ਹੇਲਸਿੰਕੀ 14 ਜੁਲਾਈ (ਵਿੱਕੀ ਮੋਗਾ) ਬੀਤੇ ਐਤਵਾਰ ਫ਼ਿੰਨਲੈਂਡ ਦੇ ਸ਼ਹਿਰ ਹੈਮੈਲੀਨਾ ਵਿਖੇ ਜੂਨੀਅਰ ਵਰਗ ਵਿੱਚ ਅੰਡਰ-12 ਅਤੇ ਅੰਡਰ-14 ਸਾਲ ਦੇ ਹਾਕੀ ਲੀਗ ਮੁਕਾਬਲੇ ਕਰਵਾਏ ਗਏ ਜਿਸ ਵਿੱਚ 6 ਟੀਮਾਂ ਨੇ ਭਾਗ ਲਿਆ। ਸਾਲ 2014 ਵਿੱਚ ਇਹ ਗਰਮ ਰੁੱਤ ਦਾ ਤੀਸਰਾ ਦੌਰ ਕਰਵਾਇਆ ਗਿਆ ਜਿਸ ਵਿੱਚ 12 ਸਾਲ ਤੋਂ ਘੱਟ ਉਮਰ ਦੇ ਵਿੱਚ ਤਿੰਨ ਟੀਮਾਂ ਹਾਕੀ ਕਲੱਬ ਵਾਨਤਾ, ਸੇਇਨਾਜੋਕੀ ਯੂਨਾਇਟੇਡ ਅਤੇ ਹਾਕੀ ਕਲੱਬ ਹੁੰਮਪੀਲਾ ਨੇ ਹਿੱਸਾ ਲਿਆ ਅਤੇ 14 ਸਾਲ ਦੇ ਵਰਗ ਵਿੱਚ ਹਾਕੀ ਕਲੱਬ ਐਚ.ਟੀ- 85 ਹੈਮੈਲੀਨਾ, ਮਿੰਨੀ ਕਿਲਪਰੀ ਤੁਰਕੂ ਅਤੇ ਕ੍ਰੋਕੋਡੇਲ ਹਾਕੀ ਕਲੱਬ ਨੇ ਹਿੱਸਾ ਲਿਆ।

ਟੂਰਨਾਂਮੈਂਟ ਦੇ 12 ਸਾਲ ਉਮਰ ਵਰਗ ਵਿੱਚ ਵਾਨਤਾ ਹਾਕੀ ਕਲੱਬ ਨੇ ਸੇਇਨਾਜੋਕੀ ਯੂਨਾਇਟੇਡ ਨੂੰ 4-2 ਨਾਲ ਅਤੇ ਹਾਕੀ ਕਲੱਬ ਹੁੰਮਪੀਲਾ ਨੂੰ 5-0 ਨਾਲ ਹਰਾਕੇ ਜਿੱਤ ਪ੍ਰਾਪਤ ਕੀਤੀ ਜਦਕਿ 14 ਸਾਲ ਉਮਰ ਦੇ ਵਰਗ ਵਿੱਚ ਹਾਕੀ ਕਲੱਬ ਐਚ.ਟੀ- 85 ਹੈਮੈਲੀਨਾ ਨੇ ਮਿੰਨੀ ਕਿਲਪਰੀ ਤੁਰਕੂ ਨੂੰ 11-2 ਨਾਲ ਅਤੇ ਕ੍ਰੋਕੋਡੇਲ ਹਾਕੀ ਕਲੱਬ ਨੂੰ 15-4 ਦੇ ਵੱਡੇ ਫਰਕ ਨਾਲ ਹਰਾ ਕੇ ਪਹਿਲਾ ਸਥਾਨ ਹਾਸਿਲ ਕੀਤਾ। ਵਾਨਤਾ ਹਾਕੀ ਕਲੱਬ ਵਲੋਂ ਦੋ ਪੰਜਾਬੀ ਖਿਡਾਰੀ ਜੋਬਨਵੀਰ ਸਿੰਘ ਖਹਿਰਾ ਅਤੇ ਅਰਜੁਨਜੀਤ ਸਿੰਘ ਨੇ ਹਿੱਸਾ ਲਿਆ।

ਟੂਰਨਾਂਮੈਂਟ ਦੇ ਮੈਚ 5-ਏ-ਸਾਈਡ ਦੇ ਅਧਾਰ ਤੇ ਰਾਉਂਡ ਰੋਬਿਨ ਲੀਗ ਅਨੁਸਾਰ ਕਰਵਾਏ ਗਏ। ਫ਼ਿੰਨਲੈਂਡ ਹਾਕੀ ਫੈਡਰੇਸ਼ਨ ਦੇ ਪ੍ਰਧਾਨ ਮੀਕਾ ਰੀਹੀਤਿਲਾ ਨੇ ਕਿਹਾ ਕਿ ਅਸੀਂ ਫ਼ਿੰਨਲੈਂਡ ਵਿੱਚ ਹਾਕੀ ਨੂੰ ਜੂਨੀਅਰ ਪੱਧਰ ਤੇ ਵਿਕਸਿਤ ਕਰਨ ਲਈ ਬਹੁਤ ਮਿਹਨਤ ਕਰ ਰਹੇਂ ਹਾਂ, ਉਨ੍ਹਾਂ ਇਹ ਵੀ ਕਿਹਾ ਕਿ ਇਸ ਸਾਲ ਫ਼ਿੰਨਲੈਂਡ ਵਿੱਚ ਅਤੇ ਵਸਦੇ ਪੰਜਾਬੀਆਂ ਦੇ ਬੱਚੇ ਵੀ ਸਾਡੇ ਨਾਲ ਜੁੜੇ ਹਨ ਅਤੇ ਹੋਰ ਖਿਡਾਰੀਆਂ ਦੇ ਆਉਣ ਦੀ ਵੀ ਸੰਭਵਾਨਾ ਬਣਦੀ ਜਾ ਰਹੀ ਹੈ ਅਸੀਂ ਉਮੀਦ ਕਰਦੇ ਹਾਂ ਕਿ ਆਉਣ ਵਾਲੇ ਸਾਲਾਂ ਵਿੱਚ ਫ਼ੀਲਡ ਹਾਕੀ ਵੀ ਫ਼ਿੰਨਲੈਂਡ ਵਿੱਚ ਵੱਡੇ ਪੱਧਰ ਤੇ ਖੇਡੀ ਜਾਵੇਗੀ। ਟੂਰਨਾਂਮੈਂਟ ਦੇ ਦੌਰਾਨ ਟੋਮੀ ਰਾਨਤਾਲਾ, ਆਂਸੀ ਓਜਲਾ, ਬਿਕਰਮਜੀਤ ਸਿੰਘ (ਵਿੱਕੀ ਮੋਗਾ), ਰਣਜੀਤ ਸਿੰਘ ਗਿੱਲ ਅਤੇ ਹਰਵਿੰਦਰ ਸਿੰਘ ਖਹਿਰਾ ਵੀ ਮੌਜੂਦ ਸਨ।

14/07/2014