ਫ਼ਿੰਨਲੈਂਡ 15 ਸਤੰਬਰ - ਦਿੱਲੀ ਦੇ ਉਪ ਮੁੱਖ ਮੰਤਰੀ ਅਤੇ ਸਿੱਖਿਆ ਮੰਤਰੀ ਸ਼੍ਰੀ ਮਨੀਸ਼ ਸਿਸੋਦੀਆ ਅੱਜ-ਕੱਲ ਆਪਣੇ ਵਫ਼ਦ ਸਮੇਤ ਫ਼ਿੰਨਲੈਂਡ ਦੇ ਦੌਰੇ ਤੇ ਆਏ ਹੋਏ ਹਨ। ਉਨ੍ਹਾਂ ਦਾ ਫ਼ਿੰਨਲੈਂਡ ਪਹੁੰਚਣ ਤੇ ਹੇਲਸਿੰਕੀ ਦੇ ਹਵਾਈ ਅੱਡੇ ਤੇ ਆਪ ਦੇ ਸਮਰਥਕਾਂ ਵਲੋਂ ਨਿੱਘਾ ਸਵਾਗਤ ਕੀਤਾ ਗਿਆ। ਫ਼ਿੰਨਲੈਂਡ ਪੁੱਜਣ ਤੋਂ ਬਾਅਦ ਪਹਿਲੇ ਦਿਨ ਫ਼ਿੰਨਲੈਂਡ ਦੇ ਆਮ ਆਦਮੀ ਪਾਰਟੀ ਦੇ ਵਰਕਰਾਂ ਨੇ ਉਨ੍ਹਾਂ ਨੂੰ ਹੇਲਿੰਕੀ ਅਤੇ ਆਸਪਾਸ ਦੇ ਕਈ ਅਹਿਮ ਸਥਾਨਾਂ ਹੇਲਸਿੰਕੀ ਦਾ ਚਿੱਟਾ ਚਰਚ, ਫਿੰਨਲੈਂਡੀਆ ਹਾਉਸ ਅਤੇ ਸੋਆਮੀਲੀਨਾ ਤੇ ਘੁਮਾਇਆ ਅਤੇ ਫ਼ਿੰਨਲੈਂਡ ਦਾ ਮਸ਼ਹੂਰ ਫਲ ਅਸਤਰਬੇਰੀ ਅਤੇ ਆਈਸਕਰੀਮ ਦਾ ਵੀ ਸਵਾਦ ਚਖਾਇਆ ਅਤੇ ਸ਼ਾਮ ਦਾ ਖਾਣਾ ਫ਼ਿੰਨਲੈਂਡ ਵਿੱਚ ਵਸਦੇ ਗਿੱਲ ਪਰਿਵਾਰ ਦੇ ਘਰ ਖਾਧਾ ਜਿਥੇ ਸਾਰੀ ਟੀਮ ਨੇ ਆਪ ਸਮਰਥਕਾਂ ਨਾਲ ਗੱਲਬਾਤ ਕੀਤੀ।

ਹੇਲਸਿੰਕੀ ਵਸਦੇ ਆਮ ਆਦਮੀ ਪਾਰਟੀ ਦੇ ਸਮਰੱਥਕ ਅਮਰਦੀਪ ਸਿੰਘ ਬਾਸੀ ਨੇ ਗੱਲਬਾਤ ਦੌਰਾਨ ਦੱਸਿਆ ਕਿ ਮਨੀਸ਼ ਸਿਸੋਦੀਆ ਅਤੇ ਉਨ੍ਹਾਂ ਦਾ ਵਫ਼ਦ ਦਿੱਲੀ ਸਰਕਾਰ ਵਲੋਂ ਫ਼ਿੰਨਲੈਂਡ ਦੇ ਸਕੂਲਾਂ ਦੇ ਪੜ੍ਹਾਈ ਦੇ ਤੌਰ ਤਰੀਕਿਆਂ ਬਾਰੇ ਜਾਣੂ ਹੋਣ ਲਈ ਫ਼ਿੰਨਲੈਂਡ ਦੇ ਦੌਰੇ ਤੇ ਆਏ ਹੋਏ ਹਨ ਜੋ ਫ਼ਿੰਨਲੈਂਡ ਦੇ ਅਲੱਗ - ਅਲੱਗ ਸਕੂਲਾਂ ਕਾਲਜਾਂ ਅਤੇ ਹੋਰ ਅਦਾਰਿਆਂ ਦਾ ਦੌਰਾ ਕਰਨਗੇ। ਉਨ੍ਹਾਂ ਇਹ ਵੀ ਦੱਸਿਆ ਕਿ ਫ਼ਿੰਨਲੈਂਡ ਵਿੱਚ ਕਿਸੇ ਆਪ ਨੇਤਾ ਦਾ ਪਹਿਲੀ ਵਾਰ ਆਉਣ ਤੇ ਫ਼ਿੰਨਲੈਂਡ ਵਿੱਚ ਵਸਦੇ ਆਪ ਸਮਰਥਕਾਂ ਦੇ ਜੋਸ਼ ਵਿੱਚ ਹੋਰ ਵਾਧਾ ਹੋਇਆ ਹੈ। ਆਪ ਫ਼ਿੰਨਲੈਂਡ ਵਲੋਂ ਆਉਣ ਵਾਲੇ ਸ਼ੁੱਕਰਵਾਰ ਨੂੰ ਮਨੀਸ਼ ਸਿਸੋਦੀਆ ਜੀ ਨਾਲ ਮੁਲਾਕਾਤ ਲਈ ਹੇਲਸਿੰਕੀ ਵਿੱਚ ਇੱਕ ਪ੍ਰੋਗਰਾਮ ਵੀ ਰੱਖਿਆ ਹੈ ਜਿੱਥੇ ਆਮ ਆਦਮੀ ਪਾਰਟੀ ਦੇ ਸਮਰਥੱਕ ਮਿਸ਼ਨ ਪੰਜਾਬ ਅਤੇ ਗੋਆ ਚੋਣਾਂ ਬਾਰੇ ਵਿਚਾਰ ਵਟਾਂਦਰਾ ਕਰਨਗੇ।

Bikramjit Singh
vickymoga@hotmail.com
+358 503065677
Finland.

15/09/16