ਫ਼ਿੰਨਲੈਂਡ 24 ਜੁਲਾਈ (ਵਿੱਕੀ ਮੋਗਾ) ਗਲਾਸਗੋ ਕਾਮਨਵੈਲਥ ਖੇਡਾਂ ਦੇ ਮਹਿਲਾ ਹਾਕੀ ਵਰਗ ਵਿੱਚ ਭਾਰਤ ਨੇ ਕੈਨੇਡਾ ਨੂੰ 4-2 ਨਾਲ ਹਰਾਕੇ ਪਹਿਲੇ ਮੈਚ ਵਿੱਚ ਤਿੰਨ ਅੰਕ ਹਾਸਿਲ ਕਰ ਲਏ ਹਨ। ਭਾਰਤ ਵਲੋਂ ਜਸਪ੍ਰੀਤ ਕੌਰ ਨੇ ਪੇਨਲਟੀ ਕਾਰਨਰ ਰਾਹੀਂ 2 ਗੋਲ ਕੀਤੇ ਜਦਕਿ ਰਾਣੀ ਰਾਮਪਾਲ ਅਤੇ ਪੂਨਮ ਰਾਣੀ ਨੇ ਇੱਕ-ਇੱਕ ਗੋਲ ਕੀਤਾ। ਅੱਧ ਸਮੇਂ ਤੱਕ ਭਾਰਤੀ ਟੀਮ 2-1 ਨਾਲ ਅੱਗੇ ਸੀ।

ਭਾਰਤ ਦੀ ਵੰਦਨਾ ਕਟਾਰੀਆ ਨੇ ਅੱਜ ਆਪਣਾ 100ਵਾਂ ਅੰਤਰਰਾਸ਼ਟਰੀ ਮੈਚ ਖੇਡਿਆ। ਮਹਿਲਾ ਵਰਗ `ਚ ਅੱਜ ਖੇਡੇ ਗਏ ਹੋਰ ਮੈਚਾਂ ਵਿੱਚ ਆਸਟ੍ਰੇਲੀਆ ਨੇ ਮਲੇਸ਼ੀਆ ਨੂੰ 4-0 ਨਾਲ, ਇੰਗਲੈਂਡ ਨੇ ਵੇਲਜ਼ ਨੂੰ 2-0 ਨਾਲ ਅਤੇ ਦੱਖਣੀ ਅਫਰੀਕਾ ਨੇ ਟ੍ਰਿਨੀਡਾਡ ਅਤੇ ਟੋਬੇਗੋ ਨੂੰ ਇਕ ਪਾਸੜ ਮੁਕਾਬਲੇ ਦੌਰਾਨ 16-0 ਨਾਲ ਰੌਂਦਿਆ। ਹੁਣ ਭਾਰਤੀ ਮਹਿਲਾ ਟੀਮ ਆਪਣਾ ਅਗਲਾ ਮੁਕਾਬਲਾ 27 ਜੁਲਾਈ ਨੂੰ ਨਿਉਜ਼ੀਲੈਂਡ ਖਿਲਾਫ਼ ਖੇਡੇਗੀ। ਪੁਰਸ਼ਾਂ ਦੇ ਵਰਗ ਵਿੱਚ ਭਾਰਤ ਆਪਣਾ ਪਹਿਲਾ ਮੈਚ 25 ਜੁਲਾਈ ਨੂੰ ਵੇਲਜ਼ ਨਾਲ ਖੇਡੇਗਾ।

Bikramjit Singh (vicky moga)
vickymoga@hotmail.com
+358 503065677
Finland.

24/07/2014