ਫ਼ਿੰਨਲੈਂਡ 25 ਜੁਲਾਈ (ਵਿੱਕੀ ਮੋਗਾ) ਗਲਾਸਗੋ ਕਾਮਨਵੈਲਥ ਖੇਡਾਂ ਦੇ ਪੁਰਸ਼ ਹਾਕੀ ਵਰਗ ਵਿੱਚ ਭਾਰਤ ਨੂੰ ਆਪਣੇ ਪਹਿਲੇ ਮੈਚ ਵਿੱਚ ਵੇਲਸ ਨੂੰ ਹਰਾਉਣ ਲਈ ਕਾਫੀ ਪਸੀਨਾ ਬਹਾਉਣਾ ਪਿਆ। ਭਾਰਤ ਨੇ ਇਹ ਮੈਚ ਭਾਵੇਂ 3-1 ਨਾਲ ਜਿੱਤ ਲਿਆ ਪਰ ਵਿਸ਼ਵ ਦੀ ਦਰਜ਼ਾ ਨੰਬਰ 31 ਟੀਮ ਵੇਲਸ ਨੇ ਭਾਰਤੀ ਟੀਮ ਨੂੰ ਕੜ੍ਹੀ ਚਨੌਤੀ ਦਿੱਤੀ। ਦੋਨਾਂ ਟੀਮਾਂ ਨੇ ਹਮਲਾਵਰ ਖੇਡ ਦਾ ਪ੍ਰਦਰਸ਼ਨ ਕੀਤਾ। ਕਪਤਾਨ ਸਰਦਾਰ ਸਿੰਘ ਦੀ ਸੇਨਾ ਨੂੰ ਪਹਿਲੇ ਅੱਧ ਵਿੱਚ ਕੋਈ ਸਮਝ ਹੀ ਨਹੀਂ ਆਈ ਕੇ ਕੀ ਹੋ ਰਿਹਾ ਹੈ।

ਭਾਰਤ ਵਲੋਂ ਮੈਚ ਦਾ ਪਹਿਲਾ ਗੋਲ ਰਘੁਨਾਥ ਨੇ 20ਵੇਂ ਮਿੰਟ ਵਿੱਚ ਪੇਨਲਟੀ ਕਾਰਨਰ ਰਾਹੀਂ ਕੀਤਾ ਜਦਕਿ ਤਿੰਨ ਮਿੰਟ ਬਾਅਦ ਹੀ ਵੇਲਸ ਵਲੋਂ ਕੋਰਨਿਕ ਨੇ ਬਰਾਬਰੀ ਦਾ ਗੋਲ ਠੋਕ ਦਿੱਤਾ। ਅੱਧ ਸਮੇਂ ਤੱਕ ਮੁਕਾਬਲਾ1-1 ਦੀ ਬਰਾਬਰੀ ਤੇ ਸੀ। ਮੈਚ ਦੇ ਦੂਸਰੇ ਅੱਧ ਵਿੱਚ ਭਾਰਤੀ ਟੀਮ ਨੇ ਮੈਚ ਨੂੰ ਪਕੜ੍ਹ ਵਿੱਚ ਲਿਆ ਅਤੇ 42ਵੇਂ ਮਿੰਟ ਵਿੱਚ ਰੁਪਿੰਦਰਪਾਲ ਸਿੰਘ ਨੇ ਪੇਨਲਟੀ ਕਾਰਨਰ ਰਾਹੀਂ ਅਤੇ 47 ਮਿੰਟ ਵਿੱਚ ਗੁਰਵਿੰਦਰ ਸਿੰਘ ਚੰਦੀ ਨੇ ਫ਼ੀਲਡ ਗੋਲ ਕਰਕੇ ਟੀਮ ਨੂੰ 3-1 ਨਾਲ ਜਿੱਤ ਦਿਵਾਈ। ਪਰ ਵੇਲਸ ਦੀ ਟੀਮ ਆਪਣੇ ਅੱਜ ਦੇ ਪ੍ਰਦਰਸ਼ਨ ਤੋਂ ਕਾਫ਼ੀ ਖੁਸ਼ ਨਜ਼ਰ ਆ ਰਹੀ ਸੀ।

ਭਾਵੇਂ ਭਾਰਤੀ ਟੀਮ ਨੇ ਵੇਲਸ ਦੇ ਗੋਲਾਂ ਤੇ ਕਾਫੀ ਹਮਲੇ ਕੀਤੇ ਪਰ ਵੇਲਸ ਟੀਮ ਦੇ ਗੋਲਕੀਪਰ ਨੇ ਅੱਜ ਸ਼ਾਨਦਾਰ ਪ੍ਰਦਰਸ਼ਨ ਦੁਆਰਾ ਕਾਫੀ ਗੋਲ ਬਚਾਏ। ਭਾਰਤ ਨੇ ਇਹ ਮੈਚ ਜਿੱਤ ਤਾਂ ਲਿਆ ਪਰ ਉਸਦੀ ਖੇਡ ਵਿਚ ਅਜੇ ਕਾਫੀ ਕਮਜ਼ੋਰੀਆਂ ਦਿਖਾਈ ਦਿੱਤੀਆਂ ਜਿਨ੍ਹਾਂ 'ਤੇ ਕੋਚ ਟੈਰੀ ਵਾਲਸ਼ ਅਤੇ ਖਿਡਾਰੀਆਂ ਨੂੰ ਸਖਤ ਮਿਹਨਤ ਕਰਨ ਦੀ ਲੋੜ ਹੈ। ਭਾਰਤ ਆਪਣਾ ਅਗਲਾ ਮੈਚ 26 ਜੁਲਾਈ ਨੂੰ ਸਕੌਟਲੈਂਡ ਨਾਲ ਖੇਡੇਗਾ ਜੋ ਆਪਣਾ ਅੱਜ ਦਾ ਮੈਚ ਦੱਖਣੀ ਅਫਰੀਕਾ ਤੋਂ 2-0 ਨਾਲ ਹਾਰ ਗਿਆ ਸੀ।

Bikramjit Singh (vicky moga)
vickymoga@hotmail.com
+358 503065677
Finland.

26/07/2014