ਫ਼ਿੰਨਲੈਂਡ 2 ਜੁਲਾਈ ( ਵਿੱਕੀ ਮੋਗਾ ) ਹਾਕੀ ਇੰਡੀਆ ਨੇ ਸਕੌਟਲੈਂਡ ਦੇ ਸ਼ਹਿਰ ਗਲਾਸਗੋ ਵਿੱਚ 23 ਜੁਲਾਈ ਤੋਂ 3 ਅਗਸਤ 2014 ਤੱਕ ਹੋਣ ਵਾਲੀਆਂ 20ਵੀਂਆਂ ਕਾਮਨਵੈਲਥ ਖੇਡਾਂ ਲਈ ਸੀਨੀਅਰ ਮਹਿਲਾ ਹਾਕੀ ਟੀਮ ਦਾ ਐਲਾਨ ਕੀਤਾ ਹੈ। ਪਟਿਆਲਾ ਦੇ ਐਨ.ਆਈ.ਐਸ ਵਿੱਚ 28-29 ਜੂਨ ਨੂੰ ਹੋਏ ਟ੍ਰਾਇਲਾਂ ਦੇ ਅਧਾਰ ਤੇ 16 ਮੈਂਬਰੀ ਟੀਮ ਦੀ ਚੋਣ ਬੀ.ਪੀ. ਗੋਵਿੰਦਾ, ਸ੍ਰ. ਹਰਬਿੰਦਰ ਸਿੰਘ , ਸ਼੍ਰੀਮਤੀ ਸੁਰਿੰਦਰ ਕੌਰ, ਹਾਈ ਪਰਫ਼ਾਰਮੈਂਸ ਡਾਇਰੈਕਟਰ ਰੋਲੈਂਟ ਓਲਟਮੈਂਨਸ, ਚੀਫ਼ ਕੋਚ ਨੀਲ ਹਾਵਗੁੱਡ ਅਤੇ ਤਕਨੀਕੀ ਸਲਾਹਕਾਰ ਮੈਥਿਊ ਟ੍ਰੇਡੇਰਾ ਨੇ ਕੀਤੀ।

ਟੀਮ ਦੀ ਕਪਤਾਨੀ 179 ਅੰਤਰਰਾਸ਼ਟਰੀ ਮੈਚ ਖੇਡੀ ਅਨੁਭਵੀ ਮਿੱਡਫੀਲਡਰ ਰਿੱਤੂ ਰਾਣੀ ਨੂੰ ਸੌਂਪੀ ਗਈ ਹੈ ਜਦਕਿ 126 ਅੰਤਰਰਾਸ਼ਟਰੀ ਮੈਚ ਖੇਡੀ ਦੀਪਿਕਾ ਨੂੰ ਉੱਪ-ਕਪਤਾਨ ਬਣਾਇਆ ਗਿਆ ਹੈ। ਟੀਮ 24 ਜੁਲਾਈ ਨੂੰ ਕੈਨੇਡਾ ਨਾਲ ਆਪਣਾ ਪਹਿਲਾ ਮੈਚ ਖੇਡੇਗੀ ਜਦਕਿ ਦੂਸਰਾ ਮੈਚ ਨਿਊਜ਼ੀਲੈਂਡ ਨਾਲ 27 ਜੁਲਾਈ ਨੂੰ ਹੋਵੇਗਾ, 28 ਜੁਲਾਈ ਨੂੰ ਟ੍ਰਿਨੀਡਾਡ ਅਤੇ ਟੋਬੈਗੋ ਨਾਲ ਅਤੇ 30 ਜੁਲਾਈ ਨੂੰ ਦੱਖਣੀ ਅਫ੍ਰੀਕਾ ਨਾਲ ਹੋਵੇਗਾ। ਟੀਮ 9 ਜੁਲਾਈ ਨੂੰ ਗਲਾਸਗੋ ਲਈ ਰਵਾਨਾ ਹੋ ਜਾਵੇਗੀ। ਕਾਮਨਵੈਲਥ ਖੇਡਾਂ ਲਈ 16 ਮੈਂਬਰੀ ਟੀਮ ਦੀ ਸੂਚੀ ਇਸ ਪ੍ਰਕਾਰ ਹੈ :- (ਗੋਲਕੀਪਰ) ਸਵਿਤਾ। (ਡੀਫੈਂਡਰ) ਦੀਪ ਗ੍ਰੇਸ ਇੱਕਾ, ਦੀਪਿਕਾ, ਕਿਰਨਦੀਪ ਕੌਰ, ਨਮਿਤਾ ਟੋਪੋ, ਜਸਪ੍ਰੀਤ ਕੌਰ। (ਮਿੱਡਫੀਲਡਰ) ਰਿੱਤੂ ਰਾਣੀ, ਸੁਸ਼ੀਲਾ ਚਾਨੂੰ, ਲਿਲਿਮਾ ਮਿੰਜ਼, ਵੰਦਨਾ ਕਟਾਰੀਆ, ਨਵਜੋਤ ਕੌਰ।( ਫ਼ਾਰਵਰਡ) ਰਾਣੀ ਰਾਮਪਾਲ, ਪੂਨਮ ਰਾਣੀ , ਰਿਤੁਸ਼ਾ ਆਰੀਆ, ਅਨੂਪਾ ਬਾਰਲਾ ਅਤੇ ਅਨੁਰਾਧਾ ਦੇਵੀ।

ਵਿੱਕੀ ਮੋਗਾ (ਫ਼ਿੰਨਲੈਂਡ)
Bikramjit Singh (vicky moga)
vickymoga@hotmail.com

+358 503065677
Finland.

02/07/2014