ਮੋਦੀ ਨੇ ਆਪਣੇ 'ਮਨ ਕੀ ਬਾਤ' ਵਿੱਚ ਖੇਤੀਬਾੜੀ ਕਨੂੰਨ ਦੇ ਹੱਕ 'ਚ ਬੋਲਕੇ ਅਤੇ ਫਾਇਦੇ ਗਿਣਾ ਕੇ ਇਹ ਇਸ਼ਾਰਾ ਕਰ ਦਿੱਤਾ ਹੈ ਕੇ ਉਹ ਇਹ ਕਨੂੰਨ ਵਾਪਸ ਨਹੀਂ ਲਵੇਗਾ। ਸੱਤਾ ਦਾ ਅਹੰਕਾਰ ਆਪਣੇ ਚਰਮ 'ਤੇ ਹੈ।  ਜੇ ਇਥੋਂ ਭਾਜਪਾ ਪਿੱਛੇ ਮੁੜਦੀ ਹੈ ਤਾਂ ਓਹਦੀ ਹੈਂਕੜ ਟੁੱਟ ਜਾਣੀ ਹੈ ਅਤੇ ਮੋਦੀ ਸ਼ਾਹ ਦੇ ਦਵਾਲੇ ਬਣਿਆ ''ਅਜਿੱਤ ਸਮਰਾਟ '' ਦਾ ਭਰਮ ਚੱਕਰ ਖਤਮ ਹੋ ਜਾਣਾ ਹੈ।  ਇਸ ਕਰਕੇ ਹੀ 'ਸੰਘ' ਅਤੇ 'ਸਵਦੇਸ਼ੀ ਜਾਗਰਣ ਮੰਚ' ਦੇ ਕਹਿਣ ਦੇ ਬਾਵਜੂਦ ਵੀ ਮੋਦੀ ਅਤੇ ਸ਼ਾਹ ਨੇ ਇਹ ਕਾਨੂੰਨ ਬਣਾਇਆ ਹੈ।  

ਮੋਦੀ ਸਿਰਫ ਇੱਕ ਮੋਹਰਾ ਹੈ , ਇਸ ਕਾਨੂੰਨ ਪਿੱਛੇ 'ਅੰਬਾਨੀ ਅਡਾਨੀ' ਸਮੇਤ 'ਬਿੱਲ ਗੇਟਸ' ਅਤੇ ਹੋਰ ਵੱਡੀਆਂ ਵਿਦੇਸ਼ੀ ਤਾਕਤਾਂ ਹਨ। ਕਦਮ ਦਰ ਕਦਮ ਹਿੰਦੁਸਤਾਨ ਦੇ ਕਿਸਾਨ ਮਜਦੂਰ ਨੂੰ ਕੁਚਲਦਿਆਂ ਇਹ ਜ਼ਾਲਮ ਪਹੀਆ ਹੁਣ ਉੱਤਰ ਭਾਰਤ 'ਚ ਵਸੇ ਕਿਸਾਨਾਂ ਨੂੰ ਪੀੜਨ ਲਈ ਆਇਆ ਹੈ।  ਆਪ ਮੁਹਾਰੇ ਉੱਠੇ ਕਿਸਾਨਾਂ ਦੇ ਸੰਘਰਸ਼ ਦਾ 'ਮੋਦੀ ਸ਼ਾਹ' ਨੇ ਭੋਰਾ ਵੀ ਖਿਆਲ ਨਹੀਂ ਸੀ ਕੀਤਾ ਕੇ ਇਹ ਏਦਾਂ ਹੋਵੇਗਾ।  ਹੁਣ ਜਦ ਇਹ ਸੰਘਰਸ਼ ਦਿੱਲੀ ਦੀਆਂ ਬਰੂਹਾਂ ਤੇ ਆ ਗਿਆ ਹੈ ਤਾਂ ਇਹ ਸਾਰੀਆਂ ਸ਼ਕਤੀਆਂ ਹੁਣ ਇਸ ਨਾਲ ਨਜਿੱਠਣ ਲਈ ਕ੍ਰਿਆਸ਼ੀਲ ਹੋ ਗਈਆਂ ਹਨ। 
 
ਹਰਿਆਣਾ ਮੰਡੀ ਦੇ ਵਪਾਰੀਆਂ ਦੀਆਂ 
ਖਿੱਚੀਆਂ ਦਿੱਲੀ ਦੀਆਂ ਤਿਆਰੀਆਂ 
 
ਹਰਿਆਣੇ ਦੇ ਮੰਡੀਆਂ ਦੇ ਵਪਾਰੀ ਵੀ ਕੱਲ ਤੋਂ ਦਿੱਲੀ ਆਉਣਾ ਸ਼ੁਰੂ ਕਰਨਗੇ। ਦੂਜੇ ਪਾਸੇ ਹਰਿਆਣੇ ਦੀ 'ਜਾਟ ਲੈਂਡ' ਦੇ ਕਿਸਾਨ ਅੱਜ ਜੰਗੀ ਪੱਧਰ ਤੇ ਤਿਆਰੀ ਕਰ ਚੁੱਕੇ ਹਨ ਅਤੇ ਕੱਲ ਨੂੰ ਜਾਟ ਕਿਸਾਨ ਵੀ ਦਿੱਲੀ ਪਹੁੰਚਣਗੇ। ਜਾਟਾਂ ਦਾ ਆਉਣਾ ਦੋ ਧਾਰੀ ਤਲਵਾਰ ਵਾਂਗ ਹੋਵੇਗਾ।
 
ਜੇ ਹਰਿਆਣੇ ਦੇ ਅਤੇ ਰਾਜਸਥਾਨ, ਉੱਤਰ ਪ੍ਰਦੇਸ਼ ਦੇ ਕਿਸਾਨ ਵੀ ਦਿੱਲੀ ਨੂੰ ਘੇਰਾ ਪਾਕੇ ਬੈਠ ਗਏ ਤਾਂ ਕੇਂਦਰ ਸਰਕਾਰ ਵਾਸਤੇ ਮੁਸ਼ਕਿਲ ਹਾਲਾਤ ਹੋ ਸਕਦੇ ਹਨ  ਜਿਸ ਨਾਲ ਨਿਬੜਨ ਲਈ  ਮੋਦੀ ਦੀ ਜ਼ਾਲਿਮ ਸਰਕਾਰ ਕੁਛ ਵੀ ਕਰ ਸਕਦੀ ਹੈ।  
 
ਆਉਣ ਵਾਲੇ ਦਿਨਾਂ ਵਿਚ , ਸੰਘਰਸ਼ ਹੋਰ ਪ੍ਰਚੰਡ ਹੋਣ ਤੋਂ ਪਹਿਲਾਂ ਪਹਿਲਾਂ ਸਰਕਾਰ ਸੰਘਰਸ਼ ਨੂੰ ਤੋੜਨ ਦੀ ਕੋਸ਼ਿਸ਼ ਕਰੇਗੀ। ਇਸ ਵਿਚ ਤਾਕ਼ਤ ਦਾ ਇਸਤੇਮਾਲ ਸ਼ਾਮਿਲ ਹੈ ਕਿਓਂਕਿ ਵੱਡੀਆਂ ਕਾਰਪੋਰੇਟ ਲਾਬੀਆਂ  ਦੀ ਸਰਕਾਰ ਨੂੰ ਹਿਮਾਇਤ ਹਾਸਿਲ ਹੈ।  'ਡੀਪ ਸਟੇਟ' ਵੀ ਨਾਲ ਖੜਾ ਹੈ ਸਰਕਾਰ ਦੇ।  ਏਸ ਕਰਕੇ ਸਿਰਫ ਅਥਰੂ ਗੈਸ ਨਹੀਂ , ਅਸਲੀ ਗੋਲੀਆਂ ਵੀ ਚਲ ਸਕਦੀਆਂ ਹਨ , ਸ਼ਹੀਦੀਆਂ ਵੀ ਹੋ ਸਕਦੀਆਂ ਹਨ।  ਸਰਕਾਰਾਂ ਕੋਲ ਢੰਗ ਹੁੰਦਾ ਹੈ, ਮੋਰਚਾ ਤੋੜ ਦੋ ਪਹਿਲਾਂ ਤਾਕ਼ਤ ਲਾਕੇ, ਫੇਰ ਮਰਨ ਵਾਲਿਆਂ ਦੇ ਪਰਿਵਾਰਾਂ ਨੂੰ ਮੁਆਵਜ਼ਾ ਦੇ ਦੋ , ਸਰਕਾਰੀ ਨੌਕਰੀਆਂ ਦੇ ਦੋ ਜਾਂ ਕਿਸਾਨਾਂ ਦੀ ਇੱਕ ਅੱਧੀ ਮੰਗ ਮੰਨ ਲਵੋ , ਜਿਵੇਂ ਕੇ MSP ਨੂੰ ਕਾਨੂੰਨ ਬਣਾਉਣਾ।  
 
ਸਭ ਧੜਿਆਂ - ਜਥੇਬੰਦੀਆਂ ਦੀ ਏਕਤਾ ਲਾਜ਼ਮੀ 
ਦੂਜਾ ਤਰੀਕਾ ਹੈ , ਕੱਲ ਤੋਂ ਹਰਿਆਣੇ ਅਤੇ ਬਾਕੀਆਂ ਸੂਬਿਆਂ ਤੋਂ ਪਹੁੰਚ ਰਹੇ ਕਿਸਾਨਾਂ ਦੇ ਆਗੂਆਂ ਨੂੰ ਹੌਲੀ ਹੌਲੀ ਅੱਗੇ ਕਰਕੇ ਉਹਨਾਂ ਨੂੰ ਮੋਰਚੇ ਦੇ ਕਰਤਾ ਧਰਤਾ ਬਣਾ ਕੇ , ਉਹਨਾਂ ਨਾਲ ਸਾਂਠ ਗਾਂਠ ਕਰਕੇ ਮੋਰਚਾ ਫੇਲ ਕਰ ਦਵੋ।  ਅੱਜ ਵੀ ਸਰਕਾਰਾਂ ਨੂੰ ਤੇਜਾ ਸਿਓ ਲਾਲ ਸਿਓ ਲੱਭਣੇ ਕੋਈ ਔਖਾ ਕੰਮ ਨਹੀਂ। ਉਹ ਮੋਰਚਾ ਵੇਚ ਜਾਣ ਅਤੇ ਪੰਜਾਬੀ ਦੇਖਦੇ ਰਹਿ ਜਾਣ। ਸ਼ਾਹੀਨ ਬਾਗ ਦਾ ਮੋਰਚਾ ਖਤਮ ਕਰਨ ਲਈ ਫਰਵਰੀ ‘ਚ ਹੋਏ ਦਿੱਲੀ ਦੰਗਿਆਂ ਦੀ ਤਰਜ਼ ਤੇ ਕੋਈ ਸਾਜਿਸ਼ ਰਚੀ ਜਾ ਸਕਦੀ ਹੈ ਜਿਸ ਨਾਲ ਕਿਸਾਨ ਸੰਘਰਸ਼ ਜਲਦੀ ਖਤਮ ਹੋਵੇ।
  
ਇਸ ਲਈ ਸਰਕਾਰ ਧਰਮ/ਜਾਤ/ਵਿਚਾਰਧਾਰਾ ਦੇ ਵਖਰੇਵਿਆਂ ਨੂੰ ਵਰਤ ਸਕਦੀ ਹੈ। 
 
ਏਸ ਕਰਕੇ ਸਿੱਖ ਕਿਸਾਨਾਂ ਨੂੰ ਇੱਕ ਜੁੱਟ ਰਹਿਣਾ ਪਵੇਗਾ।  ਪੰਜਾਬ ਦੀ ਜ਼ਮੀਨ ਦੀ ਰਾਖੀ ਲਈ  ਦ੍ਰਿੜਤਾ ਨਾਲ ਮੋਰਚੇ ਤੇ , ਚਲ ਰਹੀ ਗੱਲ ਬਾਤ ਤੇ, ਆ ਰਹੇ ਦੂਜੇ ਕਿਸਾਨਾਂ ਅਤੇ ਉਹਨਾਂ ਦੇ ਆਗੂਆਂ ਤੇ ਪੂਰੀ ਨਜ਼ਰ ਰੱਖਣੀ ਪਵੇਗੀ ਅਤੇ ਪਹਿਰਾ ਪੱਕਾ ਕਰਨਾ ਪਵੇਗਾ।  ਮੋਰਚੇ ਦੀ ਕਮਾਂਡ ਪੰਜਾਬ ਦੇ ਹੱਥ ਰਹਿਣੀ ਚਾਹੀਦੀ ਹੈ। 
 
ਦੂਰ ਅੰਦੇਸ਼ੀ ਤੇ ਦ੍ਰਿੜਤਾ ਦੀ ਵੱਡੀ ਤੇ ਅਹਿਮ ਲੋੜ 
ਪੰਜਾਬ ਦੇ ਨਾਲ਼ ੨ ਦੇਸ਼ ਭਰ ਦੇ ਕਿਸਾਨਾਂ ਦੀ ਸਿੱਧੀ ਟੱਕਰ ਇਤਿਹਾਸ ‘ਚ ਤੀਜੀ ਵਾਰ ਦਿੱਲੀ ਦੀ ਜ਼ਾਲਿਮ ਸਰਕਾਰ ਨਾਲ ਲੱਗੀ ਹੈ ਅਤੇ ਏਸ ਸਮੇਂ ਦ੍ਰਿੜਤਾ ਅਤੇ ਦੂਰਅੰਦੇਸ਼ੀ ਨਾਲ ਕੰਮ ਲੈਣਾ ਪਵੇਗਾ।  ਸਰਕਾਰ ਕੋਲ਼ ਸਾਜਿਸ਼ਾਂ ਦੀ ਪਟਾਰੀ ਹੈ - ਤੇ ਮੋਦੀ ਬੜਾ ਮਦਾਰੀ ਹੈ!  ਉਸ ਪਾਸ ਸਾਮ ਦਾਮ ਦੰਡ ਭੇਦ ਹੈ , ਫੌਜੀ ਤਾਕ਼ਤ ਹੈ , ਅੰਤਰਰਾਸ਼ਟਰੀ ਅੰਨ ਲੌਬੀ ਦਾ ਸਾਥ ਹੈ, ਪੰਜਾਬੀਆਂ ਕੋਲ ਸਿਰਫ ਅਕਾਲ ਪੁਰਖ ਦਾ ਆਸਰਾ ਅਤੇ ਭਾਰਤੀ ਕਿਸਾਨਾਂ ਕੋਲ਼ ਬੱਸ ਆਪਣੀਆਂ ਬਾਹਾਂ ਦਾ ਜ਼ੋਰ ਹੈ। ਪਰ ਆਗੂਆਂ ਕੋਲ਼ ਵੀ - ਅਜੇ ਤੱਕ ਤਾਂ ਹੋਸ਼ ਹੈ - ਤੇ ਸਾਰਾ ਕੁੱਝ ਬਣਿਆ ਹੀ ਰਹੇ। ਰੱਬ ਮਿਹਰ ਹੀ ਕਰੇ - ਹਰ ਕਿਰਤੀ, ਕਿਸਾਨ, ਮਜ਼ਦੂਰ ਵਸਦਾ ਰਹੇ !!