੱਖ ਮੰਤਰੀ ਬਣਾਉਣ ਦੀ ਸਲਾਹ ਕਰ ਲਈ ਗਈ ਦੱਸੀ ਜਾਂਦੀ ਹੈ। ਪਰ ਇਸ ਦਰਮਿਆਨ ਚਰਚਾ ਹੈ ਕਿ ਖ਼ੁਦ ਸਿੱਧੂ ਨੇ ਹੀ ਕਿਸੇ ਗ਼ੈਰ-ਜੱਟ ਸਿੱਖ ਨੂੰ ਮੁੱਖ ਮੰਤਰੀ ਬਣਾਉਣ ਦਾ ਵਿਰੋਧ ਕੀਤਾ। ਇਸ 'ਤੇ 5 ਸਿਤਾਰਾ ਹੋਟਲ ਵਿਚ ਬੈਠੇ ਕਾਂਗਰਸ ਹਾਈਕਮਾਨ ਦੇ ਨੁਮਾਇੰਦਿਆਂ ਵਲੋਂ 40-50 ਵਿਧਾਇਕਾਂ ਨੂੰ ਫੋਨ ਕਰਕੇ ਪੁੱਛੇ ਜਾਣ ਦੀ ਗੱਲ ਕਹੀ ਗਈ ਸੀ। ਪਤਾ ਲੱਗਾ ਹੈ ਕਿ ਇਨ੍ਹਾਂ ਵਿਚੋਂ ਬਹੁਤੇ ਰੰਧਾਵਾ ਦੇ ਹੱਕ ਵਿਚ ਸਨ। ਦੂਸਰੇ ਨੰਬਰ 'ਤੇ ਸੁਨੀਲ ਜਾਖੜ ਸਨ। ਇਸ 'ਤੇ ਰੰਧਾਵਾ ਦੇ ਹੱਕ ਵਿਚ ਫ਼ੈਸਲਾ ਹੋ ਗਿਆ। ਪਰ ਸਿੱਧੂ ਨੂੰ ਇਹ ਮਨਜ਼ੂਰ ਨਹੀਂ ਸੀ। ਇਸ ਲਈ ਦੱਸਿਆ ਜਾ ਰਿਹਾ ਹੈ ਕਿ ਸਿੱਧੂ ਨਾਰਾਜ਼ ਹੋ ਕੇ ਹੋਟਲ ਵਿਚੋਂ ਚਲੇ ਗਏ।

ਇਸ ਦਰਮਿਆਨ ਮਨਪ੍ਰੀਤ ਸਿੰਘ ਬਾਦਲ ਅਤੇ ਸਾਬਕਾ ਡੀ.ਜੀ.ਪੀ. ਤੇ ਸਿੱਧੂ ਦੇ ਸਲਾਹਕਾਰ ਮੁਹੰਮਦ ਮੁਸਤਫਾ ਸ਼ਾਮਿਲ ਹੋ ਗਏ। ਉਨ੍ਹਾਂ ਨੇ ਚਰਨਜੀਤ ਸਿੰਘ ਚੰਨੀ ਦੇ ਨਾਂਅ ਦੀ ਸਲਾਹ ਦਿੱਤੀ ਅਤੇ ਕਿਹਾ ਕਿ ਪੰਜਾਬ ਵਿਚ ਅਨੁਸੂਚਿਤ ਜਾਤੀਆਂ ਦੀ ਵੱਡੀ ਗਿਣਤੀ ਹੈ ਤੇ ਚੰਨੀ ਨੂੰ ਮੁੱਖ ਮੰਤਰੀ ਬਣਾਉਣਾ ਪੰਜਾਬ ਵਿਚ ਕਾਂਗਰਸ ਲਈ 'ਮਾਸਟਰ ਸਟ੍ਰੋਕ' ਹੋ ਸਕਦਾ ਹੈ ਅਤੇ ਜਾਖੜ-ਰੰਧਾਵਾ ਅਤੇ ਸਿੱਧੂ ਦੀ ਆਪਸੀ ਲੜਾਈ ਵੀ ਰੋਕੀ ਜਾ ਸਕਦੀ ਹੈ।

ਪਤਾ ਲੱਗਾ ਹੈ ਕਿ ਪੰਜਾਬ ਦੀ ਸਥਿਤੀ ਤੋਂ ਫ਼ਿਕਰਮੰਦ ਰਾਹੁਲ ਗਾਂਧੀ ਨੇ ਅੰਬਿਕਾ ਸੋਨੀ ਨੂੰ ਸਲਾਹ ਲਈ ਆਪਣੇ ਘਰ ਬੁਲਾਇਆ। ਸੋਨੀ ਨੇ ਕਿਹਾ ਕਿ ਕਿਸੇ ਸਿੱਖ ਨੂੰ ਹੀ ਪੰਜਾਬ ਦਾ ਮੁੱਖ ਮੰਤਰੀ ਬਣਾਇਆ ਜਾਵੇ। ਇਸ ਦਰਮਿਆਨ ਚੰਨੀ ਦੇ ਨਾਂਅ ਦੀ ਚਰਚਾ ਚੱਲ ਚੁੱਕੀ ਸੀ ਅਤੇ ਚੰਨੀ ਅਤੇ ਅੰਬਿਕਾ ਸੋਨੀ ਦੀ ਨੇੜਤਾ ਕਿਸੇ ਤੋਂ ਛਿਪੀ ਹੋਈ ਨਹੀਂ। ਕਿਉਂਕਿ 2015 ਵਿਚ ਜਦੋਂ ਚੰਨੀ ਪੰਜਾਬ ਵਿਧਾਨ ਸਭਾ ਵਿਚ ਵਿਰੋਧੀ ਧਿਰ ਦੇ ਨੇਤਾ ਬਣੇ ਸਨ ਤਾਂ ਉਸ ਵੇਲੇ ਵੀ ਅੰਬਿਕਾ ਸੋਨੀ ਦਾ ਮੁੱਖ ਰੋਲ ਦੱਸਿਆ ਜਾਂਦਾ ਸੀ। ਹਾਲਾਂਕਿ ਪਹਿਲਾਂ ਵਿਰੋਧੀ ਧਿਰ ਦੇ ਨੇਤਾ ਲਈ ਸਾਬਕ ਮੰਤਰੀ ਲਾਲ ਸਿੰਘ ਦੇ ਨਾਂਅ 'ਤੇ ਫ਼ੈਸਲਾ ਹੋਣ ਦੀ ਚਰਚਾ ਸਿਖ਼ਰ 'ਤੇ ਚੱਲ ਰਹੀ ਸੀ।

'ਸਰਗੋਸ਼ੀਆਂ' ਹਨ ਕਿ ਇਸ ਦਰਮਿਆਨ ਕਾਂਗਰਸ ਹਾਈਕਮਾਨ ਨੇ ਸਿੱਧੂ ਨਾਲ ਸੰਪਰਕ ਕਰਕੇ ਰੰਧਾਵਾ ਦੀ ਥਾਂ ਚੰਨੀ ਨੂੰ ਮੁੱਖ ਮੰਤਰੀ ਬਣਾਉਣ ਦੀ ਗੱਲ ਕਹੀ ਤਾਂ ਉਹ ਵੀ ਮੰਨ ਗਏ।

ਵਕਤ ਨੇ ਯੇ ਕਹਾ ਹੈ ਰੁਕ ਰੁਕ ਕਰ,
ਆਜ ਕੇ ਦੋਸਤ ਕਲ੍ਹ ਕੇ ਬੇਗਾਨੇ।

ਇਸ ਦਰਮਿਆਨ ਰੰਧਾਵਾ ਨੂੰ ਉਪ ਮੁੱਖ ਮੰਤਰੀ ਬਣਨ ਲਈ ਮਨਾ ਲਿਆ ਗਿਆ ਪਰ ਦੱਸਿਆ ਜਾ ਰਿਹਾ ਹੈ ਕਿ ਫਿਰ ਸਿੱਧੂ ਬ੍ਰਹਮ ਮਹਿੰਦਰਾ ਨੂੰ ਉਪ ਮੁੱਖ ਮੰਤਰੀ ਨਾ ਬਣਨ ਦੇਣ ਲਈ ਅੜ ਗਏ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਓ.ਪੀ. ਸੋਨੀ ਦੇ ਨਾਂਅ ਦੀ ਸਿਫ਼ਾਰਸ਼ ਵੀ ਅੰਬਿਕਾ ਸੋਨੀ ਅਤੇ ਹਰੀਸ਼ ਰਾਵਤ ਨੇ ਕੀਤੀ ਸੀ।
 
ਕੀ ਹੋਵੇਗਾ ਸਾਲ 2022 ਵਿੱਚ?
ਹੁਣ ਸਭ ਤੋਂ ਵੱਡਾ ਅਤੇ ਅਹਿਮ ਮੁੱਦਾ ਇਹ ਹੈ ਕਿ ਸਿੱਧੂ ਖ਼ੁਦ ਮੁੱਖ ਮੰਤਰੀ ਨਹੀਂ ਬਣ ਸਕੇ, ਪਰ ਉਨ੍ਹਾਂ ਨੇ 2022 ਵਿਚ ਕਾਂਗਰਸ ਵਲੋਂ ਮੁੱਖ ਮੰਤਰੀ ਦਾ ਚਿਹਰਾ ਬਣਨ ਲਈ ਚੰਨੀ ਨੂੰ ਹੀ ਪ੍ਰਵਾਨ ਕਰ ਲਿਆ ਹੈ। ਕਿਉਂਕਿ ਸਮਝਿਆ ਜਾਂਦਾ ਹੈ ਕਿ ਅਗਲੀਆਂ ਚੋਣਾਂ ਵਿਚ ਫਿਰ ਕਿਸੇ ਜੱਟ ਸਿੱਖ ਨੂੰ ਅੱਗੇ ਕੀਤਾ ਜਾਵੇਗਾ ਅਤੇ ਚੰਨੀ, ਜਾਖੜ ਵਾਂਗ, ਸਿੱਧੂ ਤੋਂ ਤਜਰਬੇ ਵਿੱਚ ਵੱਡੇ ਵੀ ਨਹੀਂ ਹਨ। ਪਰ ਸਿੱਧੂ ਇਸ ਵੇਲੇ ਇਕ ਉੱਚ ਕੋਟੀ ਦੇ ਮੁੱਖ ਮੰਤਰੀ ਵਜੋਂ ਵਿਚਰ ਰਹੇ ਜਾਪਦੇ ਹਨ। ਸ਼ਾਇਦ ਜਾਖੜ ਜਾਂ ਰੰਧਾਵਾ ਦੇ ਮੁੱਖ ਮੰਤਰੀ ਬਣਨ 'ਤੇ ਉਹ ਅਜਿਹਾ ਨਾ ਕਰ ਸਕਦੇ। ਪਰ ਸਾਡੀ ਸਮਝ ਮੁਤਾਬਿਕ ਬੇਸ਼ੱਕ ਇਸ ਵੇਲੇ ਚੰਨੀ ਦੇ ਮੁੱਖ ਮੰਤਰੀ ਹੋਣ ਦੇ ਬਾਵਜੂਦ ਸਿੱਧੂ ਚੰਨੀ ਉੱਪਰ ਹਾਵੀ ਜ਼ਰੂਰ ਦਿਸਦੇ ਹਨ, ਪਰ ਸਮਾਂ ਪੈਣ ਨਾਲ ਚੰਨੀ ਦੀ ਸਥਿਤੀ ਮਜ਼ਬੂਤ ਹੋਵੇਗੀ। ਇਥੇ ਨੋਟ ਕਰਨ ਵਾਲੀ ਗੱਲ ਇਹ ਵੀ ਕਿ ਸਿੱਧੂ ਤਾਂ ਸਿਰਫ ਚੇਅਰਮੈਨ ਬਦਲਵਾਉਣ ਵਰਗੇ ਮਾਮੂਲੀ ਕੰਮਾਂ ਵੱਲ ਧਿਆਨ ਦੇ ਰਹੇ ਹਨ, ਜਦੋਂ ਕਿ ਸਾਰੀਆਂ ਮੁੱਖ ਅਸਾਮੀਆਂ 'ਤੇ ਚੰਨੀ ਜਾਂ ਮਨਪ੍ਰੀਤ ਸਿੰਘ ਬਾਦਲ ਦੇ ਨਜ਼ਦੀਕੀ ਅਫ਼ਸਰ ਲਾਏ ਜਾ ਰਹੇ ਦਿਖਾਈ ਦੇ ਰਹੇ ਹਨ। ਅਜਿਹੀ ਸਥਿਤੀ ਵਿਚ 2022 ਦੀਆਂ ਚੋਣਾਂ ਵਿਚ ਸਿੱਧੂ ਲਈ ਚੰਨੀ ਨੂੰ ਪਿੱਛੇ ਕਰਕੇ ਕਾਂਗਰਸ ਵਲੋਂ ਅਗਲੀਆਂ ਚੋਣਾਂ ਲਈ ਮੁੱਖ ਮੰਤਰੀ ਦਾ ਚਿਹਰਾ ਬਣਨਾ ਓਨਾ ਸੌਖਾ ਨਹੀਂ ਹੋਵੇਗਾ, ਜਿੰਨਾ ਸੌਖਾ ਜਾਖੜ ਜਾਂ ਰੰਧਾਵਾ ਨੂੰ ਪਿੱਛੇ ਕਰਨਾ ਹੋਣਾ ਸੀ। ਕਿਉਂਕਿ ਇਕ ਜੱਟ ਜਾਂ ਜਾਟ ਨੂੰ ਹਟਾ ਕੇ ਦੂਸਰੇ ਜੱਟ ਦੇ ਮੁੱਖ ਮੰਤਰੀ ਦਾ ਚਿਹਰਾ ਬਣਨ ਨਾਲ ਕਾਂਗਰਸ ਦਾ ਕੋਈ ਰਾਜਨੀਤਕ ਸਮੀਕਰਨ ਖ਼ਰਾਬ ਨਹੀਂ ਸੀ ਹੋ ਸਕਣਾ। ਪਰ ਪੰਜਾਬ ਵਿਚ 34 ਫ਼ੀਸਦੀ ਅਨੁਸੂਚਿਤ ਜਾਤੀ ਵੋਟਾਂ ਹੋਣ ਕਾਰਨ ਚੰਨੀ ਨੂੰ ਪਿੱਛੇ ਕਰਨਾ ਹੁਣ ਕਾਂਗਰਸ ਲਈ ਮਹਿੰਗਾ ਪੈ ਸਕਦਾ ਹੈ। ਫਿਰ ਚੰਨੀ ਕੋਈ ਅਨਜਾਣ ਸਿਆਸਤਦਾਨ ਨਹੀਂ ਹਨ। ਜੇਕਰ ਕਿਸੇ ਜੱਟ ਸਿੱਖ ਨੂੰ ਹਟਾ ਕੇ ਦੂਸਰੇ ਜੱਟ ਸਿੱਖ ਨੂੰ ਅੱਗੇ ਕੀਤਾ ਜਾਂਦਾ ਤਾਂ ਇਸ ਦਾ ਪੰਜਾਬ ਤੋਂ ਬਾਹਰ ਕਾਂਗਰਸ ਨੂੰ ਕੋਈ ਨੁਕਸਾਨ ਨਹੀਂ ਸੀ ਹੋ ਸਕਦਾ। ਪਰ ਜਦੋਂ ਇਕ ਅਨੁਸੂਚਿਤ ਜਾਤੀ ਦੇ ਮੁੱਖ ਮੰਤਰੀ ਨੂੰ ਪਿੱਛੇ ਕੀਤਾ ਜਾਵੇਗਾ ਤਾਂ ਕਾਂਗਰਸ ਵਿਰੋਧੀ ਪਾਰਟੀਆਂ ਖ਼ਾਸ ਕਰਕੇ ਭਾਜਪਾ ਦੇਸ਼ ਭਰ ਵਿਚ ਅਨੁਸੂਚਿਤ ਜਾਤੀਆਂ ਵਿਚ ਇਸ ਨੂੰ ਕਾਂਗਰਸ ਵਿਰੁੱਧ ਵਰਤੇਗੀ। ਸੋ, ਸਾਡੀ ਦੂਰ-ਦ੍ਰਿਸ਼ਟੀ ਦੀ ਸੋਅ ਹੈ ਕਿ ਕਿ ਸਮਾਂ ਪੈਣ ਨਾਲ਼ ਇਹ ਖੇਡ ਸਿੱਧੂ ਲਈ ਮਹਿੰਗੀ ਸਾਬਤ ਹੋ ਸਕਦੀ ਹੈ। ਭਾਵ ਉਸਦੀ ਬਾਜ਼ੀ ਉਲ਼ਟ ਪੈ ਸਕਦੀ ਹੈ। 

ਪੰਜਾਬ ਯੂਨੀਵਰਸਿਟੀ ਦੀਆਂ ਨਿਯੁਕਤੀਆਂ
ਕਿਤਨੇ ਚਿਹਰੇ ਲਗੇ ਹੈਂ ਚਿਹਰੋਂ ਪਰ,
ਕਯਾ ਹਕੀਕਤ ਹੈ ਔਰ ਸਿਆਸਤ ਕਯਾ?

ਪੰਜਾਬ ਯੂਨੀਵਰਸਿਟੀ ਜੋ ਹੁਣ ਮੁੱਖ ਤੌਰ 'ਤੇ ਪੰਜਾਬ ਅਤੇ ਚੰਡੀਗੜ੍ਹ ਨਾਲ ਹੀ ਜੁੜੀ ਹੋਈ ਹੈ, ਦਾ ਪੰਜਾਬੀ ਸਰੂਪ ਵਿਗਾੜਨ ਦਾ ਖਦਸ਼ਾ ਹੋਰ ਵੀ ਵਧ ਗਿਆ ਹੈ। ਇਕ ਪਾਸੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੂੰ ਸਿੱਖਾਂ ਦਾ ਵੱਡਾ ਦੋਸਤ ਸਾਬਤ ਕਰਨ ਲਈ ਕਿਤਾਬਚੇ ਵੰਡੇ ਜਾ ਰਹੇ ਹਨ, ਦੂਜੇ ਪਾਸੇ ਭਾਜਪਾ ਦੇ ਸਾਬਕਾ ਨੇਤਾ ਤੇ ਹੁਣ ਭਾਰਤ ਤੇ ਉਪ ਰਾਸ਼ਟਰਪਤੀ ਵੈਂਕਈਆ ਨਾਇਡੂ ਵਲੋਂ ਪੰਜਾਬ ਯੂਨੀਵਰਸਿਟੀ ਦੇ ਚਾਂਸਲਰ ਵਜੋਂ ਸੈਨੇਟ ਵਿਚ ਜੋ ਨਿਯੁਕਤੀਆਂ ਕੀਤੀਆਂ ਗਈਆਂ ਹਨ, ਉਹ ਸਿੱਖ ਹਲਕਿਆਂ ਵਿਚ ਰੋਸ ਪੈਦਾ ਕਰ ਰਹੀਆਂ ਹਨ। ਚਾਂਸਲਰ ਵਲੋਂ ਨਾਮਜ਼ਦ 36 ਸੈਨੇਟ ਮੈਂਬਰਾਂ ਵਿਚ ਸਿੱਖ ਸਿਰਫ 8 ਹਨ। ਇਕ ਮੁਸਲਮਾਨ ਵੀ ਹੈ।

ਕੌਮੀ ਘੱਟ-ਗਿਣਤੀ ਕਮਿਸ਼ਨ ਦੇ ਸਾਬਕ ਚੇਅਰਮੈਨ ਤਰਲੋਚਨ ਸਿੰਘ ਨੇ ਇਸ ਦੇ ਵਿਰੋਧ ਵਿਚ ਉਪ ਰਾਸ਼ਟਰਪਤੀ ਨੂੰ ਚਿੱਠੀ ਵੀ ਲਿਖੀ ਹੈ। ਇਹ ਸੂਚੀ ਵੇਖ ਕੇ ਜਾਣਕਾਰ ਹਲਕਿਆਂ ਨੂੰ ਇੰਜ ਲਗਦਾ ਹੈ ਕਿ ਜਿਵੇਂ ਇਹ ਸੂਚੀ ਵਾਈਸ ਚਾਂਸਲਰ ਨੇ ਖ਼ੁਦ ਬਣਾਈ ਹੋਵੇ ਤੇ ਉਪ ਰਾਸ਼ਟਰਪਤੀ ਨੇ ਸਿਰਫ ਦਸਤਖ਼ਤ ਹੀ ਕੀਤੇ ਹੋਣ। ਕਿਉਂਕਿ ਇਨ੍ਹਾਂ ਵਿਚ ਬਹੁਤੇ ਜਾਂ ਤਾਂ ਭਾਜਪਾ ਨਾਲ ਸਿੱਧੇ ਰੂਪ ਨਾਲ ਸੰਬੰਧਿਤ ਦੱਸੇ ਜਾਂਦੇ ਹਨ ਜਾਂ ਵਾਈਸ ਚਾਂਸਲਰ ਦੇ ਖ਼ਾਸਮਖ਼ਾਸ ਹਨ। ਉਂਜ ਇਸ ਵੇਲੇ ਵੀ ਭਾਵੇਂ ਭਾਜਪਾ ਨੇਤਾ ਹੀ ਸਹੀ ਪਰ ਕੌਮੀ ਘੱਟ-ਗਿਣਤੀ ਕਮਿਸ਼ਨ ਦੇ ਚੇਅਰਮੈਨ ਇਕਬਾਲ ਸਿੰਘ ਲਾਲਪੁਰਾ ਖ਼ੁਦ ਵੀ ਇਕ ਸਿੱਖ ਹਨ। ਇਸ ਲਈ ਕੀ ਇਹ ਆਸ ਕੀਤੀ ਜਾ ਸਕਦੀ ਹੈ ਕਿ ਪੰਜਾਬ ਵਿਚ ਸਿੱਖਾਂ ਦੀ ਆਬਾਦੀ 60 ਫ਼ੀਸਦੀ ਹੋਣ ਦੇ ਬਾਵਜੂਦ ਉਨ੍ਹਾਂ ਨੂੰ ਪ੍ਰਤੀਨਿਧਤਾ ਕਰੀਬ 22 ਫ਼ੀਸਦੀ ਹੀ ਮਿਲਦੀ ਹੈ ਤਾਂ ਕੀ ਉਹ ਇਸ ਮਾਮਲੇ ਨੂੰ ਆਪਣੇ ਤੌਰ 'ਤੇ ਉਠਾਉਣ ਦਾ ਜੋਖ਼ਮ ਲੈਣਗੇ?
 
ਫੋਨ : 92168-60000
E. mail : hslall@ymail.com