ਫ਼ਿੰਨਲੈਂਡ 20 ਅਪ੍ਰੈਲ  ਬੀਤੇ ਸਨਿੱਚਰਵਾਰ ਪੰਜਾਬ ਕਲਚਰਲ ਸੋਸਾਇਟੀ ਫ਼ਿੰਨਲੈਂਡ ਵਲੋਂ ਤਿੱਕੂਰੀਲਾ ਕਾਲਜ਼ ਵਿੱਚ ਵਿਸਾਖੀ ਮੇਲਾ ਬੜੀ ਧੂਮ-ਧਾਮ ਨਾਲ ਮਨਾਇਆ ਗਿਆ। ਜਿਸ ਵਿੱਚ ਭਾਰਤੀ ਸਫਾਰਤਖਾਨੇ ਦੇ ਰਾਜਦੂਤ ਸ਼੍ਰੀ ਅਸ਼ੋਕ ਕੁਮਾਰ ਸ਼ਰਮਾ ਅਤੇ ਓਨ੍ਹਾਂ ਦੇ ਨਾਲ ਚਾਂਸਲਰੀ ਦੇ ਮੁੱਖੀ ਸ਼੍ਰੀ ਸੁਨੀਲ ਬਵੇਜਾ ਨੇ ਵੀ ਆਪਣੇ ਪਰਿਵਾਰ ਸਮੇਤ ਸ਼ਿਰਕਿਤ ਕੀਤੀ। ਵਿਸਾਖੀ ਮੇਲੇ ਦੀ ਸ਼ੁਰੂਆਤ ਛੋਟੀ ਬੱਚੀ ਸਾਨੀਆ ਵਲੋਂ ਧਾਰਮਿਕ ਗੀਤ 'ਲੋਕੋ ਆਪਣੇ ਬੱਚਿਆਂ ਨੂੰ ਸਰਹੰਦ ਦਿਖਾ ਕੇ ਲਿਆਵੋ' ਨਾਲ ਕੀਤੀ ਗਈ। ਇਸ ਵਾਰ ਮੰਚ ਦਾ ਸੰਚਾਲਨ ਸੋਨੂੰ ਅਤੇ ਮੋਨੂੰ ਵਲੋਂ ਬੜੇ ਹੀ ਸੁਚੱਜੇ ਢੰਗ ਨਾਲ ਕੀਤਾ ਗਿਆ ਜਿਨ੍ਹਾਂ ਦਾ ਸਾਥ ਸ੍ਰ. ਅਮਰਦੀਪ ਸਿੰਘ ਬਾਸੀ ਅਤੇ ਫਿੰਨਿਸ਼ ਕੁੜੀ ਲਾਉਰਾ ਨੇ ਵੀ ਬਾਖੂਬੀ ਨਿਭਾਇਆ।

ਧਾਰਮਿਕ ਗੀਤ ਤੋਂ ਬਾਅਦ ਵਾਰੀ ਆਈ ਨਿੱਕੇ ਅਤੇ ਸੋਹਣੇ ਜਿਹੇ ਗੱਬਰੂਆਂ ਅਤੇ ਧੀਆਂ ਦੀ ਜਿਨ੍ਹਾਂ ਨੇ ਪੰਜਾਬੀ ਭੰਗੜਾ ਅਤੇ ਗਿੱਧਾ ਪੇਸ਼ ਕੀਤਾ ਜਿਨ੍ਹਾਂ ਦੀ ਗਿਣਤੀ ਇਸ ਵਾਰ ਸਟੇਜ ਉੱਤੇ ਪਿਛਲੀ ਵਾਰ ਨਾਲੋਂ ਤਿੱਗਣੀ ਸੀ, ਜਿਸ ਦਾ ਸਿਹਰਾ ਪੰਜਾਬ ਕਲਚਰਲ ਸੋਸਾਇਟੀ ਦੇ ਸਿਰ ਜਾਂਦਾ ਹੈ ਜੋ ਬੱਚਿਆਂ ਨੂੰ ਮਾਂ ਬੋਲੀ ਪੰਜਾਬੀ ਅਤੇ ਆਪਣੇ ਵਿਰਸੇ ਨਾਲ ਜੋੜਨ ਵਾਸਤੇ ਹਮੇਸ਼ਾ ਯਤਨਸ਼ੀਲ ਰਹੀ ਹੈ। ਮੇਲੇ ਦੌਰਾਨ ਬੌਲੀਬੀਟ, ਰਾਇਲ ਬੌਲੀਵੁੱਡ ਦਾ ਗਰੁੱਪ ਡਾਂਸ ਅਤੇ ਪੋਲੀਨਾ ਦਾ ਪੰਜਾਬੀ ਡਾਂਸ ਵੀ ਲੋਕਾਂ ਨੇ ਕਾਫ਼ੀ ਸਰਾਹਿਆ। ਹਮੇਸ਼ਾ ਦੀ ਤਰਾਂ ਇਸ ਵਾਰ ਵੀ ਧੀਆਂ ਪੰਜਾਬ ਦੀਆਂ ਨੇ ਗਿੱਧੇ ਵਿੱਚ ਭਾਂਬੜ ਮਚਾ ਦਿੱਤੇ ਤੇ ਤੰਨੂੰ ਸੈਣੀ ਦੁਆਰਾ ਤਿਆਰ ਕੀਤਾ ਗਿਆ ਮੈਜ਼ਿਕ ਡਾਂਸ ਵੀ ਬਾਖੂਬ ਸ਼ਲਾਘਾਯੋਗ ਰਿਹਾ। ਮੇਲੇ ਦੇ ਅਖੀਰ ਵਿੱਚ ਵਾਰੀ ਆਈ ਦੇਸੀ ਗੱਭਰੂਆਂ ਦੀ ਜਿਨ੍ਹਾਂ ਨੇ ਇਸ ਵਾਰ ਪੰਜਾਬ ਦੇ ਰਵਾਇਤੀ ਲੋਕ ਨਾਚ ਮਲਵਈ ਗਿੱਧੇ ਵਿੱਚ ਲੋਕ ਬੋਲੀਆਂ ਪਾਕੇ ਲੋਕਾਂ ਨੂੰ ਝੂਮਣ ਲਈ ਮਜ਼ਬੂਰ ਕਰ ਦਿੱਤਾ ਜਾ ਇਹ ਵੀ ਕਿਹਾ ਜਾ ਸਕਦਾ ਹੈ ਕਿ ਫਿੰਨਲੈਂਡ ਦੇ ਵਿਸਾਖੀ ਮੇਲੇ 2015 ਵਿੱਚ ਮਲਵਈ ਗਿੱਧਾ ਛਾਇਆ ਰਿਹਾ।

ਮਲਵਈ ਗਿੱਧੇ ਤੋਂ ਬਾਅਦ ਵਿੱਚ ਅਮਨ ਡੀਜੇ ਨੇ ਆਏ ਹੋਏ ਸਾਰੇ ਮੇਲੀਆਂ ਅਤੇ ਮੇਲਣਾ ਨੂੰ ਕਾਫੀ ਦੇਰ ਤੱਕ ਸਟੇਜ ਤੇ ਨਚਾਇਆ। ਮੇਲੇ ਦੌਰਾਨ ਪੀ.ਸੀ.ਐਸ ਵਲੋਂ ਪੰਜਾਬੀ ਖਾਣੇ ਅਤੇ ਪਿੰਨੀਆਂ ਦਾ ਵੀ ਪ੍ਰਬੰਧ ਕੀਤਾ ਗਿਆ ਸੀ ਜਿਸਦਾ ਸਾਰਿਆਂ ਨੇ ਖੂਬ ਲੁਤਫ਼ ਉਠਾਇਆ। ਪੰਜਾਬ ਕਲਚਰਲ ਸੋਸਾਇਟੀ ਫ਼ਿੰਨਲੈਂਡ ਦੇ ਪ੍ਰਧਾਨ ਸ੍ਰ. ਹਰਵਿੰਦਰ ਸਿੰਘ ਖਹਿਰਾ, ਮੀਤ ਪ੍ਰਧਾਨ ਭੁਪਿੰਦਰ ਸਿੰਘ ਬਰਾੜ, ਖਜਾਨਚੀ ਸ੍ਰ. ਰਣਜੀਤ ਸਿੰਘ ਗਿੱਲ, ਸਕੱਤਰ ਮਾਨਵ ਫੁੱਲ ਅਤੇ ਬੁਲਾਰਾ ਸ੍ਰ. ਅਮਰਦੀਪ ਸਿੰਘ ਬਾਸੀ ਨੇ ਸਹਿਯੋਗੀ ਸੱਜਣਾਂ ਦਾ ਧੰਨਵਾਦ ਕੀਤਾ ਅਤੇ ਆਉਣ ਵਾਲੇ ਸਮੇਂ ਵਿੱਚ ਆਪਣੇ ਵਿਰਸੇ-ਕਲਚਰ, ਆਪਣੀ ਬੋਲੀ ਅਤੇ ਖੇਡਾਂ ਨਾਲ ਬੱਚਿਆਂ ਨੂੰ ਜੋੜਨ ਵਾਸਤੇ ਪੀ.ਸੀ.ਐਸ ਦੇ ਯਤਨਾਂ ਨੂੰ ਹੋਰ ਤੇਜ਼ ਕਰਨ ਦਾ ਵਾਅਦਾ ਕੀਤਾ।