ਪਿਛਲੇ ਦਿਨੀਂ ਜਦੋਂ ਨਵਾਂ ਜ਼ਮਾਨਾ ਦੇ ਸਹਿ-ਸੰਪਾਦਕ ਸੁਕੀਰਤ ਲੰਡਨ ਆਏ ਤਾਂ ਉਨ੍ਹਾਂ ਨਾਲ ਨਾਲ ਹੇਜ਼ ਦੇ ਪਿੰਕ ਸਿਟੀ ਰੈਸਟੋਰੈਂਟ ਵਿਚ ਇਕ ਯਾਦਗਾਰੀ ਮਿਲਣੀ ਦਾ ਆਯੋਜਨ ਕੀਤਾ ਗਿਆ। ਇਹ ਇਕੱਠ ਪੰਜਾਬੀ ਸਾਹਿਤ ਕਲਾ ਕੇਂਦਰ ਯੂ ਕੇ, ਲਿਖਾਰੀ ਸਭਾ ਸਲੋਹ ਅਤੇ ਅਦਾਰਾ 'ਸ਼ਬਦ' ਦੇ ਸੰਯੁਕਤ ਯਤਨਾਂ ਨਾਲ ਅਯੋਜਤ ਕੀਤਾ ਗਿਆ ਸੀ। ਨਾਲੋ ਨਾਲੋ ਪਿੰਕ ਸਿਟੀ ਦੇ ਲਜ਼ੀਜ਼ ਖਾਣੇ ਵੀ ਵਰਤਾਏ ਜਾਂਦੇ ਰਹੇ ਤੇ ਗੱਲਾਂ ਬਾਤਾਂ ਦਾ ਦੌਰ ਵੀ ਚਲਦਾ ਰਿਹਾ। ਪਰ ਖਾਣ ਪੀਣ ਅਤੇ ਗੱਲਾਂ ਬਾਤਾਂ ਦੇ ਸਿਲਸਿਲੇ ਤੋਂ ਪਹਿਲਾਂ ਕਾਮਰੇਡ ਜਗਜੀਤ ਸਿੰਘ ਆਨੰਦ ਦੇ ਦੁਖ਼ਦਾਈ ਵਿਛੋੜੇ ਵਾਰੇ ਸ਼ੋਕ ਮਤਾ ਪਾਸ ਕੀਤਾ ਗਿਆ ਤੇ ਇਕ ਮਿੰਟ ਦਾ ਮੋਨਵਰਤ ਰੱਖ ਕੇ ਆਨੰਦ ਜੀ ਵਰਗੇ ਪੰਜਾਬ ਦੇ ਸਯੋਗ ਸਪੂਤ ਨੂੰ ਸ਼ਰਧਾਂਜਲੀਂ ਦਿੱਤੀ ਗਈ।

ਕਾਮਰੇਡ ਆਨੰਦ ਨਾਲ ਬਿਤਾਈਆਂ ਕੁਝ ਯਾਦਾਂ ਸਾਂਝਿਆਂ ਕਰਦਿਆਂ ਡਾ.ਸਾਥੀ ਲੁਧਿਆਣਵੀ ਨੇ ਕਿਹਾ ਕਿ ‘ਪ੍ਰੀਤ ਲੜੀ’ ਪਰਵਾਰ ਵਾਂਗ ਆਨੰਦ ਪਰਵਾਰ ਪਰ ਖ਼ਾਸ ਕਰਕੇ ਉਰਮਿਲਾ ਜੀ ਅਤੇ ਆਨੰਦ ਜੀ ਨਾਲ ਉਨ੍ਹਾਂ ਦੇ ਗੂੜ੍ਹੇ ਸੰਬੰਧ ਸਨ। ਅਸੀਂ ਇੰਡੀਆ ਜਾਦੇ ਤਾਂ ਮਿਲਦੇ-ਘਰ ਵੀ ਜਾਂਦੇ। ਉਹ ਇਥੇ ਆਂਦੇ ਤਾਂ ਵੀ ਇੰਝੇ ਹੁੰਦਾ। ਸਾਥੀ ਜੀ ਨੇ ਦੱਸਿਆ ਕਿ ਇੰਡੀਆ ਵਿਚ ਇੰਦਰਾ ਗਾਂਧੀ ਵਲੋਂ ਲਾਈ ਗਈ ਐਮਰਜੈਂਸੀ ਦੇ ਸਮਿਆਂ ਵਿਚ ਜਦੋਂ ਉਹ ਭਾਰਤ ਗਏ ਤਾਂ ਜਗਜੀਤ ਸਿੰਘ ਆਨੰਦ ਜੀ ਨੇ 'ਔਲ ਇੰਡੀਆ ਰੇਡੀਓ' ਉਤੇ ਉਨ੍ਹਾਂ ਨੂੰ ਅੰਗਰੇਜ਼ੀ ਵਿਚ ਇੰਟਰਵਿਊ ਕੀਤਾ ਸੀ ਜਿਹੜੀ ਬਰਾਸਤਾ ਦਿੱਲੀ ਔਲ ਇੰਡੀਆਂ ਰੇਡੀਓ ਤੋਂ ਬਰਾਡਕਾਸਟ ਕੀਤੀ ਗਈ ਸੀ। ਕਾਮਰੇਡ ਸਰਵਣ ਸਿੰਘ ਜ਼ਫ਼ਰ ਉਨ੍ਹਾਂ ਲੋਕਾਂ ਵਿਚੋਂ ਹਨ ਜਿਹੜੇ ਜਗਜੀਤ ਸਿੰਘ ਆਨੰਦ ਦੇ ਬਹੁਤ ਹੀ ਨੇੜੇ ਸਨ। ਆਨੰਦ ਜੀ ਉਨ੍ਹਾਂ ਕੋਲ ਵੀ ਠਹਿਰਿਆ ਕਰਦੇ ਸਨ। ਜ਼ਫ਼ਰ ਜੀ ਨੇ ਕਿਹਾ ਕਿ ਉਨ੍ਹਾਂ ਵਾਸਤੇ ਆਨੰਦ ਜੀ ਦਾ ਚਲੇ ਜਾਣਾ ਅਤੀ ਹਿਰਦੇ ਵੇਧਕ ਹੈ। ਆਪ ਨੇ ਉਨ੍ਹਾਂ ਦੀਆਂ ਕੁਝ ਯਾਦਾਂ ਵੀ ਸਾਂਝੀਆਂ ਕੀਤੀਆਂ।