ਤੁਮ ਇਸ ਕਦਰ ਜੋ ਨਿਡਰ ਹੋ ਕੇ ਜ਼ੁਲਮ ਕਰਤੇ ਹੋ,
ਡਰੋ, ਹਮਾਰਾ-ਤੁਮਹਾਰਾ ਕੋਈ ਖ਼ੁਦਾ ਭੀ ਹੈ।

'ਤਾਬਾਂ ਅਬਦੁਲ ਹਈ' ਦਾ ਇਹ ਸ਼ਿਅਰ ਲਖੀਮਪੁਰ ਖੀਰੀ (ਯੂ.ਪੀ.) ਦੇ ਪਿੰਡ ਤਿਕੁਨੀਆ ਵਿਚ ਵਾਪਰੀ ਹਿਰਦੇਵੇਦਕ ਘਟਨਾ ਦੇ ਸੰਬੰਧ ਵਿਚ ਲਿਖਣਾ ਜ਼ਰੂਰੀ ਜਾਪਦਾ ਹੈ। ਠੀਕ ਹੈ ਕਿ ਹਕੂਮਤ ਦੀ ਤਾਕਤ ਬਹੁਤ ਜ਼ਿਆਦਾ ਹੁੰਦੀ ਹੈ, ਫਿਰ ਪੂਰੇ ਦੇਸ਼ ਦਾ ਗ੍ਰਹਿ ਰਾਜ ਮੰਤਰੀ ਹੋਣਾ ਤਾਂ ਸਚਮੁੱਚ ਹੀ ਬਹੁਤ ਵੱਡੀ ਤਾਕਤ ਹੈ। ਹਰ ਜ਼ੁਲਮ ਕਰਨ ਵਾਲਾ ਸਦਾ ਇਹੀ ਸਮਝਦਾ ਹੈ ਕਿ ਸਮਾਂ ਤਾਂ ਮੇਰਾ ਗੁਲਾਮ ਬਣ ਗਿਆ ਹੈ ਪਰ ਸੱਚ ਇਹੀ ਹੈ ਕਿ ਸਮਾਂ ਬਦਲਦਿਆਂ ਦੇਰ ਨਹੀਂ ਲਗਦੀ, 'ਰੱਬ ਦੇ ਘਰ ਦੇਰ ਹੈ ਅੰਧੇਰ ਨਹੀਂ'।

ਹੁਣ ਤੱਕ ਆਏ ਵੀਡੀਓ ਕਲਿਪ ਇਹ ਸਾਫ਼ ਕਰਦੇ ਹਨ ਕਿ ਨਿਹੱਥੇ ਵਾਪਸ ਪਰਤ ਰਹੇ ਕਿਸਾਨਾਂ 'ਤੇ ਪਿੱਛੋਂ ਗੱਡੀਆਂ ਚੜ੍ਹਾ ਕੇ ਉਨ੍ਹਾਂ ਨੂੰ ਦਰੜ ਦਿੱਤਾ ਗਿਆ। ਇਹ ਵੀ ਸਾਫ਼ ਹੋ ਗਿਆ ਹੈ ਕਿ ਕਿਸਾਨਾਂ ਨੂੰ ਦਰੜਨ ਵਾਲੀਆਂ ਦੋ ਗੱਡੀਆਂ ਲੋਕਾਂ ਵਲੋਂ ਘੇਰ ਕੇ ਸਾੜ ਦਿੱਤੀਆਂ ਗਈਆਂ। ਪਰ ਇਹ ਦੋ ਗੱਡੀਆਂ ਹੀ ਨਹੀਂ ਸਨ, ਸਗੋਂ ਇਕ ਹੋਰ ਤੀਸਰੀ ਗੱਡੀ ਵੀ ਸੀ ਜੋ ਸਵਾਰਾਂ ਸਮੇਤ ਮੌਕਾ-ਏ-ਵਾਰਦਾਤ ਤੋਂ ਫਰਾਰ ਹੋਣ ਵਿਚ ਸਫਲ ਰਹੀ।

ਹੈਰਾਨੀ ਦੀ ਗੱਲ ਹੈ ਕਿ ਦੇਸ਼ ਦੇ ਗ੍ਰਹਿ ਰਾਜ ਮੰਤਰੀ ਦੀ ਕੁਰਸੀ 'ਤੇ ਬੈਠਾ ਵਿਅਕਤੀ ਇਸ ਦੁਰਘਟਨਾ ਤੋਂ ਕੁਝ ਦਿਨ ਪਹਿਲਾਂ ਧਮਕੀ ਭਰਿਆ ਬਿਆਨ ਦੇਣ ਦੀ ਹਿਮਾਕਤ ਹੀ ਨਹੀਂ ਕਰਦਾ ਸਗੋਂ ਸਿਰਫ ਕੁਝ ਦਿਨਾਂ ਬਾਅਦ ਹੀ ਉਸ ਦੀਆਂ ਗੱਡੀਆਂ ਜੀਂਦੇ ਜਾਗਦੇ ਬੰਦਿਆਂ ਨੂੰ ਦਰੜ ਦਿੰਦੀਆਂ ਹਨ। ਇਥੇ ਇਹ ਦੋਸ਼ ਵੀ ਲਗਦਾ ਹੈ ਕਿ ਇਸ ਘਟਨਾ ਵਿਚ ਮੰਤਰੀ ਦਾ ਆਪਣਾ ਪੁੱਤਰ ਵੀ ਸ਼ਾਮਿਲ ਸੀ। ਇਥੋਂ ਤੱਕ ਕਿ ਮੰਤਰੀ ਦੇ ਪੁੱਤਰ ਦੇ ਇਕ ਸਾਥੀ ਦਾ ਬਿਆਨ ਵੀ ਇਹ ਸਾਫ਼ ਕਰਦਾ ਹੈ ਕਿ ਇਸ ਬੇਰਹਿਸ ਤੇ ਬੇਕਿਰਕ ਕਾਰਵਾਈ ਵਿਚ ਮੰਤਰੀ ਦਾ ਬੇਟਾ 'ਅਸ਼ੀਸ਼ ਮਿਸ਼ਰਾ' ਵੀ ਸ਼ਾਮਿਲ ਸੀ। ਬੇਸ਼ੱਕ ਬਦਲੇ ਵਿਚ ਮਾਰੇ ਗਏ ਵਿਅਕਤੀ ਵੀ ਇਨਸਾਨ ਸਨ, ਕਾਨੂੰਨ ਨੂੰ ਹੱਥ ਵਿਚ ਲੈਣਾ ਠੀਕ ਨਹੀਂ ਸੀ ਪਰ ਅਜਿਹੇ ਹਾਲਾਤ ਪੈਦਾ ਕਰਨ ਲਈ ਜ਼ਿੰਮੇਵਾਰ ਕੌਣ ਹੈ?

ਕੀ ਇਹ ਅਸੰਵੇਦਨਸ਼ੀਲਤਾ ਦੀ ਹੱਦ ਨਹੀਂ ਕਿ ਇਕ ਅਜਿਹੀ ਘਟਨਾ ਜਿਸ ਵਿਚ 8 ਮਨੁੱਖੀ ਜਾਨਾਂ ਗਈਆਂ ਹਨ ਤੇ ਕਰੀਬ ਏਨੇ ਹੀ ਲੋਕ ਬੁਰੀ ਤਰ੍ਹਾਂ ਜ਼ਖ਼ਮੀ ਹੁੰਦੇ ਹਨ ਸੰਬੰਧੀ ਇਲਜ਼ਾਮ ਦੇਸ਼ ਦੇ ਗ੍ਰਹਿ ਰਾਜ ਮੰਤਰੀ ਤੇ ਉਸ ਦੇ ਬੇਟੇ 'ਤੇ ਲਗਦੇ ਹਨ ਪਰ ਭਾਰਤ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ, ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਅਤੇ ਸੰਬੰਧਿਤ ਸੂਬੇ ਦੇ ਮੁੱਖ ਮੰਤਰੀ ਯੋਗੀ ਅਦਿੱਤਿਆਨਾਥ ਬੁੱਲ੍ਹ ਸੀ ਲੈਂਦੇ ਹਨ। ਇਕ ਲਫ਼ਜ਼ ਵੀ ਨਹੀਂ ਕਹਿੰਦੇ?

ਪ੍ਰਧਾਨ ਮੰਤਰੀ ਨੂੰ ਆਪਣੇ ਮਜ਼ਬੂਤ ਅਕਸ ਵਾਂਗ ਕਾਰਵਾਈ ਕਰਦਿਆਂ ਸਭ ਤੋਂ ਪਹਿਲਾਂ ਗ੍ਰਹਿ ਰਾਜ ਮੰਤਰੀ ਅਜੇ ਮਿਸ਼ਰਾ ਤੋਂ ਅਸਤੀਫ਼ਾ ਲੈਣਾ ਚਾਹੀਦਾ ਸੀ ਜਾਂ ਉਸ ਨੂੰ ਬਰਖ਼ਾਸਤ ਕਰ ਦੇਣਾ ਚਾਹੀਦਾ ਸੀ। ਕਿਉਂਕਿ ਇਹ ਕਿਵੇਂ ਸੰਭਵ ਹੈ ਕਿ ਦੇਸ਼ ਦੇ ਗ੍ਰਹਿ ਮੰਤਰਾਲੇ ਵਿਚ ਦੂਜੇ ਨੰਬਰ 'ਤੇ ਬੈਠਾ ਵਿਅਕਤੀ ਜਾਂਚ ਨੂੰ ਪ੍ਰਭਾਵਿਤ ਨਹੀਂ ਕਰੇਗਾ?

ਮੰਤਰੀ ਦੇ ਪੁੱਤਰ 'ਤੇ ਮਾਮਲਾ ਦਰਜ ਕਰਨਾ ਪਿਆ, ਪਰ ਗ੍ਰਿਫ਼ਤਾਰੀ ਨਹੀਂ ਕੀਤੀ ਗਈ ਹਾਲਾਂਕਿ ਉਹ 'ਭਗੌੜਾ' ਨਹੀਂ ਸ਼ਰ੍ਹੇਆਮ ਫਿਰ ਰਿਹਾ ਹੈ। ਉਂਜ ਏਨੀ ਸੰਵੇਦਨਹੀਣਤਾ ਦੀ ਲੋਕ ਰਾਜ ਵਿਚ ਹੁੰਦੀ ਨਹੀਂ ਕੀਤੀ ਜਾ ਸਕਦੀ, ਜਿੰਨੀ ਸਮੇਂ ਦੇ ਹੁਕਮਰਾਨ ਦਿਖਾ ਰਹੇ ਹਨ।

ਕਿਤਨੀ ਬੇਹਿਸ ਬਸਤੀ ਹੈ ਯੇ,
ਇੰਸਾਂ ਭੀ ਹੈ ਜੈਸੇ ਪੱਥਰ।
ਹਾਂ ਇਹ ਤਸੱਲੀ ਦੀ ਗੱਲ ਹੈ ਕਿ ਭਾਰਤ ਦੀ 'ਸੁਪਰੀਮ ਕੋਰਟ' ਨੇ ਇਸ ਮਾਮਲੇ ਦਾ ਖ਼ੁਦ ਨੋਟਿਸ ਲੈ ਕੇ ਇਸ ਦੀ ਸੁਣਵਾਈ ਸ਼ੁਰੂ ਕਰ ਦਿੱਤੀ ਹੈ।

ਸਿੱਧੂ ਬਨਾਮ ਚੰਨੀ
ਖ਼ੁਦ ਅਪਨੇ ਹਾਥ ਸੇ ਲੇਨਾ ਥਾ ਇੰਤਕਾਮ ਮੁਝੇ,
ਮੈਂ ਅਪਨੇ ਹਾਥ ਕੇ ਪੱਥਰ ਸੇ ਸੰਗਸਾਰ ਹੂਆ।

ਪੰਜਾਬ ਕਾਂਗਰਸ ਦੀ ਰਾਜਨੀਤੀ ਵਿਚ ਪਿਛਲੇ ਦਿਨਾਂ ਵਿਚ ਜੋ ਕੁਝ ਵਾਪਰਿਆ ਤੇ ਵਾਪਰ ਰਿਹਾ ਹੈ, ਉਸ ਤੋਂ ਸਾਫ਼ ਦਿਖਾਈ ਦੇ ਰਿਹਾ ਹੈ ਕਿ ਪੰਜਾਬ ਦੇ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਜਿਸ ਤੇਜ਼ੀ, ਮੁਸਤੈਦੀ, ਚੌਕੰਨੇਪਨ ਅਤੇ ਰਾਜਨੀਤਕ ਹੌਸਲੇ ਨਾਲ ਕੰਮ ਕਰ ਰਹੇ ਹਨ, ਉਸ ਨਾਲ ਉਹ ਤੇਜ਼-ਤਰਾਰ 'ਸਮਝੇ' ਜਾਂਦੇ ਪੰਜਾਬ ਕਾਂਗਰਸ ਦੇ 'ਅਸਤੀਫ਼ਾ' ਦੇ ਚੁੱਕੇ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ 'ਤੇ ਕਾਫੀ ਭਾਰੇ ਪੈ ਰਹੇ ਹਨ।

ਇਹ ਪਹਿਲੀ ਵਾਰ ਹੈ ਕਿ 'ਲਖੀਮਪੁਰ ਖੀਰੀ' ਮਾਮਲੇ ਵਿਚ ਕਾਂਗਰਸੀ ਨੇਤਾ ਪ੍ਰਿਅੰਕਾ ਗਾਂਧੀ ਤੇ ਰਾਹੁਲ ਗਾਂਧੀ ਰਾਜਨੀਤਕ ਤੌਰ 'ਤੇ ਇਕ ਮਜ਼ਬੂਤ ਵਿਰੋਧੀ ਨੇਤਾ ਵਜੋਂ ਉੱਭਰ ਕੇ ਸਾਹਮਣੇ ਆਏ ਹਨ ਅਤੇ ਇਸ ਸਫਲਤਾ ਵਿਚ ਪੰਜਾਬ ਦੇ ਮੁੱਖ ਮੰਤਰੀ ਚੰਨੀ ਵੀ ਆਪਣੀ ਛਾਪ ਛੱਡਣ ਵਿਚ ਸਫਲ ਰਹੇ ਹਨ। ਨਿਸਚਿਤ ਤੌਰ 'ਤੇ ਇਸ ਤਰ੍ਹਾਂ ਉਨ੍ਹਾਂ ਦੀ ਨੇੜਤਾ ਰਾਹੁਲ ਗਾਂਧੀ ਨਾਲ ਕੁਝ ਵਧੀ ਹੀ ਹੋਵੇਗੀ।

ਭਾਵੇਂ ਅਜੇ ਨਵੇਂ ਮੁੱਖ ਮੰਤਰੀ ਨੇ 18 ਨੁਕਾਤੀ ਪ੍ਰੋਗਰਾਮ ਲਾਗੂ ਕਰਨ ਵੱਲ ਕੋਈ ਮਾਅਰਕਾਖੇਜ਼ ਕਦਮ ਨਹੀਂ ਪੁੱਟਿਆ ਪਰ ਇਹ ਜ਼ਰੂਰ ਸਪੱਸ਼ਟ ਹੋ ਗਿਆ ਹੈ ਕਿ ਉਹ ਕਾਂਗਰਸ ਪ੍ਰਧਾਨ ਸਿੱਧੂ ਨੂੰ 'ਸੁਪਰ ਮੁੱਖ ਮੰਤਰੀ' ਵਜੋਂ ਹਾਵੀ ਨਹੀਂ ਹੋਣ ਦੇਣਗੇ।

ਇਸੇ ਦੌਰਾਨ ਨਵਜੋਤ ਸਿੰਘ ਸਿੱਧੂ ਇਕ ਵੱਡਾ ਕਾਫ਼ਲਾ ਲੈ ਕੇ ਲਖੀਮਪੁਰ ਖੀਰੀ ਵੱਲ ਰਵਾਨਾ ਹੋਏ ਸਨ ਪਰ ਉੱਤਰ ਪ੍ਰਦੇਸ਼ ਦੀ ਸਹਾਰਨਪੁਰ ਸਰਹੱਦ ਨੇੜੇ ਉੱਤਰ ਪ੍ਰਦੇਸ਼ ਪੁਲਿਸ ਨੇ ਨਵਜੋਤ ਸਿੰਘ ਸਿੱਧੂ, ਕੁਲਵੰਤ ਸਿੰਘ ਨਾਗਰਾ, ਪ੍ਰਗਟ ਸਿੰਘ, ਵਿਜੈਇੰਦਰ ਸਿੰਗਲਾ, ਰਾਜਾ ਵੜਿੰਗ, ਹਰਦੇਵ ਸਿੰਘ ਲਾਡੀ, ਗੁਰਕੀਰਤ ਸਿੰਘ ਕੋਟਲੀ, ਫਤਹਿਜੰਗ ਸਿੰਘ ਬਾਜਵਾ ਤੇ ਮਦਨ ਲਾਲ ਜਲਾਲਪੁਰ ਆਦਿ ਕਾਂਗਰਸੀ ਆਗੂਆਂ ਤੇ ਮੰਤਰੀਆਂ ਨੂੰ ਹਿਰਾਸਤ ਵਿਚ ਲੈ ਲਿਆ ਗਿਆ ਹੈ।

ਪਰ ਇਸ ਤੋਂ ਇਕ ਗੱਲ ਹੋਰ ਵੀ ਸਾਫ਼ ਹੁੰਦੀ ਹੈ ਕਿ ਹੁਣ ਸਿੱਧੂ ਪ੍ਰਧਾਨਗੀ ਛੱਡਣ ਦੇ ਰੌਂਅ ਵਿਚ ਨਹੀਂ ਹਨ। ਰਹੀ ਗੱਲ ਅਸਤੀਫ਼ੇ ਦੀ, ਤਾਂ ਪੰਜਾਬ ਕਾਂਗਰਸ ਦੇ ਪਹਿਲੇ ਪ੍ਰਧਾਨ ਸੁਨੀਲ ਜਾਖੜ ਦਾ ਅਸਤੀਫ਼ਾ ਵੀ ਲੰਮੇ ਸਮੇਂ ਤੱਕ ਬਿਨਾਂ ਪ੍ਰਵਾਨ ਜਾਂ ਅਪ੍ਰਵਾਨ ਹੋਏ ਹੀ ਲਟਕਿਆ ਰਿਹਾ ਸੀ। ਪਰ ਇਕ ਫ਼ਰਕ ਜ਼ਰੂਰ ਹੈ ਕਿ ਜਾਖੜ ਨੂੰ ਕਾਂਗਰਸ ਪ੍ਰਧਾਨ ਨੇ ਦੋ ਵਾਰ ਕੰਮ ਕਰਦੇ ਰਹਿਣ ਲਈ ਕਿਹਾ ਸੀ ਜਦੋਂ ਕਿ ਚਰਚਾ ਹੈ ਕਿ ਰਾਹੁਲ ਗਾਂਧੀ ਨੇ ਇਕ ਵਾਰ ਤਾਂ ਸਿੱਧੂ ਦਾ ਅਸਤੀਫ਼ਾ ਮਨਜ਼ੂਰ ਕਰਨ ਲਈ ਵੀ ਕਹਿ ਦਿੱਤਾ ਸੀ ਪਰ ਹਾਈਕਮਾਨ ਵਿਚ ਸਿੱਧੂ ਦੇ ਬਾਕੀ ਸਮਰਥਕਾਂ ਅਤੇ ਕਾਂਗਰਸ ਦਾ ਭਲਾ ਚਾਹੁਣ ਵਾਲਿਆਂ ਨੇ ਸਿੱਧੂ ਨੂੰ ਸਮਝਾਇਆ ਕਿ ਚੋਣਾਂ ਸਿਰ 'ਤੇ ਹਨ ਤੇ ਇਹ ਵੇਲਾ ਜ਼ਿੱਦ ਕਰਨ ਦਾ ਨਹੀਂ।

ਸਾਫ਼ ਸਪੱਸ਼ਟ ਹੈ ਕਿ ਚੰਨੀ ਨੇ ਆਪਣੀਆਂ ਰਾਜਨੀਤਕ ਗੋਟੀਆਂ ਸਿੱਧੂ ਨਾਲੋਂ ਜ਼ਿਆਦਾ ਸਿਆਣਪ ਨਾਲ ਖੇਡੀਆਂ ਹਨ। ਚੰਨੀ ਨੇ ਆਪਣੀ ਬਰਤਰੀ ਸਾਬਤ ਕਰਨ ਲਈ ਜਿਥੇ ਇਹ ਬਿਆਨ ਦੇਣ ਦੀ ਹਿੰਮਤ ਕੀਤੀ ਕਿ ਤੁਸੀਂ ਪਾਰਟੀ ਚਲਾਓ, ਸਰਕਾਰ ਸਾਨੂੰ ਚਲਾਉਣ ਦਿਓ, ਉਥੇ ਉਨ੍ਹਾਂ ਨੇ ਸਿੱਧੂ ਦੀ ਹਮਾਇਤ ਵਿਚ ਅਸਤੀਫ਼ਾ ਦੇਣ ਵਾਲੀ ਸਿੱਧੂ ਦੇ ਸਲਾਹਕਾਰ ਮੁਹੰਮਦ ਮੁਸਤਫ਼ਾ ਦੀ ਪਤਨੀ ਕੈਬਨਿਟ ਮੰਤਰੀ ਰਜ਼ੀਆ ਸੁਲਤਾਨਾ ਨੂੰ ਮੰਤਰੀਆਂ ਨੂੰ ਜ਼ਿਲ੍ਹਿਆਂ ਦੀਆਂ ਜ਼ਿੰਮੇਵਾਰੀਆਂ ਸੌਂਪਦਿਆਂ ਅਣਦੇਖਿਆਂ ਕਰ ਦਿੱਤਾ।

ਹਾਲਾਂਕਿ ਇਹ ਵੀ ਚਰਚਾ ਹੈ ਕਿ ਰਾਹੁਲ ਗਾਂਧੀ ਰਜ਼ੀਆ ਦਾ ਅਸਤੀਫ਼ਾ ਪ੍ਰਵਾਨ ਕਰਨ ਦੇ ਹੱਕ ਵਿਚ ਵੀ ਸਨ ਪਰ ਦੱਸਿਆ ਗਿਆ ਹੈ ਕਿ ਚੰਨੀ ਨੇ ਖ਼ੁਦ ਹੀ ਰਜ਼ੀਆ ਦਾ ਅਸਤੀਫ਼ਾ ਮਨਜ਼ੂਰ ਨਾ ਕਰਕੇ ਲੜਾਈ ਨੂੰ ਰੋਕਣ ਦੀ ਸਲਾਹ ਦਿੱਤੀ ਸੀ। ਅਸੀਂ ਸਮਝਦੇ ਹਾਂ ਕਿ ਜੇ ਹੁਣ ਸਿੱਧੂ ਕੋਈ ਨਵੀਂ ਜ਼ਿੱਦ ਨਹੀਂ ਕਰਦੇ ਤਾਂ ਉਨ੍ਹਾਂ ਦੇ ਅਸਤੀਫ਼ੇ ਦੀ ਮਨਜ਼ੂਰੀ ਜਾਂ ਪੰਜਾਬ ਕਾਂਗਰਸ ਦਾ ਕੋਈ ਨਵਾਂ ਪ੍ਰਧਾਨ ਬਣਾਏ ਜਾਣ ਦਾ ਮਾਮਲਾ ਹਾਲ ਦੀ ਘੜੀ ਟਲ ਗਿਆ ਹੈ। ਇਸ ਦਰਮਿਆਨ ਪਤਾ ਲੱਗਾ ਹੈ ਕਿ ਰਜ਼ੀਆ ਸੁਲਤਾਨਾ ਵੀ ਆਪਣਾ ਅਸਤੀਫ਼ਾ ਪ੍ਰਵਾਨ ਕਰਵਾਉਣ ਤੋਂ ਪਿੱਛੇ ਹਟ ਗਏ ਹਨ। ਦੱਸਿਆ ਗਿਆ ਹੈ ਕਿ ਅਸਤੀਫ਼ੇ ਤੋਂ ਬਾਅਦ ਉਹ ਕੈਬਨਿਟ ਮੀਟਿੰਗ ਦੇ ਇਕ ਏਜੰਡੇ 'ਤੇ ਮੰਤਰੀ ਵਜੋਂ ਦਸਤਖ਼ਤ ਕਰ ਚੁੱਕੇ ਹਨ।

ਪੰਜਾਬ ਕਾਂਗਰਸ ਕੋਲ ਪੈਸੇ ਦੀ ਘਾਟ?
ਇਸ ਦਰਮਿਆਨ ਇਕ ਚਰਚਾ ਹੋਰ ਵੀ ਸੁਣਾਈ ਦੇ ਰਹੀ ਹੈ ਕਿ ਪੰਜਾਬ ਕਾਂਗਰਸ ਕੋਲ ਫੰਡਾਂ ਦੀ ਬਹੁਤ ਘਾਟ ਹੈ ਅਤੇ ਨਵਜੋਤ ਸਿੰਘ ਸਿੱਧੂ ਕੋਲ ਇਹ ਘਾਟ ਦੂਰ ਕਰਨ ਦੇ ਸਮਰੱਥ ਕੋਈ ਵਿਅਕਤੀ ਹਾਲ ਦੀ ਘੜੀ ਨਜ਼ਰ ਵੀ ਨਹੀਂ ਆ ਰਿਹਾ। ਕੁਝ ਹਲਕਿਆਂ ਵਿਚ ਚਰਚਾ ਹੈ ਕਿ ਭਾਵੇਂ ਪੰਜਾਬ ਕਾਂਗਰਸ ਦੇ ਖਜ਼ਾਨਚੀ ਗੁਲਜ਼ਾਰ ਇੰਦਰ ਸਿੰਘ ਚਹਿਲ ਨੇ ਅਸਤੀਫ਼ਾ ਤਾਂ ਸਿੱਧੂ ਦੇ ਸਮਰਥਨ ਵਿਚ ਹੀ ਦਿੱਤਾ ਹੈ ਪਰ ਚਰਚਾ ਹੈ ਕਿ ਸਿੱਧੂ ਤਾਂ ਹੁਣ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਵਜੋਂ ਕੰਮ ਕਰਦੇ ਰਹਿਣਗੇ ਪਰ ਚਹਿਲ ਖਜ਼ਾਨਚੀ ਵਜੋਂ ਸ਼ਾਇਦ ਹੀ ਪਰਤਣ।

ਦੂਜੇ ਪਾਸੇ ਮੁੱਖ ਮੰਤਰੀ ਚੰਨੀ ਕੋਲ ਇਸ਼ਤਿਹਾਰਬਾਜ਼ੀ ਤੇ ਪ੍ਰਚਾਰ ਲਈ ਪੈਸੇ ਦੀ ਕੋਈ ਘਾਟ ਨਹੀਂ, ਕਿਉਂਕਿ ਇਸ ਦਾ ਇੰਤਜ਼ਾਮ ਤਾਂ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਸਰਕਾਰੀ ਖਜ਼ਾਨੇ ਵਿਚੋਂ ਸੈਂਕੜੇ ਕਰੋੜ ਰੁਪਏ ਪਾਸ ਕਰਵਾ ਕੇ ਕਰ ਗਏ ਸਨ। ਪਤਾ ਲੱਗਾ ਹੈ ਕਿ ਇਹ ਸਾਲ ਚੋਣ ਵਰ੍ਹਾ ਹੋਣ ਕਾਰਨ ਸਰਕਾਰ ਨੇ ਇਸ ਵਾਰ ਪ੍ਰਚਾਰ ਲਈ ਕਾਫੀ ਜ਼ਿਆਦਾ ਫੰਡ ਰੱਖਿਆ ਸੀ। ਉਸ ਵਿਚੋਂ ਬਹੁਤਾ ਫੰਡ ਅਜੇ ਅਣਵਰਤਿਆ ਪਿਆ ਹੈ ਜੋ ਹੁਣ ਨਵੇਂ ਮੁੱਖ ਮੰਤਰੀ ਦੀ ਦੇਖ-ਰੇਖ ਵਿਚ ਸਰਕਾਰੀ ਸਕੀਮਾਂ ਦਾ ਪ੍ਰਚਾਰ ਕਰਨ ਲਈ ਖ਼ਰਚਿਆ ਜਾਏਗਾ ਜੋ ਅਸਿੱਧੇ ਰੂਪ ਵਿਚ ਪਾਰਟੀ ਲਈ ਵੀ ਫਾਇਦੇਮੰਦ ਹੀ ਹੋਵੇਗਾ।
 
ਫੋਨ : 92168-60000
E. mail : hslall@ymail.com