ਫ਼ਿੰਨਲੈਂਡ 2 ਜੁਲਾਈ (ਵਿੱਕੀ ਮੋਗਾ) ਸੰਗਰੂਰ ਦੇ ਗੋਲਡਨ ਅਰਥ ਗਲੋਬਲ ਸੀਨੀਅਰ ਸੈਂਕੰਡਰੀ ਸਕੂਲ ਦੀ 10ਵੀਂ ਕਲਾਸ ਦੀ ਵਿਦਿਆਰਥਣ ਹਰਲੀਨ ਕੌਰ ਲਹਿਲ ਨੇ ਪਿਛਲੇ ਦਿਨੀ ਲੁਧਿਆਣਾ ਦੇ ਪੀ.ਏ.ਯੂ. ਵਿੱਚ ਆਯੋਜਿਤ ਕੀਤੀ ਗਈ 39ਵੀਂ ਜੂਨੀਅਰ ਪੰਜਾਬ ਸਟੇਟ ਤੈਰਾਕੀ ਅਤੇ ਵਾਟਰ ਪੋਲੋ ਚੈਂਪੀਅਨਸ਼ਿਪ 2014 ਵਿੱਚ 6 ਸੋਨੇ ਅਤੇ 2 ਚਾਂਦੀ ਦੇ ਤਮਗੇ ਜਿੱਤ ਕੇ ਆਪਣੇ ਸਕੂਲ ਆਪਣੇ ਸ਼ਹਿਰ ਦਾ ਨਾਮ ਰੌਸ਼ਨ ਕੀਤਾ ਹੈ। ਇਹ ਹੀ ਨਹੀਂ ਬਲਕਿ 16 ਸਾਲਾਂ ਦੀ ਹਰਲੀਨ ਨੇ ਇਸ ਚੈਂਪੀਅਨਸ਼ਿਪ ਵਿੱਚ ਚਾਰ ਨਵੇਂ ਰਿਕਾਰਡ ਵੀ ਬਣਾਏ।

ਹਰਲੀਨ ਨੇ 50 ਮੀਟਰ ਬਰੈਸਟ ਸਟਰੋਕ 37.30 ਸੈਂਕਿੰਡ, 100 ਮੀਟਰ ਬਰੈਸਟ ਸਟਰੋਕ 1 ਮਿੰਟ 22 ਸੈਂਕਿੰਡ, 200 ਮੀਟਰ ਬਰੈਸਟ ਸਟਰੋਕ 3 ਮਿੰਟ, 200 ਅਤੇ 400 ਮੀਟਰ ਮੈਡਲੀ ਵਿੱਚ ਅਤੇ 200 ਮੀਟਰ ਰਿਲੇ ਵਿੱਚ ਪਹਿਲਾ ਸਥਾਨ ਹਾਸਿਲ ਕਰਕੇ 6 ਸੋਨੇ ਦੇ ਤਮਗੇ ਜਿੱਤੇ। ਹਰਲੀਨ ਕੌਰ ਨੇ 4 ਗੁਣਾ 100 ਅਤੇ 4 ਗੁਣਾ 200 ਰਿਲੇ ਵਿਚੋਂ ਦੋ ਚਾਂਦੀ ਦੇ ਤਮਗੇ ਵੀ ਜਿੱਤੇ। ਹਰਲੀਨ ਆਪਣੀਆਂ ਜਿੱਤਾਂ ਦਾ ਸਿਹਰਾ ਆਪਣੇ ਕੋਚ ਸ੍ਰ. ਬਲਬੀਰ ਸਿੰਘ, ਪਿਤਾ ਸ੍ਰ. ਰਬਿੰਦਰ ਸਿੰਘ ਲਹਿਲ, ਸ੍ਰ. ਤੇਜਿੰਦਰ ਵਾਲੀਆ ਅਤੇ ਸਕੂਲ ਦੇ ਪ੍ਰਿੰਸੀਪਲ ਅਤੇ ਸਾਰੇ ਸਟਾਫ਼ ਨੂੰ ਦਿੰਦੀ ਹੈ। ਹਰਲੀਨ ਅਨੁਸਾਰ ਉਸਦੀ ਕੜ੍ਹੀ ਮਿਹਨਤ ਅਤੇ ਕੋਚ ਸ੍ਰ. ਬਲਬੀਰ ਸਿੰਘ ਦੀ ਟ੍ਰੇਨਿਗ ਕਾਰਣ ਹੀ ਉਹ ਇਸ ਮੁਕਾਮ ਤੇ ਪਹੁੰਚੀ ਹੈ। ਗੌਰਤਲਬ ਰਹੇ ਕੇ ਹਰਲੀਨ ਪਹਿਲਾਂ ਵੀ ਕਈ ਇਨਾਮ ਜਿੱਤ ਚੁੱਕੀ ਹੈ ਅਤੇ ਉਸਨੇ ਮੈਕਸੀਕੋ 'ਚ ਹੋਈਆਂ ਪਿਛਲੀਆਂ ਅੰਤਰਰਾਸ਼ਟਰੀ ਸਕੂਲ ਖੇਡਾਂ ਵਿੱਚ ਭਾਰਤ ਵਲੋਂ ਪ੍ਰਤੀਨਿਧਤਾ ਕੀਤੀ ਸੀ।

ਵਿੱਕੀ ਮੋਗਾ (ਫ਼ਿੰਨਲੈਂਡ)
Bikramjit Singh (vicky moga)
vickymoga@hotmail.com

+358 503065677
Finland.

02/07/2014