ਫ਼ਿੰਨਲੈਂਡ 26 ਜੁਲਾਈ (ਵਿੱਕੀ ਮੋਗਾ) ਗਲਾਸਗੋ ਵਿੱਚ ਚੱਲ ਰਹੀਆਂ 2014 ਕਾਮਨਵੈਲਥ ਖੇਡਾਂ ਦੇ ਤੀਸਰੇ ਦਿਨ ਹਾਕੀ ਦੇ ਮਰਦਾਂ ਦੇ ਵਰਗ ਵਿੱਚ ਸਕੌਟਲੈਂਡ ਨੂੰ 6-2 ਨਾਲ ਕਰਾਰੀ ਮਾਤ ਦਿੱਤੀ। ਭਾਰਤ ਦੀ ਟੀਮ ਨੇ ਕੱਲ ਦੇ ਮੁਕਾਬਲੇ ਅੱਜ ਬੇਹਤਰੀਨ ਪ੍ਰਦਰਸ਼ਨ ਕੀਤਾ। ਭਾਰਤੀ ਟੀਮ ਅੱਜ ਕਾਫ਼ੀ ਤਾਲਮੇਲ ਅਤੇ ਲੈਅ ਵਿੱਚ ਨਜ਼ਰ ਆਈ। ਭਾਰਤ ਵਲੋਂ ਗੁਰਬਾਜ਼ ਸਿੰਘ ਨੇ 6ਵੇਂ ਮਿੰਟ ਵਿੱਚ ਸ਼ਾਨਦਾਰ ਫ਼ੀਲਡ ਗੋਲ ਕਰਕੇ ਟੀਮ ਨੂੰ ਸ਼ੁਰੂਆਤੀ ਪਲਾਂ ਵਿੱਚ ਹੀ ਇੱਕ ਗੋਲ ਦੀ ਬੜ੍ਹਤ ਦਿਵਾ ਦਿੱਤੀ।

ਇਸਤੋਂ ਬਾਅਦ ਭਾਰਤ ਵਲੋਂ ਰੁਪਿੰਦਰਪਾਲ ਸਿੰਘ ਅਤੇ ਰਘੁਨਾਥ ਨੇ ਪੇਨਲਟੀ ਕਾਰਨਰ ਜ਼ਰੀਏ ਦੋ-ਦੋ ਗੋਲ ਅਤੇ ਗੁਰਵਿੰਦਰ ਸਿੰਘ ਚੰਦੀ ਨੇ ਇੱਕ ਫ਼ੀਲਡ ਗੋਲ ਕਰਕੇ ਭਾਰਤ ਨੂੰ 6-0 ਨਾਲ ਮਜ਼ਬੂਤ ਬੜ੍ਹਤ ਦਿਵਾ ਦਿੱਤੀ। ਸਕੌਟਲੈਂਡ ਦੀ ਟੀਮ ਨੇ ਆਖਰੀ ਪਲਾਂ ਵਿੱਚ ਦੋ ਗੋਲ ਉਤਾਰ ਦਿੱਤੇ ਅਤੇ ਭਾਰਤ ਨੇ ਇਸ ਮੈਚ ਨੂੰ 6-2 ਨਾਲ ਜਿੱਤ ਲਿਆ। ਪੁਰਸ਼ਾਂ ਦੇ ਵਰਗ ਵਿੱਚ ਅੱਜ ਖੇਡੇ ਦੂਸਰੇ ਮੈਚਾਂ ´ਚ ਆਸਟ੍ਰੇਲੀਆ ਨੇ ਵੇਲਸ ਨੂੰ 7-1 ਨਾਲ ਅਤੇ ਮਲੇਸ਼ੀਆ ਨੇ ਕੈਨੇਡਾ ਨੂੰ 2-0 ਨਾਲ ਹਰਾਇਆ। ਭਾਰਤ ਦਾ ਅਗਲਾ ਮੈਚ ਹੁਣ 29 ਜੁਲਾਈ ਨੂੰ ਆਸਟ੍ਰੇਲੀਆ ਨਾਲ ਹੋਵੇਗਾ।

Bikramjit Singh (vicky moga)
vickymoga@hotmail.com
+358 503065677
Finland.

27/07/2014