16 ਮਈ ਦੀ ਸੁਰਮੀਲੀ ਸ਼ਾਮ, ਮੌਸਮ ਬਹੁਤ ਖ਼ੁਬਸੂਰਤ ਸੀ, ਤਿੱਤਰਖੰਭੀ ਬੱਦਲ ਕਿਤੇ ਕਿਤੇ ਹਲਕੀ ਹਲਕੀ ਫ਼ੁਆਰ ਪਾ ਰਹੇ ਸਨ। ਸੈਂਟ ਥੌਮਸ ਚਰਚ ਦੇ ਅੰਦਰ ਮਹੌਲ ਬੜਾ ਰੰਗਦਾਰ ਸੀ, ਬੱਚੇ-ਵੱਡੇ ਭੰਗੜੇ ਅਤੇ ਗਿੱਧੇ ਦੀਆਂ ਰੰਗ-ਬਰੰਗੀਆਂ ਵਰਦੀਆਂ ਪਾ ਕੇ ਤਿਆਰ ਹੋ ਰਹੇ ਸਨ। ਛੋਟੇ ਛੋਟੇ ਬੱਚਿਆਂ 'ਤੇ ਤੁਰਲੇ ਵਾਲੀਆਂ ਪੱਗਾਂ, ਕੈਂਠੇ, ਕਢਾਈਦਾਰ ਝੱਗੇ, ਅਤੇ ਚਾਦਰੇ ਬੜੇ ਜਚ ਰਹੇ ਸਨ। ਬੱਚਿਆਂ ਅਤੇ ਤ੍ਰੀਮਤਾਂ 'ਤੇ ਰੰਗ-ਬਰੰਗੇ ਸੂਟ ਬੜਾ ਨਿਖਾਰ ਲਿਆ ਰਹੇ ਸਨ। ਅੱਜ ਬੋਸਟਨ ਦੇ ਇਲਾਕੇ ਵਿੱਚ ਪਹਿਲੀ ਵਾਰ ਵਿਸਾਖੀ ਮੇਲਾ ਮਨਾਇਆ ਜਾ ਰਿਹਾ ਸੀ। ਹਰ ਇੱਕ ਦੇ ਮਨ ਵਿੱਚ ਬੜਾ ਚਾ ਸੀ - ਰੰਗਾ ਰੰਗ ਪ੍ਰੋਗ੍ਰਾਮ ਵਾਸਤੇ ਉਹ ਕਈ ਮਹੀਨਿਆਂ ਤੋਂ ਲਗਾਤਾਰ ਭੰਗੜੇ ਅਤੇ ਗਿੱਧੇ ਦੀ ਤਿਆਰੀ ਕਰ ਰਹੇ ਸਨ। ਬੋਸਟਨ ਦੇ ਸਮੁੱਚੇ ਪੰਜਾਬੀ ਭਾਈਚਾਰੇ ਦੇ ਸਹਿਯੋਗ ਨਾਲ ਹੋ ਰਹੇ ਮੇਲੇ ਦਾ ਮੁੱਖ ਮਕਸਦ ਬੱਚਿਆਂ ਨੂੰ ਅਮੀਰ ਪੰਜਾਬੀ ਵਿਰਸੇ ਵਾਰੇ ਜਾਣਕਾਰੀ ਦੇਣਾ ਅਤੇ ਨਵੇਂ ਬਣ ਰਹੇ ਗੁਰਦਵਾਰਾ ਸਾਹਿਬ ਲਈ ਉਗਰਾਹੀ ਕਰਨਾ ਸੀ।

ਪ੍ਰੋਗ੍ਰਾਮ ਠੀਕ ਸਮੇਂ ਤੇ ਸ਼ੁਰੂ ਹੋ ਗਿਆ, ਸਟੇਜ ਸੈਕਟਰੀ ਕਿਰਨਦੀਪ ਅਤੇ ਜਸਲੀਨ ਕੌਰ ਨੇ ਸਭ ਤੋਂ ਪਹਿਲਾਂ ਬਾਜਾਂ ਵਾਲੇ ਸੰਤ ਸਿਪਾਹੀ ਨੂੰ ਯਾਦ ਕੀਤਾ। ਸਭ ਤੋਂ ਪਹਿਲਾਂ ਹਰਨੀਤ ਕੌਰ ਨੇ ਵਿਸਾਖੀ ਦੀ ਜਾਣਕਾਰੀ ਪੇਸ਼ ਕੀਤੀ - ਕਿਸ ਤਰ੍ਹਾਂ ਗੁਰੂ ਗੋਬਿੰਦ ਸਿੰਘ ਜੀ ਨੇ ਖ਼ਾਲਸਾ ਸਾਜਿਆ ਅਤੇ ਕਿਸ ਤਰ੍ਹਾਂ ਕਿਸਾਨ ਵੀਰ ਸੋਨੇ ਰੰਗੀ ਕਣਕ ਨੂੰ ਵੇਚ ਵਿਸਾਖੀ ਮਨਾਉਣ ਦੇ ਸੁਪਨੇ ਵੇਖਦੇ ਹਨ । ਹਰਮਨ ਦੀਪ ਸਿੰਘ ਅਤੇ ਹਰਦਿਆਲ ਸਿੰਘ ਨੇ ਗੁਰੂ ਗੋਬਿੰਦ ਸਿੰਘ ਜੀ ਅਤੇ ਸਿੰਘਾਂ ਦੀਆਂ ਸ਼ਹਾਦਤਾਂ ਬਿਆਨ ਕਰਦੇ, ਦਿਲ ਛੂਹਣ ਵਾਲੇ ਧਾਰਮਿਕ ਗੀਤ ਪੇਸ਼ ਕੀਤੇ। ਫੇਰ ਪੰਜਾਬੀ ਸੰਗੀਤ ਅਤੇ ਭੰਗੜੇ ਦੀਆਂ ਧਮਾਲਾਂ ਨੇ ਹਾਲ ਗੂੰਜਣ ਲਗਾ ਦਿੱਤਾ। ਸੋਹਣੀਆਂ ਪੁਸ਼ਾਕਾਂ ਵਿੱਚ ਸਜੇ ਛੋਟੇ ਛੋਟੇ ਬੱਚਿਆਂ ਦੀਆਂ ਟੀਮਾਂ (ਛੋਟੇ ਪਟਾਕੇ, ਪੰਜਾਬੀ ਫੁੱਲਝੜੀਆਂ, ਸਾਹਿਬ ਸਿੰਘ , ਅਮਿਤੋਜ, ਅਮਰੋਜ਼) ਨੇ ਬਹੁਤ ਹੀ ਸ਼ਾਨਦਾਰ ਭੰਗੜਾ ਪੇਸ਼ ਕੀਤਾ, ਜਿਸਨੂੰ ਦੇਖ ਕੇ ਦਰਸ਼ਕਾਂ ਦਾ ਮਨ ਗਦਗਦ ਕਰ ਉੱਠਿਆ। ਪੰਜਾਬੀ ਗੀਤਾਂ ਅਤੇ ਢੋਲ ਦੀ ਧਮਕ ਨਾਲ ਨੱਚਦੇ ਅਤੇ ਗਾਉਂਦੇ ਬੱਚੇ ਬਹੁਤ ਹੀ ਅਦਭੁਤ ਨਜ਼ਾਰਾ ਪੇਸ਼ ਕਰ ਰਹੇ ਸਨ। ਭੰਗੜੇ ਦੀਆਂ ਵੱਖ ਵੱਖ ਪੇਸ਼ਕਸ਼ਾਂ ਵਿੱਚ ਪੰਜ-ਛੇ ਸਾਲ ਤੋਂ ਲੈ ਕੇ ਵੀਹ-ਪੱਚੀ ਸਾਲ ਦੇ ਗਭਰੂਆਂ ਅਤੇ ਮੁਟਿਆਰਾਂ ਨੇ ਭਾਗ ਲਿਆ। ਨੱਚਦੇ ਹੋਏ ਛੋਟੇ ਛੋਟੇ ਬੱਚੇ ਬੜੇ ਹੀ ਪਿਆਰੇ ਲੱਗ ਰਹੇ ਸਨ! ਨੱਚਦੇ ਸ਼ੇਰ ਗਭਰੂਆਂ ਅਤੇ ਕੋਹਿਨੂਰ ਦੇ ਹੀਰੇ ਵਰਗੀਆਂ ਮੁਟਿਆਰਾਂ ਦੀ ਚਮਕ-ਦਮਕ ਅਦਭੁਤ ਸੀ! ਮਨਵੀਨ ਕੌਰ ਅਤੇ ਨਵਜੋਤ ਕੌਰ ਵਲੋਂ ਪੇਸ਼ ਸੰਮੀ ਨਾਚ, ਜੋ ਅਲੋਪ ਹੋ ਰਿਹਾ ਹੈ, ਦਾ ਵੱਖਰਾ ਹੀ ਜਲੌ ਸੀ। ਅੰਤ ਵਿੱਚ ਗਿੱਧੇ ਨੇ ਖੂਬ ਰੰਗ ਬੰਨ੍ਹਿਆ। ਇਸਤੋਂ ਇਲਾਵਾ ਹਲਕੇ ਫੁਲਕੇ ਮਜ਼ਾਕੀਆ ਸਕਿੱਟਾਂ ਅਤੇ ਗੀਤ-ਸੰਗੀਤ ਨੇ ਵੀ ਮਾਹੌਲ ਨੂੰ ਖ਼ੁਸ਼ਗਵਾਰ ਬਣਾਇਆ।