ਫ਼ਿੰਨਲੈਂਡ 31 ਮਈ (ਵਿੱਕੀ ਮੋਗਾ) ਨੀਦਰਲੈਂਡ ਦੇ ਸ਼ਹਿਰ ਹੇਗ 'ਚ ਅੱਜ ਤੋਂ ਸ਼ੁਰੂ ਹੋਏ ਹਾਕੀ ਮਹਾਂਕੁੰਭ ਰੈਬੋਬੈਕ ਹਾਕੀ ਵਿਸ਼ਵ ਕੱਪ 2014 ਵਿੱਚ ਭਾਰਤ ਆਪਣਾ ਪਹਿਲਾ ਮੈਚ ਬੈਲਜੀਅਮ ਤੋਂ 2 ਦੇ ਮੁਕਾਬਲੇ 3 ਗੋਲਾਂ ਹਾਰ ਗਿਆ। ਅੱਜ ਦੇ ਮੈਚ ਵਿੱਚ ਭਾਰਤ ਨੇ ਆਪਣੀ ਸਾਲਾਂ ਤੋਂ ਹੋ ਰਹੀ ਪੁਰਾਣੀ ਗਲਤੀ ਨੂੰ ਦੁਹਰਾਉਦਿਆਂ ਹੋਇਆਂ ਇੱਕ ਵਾਰ ਫੇਰ ਅਖ਼ੀਰਲੇ ਮਿੰਟ ਵਿੱਚ ਗੋਲ ਖਾਕੇ ਮੈਚ ਗਵਾ ਦਿੱਤਾ।

ਕਿਓਸੇਰਾ ਸਟੇਡੀਅਮ ਵਿੱਚ ਖੇਡੇ ਗਏ ਇਸ ਮੈਚ ਦੇ ਪਹਿਲੇ ਅੱਧ ਵਿੱਚ ਬੈਲਜੀਅਮ ਪੂਰੀ ਤਰਾਂ ਨਾਲ ਭਾਰਤ ਤੇ ਹਾਵੀ ਰਿਹਾ। ਪਹਿਲੇ ਅੱਧ ਵਿੱਚ ਭਾਰਤ ਸਿਰਫ਼ ਗੋਲ ਬਚਾਉਣ ਵਿੱਚ ਹੀ ਰਿਹਾ। ਭਾਰਤ ਦੇ ਗੋਲਕੀਪਰ ਪੀ. ਆਰ. ਸ੍ਰੀਜੇਸ਼ ਨੇ ਸ਼ਾਨਦਾਰ ਖੇਡ ਦਾ ਪ੍ਰਦਰਸ਼ਨ ਕੀਤਾ ਪਰ ਅੱਧ ਸਮੇਂ ਦੀ ਖੇਡ ਖ਼ਤਮ ਹੋਣ ਤੋਂ ਮਹਿਜ਼ ਕੁਝ ਸੈਕਿੰਡ ਪਹਿਲਾ ਬੈਲਜੀਅਮ ਵਲੋਂ ਫਲੋਂਰਿੰਟ ਵਨ ਅਬੀਉਲ ਨੇ ਡਿਫ਼ਲੈਕਸ਼ਨ ਰਾਹੀਂ ਗੋਲ ਕਰਕੇ ਟੀਮ ਨੂੰ 1-0 ਦੀ ਬੜ੍ਹਤ ਦਿਵਾ ਦਿੱਤੀ। ਮੈਚ ਦੇ ਦੂਸਰੇ ਅੱਧ ਵਿੱਚ ਭਾਰਤੀ ਟੀਮ ਅਲੱਗ ਹੀ ਲੈਅ ਵਿੱਚ ਨਜਰ ਆਈ ਅਤੇ 45ਵੇਂ ਮਿੰਟ ਵਿੱਚ ਗੁਰਬਾਜ਼ ਸਿੰਘ ਦੁਆਰਾ ਬਣਾਏ ਸ਼ਾਨਦਾਰ ਮੂਵ ਨੂੰ ਧਰਮਵੀਰ ਸਿੰਘ ਦੇ ਦਿੱਤਾ ਹੋਏ ਪਾਸ ਨੂੰ ਮਨਦੀਪ ਸਿੰਘ ਨੇ ਗੋਲ ਵਿੱਚ ਬਦਲਕੇ ਭਾਰਤ ਨੂੰ ਬਰਾਬਰੀ ਤੇ ਲਿਆਂਦਾ ਜਦਕਿ 50ਵੇਂ ਮਿੰਟ ਵਿੱਚ ਰਘੁਨਾਥ ਦੇ ਸ਼ਾਨਦਾਰ ਲੰਬੇ ਪਾਸ ਨੂੰ ਅਕਾਸ਼ਦੀਪ ਸਿੰਘ ਨੇ ਡਿਫ਼ਲੈਕਸ਼ਨ ਰਾਹੀਂ ਬਾਲ ਨੂੰ ਗੋਲਾਂ ਵਿੱਚ ਪਹੁੰਚਾਂ ਕੇ ਭਾਰਤ ਨੂੰ ਇੱਕ ਗੋਲ ਦੀ ਬੜ੍ਹਤ ਵੀ ਦਿਵਾ ਦਿੱਤੀ। ਪਰ ਬੈਲਜੀਅਮ ਵਲੋਂ ਸਿਮੋਨ ਗੌਗਨਾਰਡ ਨੇ 56ਵੇਂ ਮਿੰਟ ਵਿੱਚ ਪੇਨਲਟੀ ਕਾਰਨਰ ਰਾਹੀਂ ਗੋਲ ਕਰਕੇ ਸਕੋਰ 2-2 ਕਰ ਦਿੱਤਾ। ਭਾਰਤ ਨੂੰ ਇਸ ਤੋਂ ਬਾਅਦ ਮੈਚ ਦਾ ਇਕੋ ਇੱਕ ਪੇਨਲਟੀ ਕਾਰਨਰ ਮਿਲਿਆ ਜਿਸ ਨੂੰ ਰਘੁਨਾਥ ਨੇ ਗੋਲਾਂ ਤੋਂ ਬਾਹਰ ਸੁੱਟ ਦਿੱਤਾ ਪਰ ਦੂਸਰੇ ਪਾਸੇ ਬੈਲਜੀਅਮ ਦੇ ਜੋਹਨ ਡੋਮੇਨ ਨੇ ਮੈਚ ਖ਼ਤਮ ਹੋਣ ਤੋਂ ਮਹਿਜ਼ 15 ਸੈਕਿੰਡ ਪਹਿਲਾ ਗੋਲ ਕਰਕੇ ਟੀਮ ਨੂੰ 3-2 ਨਾਲ ਜਿੱਤ ਦਿਵਾ ਦਿੱਤੀ। ਗਰੁੱਪ ਏ ਵਿੱਚ ਅੱਜ ਖੇਡੇ ਗਏ ਹੋਰ ਮੈਚਾਂ ਵਿੱਚ ਆਸਟ੍ਰੇਲੀਆ ਨੇ ਮਲੇਸ਼ੀਆ ਨੂੰ 4-0 ਨਾਲ ਹਰਾਇਆ ਜਦਕਿ ਸਪੇਨ ਅਤੇ ਇੰਗਲੈਂਡ ਵਿਚਕਾਰ ਮੁਕਾਬਲਾ 1-1 ਦੀ ਬਰਾਬਰੀ ਤੇ ਰਿਹਾ। ਹੁਣ ਭਾਰਤ ਆਪਣਾ ਅਗਲਾ ਮੈਚ 2 ਜੂਨ ਨੂੰ ਇੰਗਲੈਂਡ ਖਿਲਾਫ਼ ਖੇਡੇਗਾ।

ਵਿੱਕੀ ਮੋਗਾ (ਫ਼ਿੰਨਲੈਂਡ)
Bikramjit Singh (vicky moga)
vickymoga@hotmail.com

+358 503065677
Finland.

30/05/2014