ਮਸਲਾ ਜਬ ਭੀ ਚਰਾਗੋਂ ਕਾ ਉਠਾ,
ਫ਼ੈਸਲਾ ਸਿਰਫ਼ ਹਵਾ ਕਰਤੀ ਹੈ।

ਪਰਵੀਨ ਸ਼ਾਕਿਰ ਦਾ ਇਹ ਸ਼ਿਅਰ ਆਪਣੇ-ਆਪ ਵਿਚ ਕਈ ਅਰਥ ਸਮੋਈ ਬੈਠਾ ਹੈ, ਪਰ ਕਿਉਂਕਿ ਅਸੀਂ ਗੱਲ ਕਰਨੀ ਹੈ ਇਸ ਵੇਲੇ ਹੋ ਰਹੀਆਂ 5 ਵਿਧਾਨ ਸਭਾਵਾਂ ਦੇ ਚੋਣ ਨਤੀਜਿਆਂ ਦੇ ਅਸਰ ਦੀ, ਸੋ ਇਸ ਸ਼ਿਅਰ ਦਾ ਇਥੇ ਸਿੱਧਾ ਪ੍ਰਭਾਵ ਇਹ ਹੀ ਹੈ ਕਿ ਇਨ੍ਹਾਂ ਚੋਣਾਂ ਵਿਚ ਕੌਣ ਜਿੱਤੇਗਾ, ਕੌਣ ਹਾਰੇਗਾ, ਇਸ ਦਾ ਫ਼ੈਸਲਾ ਤਾਂ ਲੋਕ ਹੀ ਕਰਨਗੇ।

ਪਰ ਲੋਕਾਂ ਵਿਚ ਵੋਟਾਂ ਤੋਂ ਪਹਿਲਾਂ ਹੀ ਕਿਸੇ ਇਕ ਰਾਜਨੀਤਕ ਪਾਰਟੀ ਦੇ ਹੱਕ ਵਿਚ ਜਾਂ ਵਿਰੋਧ ਵਿਚ ਇਕ ਹਵਾ ਜਿਹੀ ਵਹਿਣ ਲੱਗ ਪੈਂਦੀ ਹੈ। ਜੇਕਰ ਵੋਟਾਂ ਵਾਲੇ ਦਿਨ ਤੱਕ ਇਹ ਹਵਾ ਹਨ੍ਹੇਰੀ ਬਣ ਜਾਵੇ ਤਾਂ ਇਸ ਦਾ ਨਤੀਜਾ ਪੰਜਾਬ ਵਿਚ ਤੇ ਦਿੱਲੀ ਵਿਚ 'ਆਮ ਆਦਮੀ ਪਾਰਟੀ' ਨੂੰ ਮਿਲੇ ਬਹੁਮਤ ਵਰਗਾ ਹੁੰਦਾ ਹੈ। ਪਰ ਜੇਕਰ ਇਹ ਹਵਾ ਮੱਠੀ ਹੋਵੇ ਜਾਂ ਕਿਸੇ ਦੇ ਵੀ ਹੱਕ ਵਿਚ ਨਾ ਬਣੇ ਤਾਂ ਕਈ ਵਾਰ ਕਿਸੇ ਵੀ ਪਾਰਟੀ ਨੂੰ ਬਹੁਮਤ ਨਹੀਂ ਮਿਲਦਾ।
 
ਖ਼ੈਰ 3 ਦਸੰਬਰ ਨੂੰ 5 ਵਿਧਾਨ ਸਭਾਵਾਂ, ਮੱਧ ਪ੍ਰਦੇਸ਼, ਰਾਜਸਥਾਨ, ਛੱਤੀਸਗੜ੍ਹ, ਤੇਲੰਗਾਨਾ ਤੇ ਮਿਜ਼ੋਰਮ ਦੇ ਚੋਣ ਨਤੀਜੇ ਆ ਜਾਣੇ ਹਨ। ਭਾਵੇਂ ਇਨ੍ਹਾਂ ਚੋਣਾਂ ਨੂੰ 2024 ਦੀਆਂ ਲੋਕ ਸਭਾ ਚੋਣਾਂ ਦਾ ਸੈਮੀਫਾਈਨਲ  ਵੀ ਕਿਹਾ ਜਾ ਰਿਹਾ ਹੈ, ਪਰ ਇਨ੍ਹਾਂ ਰਾਜਾਂ ਦੀਆਂ ਹੀ ਪ੍ਰਾਂਤਕ ਚੋਣਾਂ ਤੋਂ ਬਾਅਦ 2019 ਦੀਆਂ ਆਮ ਚੋਣਾਂ ਵਿਚ ਭਾਜਪਾ ਨੇ ਜਿਵੇਂ ਦੀ ਜਿੱਤ ਪ੍ਰਾਪਤ ਕੀਤੀ ਸੀ, ਉਸ ਤੋਂ ਨਹੀਂ ਜਾਪਦਾ ਸੀ ਕਿ ਇਨ੍ਹਾਂ ਵਿਧਾਨ ਸਭਾਵਾਂ ਦੇ ਨਤੀਜਿਆਂ ਨੇ ਲੋਕ ਸਭਾ ਚੋਣ ਨਤੀਜਿਆਂ 'ਤੇ ਕੋਈ ਅਸਰ ਪਾਇਆ ਸੀ। ਪਰ ਅਸਲੀਅਤ ਇਹ ਨਹੀਂ ਸੀ ਸਗੋਂ ਅਸਲੀਅਤ ਇਹ ਹੈ ਕਿ ਵਿਧਾਨ ਸਭਾ ਦੇ ਚੋਣ ਨਤੀਜਿਆਂ ਤੋਂ ਬਾਅਦ ਜੰਮੂ-ਕਸ਼ਮੀਰ ਵਿਚ ਵਾਪਰੀਆਂ ਘਟਨਾਵਾਂ ਅਤੇ "ਬਾਲਾਕੋਟ ਏਅਰ ਸਟ੍ਰਾਈਕ" ਤੋਂ ਬਾਅਦ 'ਦੁਸ਼ਮਨ ਕੇ ਘਰ ਮੇਂ ਘੁਸ ਕਰ ਮਾਰੇਂਗੇ' ਦੇ ਬਿਰਤਾਂਤ ਨੇ ਰਾਸ਼ਟਰਵਾਦ ਭਾਵਨਾ ਏਨੀ ਉਭਾਰ ਦਿੱਤੀ ਸੀ ਕਿ ਹੋਰ ਕਿਸੇ ਗੱਲ ਦਾ ਕੋਈ ਅਸਰ ਹੀ ਨਹੀਂ ਸੀ ਰਿਹਾ। ਇਸ ਵਾਰ 'ਕਿਸ ਕੇ ਘਰ ਮੇਂ ਕਿਸਕੋ ਮਾਰੇਂਗੇ?' ਕਿਸੇ ਨੂੰ ਨਹੀਂ ਪਤਾ ਕਿਉਂਕਿ 3 ਦਸੰਬਰ ਨੂੰ 5 ਵਿਧਾਨ ਸਭਾਵਾਂ ਦੇ ਚੋਣ ਨਤੀਜਿਆਂ ਤੋਂ ਬਾਅਦ ਆਮ ਚੋਣਾਂ ਵਿਚ 4-5 ਮਹੀਨੇ ਦਾ ਸਮਾਂ ਹੀ ਹੋਵੇਗਾ। ਇਨ੍ਹਾਂ 4-5 ਮਹੀਨਿਆਂ ਵਿਚ ਕੀ ਵਾਪਰਦਾ ਹੈ ਤੇ ਉਸ ਦਾ ਕਿਸਦੀ ਹਵਾ 'ਤੇ ਕੀ ਅਸਰ ਪੈਂਦਾ ਹੈ, ਕਿਸੇ ਨੂੰ ਨਹੀਂ ਪਤਾ।
 
ਪਰ ਫਿਰ ਵੀ ਜੋ ਮਰਜ਼ੀ ਹੋਵੇ ਇਸ ਗੱਲ ਤੋਂ ਤਾਂ ਇਨਕਾਰ ਨਹੀਂ ਕੀਤਾ ਜਾ ਸਕਦਾ ਕਿ ਜੇ ਕੋਈ ਅਸਾਧਾਰਨ ਘਟਨਾ, ਜਿਸਦੀ ਅਜੇ ਕੋਈ ਸੋਅ ਨਹੀਂ ਆਈ, ਨਹੀਂ ਵਾਪਰਦੀ ਤਾਂ ਇਨ੍ਹਾਂ ਵਿਧਾਨ ਸਭਾ ਚੋਣਾਂ ਦੇ ਨਤੀਜੇ ਵੱਖ-ਵੱਖ ਖ਼ੇਤਰਾਂ ਵਿਚ ਕਾਫ਼ੀ ਹੱਦ ਤਕ ਅਸਰ-ਅੰਦਾਜ਼ ਹੋਣਗੇ। ਸਭ ਤੋਂ ਵੱਡਾ ਅਸਰ ਤਾਂ ਇਹ ਕਾਂਗਰਸ ਪਾਰਟੀ ਅਤੇ 'ਇੰਡੀਆ' ਗੱਠਜੋੜ ਦੀ ਸਿਆਸਤ 'ਤੇ ਹੀ ਪਾਉਣਗੇ। ਜੇਕਰ ਇਨ੍ਹਾਂ ਚੋਣਾਂ ਵਿਚ ਕਾਂਗਰਸ ਮੱਧ ਪ੍ਰਦੇਸ਼, ਛੱਤੀਸਗੜ੍ਹ ਅਤੇ ਰਾਜਸਥਾਨ ਤਿੰਨਾਂ ਵਿਚ ਹੀ ਜੇਤੂ ਰਹਿੰਦੀ ਹੈ ਜਾਂ ਘੱਟੋ-ਘੱਟ ਇਨ੍ਹਾਂ ਤਿੰਨਾਂ ਵਿਚੋਂ 2 'ਤੇ ਵੀ ਜਿੱਤਦੀ ਹੈ ਤਾਂ 'ਇੰਡੀਆ' ਗੱਠਜੋੜ ਵਿਚ ਕਾਂਗਰਸ ਦੀ ਸਥਿਤੀ ਮਜ਼ਬੂਤ ਹੋਵੇਗੀ, ਗਠਜੋੜ ਦੀ ਵੀ ਅਤੇ ਰਾਹੁਲ ਗਾਂਧੀ ਦਾ ਰੁਤਬਾ ਵੀ ਵਧੇਗਾ।

ਭਾਜਪਾ ਦੀ ਕੂਟਨੀਤੀ ਦਾ ਜ਼ਾਹਰਾ ਤੌਰ 'ਤੇ ਸਾਰਾ ਜ਼ੋਰ ਵੀ ਇਨ੍ਹਾਂ ਤਿੰਨਾਂ ਰਾਜਾਂ 'ਤੇ ਹੀ ਲੱਗਾ ਹੋਇਆ ਹੈ। ਉਸ ਨੂੰ ਪਤਾ ਹੈ ਕਿ ਮਿਜ਼ੋਰਮ ਤੇ ਤੇਲੰਗਾਨਾ ਵਿਚ ਉਹ ਬਹੁਤ ਵੱਡੀ ਜਿੱਤ ਪ੍ਰਾਪਤ ਨਹੀਂ ਕਰ ਸਕਦੀ। ਹਾਲ ਦੀ ਘੜੀ ਤੱਕ ਜੋ ਰਿਪੋਰਟਾਂ ਮਿਲ ਰਹੀਆਂ ਹਨ, ਉਨ੍ਹਾਂ ਅਨੁਸਾਰ ਮੱਧ ਪ੍ਰਦੇਸ਼ ਅਤੇ ਛੱਤੀਸਗੜ੍ਹ ਵਿਚ ਕਾਂਗਰਸ ਦਾ ਹੱਥ ਉੱਪਰ ਜਾਪਦਾ ਹੈ, ਜਦੋਂਕਿ ਰਾਜਸਥਾਨ ਵਿਚ ਮੁਕਾਬਲਾ ਸਖ਼ਤ ਦੱਸਿਆ ਜਾ ਰਿਹਾ ਹੈ। ਪਰ ਇਹ ਸਾਰੇ ਅਨੁਮਾਨ ਹੀ ਹਨ, ਅਸਲੀਅਤ ਤਾਂ 3 ਦਸੰਬਰ ਦੇ ਨਤੀਜੇ ਆਉਣ 'ਤੇ ਹੀ ਸਾਹਮਣੇ ਆਵੇਗੀ। ਪਰ ਇਹ ਗੱਲ ਵੀ ਸਪੱਸ਼ਟ ਹੈ ਕਿ ਜੇਕਰ ਭਾਜਪਾ ਇਨ੍ਹਾਂ ਪੰਜਾਂ ਵਿਧਾਨ ਸਭਾ ਚੋਣਾਂ ਵਿਚ ਹਾਰਦੀ ਹੈ ਤਾਂ ਉਸ ਲਈ 2024 ਦਾ ਰਸਤਾ ਜ਼ਰੂਰ ਮੁਸ਼ਕਿਲ ਹੋ ਜਾਵੇਗਾ।
 
ਇਨ੍ਹਾਂ ਚੋਣਾਂ ਦੇ ਨਤੀਜੇ ਇਹ ਵੀ ਸਪੱਸ਼ਟ ਕਰਨਗੇ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਅਪੀਲ ਦਾ ਅਸਰ ਬਾਦਸਤੂਰ ਕਾਇਮ ਹੈ ਜਾਂ ਘਟ ਰਿਹਾ ਹੈ, ਕਿਉਂਕਿ ਭਾਜਪਾ ਇਹ ਚੋਣਾਂ ਵੀ ਪ੍ਰਧਾਨ ਮੰਤਰੀ ਦੇ ਨਾਂਅ 'ਤੇ ਹੀ ਲੜ ਰਹੀ ਹੈ। ਇਨ੍ਹਾਂ ਚੋਣਾਂ ਵਿਚ ਮੁਫ਼ਤ ਦੀਆਂ ਗਾਰੰਟੀਆਂ ਬਾਰੇ ਵੀ ਫ਼ੈਸਲਾ ਹੋਵੇਗਾ। ਜੇਕਰ ਇਨ੍ਹਾਂ ਚੋਣਾਂ ਵਿਚ ਮੁਫ਼ਤ ਦੀਆਂ ਸਹੂਲਤਾਂ ਦੇਣ ਵਾਲੀਆਂ ਪਾਰਟੀਆਂ ਸਪੱਸ਼ਟ ਬਹੁਮਤ ਲੈ ਗਈਆਂ ਤਾਂ ਅਜਿਹੇ ਐਲਾਨਾਂ ਦਾ ਪ੍ਰਭਾਵ ਤੇ ਜ਼ਰੂਰਤ 2024 ਦੀਆਂ ਆਮ ਚੋਣਾਂ ਵਿਚ ਹੋਰ ਵਧੇਗੀ। ਤੇਲੰਗਾਨਾ ਤੇ ਮਿਜ਼ੋਰਮ ਦੇ ਚੋਣ ਨਤੀਜੇ ਇਕ ਹੋਰ ਰੁਝਾਨ ਵੀ ਸਪੱਸ਼ਟ ਕਰਨਗੇ ਕਿ, ਕੀ ਮਨੀਪੁਰ ਵਰਗੇ ਹਾਲਾਤ ਵੋਟਰਾਂ 'ਤੇ ਕੋਈ ਅਸਰ ਪਾਉਂਦੇ ਹਨ ਜਾਂ ਨਹੀਂ? ਇਨ੍ਹਾਂ ਚੋਣ ਨਤੀਜਿਆਂ ਦਾ ਸਭ ਤੋਂ ਵੱਧ ਪ੍ਰਭਾਵ ਉੱਤਰ ਭਾਰਤ ਤੇ ਹਿੰਦੀ ਭਾਸ਼ੀ ਰਾਜਾਂ ਵਿਚ ਜ਼ਿਆਦਾ ਨਜ਼ਰ ਆਵੇਗਾ। ਖ਼ਾਸ ਕਰ ਦਿੱਲੀ, ਹਰਿਆਣਾ, ਬਿਹਾਰ, ਉੱਤਰ ਪ੍ਰਦੇਸ਼ ਵਿਚ ਇਨ੍ਹਾਂ ਦਾ ਅਸਰ ਪ੍ਰਤੱਖ ਹੋਵੇਗਾ।

ਪੰਜਾਬ ਦੀ ਸਿਆਸਤ 'ਤੇ ਵੀ ਇਨ੍ਹਾਂ ਚੋਣ ਨਤੀਜਿਆਂ ਦਾ ਪ੍ਰਭਾਵ ਅਵੱਸ਼ ਪਵੇਗਾ। ਭਾਵੇਂ ਕਿ ਪੰਜਾਬ ਵਿੱਚ ਭਾਜਪਾ ਦੀ ਹਾਲਤ ਕਾਫੀ ਪਤਲੀ ਹੈ। ਸਭ ਤੋਂ ਵੱਡੀ ਗੱਲ ਇਹ ਦੇਖਣ ਵਾਲੀ ਹੋਵੇਗੀ ਕਿ ਜੇ ਇਨ੍ਹਾਂ ਵਿਧਾਨ ਸਭਾ ਚੋਣਾਂ ਵਿਚ ਭਾਜਪਾ ਹਾਰਦੀ ਹੈ ਤਾਂ ਉਹ ਫਿਰ ਤੋਂ ਨਵ-ਰਾਸ਼ਟਰਵਾਦ ਉਭਾਰਨ ਲਈ ਕੀ ਰੁਖ਼ ਅਪਣਾਉਂਦੀ ਹੈ? ਕੀ ਇਸ ਦਾ ਗੁਆਂਢੀ ਦੇਸ਼ਾਂ ਖ਼ਾਸ ਕਰਕੇ ਪਾਕਿਸਤਾਨ ਨਾਲ ਰਿਸ਼ਤਿਆਂ 'ਤੇ ਬੁਰਾ ਅਸਰ ਪਵੇਗਾ? ਪਰ ਯਾਦ ਰੱਖੋ:

ਜ਼ਮੀਂ ਕੀ ਕੈਸੀ ਵਕਾਲਤ ਹੋ ਫਿਰ ਨਹੀਂ ਚਲਤੀ,
ਜਬ ਆਸਮਾਂ ਸੇ ਕੋਈ ਫ਼ੈਸਲਾ ਉਤਰਤਾ ਹੈ।    (ਵਸੀਮ ਬਰੇਲਵੀ)

ਪੰਜਾਬ 'ਤੇ ਕੀ ਪ੍ਰਭਾਵ ਪੈਣਗੇ?

ਪੰਜਾਬ ਦੀ ਰਾਜਨੀਤੀ ਇਸ ਵੇਲੇ ਬਹੁਤ ਹੀ ਅਸਪੱਸ਼ਟ ਸਥਿਤੀ ਵਿਚ ਹੈ। ਭਾਵੇਂ 'ਆਪ' ਕੋਲ 92 ਵਿਧਾਇਕਾਂ ਦਾ ਅਸੀਮ ਬਹੁਮਤ ਹੈ ਪਰ ਪਾਰਟੀ ਅਜੇ ਵੀ ਆਪਣੇ ਪੈਰਾਂ 'ਤੇ ਖੜ੍ਹੀ ਨਜ਼ਰ ਨਹੀਂ ਆ ਰਹੀ। ਸੱਤਾ ਵਿੱਚ ਆਉਣ ਦੇ ਡੇਢ ਸਾਲ ਵਿੱਚ ਵੀ ਆਪਣਾ ਸੰਤੁਲਨ ਨਹੀਂ ਬਣਾ ਸਕੀ। ਸਰਕਾਰ ਵੀ ਕਈ ਵਾਰ ਫ਼ੈਸਲੇ ਲੈ ਕੇ ਯੂ-ਟਰਨ ਲੈਂਦੀ ਦਿਖਾਈ ਦਿੰਦੀ ਹੈ। ਪਰ ਇਸ ਦੇ ਬਾਵਜੂਦ ਵਿਰੋਧੀ ਧਿਰਾਂ ਦੀ ਹਾਲਤ ਵੀ ਕੋਈ ਬਹੁਤੀ ਚੰਗੀ ਨਹੀਂ। ਕਦੇ ਕਾਂਗਰਸੀ 'ਵਾਂਢੇ ਜਾ ਕੇ ਘਰ ਵਾਪਸੀ' ਕਰਦੇ ਹਨ। ਕਈ ਵਾਰ ਤਾਂ ਇਹ ਪ੍ਰਭਾਵ ਹੀ ਬਣਦਾ ਹੈ ਕਿ ਭਾਵੇਂ ਸਾਰੇ ਨਹੀਂ ਪਰ ਬਹੁਤੇ ਕਾਂਗਰਸੀ ਤਾਂ ਈ.ਡੀ. ਤੇ ਵਿਜੀਲੈਂਸ ਦੇ ਡਰੋਂ ਹੀ ਭਾਜਪਾ ਵਿਚ ਗਏ ਹਨ। 

ਵੋਟਰਾਂ ਨੂੰ ਪਤਾ ਹੈ ਹਮਾਮ ਵਿੱਚ ਸਭ ਨੰਗੇ ਹਨ।

ਕੁਝ ਬਾਰੇ ਚਰਚਾ ਹੈ ਕਿ ਉਹ ਆਪਣੇ ਕੇਸ ਠੀਕ ਕਰਵਾ ਕੇ ਵਾਪਸ ਵੀ ਪਰਤ ਆਏ ਹਨ। ਇਕ ਚਰਚਾ ਤਾਂ ਬਹੁਤ ਜ਼ੋਰ ਨਾਲ ਸੁਣਾਈ ਦੇ ਰਹੀ ਹੈ ਕਿ ਇਕ ਨੇਤਾ ਆਪਣਾ ਹਿਸਾਬ-ਕਿਤਾਬ ਹੀ ਠੀਕ ਨਹੀਂ ਕਰਵਾ ਗਿਆ, ਸਗੋਂ ਆਪਣਾ ਵਿਰੋਧੀ ਜੋ 'ਆਪ' ਵਿਚ ਸੀ, ਦੇ ਖਿਲਾਫ਼ ਕਾਰਵਾਈ ਵੀ ਸ਼ੁਰੂ ਕਰਵਾ ਗਿਆ। ਪਰ ਦੂਜੇ ਪਾਸੇ ਪੰਜਾਬ ਵਿਜੀਲੈਂਸ ਨੇ ਪੰਜਾਬ ਦੇ ਸਾਬਕਾ ਖਜ਼ਾਨਾ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਦਾ ਪਿੱਛਾ ਤਾਂ ਉਨ੍ਹਾਂ ਦੇ ਭਾਜਪਾ ਵਿਚ ਸ਼ਾਮਿਲ ਹੋਣ ਉਪਰੰਤ ਵੀ ਨਹੀਂ ਛੱਡਿਆ।

ਖ਼ੈਰ, ਆਪਾਂ ਗੱਲ ਕਰ ਰਹੇ ਸੀ 5 ਵਿਧਾਨ ਸਭਾਵਾਂ ਦੇ ਚੋਣ ਨਤੀਜਿਆਂ ਦੇ ਪੰਜਾਬ 'ਤੇ ਪੈਣ ਵਾਲੇ ਸਿੱਧੇ ਅਸਰ ਦੀ। ਵੱਖ-ਵੱਖ ਨੇਤਾਵਾਂ ਨਾਲ ਕੀਤੀ ਗੱਲਬਾਤ ਤੋਂ ਇਹ ਪ੍ਰਭਾਵ ਬਣਦਾ ਹੈ ਕਿ ਜੇਕਰ ਇਨ੍ਹਾਂ 5 ਵਿਧਾਨ ਸਭਾਵਾਂ ਦੀਆਂ ਚੋਣਾਂ ਵਿਚ ਭਾਜਪਾ ਜੇਤੂ ਰਹੀ ਤੇ ਪੰਜਾਬ ਵਿਚ ਭਾਜਪਾ ਦੀ ਸਥਿਤੀ ਸੁਧਰਨ ਦੇ ਆਸਾਰ ਦਿਖਾਈ ਦਿੱਤੇ ਤਾਂ ਕਾਂਗਰਸ ਵਿਚੋਂ ਵੱਡੀ ਗਿਣਤੀ ਵਿਚ ਨੇਤਾ ਇਕ ਵਾਰ ਫਿਰ ਭਾਜਪਾ ਵੱਲ ਪ੍ਰਵਾਸ ਕਰਨਗੇ।

ਪਰ ਜੇ ਇਸ ਦੇ ਉਲਟ ਭਾਜਪਾ ਹਾਰੀ ਤੇ ਕਾਂਗਰਸ ਦੀ ਸਥਿਤੀ ਸੁਧਰੀ ਤਾਂ ਭਾਜਪਾ ਵਿਚ ਗਏ ਕਈ ਕਾਂਗਰਸੀ ਨੇਤਾ ਘਰ ਵਾਪਸੀ ਬਾਰੇ ਸੋਚਣਗੇ। ਇਹੀ ਹਾਲਤ ਅਕਾਲੀ ਦਲ ਵਿਚੋਂ ਗਏ ਕਈ ਨੇਤਾਵਾਂ ਦੀ ਵੀ ਹੋ ਸਕਦੀ ਹੈ।

ਕਾਸ਼ ਇਨ ਉਲਝਨੋਂ ਸੇ ਗੁਜ਼ਰ ਜਾਊਂ।
ਮੈਂ ਇਧਰ ਜਾਊਂ ਯਾ ਉਧਰ ਜਾਊਂ।    (ਸ਼ਕੀਲ ਬਦਾਯੂਨੀ)

ਅਕਾਲੀ-ਭਾਜਪਾ ਸਮਝੌਤੇ ਦੇ ਆਸਾਰ ਅਜੇ ਨਹੀਂ

ਭਾਵੇਂ ਇਹ ਚਰਚਾ ਅਜੇ ਵੀ ਦਿਨ-ਰਾਤ ਚਲਦੀ ਰਹਿੰਦੀ ਹੈ ਕਿ ਅਕਾਲੀ ਦਲ ਬਾਦਲ ਅਤੇ ਭਾਰਤੀ ਜਨਤਾ ਪਾਰਟੀ ਵਿਚ ਸਮਝੌਤੇ ਦੀ ਕੋਈ ਗੁਪਤ ਗੱਲਬਾਤ ਚੱਲ ਰਹੀ ਹੈ, ਪਰ ਸਾਡੀ ਜਾਣਕਾਰੀ ਅਨੁਸਾਰ ਅਜੇ ਅਜਿਹੀ ਕੋਈ ਗੱਲ ਨਹੀਂ ਚੱਲੀ।

ਪਰ ਜੇਕਰ ਭਾਜਪਾ 5 ਰਾਜਾਂ ਦੀਆਂ ਵਿਧਾਨ ਸਭਾਵਾਂ ਦੀਆਂ ਚੋਣਾਂ ਵਿਚ ਹਾਰਦੀ ਹੈ ਤਾਂ ਭਾਜਪਾ ਦਾ ਅਕਾਲੀ ਦਲ ਨਾਲ ਗੱਠਜੋੜ ਕਰਨ 'ਤੇ ਵਿਚਾਰ ਕਰਨਾ ਉਸ ਦੀ ਮਜਬੂਰੀ ਬਣ ਸਕਦੀ ਹੈ, ਕਿਉਂਕਿ ਹਾਰ ਦੀ ਸਥਿਤੀ ਵਿਚ ਭਾਜਪਾ ਲਈ ਉੱਤਰ ਭਾਰਤ ਵਿਚ ਆਪਣੀ ਮਜ਼ਬੂਤੀ ਦਾ ਬਿਰਤਾਂਤ ਸਿਰਜਣ ਲਈ ਅਕਾਲੀ ਦਲ ਨਾਲ ਸਮਝੌਤਾ ਕਰਨਾ, ਭਾਜਪਾ ਲਈ ਚਿੰਨ੍ਹਾਤਮਿਕ ਮਜ਼ਬੂਤੀ ਦਾ ਸੰਦੇਸ਼ ਦੇ ਸਕਦਾ ਹੈ।

ਦੂਸਰਾ ਇਸ ਨਾਲ ਦਿੱਲੀ, ਪੰਜਾਬ, ਹਰਿਆਣਾ, ਰਾਜਸਥਾਨ ਤੇ ਉੱਤਰ ਪ੍ਰਦੇਸ਼ ਵਿਚ ਵਸਦੇ ਸਿੱਖ ਤੇ ਪੰਜਾਬੀ ਵੋਟਰਾਂ ਦਾ ਝੁਕਾਅ ਭਾਜਪਾ ਵੱਲ ਹੋ ਸਕਦਾ ਹੈ। ਇਸ ਦਰਮਿਆਨ ਇਕ ਚਰਚਾ ਹੋਰ ਵੀ ਹੈ ਕਿ ਜੇਕਰ ਅਕਾਲੀ-ਭਾਜਪਾ ਸਮਝੌਤੇ ਦੀ ਕੋਈ ਗੱਲ ਚਲਦੀ ਹੈ ਤਾਂ ਬਸਪਾ-ਅਕਾਲੀ ਸਮਝੌਤੇ 'ਤੇ ਇਸ ਦਾ ਕੀ ਅਸਰ ਪਵੇਗਾ, ਇਹ ਵੀ ਵਿਚਾਰਨ ਵਾਲੀ ਗੱਲ ਹੋਵੇਗੀ। ਸਾਡੀ ਜਾਣਕਾਰੀ ਅਨੁਸਾਰ ਇਸ ਦਾ ਅੰਤਿਮ ਫ਼ੈਸਲਾ ਤਾਂ ਬਸਪਾ ਮੁਖੀ ਕੁਮਾਰੀ ਮਾਇਆਵਤੀ ਹੀ ਲੈਣਗੇ ਪਰ ਅਕਾਲੀ ਦਲ ਹਰ ਹਾਲਤ ਵਿਚ ਭਾਜਪਾ ਨਾਲ ਗੱਲਬਾਤ ਹੋਣ ਦੀ ਸਥਿਤੀ ਵਿਚ ਵੀ ਬਸਪਾ ਨੂੰ ਜਾਂ ਘੱਟੋ-ਘੱਟ ਪੰਜਾਬ ਬਸਪਾ ਦੇ ਨੇਤਾਵਾਂ ਨੂੰ ਆਪਣੇ ਨਾਲ ਰੱਖਣ ਨੂੰ ਹੀ ਤਰਜੀਹ ਦੇਵੇਗਾ।
 
।-1044, ਗੁਰੂ ਨਾਨਕ ਸਟਰੀਟ,
ਸਮਰਾਲਾ ਰੋਡ, ਖੰਨਾ-141401.
ਮੋਬਾਈਲ : 92168-60000
E. mail : hslall@ymail.com