“ਕਾਂਗਰਸੀ ਵਰਕਰਾਂ ਵਿਚ ਉਤਸ਼ਾਹ ਪਰ ਪਾਰਟੀ 'ਚ ਧੜੇਬੰਦੀ ਬਰਕਰਾਰ !”

ਹਾਲਾਂ ਕਿ ਇਹ ਖ਼ਬਰ ਬਹੁਤ ਗਰਮ ਹੈ ਕਿ ਪੰਜਾਬ ਵਜ਼ਾਰਤ ਵਿਚ ਰੱਦੋਬਦਲ ਕਿਸੇ ਵੇਲੇ ਵੀ ਸੰਭਵ ਹੈ, ਵੱਖ-ਵੱਖ ਮੀਡੀਆ ਰਿਪੋਰਟਾਂ  ਵਿਚ ਹਟਾਏ ਜਾਂ ਬਣਨ ਵਾਲੇ ਵਜ਼ੀਰਾਂ ਦੇ ਨਾਵਾਂ ਸਬੰਧੀ ਇਸ਼ਾਰਿਆਂ ਦੇ ਨਾਲ-ਨਾਲ ਨਵੇਂ ਸੰਭਾਵਿਤ ਵਜ਼ੀਰਾਂ ਦੇ ਨਾਂਅ ਤੱਕ ਛਪ ਰਹੇ ਹਨ। ਪਰ ਸਾਡੀ ਜਾਣਕਾਰੀ ਅਨੁਸਾਰ ਹਾਲ ਦੀ ਘੜੀ ਪੰਜਾਬ ਮੰਤਰੀ ਮੰਡਲ ਵਿਚ ਫੇਰਬਦਲ ਦਾ ਮਸਲਾ ਲਟਕ ਗਿਆ ਹੈ।

ਭਾਵੇਂ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਕਾਂਗਰਸ ਪ੍ਰਧਾਨ ਸੋਨੀਆ ਗਾਂਧੀ ਨਾਲ ਮੁਲਾਕਾਤ ਕਰ ਆਏ ਹਨ ਪਰ ਪਤਾ ਲੱਗਾ ਹੈ ਕਿ ਪ੍ਰਿਅੰਕਾ ਗਾਂਧੀ ਦੇ ਬਾਹਰ ਹੋਣ ਅਤੇ ਰਾਹੁਲ ਗਾਂਧੀ ਦੇ ਉਪਲਬਧ ਨਾ ਹੋਣ ਕਾਰਨ ਇਸ ਮਾਮਲੇ 'ਤੇ ਕੋਈ ਵਿਚਾਰ ਜਾਂ ਅੰਤਿਮ ਫ਼ੈਸਲਾ ਨਹੀਂ ਹੋ ਸਕਿਆ, ਜਿਸ ਕਾਰਨ ਮੰਤਰੀ ਮੰਡਲ ਵਿਚ ਰੱਦੋਬਦਲ ਵਿਚ ਦੇਰੀ ਹੋਣੀ ਸੁਭਾਵਿਕ ਹੈ। ਉਂਜ ਹਾਲਤ ਇਹ ਹੈ ਕਿ ਪੰਜਾਬ ਮੰਤਰੀ ਮੰਡਲ ਵਿਚ ਵੱਡਾ ਫੇਰਬਦਲ ਦੇਰ-ਸਵੇਰ ਜ਼ਰੂਰ ਹੋਵੇਗਾ ਕਿਉਂਕਿ ਕੈਪਟਨ, ਨਵਜੋਤ ਸਿੰਘ ਸਿੱਧੂ ਅਤੇ ਕਾਂਗਰਸ ਹਾਈ ਕਮਾਨ ਤਿੰਨੇ ਹੀ ਆਪੋ-ਆਪਣੇ ਕਾਰਨਾਂ ਕਰਕੇ ਮੰਤਰੀ ਮੰਡਲ ਵਿਚ ਆਪਣੀ ਮਰਜ਼ੀ ਦਾ ਫੇਰਬਦਲ ਚਾਹੁੰਦੇ ਹਨ।

ਕੈਪਟਨ ਕੁਝ ਨਵੇਂ ਬਣੇ ਵਿਰੋਧੀਆਂ ਨੂੰ ਹਟਾਉਣਾ ਚਾਹੁੰਦੇ ਹਨ, ਨਵਜੋਤ ਸਿੰਘ ਸਿੱਧੂ ਕੁਝ ਅਜਿਹੇ ਮੰਤਰੀ ਹਟਵਾਉਣਾ ਚਾਹੁੰਦੇ ਹਨ ਜਿਨ੍ਹਾਂ 'ਤੇ ਅੱਜਕਲ੍ਹ ਇਲਜ਼ਾਮਾਂ ਦੀਆਂ ਉਂਗਲਾਂ ਉੱਠ ਰਹੀਆਂ ਹਨ ਤੇ ਉਹ ਆਪਣੇ ਕੁਝ ਹੋਰ ਸਮਰਥਕ ਵਿਧਾਇਕਾਂ ਨੂੰ ਵੀ ਮੰਤਰੀ ਮੰਡਲ ਵਿਚ ਥਾਂ ਵੀ ਦਿਵਾਉਣਾ ਚਾਹੁੰਦੇ ਹਨ। ਜੋ ਉਸਨੂੰ ਨਵੀਂ ਮਿਲ਼ੀ ਪ੍ਰਧਾਨੀ ਦੀ ਤਰਜਮਾਨੀ ਵੀ ਅਤੇ ਆਉਂਦੀਆਂ ਚੋਣਾਂ ਵਿੱਚ ਉਸ ਵਾਸਤੇ ਰਾਹ ਵੀ ਪੱਧਰਾ ਕਰ ਸਕਣ। ਜਦ ਕਿ ਕਾਂਗਰਸ ਹਾਈ ਕਮਾਨ ਯਕੀਨੀ ਤੌਰ 'ਤੇ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਕਾਂਗਰਸ ਵਿਚ ਏਕਤਾ ਚਾਹੁੰਦੀ ਹੋਵੇਗੀ ਅਤੇ ਚੋਣਾਂ ਵਿਚ ਜਿੱਤ ਪ੍ਰਾਪਤ ਕਰਨ ਲਈ ਅਤੇ ਸਥਾਪਤੀ ਵਿਰੋਧੀ ਰੁਝਾਨ ਨੂੰ ਘਟਾਉਣ ਲਈ ਮੰਤਰੀ ਮੰਡਲ ਦੀ ਦਿੱਖ ਬਦਲਣੀ ਜ਼ਰੂਰੀ ਸਮਝਦੀ ਹੋਵੇਗੀ।

ਸਿੱਧੂ ਦੇ ਸਲਾਹਕਾਰ
ਮੇਰੀ ਬਾਤੋਂ ਕੋ ਮੈਂ ਹੀ ਸਮਝੂੰ ਬਸ,
ਕੁਛ ਨਾ ਸਮਝੇ ਖ਼ੁਦਾ ਕਰੇ ਕੋਈ।

ਨਵਜੋਤ ਸਿੰਘ ਸਿੱਧੂ ਬਿਲਕੁਲ ਵੱਖਰੀ ਤਰ੍ਹਾਂ ਦੀ ਰਾਜਨੀਤੀ ਕਰਦੇ ਹਨ, ਜਿਸ ਨੂੰ ਸਮਝਣਾ ਹੋਰਾਂ ਲਈ ਜੇ ਅਸੰਭਵ ਨਹੀਂ ਤਾਂ ਸੌਖਾ ਵੀ ਨਹੀਂ। ਅਸਲ ਵਿਚ ਇਹੀ ਗੱਲ ਸਿੱਧੂ ਦੀ ਕਮਜ਼ੋਰੀ ਵੀ ਹੈ ਤੇ ਤਾਕਤ ਵੀ। ਕਿਉਂਕਿ ਕਿਸੇ ਦੀ ਰਾਜਨੀਤੀ ਨੂੰ ਸਮਝੇ ਬਿਨਾਂ ਵਿਰੋਧੀ ਠੀਕ ਤਰ੍ਹਾਂ ਜਵਾਬ ਦੇਣ ਦੇ ਸਮਰੱਥ ਨਹੀਂ ਹੋ ਸਕਦੇ ਅਤੇ ਜੇ ਕਿਤੇ ਤੁਸੀਂ ਆਪਣੀ ਗੱਲ ਸਮਝਾ ਨਾ ਸਕੋ ਤਾਂ ਉਹ ਗੱਲ ਅਸਰ ਅੰਦਾਜ਼ ਹੀ ਨਹੀਂ ਹੁੰਦੀ।

ਖੈਰ ਸਿੱਧੂ ਵਲੋਂ ਅਚਾਨਕ 4 ਸਲਾਹਕਾਰਾਂ ਦੀ ਨਿਯੁਕਤੀ ਦੀ ਗੱਲ ਵੀ ਕਿਸੇ ਨੂੰ ਘੱਟ ਹੀ ਸਮਝ ਆ ਰਹੀ ਹੈ। ਇਸ ਨੇ ਕਾਂਗਰਸੀ ਹਲਕਿਆਂ ਵਿਚ ਹੈਰਾਨੀ ਹੀ ਨਹੀਂ ਪੈਦਾ ਕੀਤੀ ਸਗੋਂ ਇਕ ਬਹਿਸ ਵੀ ਛੇੜ ਦਿੱਤੀ ਹੈ। ਸਿੱਧੂ ਨੇ ਇਨ੍ਹਾਂ ਨਿਯੁਕਤੀਆਂ ਲਈ ਕਿਸੇ ਨਾਲ ਸਲਾਹ ਨਹੀਂ ਕੀਤੀ ਜਾਪਦੀ। ਭਰੋਸੇਯੋਗ ਜਾਣਕਾਰੀ ਅਨੁਸਾਰ ਨਿਯੁਕਤੀਆਂ ਹੋਣ ਤੋਂ ਪਹਿਲਾਂ ਇਸ ਬਾਰੇ ਪੰਜਾਬ ਕਾਂਗਰਸ ਦੇ 4 ਕਾਰਜਕਾਰੀ ਪ੍ਰਧਾਨਾਂ ਤੱਕ ਨੂੰ ਵੀ ਪਤਾ ਨਹੀਂ ਸੀ।
 
ਹਾਲਾਂਕਿ ਸਿੱਧੂ ਵਲੋਂ ਨਿਯੁਕਤ 4 ਸਲਾਹਕਾਰਾਂ ਵਿਚੋਂ ਇਕ ਸਾਬਕਾ ਡੀ.ਜੀ.ਪੀ. ਅਤੇ ਕੈਬਨਿਟ ਮੰਤਰੀ ਰਜੀਆ ਸੁਲਤਾਨਾ ਦੇ ਪਤੀ ਮੁਹੰਮਦ ਮੁਸਤਫਾ ਨੇ ਤਾਂ ਸਿੱਧੂ ਦਾ ਸਲਾਹਕਾਰ ਬਣਨ ਤੋਂ ਟਾਲਾ ਹੀ ਵੱਟ ਲਿਆ। ਪਰ ਰਾਜਨੀਤਕ ਹਲਕਿਆਂ ਵਿਚ ਇਨ੍ਹਾਂ ਚਾਰਾਂ ਹੀ ਵਿਅਕਤੀਆਂ ਦੀ ਚੋਣ ਪਿੱਛੇ ਸੰਭਾਵਿਤ ਕਾਰਨ ਚਰਚਾ ਦਾ ਵਿਸ਼ਾ ਬਣੇ ਹੋਏ ਹਨ।

ਪ੍ਰਾਪਤ ਜਾਣਕਾਰੀ ਅਨੁਸਾਰ ਦੋ ਪ੍ਰਮੁੱਖ ਪੰਜਾਬੀਅਤ ਪੱਖੀ ਪਰ ਗ਼ੈਰ-ਕਾਂਗਰਸੀ ਸਲਾਹਕਾਰ ਡਾ. ਪਿਆਰੇ ਲਾਲ ਗਰਗ ਅਤੇ ਮਾਲਵਿੰਦਰ ਸਿੰਘ ਮਾਲੀ ਨੂੰ ਮਿਲੀਆਂ ਨਿਯੁਕਤੀਆਂ ਪਿੱਛੇ ਨਿਰੋਲ ਤੌਰ 'ਤੇ ਉਨ੍ਹਾਂ ਦੀਆਂ ਲਿਖਤਾਂ ਦਾ ਹੀ ਹੱਥ ਹੈ। ਮਾਲਵਿੰਦਰ ਸਿੰਘ ਮਾਲੀ ਪਹਿਲਾਂ 'ਪੰਜਾਬ ਸਟੂਡੈਂਟਸ ਯੂਨੀਅਨ' ਦੇ ਜਨਰਲ ਸਕੱਤਰ ਰਹੇ। ਫਿਰ ਉਹ ਜਥੇਦਾਰ ਟੌਹੜਾ ਦੇ ਨਜ਼ਦੀਕੀ ਤੇ ਬਾਅਦ ਵਿਚ ਵੀ ਅਕਾਲੀ ਦਲ ਦੇ ਨੇੜੇ ਰਹੇ। 'ਮਾਲੀ' ਆਪਣੀਆਂ ਬੇਬਾਕ ਟਿੱਪਣੀਆਂ ਕਰਕੇ ਜਾਣੇ ਜਾਂਦੇ ਰਹੇ ਹਨ। ਭਰੋਸੇਯੋਗ ਸੂਤਰਾਂ ਮੁਤਾਬਿਕ ਸ੍ਰੀ ਕਰਤਾਰਪੁਰ ਸਾਹਿਬ ਲਾਂਘਾ ਬਣਨ ਦੇ ਦਿਨਾਂ ਵਿਚ ਸਿੱਧੂ ਦੇ ਹੱਕ ਵਿਚ ਉਨ੍ਹਾਂ ਵਲੋਂ ਸੋਸ਼ਲ ਮੀਡੀਆ  'ਤੇ ਲਿਖਣ ਦਰਮਿਆਨ ਹੀ ਉਹ ਸਿੱਧੂ ਦੇ ਸੰਪਰਕ ਵਿਚ ਆਏ ਤੇ ਲਗਾਤਾਰ ਸਿੱਧੂ ਵਲੋਂ ਦਿੱਤੇ 'ਪੰਜਾਬ ਵਿਯਨ’ ਦੀ ਵਕਾਲਤ ਕਰਦੇ ਰਹੇ। ਸ਼ਾਇਦ ਇਹੀ ਕਾਰਨ ਹੈ ਕਿ ਉਹ ਸਿੱਧੂ ਦੀ ਪਸੰਦ ਬਣ ਗਏ।

ਡਾ. ਪਿਆਰੇ ਲਾਲ ਗਰਗ ਵੀ ਪੰਜਾਬੀ ਦੇ ਚੰਗੇ ਲੇਖਕ ਅਤੇ ਚਿੰਤਕ ਹਨ। ਬਾਬਾ ਫਰੀਦ ਯੂਨੀਵਰਸਿਟੀ ਦੇ ਰਜਿਸਟਰਾਰ ਰਹਿਣ ਸਮੇਂ ਉਨ੍ਹਾਂ ਦਾ ਕੰਮ ਚਰਚਾ ਵਿਚ ਰਿਹਾ ਹੈ। ਉਹ ਵੀ ਲਗਾਤਾਰ ਸਿੱਧੂ ਦੇ ਹੱਕ ਵਿਚ ਲਿਖਦੇ ਬੋਲਦੇ ਰਹੇ ਹਨ। ਜਦੋਂ ਕਿ ਐਮ.ਪੀ. ਡਾ. ਅਮਰ ਸਿੰਘ ਨਾਲ ਸਿੱਧੂ ਦੀ ਨੇੜਤਾ ਪਹਿਲਾਂ ਹੀ ਸਭ ਨੂੰ ਪਤਾ ਹੈ। ਇਸ ਪਿੱਛੇ ਜੋ ਚਰਚਾ ਹੈ, ਉਸ ਅਨੁਸਾਰ ਡਾ. ਅਮਰ ਸਿੰਘ ਕਾਂਗਰਸ ਦੇ ਪ੍ਰਮੁੱਖ ਨੇਤਾ ਦਿਗਵਿਜੈ ਸਿੰਘ ਦੇ ਕਾਫੀ ਖ਼ਾਸਮ-ਖ਼ਾਸ ਹਨ, ਜੋ ਕਿ ਉਨ੍ਹਾਂ ਦਿਨਾਂ ਵਿਚ ਰਾਹੁਲ ਗਾਂਧੀ ਦੇ ਸਭ ਤੋਂ ਵੱਧ ਨੇੜੇ ਮੰਨੇ ਜਾਂਦੇ ਸਨ, ਜਿਨ੍ਹਾਂ ਦਿਨਾਂ ਵਿਚ ਸਿੱਧੂ ਕਾਂਗਰਸ ਵਿਚ ਸ਼ਾਮਿਲ ਹੋਏ।

ਭਾਵੇਂ ਸਾਬਕਾ ਡੀ.ਜੀ.ਪੀ. ਮੁਸਤਫਾ ਰਾਜਨੀਤਕ ਮਜਬੂਰੀਆਂ ਕਾਰਨ ਸਿੱਧੂ ਦਾ ਸਲਾਹਕਾਰ ਪਦ ਨਹੀਂ ਸੰਭਾਲ਼ ਰਹੇ ਪਰ ਉਨ੍ਹਾਂ ਦੀ ਨਿਯੁਕਤੀ ਜਾਂ ਚੋਣ ਪਿੱਛੇ ਸੰਗਰੂਰ ਜ਼ਿਲ੍ਹੇ ਦੀ ਅੰਦਰੂਨੀ ਸਿਆਸਤ ਦਾ ਵੱਡਾ ਹੱਥ ਦੱਸਿਆ ਜਾਂਦਾ ਹੈ। ਦੱਸਿਆ ਜਾਂਦਾ ਹੈ ਕਿ ਸਿੱਧੂ ਦੇ ਅੱਜਕਲ੍ਹ ਬਹੁਤ ਹੀ ਨਜ਼ਦੀਕੀ ਨੌਜਵਾਨ ਜੋ ਇਕ ਸਾਬਕਾ ਵਿਧਾਇਕ ਦੇ ਸਪੁੱਤਰ ਹਨ, ਇਸ ਵਾਰ ਧੂਰੀ ਤੋਂ ਵਿਧਾਨ ਸਭਾ ਦੀ ਚੋਣ ਲੜਨੀ ਚਾਹੁੰਦੇ ਹਨ। ਇਸ ਲਈ ਉਸ ਨੂੰ ਮੁਸਤਫਾ ਅਤੇ ਉਨ੍ਹਾਂ ਦੀ ਮੰਤਰੀ ਪਤਨੀ ਦੀ ਮਦਦ ਦੀ ਬਹੁਤ ਲੋੜ ਹੈ। ਮੁਹੰਮਦ ਮੁਸਤਫਾ ਦੀ ਚੋਣ ਪਿੱਛੇ ਦੂਸਰਾ ਕਾਰਨ ਉਨ੍ਹਾਂ ਦਾ ਅੱਜਕਲ੍ਹ ਕੈਪਟਨ ਵਿਰੋਧੀ ਹੋਣਾ ਵੀ ਮੰਨਿਆ ਜਾ ਰਿਹਾ ਹੈ।

ਸਿੱਧੂ-ਕੈਪਟਨ ਏਕਤਾ ਅਜੇ ਦੂਰ ਦੀ ਗੱਲ?
ਬੇਸ਼ੱਕ ਇਸ ਵਿਚ ਕੋਈ ਸ਼ੱਕ ਨਹੀਂ ਕਿ ਨਵਜੋਤ ਸਿੰਘ ਸਿੱਧੂ ਜਿਸ ਤਰ੍ਹਾਂ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਬਣੇ ਹਨ, ਉਸ ਨਾਲ ਕੈਪਟਨ ਦੇ ਵਕਾਰ ਅਤੇ ਕਾਂਗਰਸ ਵਿਚ ਉਨ੍ਹਾਂ ਦੀ ਚੜ੍ਹਤ ਨੂੰ ਸੱਟ ਵੱਜੀ ਹੈ। ਪਰ ਕੈਪਟਨ ਅਮਰਿੰਦਰ ਸਿੰਘ ਇਕ ਹੰਢੇ-ਵਰਤੇ ਸਿਆਸਤਦਾਨ ਹਨ। ਉਹ ਇਨ੍ਹਾਂ ਦਿਨਾਂ ਵਿਚ ਸਿੱਧੂ ਨਾਲ ਸਬੰਧਾਂ ਬਾਰੇ ਕਾਫੀ ਘੱਟ ਬੋਲ ਰਹੇ ਹਨ। ਹੈਰਾਨੀ ਦੀ ਗੱਲ ਤਾਂ ਇਹ ਹੈ ਕਿ ਉਨ੍ਹਾਂ ਦੇ ਮੀਡੀਆ  ਸਲਾਹਕਾਰ ਵੀ ਅੱਜਕਲ੍ਹ ਕਿਸੇ ਤਰ੍ਹਾਂ ਦੀਆਂ ਰਾਜਨੀਤਕ ਖ਼ਬਰਾਂ ਲੀਕ ਕਰਨ ਤੋਂ ਗੁਰੇਜ਼ ਕਰ ਰਹੇ ਹਨ, ਜਿਸ ਕਾਰਨ ਕੈਪਟਨ ਵਿਰੋਧੀ ਨੇਤਾਵਾਂ ਵਿਚ ਇਕ ਖ਼ਾਸ ਤਰ੍ਹਾਂ ਦੀ ਬੇਚੈਨੀ ਦੀ ਚਰਚਾ ਹੈ, ਕਿਉਂਕਿ ਉਹ ਇਹ ਨਹੀਂ ਸਮਝ ਪਾ ਰਹੇ ਕਿ ਕੈਪਟਨ ਦੀ ਜਵਾਬੀ ਰਣਨੀਤੀ ਕੀ ਹੋਵੇਗੀ?

ਇਸ ਦਰਮਿਆਨ ਕੈਪਟਨ ਦੀ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨਾਲ ਮੁਲਾਕਾਤ ਨੂੰ ਲੈ ਕੇ ਵੀ ਕਈ ਤਰ੍ਹਾਂ ਦੇ ਚਰਚੇ ਸੁਣਾਈ ਦੇ ਰਹੇ ਹਨ ਪਰ ਸਾਡੀ ਸਮਝ ਇਹ ਦੱਸ ਪਾ ਰਹੀ ਹੈ ਕਿ ਜਦੋਂ ਤੱਕ ਕੈਪਟਨ ਦੀ ਮੁੱਖ ਮੰਤਰੀ ਦੀ ਕੁਰਸੀ ਨੂੰ ਕੋਈ ਸਿੱਧਾ ਖ਼ਤਰਾ ਨਜ਼ਰ ਨਹੀਂ ਆਉਂਦਾ, ਉਹ ਕੋਈ ਵੀ ‘ਰਾਜਨੀਤਕ ਆਤਮਘਾਤ ਵਾਲਾ ਕਦਮ’ ਕਿਉਂ ਚੁੱਕਣਗੇ? ਪਰ ਹਾਂ ਇਸ ਗੱਲ ਵਿਚ ਕੋਈ ਸ਼ੱਕ ਨਹੀਂ ਕਿ ਜੇਕਰ ਕੈਪਟਨ ਨੂੰ ਇਸ ਸਥਿਤੀ ਵਿਚੋਂ ਨਿਕਲਣ ਲਈ ਕੋਈ ਸਨਮਾਨਜਨਕ ਰਸਤਾ ਨਾ ਮਿਲਿਆ ਤਾਂ ਉਹ ਇਸ ਸ਼ਿਅਰ,

ਜੋ ਡੂਬੇਗੀ ਕਸ਼ਤੀ ਤੋ ਡੂਬੇਂਗੇ ਸਾਰੇ।
ਨਾ ਤੁਮ ਹੀ ਬਚੋਗੇ ਨਾ ਸਾਥੀ ਤੁਮ੍ਹਾਰੇ। 

'ਤੇ ਅਮਲ ਵੀ ਅਵੱਸ਼ ਕਰ ਸਕਦੇ ਹਨ। ਪਰ ਸਿੱਧੂ ਦੇ ਪੰਜਾਬ ਕਾਂਗਰਸ ਪ੍ਰਧਾਨ ਬਣਨ ਉਪਰੰਤ ਨਜ਼ਰ ਆ ਰਹੀ ਸਥਿਤੀ ਅਨੁਸਾਰ ਕਾਂਗਰਸ ਪਾਰਟੀ ਵਿੱਚ ਉਤਸ਼ਾਹ ਜ਼ਰੂਰ ਵਧਿਆ ਹੈ। ਸਰਗਰਮੀ ਵੀ ਤੇਜ਼ ਹੋਈ ਹੈ ਪਰ ਪਾਰਟੀ ਵਿਚ ਧੜੇਬੰਦੀ ਖ਼ਤਮ ਹੋਣ ਦੀ ਬਜਾਏ ਹੋਰ ਤਿੱਖੀ ਹੁੰਦੀ ਹੀ ਨਜ਼ਰ ਆ ਰਹੀ ਹੈ ਅਤੇ ਜਾਪਦਾ ਹੈ ਕਿ ਇਹ ਅਜੇ ਹੋਰ ਸਮਾਂ ਚੱਲ ਸਕਦੀ ਹੈ।

ਜਥੇਬੰਦਕ ਢਾਂਚਾ ਸਤੰਬਰ ਵਿੱਚ?
ਨਵਜੋਤ ਸਿੰਘ ਸਿੱਧੂ ਦੇ ਪੰਜਾਬ ਕਾਂਗਰਸ ਪ੍ਰਧਾਨ ਬਣਨ ਉਪਰੰਤ ਪੰਜਾਬ ਕਾਂਗਰਸ ਦਾ ਜਥੇਬੰਦਕ ਢਾਂਚਾ ਜਲਦੀ ਬਣਨ ਦੀ ਆਸ ਕੀਤੀ ਜਾ ਰਹੀ ਸੀ ਪਰ ਜਾਪਦਾ ਹੈ ਕਿ ਇਹ ਢਾਂਚਾ ਸਤੰਬਰ ਤੱਕ ਹੀ ਬਣ ਸਕੇਗਾ। ਸਮਝਿਆ ਜਾਂਦਾ ਹੈ ਕਿ ਇਸ ਤੋਂ ਪਹਿਲਾਂ ਮੰਤਰੀ ਮੰਡਲ ਦੇ ਰੱਦੋਬਦਲ ਦਾ ਮਾਮਲਾ ਨਿਬੇੜਿਆ ਜਾਵੇਗਾ। ਹਾਲਾਂ ਕਿ ਇਸ ਗੱਲ ਦੀ ਸੰਭਾਵਨਾ ਤੋਂ ਇਨਕਾਰ ਨਹੀਂ ਕੀਤਾ ਜਾ ਸਕਦਾ ਕਿ ਸਿੱਧੂ ਕਿਸੇ ਵੇਲੇ ਵੀ ਪਾਰਟੀ ਦੇ ਕੁਝ ਜਨਰਲ ਸਕੱਤਰ ਅਤੇ ਮੀਤ ਪ੍ਰਧਾਨਾਂ ਦੇ ਨਾਵਾਂ ਦਾ ਐਲਾਨ ਤਾਂ ਕਰ ਸਕਦੇ ਹਨ ਪਰ ਪੂਰਾ ਢਾਂਚਾ ਸਤੰਬਰ ਦੇ ਅਖੀਰ ਤੱਕ ਹੀ ਬਣਨ ਦੇ ਆਸਾਰ ਨਜ਼ਰ ਆ ਰਹੇ ਹਨ ਜਿਸ ਵਿੱਚ ਹਾਈ ਕਮਾਂਡ ਦੀ ਸਹਿਮਤੀ ਦੀ ਝਲਕ ਦਿਸਣ ਦੀ ਸੰਭਾਵਨਾ ਵੀ ਜ਼ਰੂਰ ਨਜ਼ਰ ਆਵੇਗੀ। 
 
ਫੋਨ : 92168-60000
E.mail : hslall@ymail.com