ਫ਼ਿੰਨਲੈਂਡ 12 ਜੂਨ (ਵਿੱਕੀ ਮੋਗਾ) ਨੀਦਰਲੈਂਡ ਦੇ ਸ਼ਹਿਰ ਹੇਗ ਵਿੱਚ ਅੱਜ ਖੇਡੇ ਗਏ ਮਹਿਲਾ ਹਾਕੀ ਵਿਸ਼ਵ ਕੱਪ ਦੇ ਪਹਿਲੇ ਸੈਂਮੀਫ਼ਾਈਨਲ ਮੈਚ ਵਿੱਚ ਆਸਟ੍ਰੇਲੀਆ ਨੇ ਇੱਕ ਫਸਵੇਂ ਮੁਕਾਬਲੇ ਦੌਰਾਨ ਵਿਸ਼ਵ ਦਰਜਾ ਨੰਬਰ 10 ਟੀਮ ਅਮਰੀਕਾ ਨੂੰ ਪੇਨਲਟੀ ਸ਼ੂਟ ਆਉਟ ਰਾਹੀਂ 3-1 ਨਾਲ ਹਰਾਕੇ ਪੰਜਵੀਂ ਵਾਰ ਵਿਸ਼ਵ ਕੱਪ ਦੇ ਫ਼ਾਈਨਲ ਵਿੱਚ ਆਪਣਾ ਸਥਾਨ ਪੱਕਾ ਕਰ ਲਿਆ ਹੈ।

ਨਿਰਧਾਰਿਤ ਸਮੇਂ ਤੱਕ ਦੋਨੋਂ ਟੀਮਾਂ 2-2 ਦੀ ਬਰਾਬਰੀ ਤੇ ਸਨ। ਅੱਜ ਖੇਡੇ ਗਏ ਇਸ ਮੁਕਾਬਲੇ ਵਿੱਚ ਅਮਰੀਕਾ ਦੀਆਂ ਮਹਿਲਾਵਾਂ ਨੇ ਹਾਕੀ ਰੂਸ ਆਸਟ੍ਰੇਲੀਆ ਨੂੰ ਕੜ੍ਹੀ ਟੱਕਰ ਦਿੱਤੀ। ਆਸਟ੍ਰੇਲੀਆ ਦੀ ਕੇੱਲੀ ਵਾਈਟ ਨੇ 33ਵੇਂ ਮਿੰਟ 'ਚ ਫ਼ੀਲਡ ਗੋਲ ਰਾਹੀਂ ਟੀਮ ਨੂੰ ਇੱਕ ਗੋਲ ਦੀ ਬੜ੍ਹਤ ਦਿਵਾ ਦਿੱਤੀ। ਮੈਚ ਦੇ ਦੂਸਰੇ ਅੱਧ ਵਿੱਚ ਅਮਰੀਕਾ ਦੀ ਟੀਮ ਨੇ ਜ਼ਬਰਦਸਤ ਖੇਡ ਦਾ ਪ੍ਰਦਰਸ਼ਨ ਕੀਤਾ ਅਤੇ 48ਵੇਂ ਮਿੰਟ ਵਿੱਚ ਕਿਲਸੇ ਕੋਲੋਜਿਜਚਿਕ ਨੇ ਫੀਲਡ ਗੋਲ ਰਾਹੀਂ ਟੀਮ ਨੂੰ ਬਰਾਬਰੀ ਦਿਵਾ ਦਿੱਤੀ। ਪਰ ਆਸਟ੍ਰੇਲੀਆ ਦੀ ਖ਼ੂਬਸੂਰਤ ਮੁਟਿਆਰ ਆਨਾ ਫਲਾਂਗਨ ਨੇ 52ਵੇਂ ਮਿੰਟ 'ਚ ਪੇਨਲਟੀ ਕਾਰਨਰ ਰਾਹੀਂ ਖੂਬਸੂਰਤ ਗੋਲ ਕਰਕੇ ਟੀਮ ਨੂੰ ਇੱਕ ਵਾਰ ਫੇਰ 2-1 ਨਾਲ ਅੱਗੇ ਲਿਆਂਦਾ।

ਦੂਸਰੇ ਪਾਸੇ ਅਮਰੀਕਾ ਨੇ ਵੀ ਹੌਸਲਾ ਨਾ ਹਾਰਿਆ ਅਤੇ ਲਗਾਤਾਰ ਹਮਲਾਵਰ ਰੁੱਖ ਅਪਣਾਉਦਿਆਂ ਹੋਇਆਂ ਮੈਚ ਖ਼ਤਮ ਹੋਣ ਤੋਂ ਮਹਿਜ਼ ਦੋ ਮਿੰਟ ਪਹਿਲਾਂ ਕਿਲਸੇ ਕੋਲੋਜਿਜਚਿਕ ਨੇ ਪੇਨਲਟੀ ਕਾਰਨਰ ਰਾਹੀਂ ਮੈਚ ਦਾ ਆਪਣਾ ਦੂਸਰਾ ਗੋਲ ਕਰਕੇ ਫ਼ਾਈਨਲ ਦੀਆਂ ਉਮੀਦਾਂ ਨੂੰ ਜਗਾਈ ਰੱਖਿਆ। ਮੈਚ ਦਾ ਫ਼ੈਸਲਾ ਪੇਨਲਟੀ ਸ਼ੂਟ ਆਉਟ ਰਾਹੀਂ ਹੋਇਆ ਜਿਸ ਵਿੱਚ ਆਸਟ੍ਰੇਲੀਆ ਨੇ ਅਮਰੀਕਾ ਨੂੰ 3-1 ਨਾਲ ਮਾਤ ਦੇਕੇ ਅਮਰੀਕਾ ਦੀਆਂ ਪਹਿਲੀ ਵਾਰ ਵਿਸ਼ਵ ਹਾਕੀ ਕੱਪ ਦੇ ਫ਼ਾਈਨਲ 'ਚ ਪਹੁੰਚਣ ਦੀਆਂ ਉਮੀਦਾਂ ਤੇ ਪਾਣੀ ਫੇਰ ਦਿੱਤਾ। ਦੂਸਰਾ ਸੈਂਮੀਫ਼ਾਈਨਲ ਮੈਚ ਅੱਜ ਦੇਰ ਸ਼ਾਮ ਨੀਦਰਲੈਂਡ ਅਤੇ ਅਰਜਨਟੀਨਾ ਦਰਮਿਆਨ ਖੇਡਿਆ ਜਾਵੇਗਾ।

ਵਿੱਕੀ ਮੋਗਾ (ਫ਼ਿੰਨਲੈਂਡ)
Bikramjit Singh (vicky moga)
vickymoga@hotmail.com

+358 503065677
Finland.

12/06/2014