ਰੈਬੋਬੈਂਕ ਮਹਿਲਾ ਵਿਸ਼ਵ ਹਾਕੀ ਕੱਪ 2014 ਦੇ ਫ਼ਾਈਨਲ ਦੀਆਂ ਟੀਮਾਂ ਦਾ ਫ਼ੈਸਲਾ ਹੋ ਚੁੱਕਾ ਹੈ। ਨੀਦਰਲੈਂਡ ਦੇ ਸ਼ਹਿਰ ਡੇਨ ਹਾਗ ਵਿੱਚ ਹੋ ਰਹੇ ਮਹਿਲਾ ਵਿਸ਼ਵ ਹਾਕੀ ਕੱਪ ਦੇ ਫ਼ਾਈਨਲ ਵਿੱਚ ਵਿਸ਼ਵ ਦੀ ਦਰਜ਼ਾ ਨੰਬਰ ਇੱਕ ਟੀਮ ਨੀਦਰਲੈਂਡ ਨੇ ਸਾਬਕਾ ਜੇਤੂ ਅਰਜਨਟੀਨਾ ਨੂੰ ਆਸਾਨੀ ਨਾਲ 4-0 ਨਾਲ ਹਰਾਕੇ ਵਿਸ਼ਵ ਕੱਪ ਦੇ ਫ਼ਾਈਨਲ ਵਿੱਚ 11ਵੀਂ ਵਾਰ ਪਹੁੰਚਣ ਦਾ ਮਾਣ ਹਾਸਿਲ ਕੀਤਾ ਹੈ। ਨੀਦਰਲੈਂਡ ਇਸਤੋਂ ਪਹਿਲਾ 6 ਵਾਰ ਇਸ ਕੱਪ ਨੂੰ ਜਿੱਤ ਚੁੱਕਾ ਹੈ ਅਤੇ 10 ਵਾਰ ਮਹਿਲਾ ਵਿਸ਼ਵ ਹਾਕੀ ਕੱਪ ਦਾ ਫ਼ਾਈਨਲ ਖੇਡ ਚੁੱਕਾ ਹੈ।

ਦੂਸਰੇ ਪਾਸੇ ਵਿਸ਼ਵ ਦੀ ਦਰਜ਼ਾ ਨੰਬਰ ਚਾਰ ਟੀਮ ਆਸਟ੍ਰੇਲੀਆ 5ਵੀਂ ਵਾਰ ਵਿਸ਼ਵ ਕੱਪ ਦੇ ਫ਼ਾਈਨਲ ਵਿੱਚ ਪਹੁੰਚੀ ਹੈ। ਸੈਂਮੀਫ਼ਾਈਨਲ 'ਚ ਆਸਟ੍ਰੇਲੀਆ ਨੂੰ ਵਿਸ਼ਵ ਦੀ ਦਰਜ਼ਾ ਨੰਬਰ 10 ਅਮਰੀਕਾ ਨੇ ਕੜ੍ਹੀ ਟੱਕਰ ਦਿੱਤੀ ਅਤੇ ਆਸਟ੍ਰੇਲੀਆ ਪੇਨਲਟੀ ਸ਼ੂਟ ਆਉਟ ਰਾਹੀਂ ਅਮਰੀਕਾ ਨੂੰ ਹਰਾਕੇ ਫ਼ਾਈਨਲ 'ਚ ਪਹੁੰਚਿਆ। ਆਸਟ੍ਰੇਲੀਆ ਇਸਤੋਂ ਪਹਿਲਾਂ ਦੋ ਵਾਰ ਵਿਸ਼ਵ ਕੱਪ ਨੂੰ ਜਿੱਤ ਚੁੱਕਾ ਹੈ। ਦੋਨੋਂ ਟੀਮਾਂ ਚੌਥੀ ਵਾਰ ਫ਼ਾਈਨਲ 'ਚ ਇੱਕ ਦੂਸਰੇ ਦੇ ਆਹਮੋ-ਸਾਹਮਣੇ ਹੋਣਗੀਆਂ। ਦੋਨੋਂ ਟੀਮਾਂ ਪਹਿਲੀ ਵਾਰ ਸਿਡਨੀ ਵਿੱਚ ਸੰਨ 1990 ਦੌਰਾਨ ਹੋਏ ਵਿਸ਼ਵ ਕੱਪ ਦੇ ਫ਼ਾਈਨਲ 'ਚ ਖੇਡੀਆਂ ਸਨ ਜਿਸ ਵਿੱਚ ਨੀਦਰਲੈਂਡ ਨੇ ਮੇਜ਼ਬਾਨ ਆਸਟ੍ਰੇਲੀਆ ਨੂੰ 3-1 ਨਾਲ ਹਰਾਕੇ ਬਾਜ਼ੀ ਜਿੱਤ ਲਈ ਸੀ। ਪਰ ਇਸਦਾ ਬਦਲਾ ਆਸਟ੍ਰੇਲੀਆ ਨੇ ਨੀਦਰਲੈਂਡ ਨੂੰ 1998 ਦੇ ਵਿਸ਼ਵ ਕੱਪ ਦੌਰਾਨ ਫ਼ਾਈਨਲ 'ਚ 3-2 ਨਾਲ ਉਸੇ ਦੀ ਧਰਤੀ ਤੇ ਹਰਾਕੇ ਲਿਆ।

ਇਸਤੋਂ ਬਾਅਦ ਸਪੇਨ ਦੇ ਸ਼ਹਿਰ ਮੈਡ੍ਰਿਡ ਵਿੱਚ 2006 ਦੇ ਵਿਸ਼ਵ ਕੱਪ ਦੇ ਫ਼ਾਈਨਲ ਮੁਕਾਬਲੇ 'ਚ ਦੋਨੋਂ ਟੀਮਾਂ ਇੱਕ ਦੂਸਰੇ ਦੇ ਆਹਮੋ-ਸਾਹਮਣੇ ਹੋਈਆਂ ਜਿਸ ਵਿੱਚ ਨੀਦਰਲੈਂਡ ਨੇ ਆਸਟ੍ਰੇਲੀਆ ਨੂੰ ਫੇਰ 3-1 ਨਾਲ ਹਰਾਕੇ ਵਿਸ਼ਵ ਕੱਪ ਤੇ ਕਬਜ਼ਾ ਕਰ ਲਿਆ। ਰੈਬੋਬੈਂਕ ਮਹਿਲਾ ਵਿਸ਼ਵ ਹਾਕੀ ਕੱਪ 2014 ਦਾ ਫ਼ਾਈਨਲ ਮੈਚ ਡੇਨ ਹਾਗ ਦੇ ਕਿਉਸੇਰਾ ਸਟੇਡੀਅਮ ਵਿੱਚ 14 ਜੂਨ ਨੂੰ ਬਾਅਦ ਦੁਪਹਿਰ ਖੇਡਿਆ ਜਾਵੇਗਾ। ਫ਼ਾਈਨਲ ਮੈਚ ਵਿੱਚ ਦੇਖਣਯੋਗ ਮਹੌਲ ਹੋਵੇਗਾ ਕਿ ਆਸਟ੍ਰੇਲੀਆ ਦੀ ਟੀਮ ਕਿਸ ਤਰਾਂ 15000 ਦੇ ਕਰੀਬ ਘਰੇਲੂ ਦਰਸ਼ਕਾਂ ਦੇ ਸ਼ੋਰ ਵਿੱਚ ਮੇਜ਼ਬਾਨ ਟੀਮ ਨੀਦਰਲੈਂਡ ਨੂੰ ਹਰਾਉਣ ਵਿੱਚ ਕਾਮਯਾਬ ਹੋਵੇਗੀ ਜਾਂ ਨੀਦਰਲੈਂਡ ਦੀ ਟੀਮ ਸੱਤਵੀਂ ਵਾਰ ਮਹਿਲਾ ਵਿਸ਼ਵ ਹਾਕੀ ਕੱਪ ਨੂੰ ਜਿੱਤਣ ਦਾ ਮਾਣ ਹਾਸਿਲ ਕਰੇਗੀ।

ਵਿੱਕੀ ਮੋਗਾ (ਫ਼ਿੰਨਲੈਂਡ)
Bikramjit Singh (vicky moga)
vickymoga@hotmail.com

+358 503065677
Finland.

14/06/2014