ਫ਼ਿੰਨਲੈਂਡ 22 ਜੁਲਾਈ (ਵਿੱਕੀ ਮੋਗਾ) ਸੰਗਰੂਰ ਦੇ ਵਾਰ ਹੀਰੋਜ਼ ਸਟੇਡੀਅਮ ਹਾਕੀ ਐਸਟ੍ਰੋਟਰਫ ਮੈਦਾਨ ਵਿੱਚ ਗੁਰਪਿੰਦਰ ਰਿੰਪੀ ਮੈਮੋਰੀਅਲ ਸਿਕਸ-ਏ-ਸਾਈਡ ਹਫਤਾਵਾਰੀ ਹਾਕੀ ਟੂਰਨਾਂਮੈਂਟ ਦੀ ਸ਼ੁਰੂਆਤ ਬੜ੍ਹੀ ਧੂਮਧਾਮ ਨਾਲ ਕੀਤੀ ਗਈ। ਟੂਰਨਾਂਮੈਂਟ ਦਾ ਉਦਘਾਟਨ ਗੁਰਪਿੰਦਰ ਰਿੰਪੀ ਦੇ ਪਿਤਾ ਅਤੇ ਮੁੱਖ ਮਹਿਮਾਨ ਸ੍ਰ. ਬਲਵੀਰ ਸਿੰਘ ਸਿੱਧੂ ਨੇ ਕੀਤਾ। ਟੂਰਨਾਂਮੈਂਟ ਦੌਰਾਨ ਅੱਜ 17 ਸਾਲ ਤੋਂ ਘੱਟ ਉਮਰ ਦੇ ਲੜਕਿਆਂ ਅਤੇ ਵੈਟਰਨ ਖਿਡਾਰੀਆਂ ਦੇ ਮੁਕਾਬਲੇ ਕਰਵਾਏ ਗਏ ਜਿਸ ਵਿੱਚ ਅੰਡਰ-17 ਦੇ ਖੇਡੇ ਗਏ ਪਹਿਲੇ ਮੈਚ ਵਿੱਚ ਨਗਨ ਬਾਬਾ ਸਾਹਿਬ ਦਾਸ ਹਾਕੀ ਅਕੈਡਮੀ ਸੰਗਰੂਰ ਨੇ ਰਾਂਚੀ ਰਾਇਨੋਰਜ਼ ਸੰਗਰੂਰ ਨੂੰ 3-1 ਨਾਲ ਹਰਾਇਆ ਜਦਕਿ ਪੰਜਾਬ ਵਾਰੀਅਰਜ਼ ਸੰਗਰੂਰ ਅਤੇ ਹਾਲੈਂਡ ਕਲੱਬ ਸੰਗਰੂਰ ਦਾ ਮੁਕਾਬਲਾ 2-2 ਦੀ ਬਰਾਬਰੀ ਤੇ ਰਿਹਾ। ਵੈਟਰਨ ਖਿਡਾਰੀਆਂ ਦਰਮਿਆਨ ਖੇਡੇ ਗਏ ਮੈਚਾਂ ਵਿੱਚ ਕਿਲਾ ਰਾਏਪੁਰ ਨੇ ਸੁਨਾਮ ਨੂੰ 14-5 ਦੇ ਵੱਡੇ ਫ਼ਰਕ ਨਾਲ ਹਰਾਇਆ ਜਦਕਿ ਦੂਸਰੇ ਮੈਚ ਵਿੱਚ ਪਟਿਆਲਾ ਨੇ ਸੰਗਰੂਰ ਨੂੰ ਕੜ੍ਹੇ ਮੁਕਾਬਲੇ ਦੌਰਾਨ 7-6 ਨਾਲ ਹਰਾਇਆ।

ਇਸ ਟੂਰਨਾਂਮੈਂਟ ਨੂੰ ਕਰਵਾਉਣ ਦਾ ਸਿਹਰਾ ਸ੍ਰ. ਜਸਵਿੰਦਰ ਸਿੰਘ ਲਾਲੀ, ਰਸ਼ਪਾਲ ਸਿੰਘ ਟੀਪੂ, ਸੰਜੇ ਕੁਮਾਰ, ਬਲਵੰਤ ਸਿੰਘ, ਗੁਰਪ੍ਰੀਤ,ਮਨੀ, ਪ੍ਰਿੰਸ ਅਤੇ ਮਲਕੀਤ ਸਿੰਘ ਦੇ ਸਿਰ ਰਿਹਾ। ਟੂਰਨਾਂਮੈਂਟ ਦੌਰਾਨ ਸ੍ਰ. ਗੁਰਮੀਤ ਸਿੰਘ , ਭੁਪਿੰਦਰ ਸਿੰਘ, ਜਤਿੰਦਰ ਸਿੰਘ, ਪ੍ਰਿਥਪਾਲ ਸਿੰਘ, ਅੰਗਰੇਜ਼ ਸਿੰਘ ,ਕੁਲਦੀਪ ਸਿੰਘ ਅਤੇ ਚਮਕੌਰ ਸਿੰਘ ਉਚੇਚੇ ਤੌਰ ਤੇ ਸ਼ਾਮਿਲ ਹੋਏ। ਟੂਰਨਾਂਮੈਂਟ ਦਾ ਅਗਲਾ ਦੌਰ ਅਗਲੇ ਹਫਤੇ ਦੇ ਅਖੀਰ ਵਿੱਚ ਖੇਡਿਆ ਜਾਵੇਗਾ।

22/07/2014