ਫ਼ਿੰਨਲੈਂਡ 22 ਸਤੰਬਰ (ਵਿੱਕੀ ਮੋਗਾ) ਦੱਖਣੀ ਕੋਰੀਆ ਦੇ ਸ਼ਹਿਰ ਇੰਚੀਓਨ ਵਿੱਚ ਹੋ ਰਹੀਆਂ 17ਵੀਆਂ ਏਸ਼ੀਅਨ ਖੇਡਾਂ ਦੌਰਾਨ ਮਹਿਲਾ ਹਾਕੀ ਵਰਗ ਵਿੱਚ ਭਾਰਤ ਨੇ ਆਪਣੇ ਪਹਿਲੇ ਮੈਚ ਵਿੱਚ ਥਾਈਲੈਂਡ ਨੂੰ 3-0 ਨਾਲ ਹਰਾਕੇ ਪਹਿਲੀ ਜਿੱਤ ਹਾਸਿਲ ਕੀਤੀ। ਭਾਰਤ ਵਲੋਂ ਪੂਨਮ ਰਾਣੀ ਨੇ ਮੈਚ ਦੇ 14ਵੇਂ ਮਿੰਟ ਵਿੱਚ ਮਿਲੇ ਪੇਨਲਟੀ ਕਾਰਨਰ ਨੂੰ ਗੋਲ ਵਿੱਚ ਬਦਲਕੇ ਟੀਮ ਨੂੰ 1-0 ਦੀ ਬੜ੍ਹਤ ਦਿਵਾਈ ਜਦਕਿ 39ਵੇਂ ਮਿੰਟ ਵਿੱਚ ਵੰਦਨਾ ਕਟਾਰੀਆ ਨੇ ਭਾਰਤ ਲਈ ਦੂਸਰਾ ਗੋਲ ਕੀਤਾ।

ਭਾਰਤ ਵਲੋਂ ਤੀਸਰਾ ਗੋਲ ਮੈਚ ਦੇ ਅਖ਼ੀਰਲੇ ਕਵਾਰਟਰ ਵਿੱਚ ਉੱਪ-ਕਪਤਾਨ ਦੀਪਿਕਾ ਨੇ ਪੇਨਲਟੀ ਕਾਰਨਰ ਰਾਹੀਂ ਕੀਤਾ। ਭਾਰਤੀ ਮਹਿਲਾ ਟੀਮ ਆਪਣਾ ਅਗਲਾ ਮੈਚ 24 ਸਤੰਬਰ ਨੂੰ ਚੀਨ ਦੇ ਖਿਲਾਫ਼ ਖੇਡੇਗੀ। ਗੌਰਤਲਬ ਰਹੇ ਕਿ ਏਸ਼ੀਅਨ ਖੇਡਾਂ ਵਿੱਚ ਹਾਕੀ ਮੈਚ ਐਫ.ਆਈ.ਐਚ ਦੇ ਨਵੇਂ ਨਿਯਮ 15-2-15(10)15-2-15 ਮਿੰਟ ਦੀ ਤਰਜ਼ ਅਨੁਸਾਰ ਖੇਡੇ ਜਾ ਰਹੇ ਹਨ।

ਕੱਲ ਪੁਰਸ਼ ਵਰਗ ਵਿੱਚ ਭਾਰਤ ਨੇ ਆਪਣੇ ਪਹਿਲੇ ਮੈਚ ਵਿੱਚ ਸ਼੍ਰੀਲੰਕਾ ਨੂੰ 8-0 ਦੇ ਫ਼ਰਕ ਨਾਲ ਹਰਾਇਆ ਸੀ।

Bikramjit Singh (vicky moga)
vickymoga@hotmail.com
+358 503065677
Finland.

23/09/2014