ਟੂ ਆਰਜ਼ ਸੈਂਟਰ ਦੇ ਪੰਜਾਬੀ ਭਵਨ ਵੁਲਵਰਹੈਂਪਟਨ ਵਿਖੇ ਪ੍ਰਗਤੀਸ਼ੀਲ ਲਿਖਾਰੀ ਸਭਾ ਜੀਬੀ ਬਰਮਿੰਘਮ ਅਤੇ ਸੈਂਡਵੈਲ ਬ੍ਰਾਂਚ ਵਲੋਂ ਇਕ ਸਾਹਿਤਕ ਸਮਾਗਮ ਸਮੇਂ ਇਕ ਗ਼ਜ਼ਲ ਦਰਬਾਰ ਕਰਵਾਇਆ ਗਿਆ। ਪ੍ਰੋਗਰਾਮ ਦੇ ਸ਼ੁਰੂ ਵਿਚ ਵਿਛੌੜਾ ਦੇ ਚੁੱਕੇ ਸਾਹਿਤਕਾਰ ਅਤੇ ਨਿਪਾਲ ਵਿਚ ਆਏ ਭੁਚਾਲ ਨਾਲ ਜਾਨ ਦੇ ਚੁੱਕੇ ਹਜਾਰਾਂ ਦੀ ਰੂਹ ਦੀ ਸ਼ਾਂਤੀ ਵਾਸਤੇ ਇਕ ਮਿੰਟ ਮੋਨ ਧਾਰਿਆ ਗਿਆ। ਇਸ ਸਮਾਗਮ ਵਿਚ ਇੰਗਲੈਂਡ ਦੇ ਸਥਾਪਤ ਅਤੇ ਪ੍ਰਤੀਨਿੱਧ ਸਾਹਿਤਕਾਰਾਂ ਨੇ ਭਾਗ ਲਿਆ।

ਪਹਿਲੇ ਭਾਗ ਵਿਚ ਡਾ: ਰਤਨ ਰੀਹਲ ਨੇ ਗ਼ਜ਼ਲਗੋ ਗੁਰਸ਼ਰਨ ਸਿੰਘ ‘ਅਜੀਬ’ ਦੇ ਗ਼ਜ਼ਲ-ਸੰਗ੍ਰਹਿ ‘ਪੁਸ਼ਪਾਂਜਲੀ’ ਉਪਰ ਇਕ ਆਲੋਚਨਾ ਪੱਤਰ ਪੜ੍ਹਿਆ। ਹਾਜਰ ਵਿਦਵਾਨਾਂ ਨੇ ਇਸ ਆਲੋਚਨਾ ਪੱਤਰ ਦੇ ਆਧਾਰ ਉਪਰ ਵਰਤਮਾਨ ਸਮੇਂ ਵਿਚ ਪੰਜਾਬੀ ਵਿਚ ਲਿਖੀ ਜਾਂਦੀ ਗ਼ਜ਼ਲ ਨੂੰ ਉਰਦੂ ਵਿਚ ਲਿਖੀ ਜਾਂਦੀ ਗ਼ਜ਼ਲ ਦੇ ਬਰਾਬਰ ਦਾ ਦਰਜਾ ਦਿੰਦੇ ਹੋਏ ਆਖਿਆ ਕਿ ਪੰਜਾਬੀ ਕੋਲ ਵੀ ਗ਼ਜ਼ਲਮਈ ਸ਼ਬਦਾਵਲੀ ਉਪਲਲਲੱਬਧ ਹੈ। ਸਿਰਫ ਉਸਦੀ ਯੋਗ ਵਰਤੋਂ ਕਰਨ ਵਾਲੇ ਗ਼ਜ਼ਲਗੋ ਹੀ ਚਾਹੀਦੇ ਹਨ। ਆਲੋਚਨਾ ਪੱਤਰ ਬਾਰੇ ਆਪਣੇ ਵਿਚਾਰ ਦਸਣ ਵਾਲੇ ਸਨ ਜਿਵੇਂ ਡਾ: ਸਾਥੀ ਲੁਧਿਆਣਵੀ, ਡਾ: ਬਲਦੇਵ ਸਿੰਘ ਕੰਦੋਲਾ, ਪ੍ਰੋ: ਸੁਰਜੀਤ ਸਿੰਘ ਖਾਲਸਾ, ਕੇਵਲ ਸਿੰਘ ਅਨੰਦ, ਇੰਦਰਜੀਤ ਸਿੰਘ ਜੀਤ, ਬਲਵੰਤ ਸਿੰਘ ਬੈਂਸ ਅਤੇ ਕੈਨੇਡਾ ਨਿਵਾਸੀ ਨਦੀਮ ਪਰਮਾਰ ਸਮੇਤ ਸਭ ਵਿਦਵਾਨਾਂ ਨੇ ਆਲੋਚਨਾ ਪੱਤਰ ਨੂੰ ‘ਪੁਸ਼ਪਾਂਜਲੀ’ ਗ਼ਜ਼ਲ-ਸੰਗ੍ਰਹਿ ਦੀ ਸਹੀ ਤਸਵੀਰ ਪੇਸ਼ ਕਰਦਾ ਮੰਨਿਆ। ਕਿਉਂ ਕਿ ਨਦੀਮ ਪਰਮਾਰ ਪੰਜਾਬੀ ਗ਼ਜ਼ਲ ਦੇ ਖੇਤਰ ਵਿਚ ਮੁਹਰਲੀ ਕਤਾਰ ਵਿਚ ਖੜੇ ਹਨ ਉਨ੍ਹਾਂ ਵਲੋਂ ਵੀ ਇਸ ਆਲੋਚਨਾ ਪੱਤਰ ਦੀ ਲਿਖਣ ਪ੍ਰੀਕਿਰਿਆ ਬਾਰੇ ਭਰਵੀਂ ਹਮਾਇਤ ਕੀਤੀ ਗਈ।

ਦੂਸਰੇ ਸੈਸ਼ਨ ਵਿਚ ਮੋਹਨ ਸਿੰਘ ਕੁੱਕੜਪਿੰਡੀਆ ਦੇ ਨਾਵਲ ‘ਛੱਲਾ’ ਨੂੰ ਰੀਲੀਜ ਕੀਤਾ ਗਿਆ। ਕੈਨੇਡਾ ਨਿਵਾਸੀ ਗ਼ਜ਼ਲਗੋ ਨਦੀਮ ਪਰਮਾਰ ਨਾਲ ਹਾਜਰ ਸਾਹਿਤਕਾਰ ਰੂ-ਬਰੂ ਹੋਏ। ਨਦੀਮ ਪਰਮਾਰ ਜੀ ਨੇ ਆਪਣੇ ਜੀਵਨ ਕਾਲ ਦੇ ਨਾਲ ਨਾਲ ਗ਼ਜ਼ਲ ਸਿਨਫ ਵਿਚ ਆਈ ਚੜ੍ਹਤ ਦੇ ਭੇਦ ਦਸਦਿਆਂ ਪੂਰਾ ਇਕ ਘੰਟਾ ਆਪਣੀਆਂ ਬਹੁਤ ਚਰਚਤ ਗ਼ਜ਼ਲਾਂ ਪੜ੍ਹੀਆ। ਹਾਜਰ ਵਿਦਵਾਨ ਲੁਤਫ ਅੰਦੋਜ਼ ਹੋਏ। ਗੁਰਸ਼ਰਨ ਸਿੰਘ ‘ਅਜੀਬ’ ਨੂੰ ਉਨ੍ਹਾਂ ਦੇ ਦੋ ਕਲਾਤਮਕ ਗ਼ਜ਼ਲ-ਸੰਗ੍ਰਿਹਾਂ ‘ਕੂੰਜਾਵਲੀ ਅਤੇ ਪੁਸ਼ਪਾਂਜਲੀ’ ਦੇ ਸੰਦਰਭ ਵਿਚ ਸਨਮਾਨਤ ਕੀਤਾ ਗਿਆ ਅਤੇ ਕੈਨੇਡਾ ਨਿਵਾਸੀ ਗ਼ਜ਼ਲਗੋ ਨਦੀਮ ਪਰਮਾਰ ਨੂੰ ‘ਗ਼ਜ਼ਲ ਦਾ ਬਾਬਾ ਬੋੜ੍ਹ’ ਦੀ ਪੱਦਵੀ ਦੇ ਕੇ ਸਨਮਾਨਤ ਕੀਤਾ ਗਿਆ। ਇਹ ਸਨਮਾਨ ਪੱਤਰ ਬਲੈਕਨ-ਹਾਲ ਇਸਟੇਟ ਦੇ ਮਾਲਕ ਜਗੀਰ ਸਿੰਘ ਦੁਦਰਾ ਜੀ ਨੇ ਆਪਣੇ ਹੱਥੀ ਪ੍ਰਦਾਨ ਕੀਤੇ।

ਅੰਤ ਵਿਚ ਇਕ ਯਾਦਗਾਰੀ ਗ਼ਜ਼ਲ-ਦਰਬਾਰ ਕੀਤਾ ਗਿਆ ਜਿਸ ਵਿਚ ਭਾਗ ਲੈਣ ਵਾਲੇ ਗ਼ਜ਼ਲਗੋ ਸਨ ਜਿਵੇਂ:ਟੀਵੀ ਸਟਾਰ ਤੇਜਕੋਟਲਾ ਵਾਲਾ, ਜੰਡੂਲਿਤਰਾਂਵਾਲਾ, ਜਸਪਾਲ ਸਿੰਘ ਝੀਤਾ, ਡਾ: ਰਤਨ ਰੀਹਲ, ਜਸਵਿੰਦਰ ਸਿੰਘ ਜਾਲਫ ਅਤੇ ਮਨਜੀਤ ਸਿੰਘ ਕਮਲਾ ਆਦਿ ਦੇ ਨਾਲ ਨਾਲ ਡਾ: ਸਾਥੀ ਲੁਧਿਆਣਵੀ, ਗ਼ਜ਼ਲਗੋ ਗੁਰਸ਼ਰਨ ਸਿੰਘ ‘ਅਜੀਬ, ਚਰਨਜੀਤ ਰਿਆਤ, ਗ਼ਜ਼ਲਗੋ ਨਦੀਮ ਪਰਮਾਰ, ਕੇਵਲ ਸਿੰਘ ਅਨੰਦ, ਪ੍ਰੋ: ਸੁਰਜੀਤ ਸਿੰਘ ਖਾਲਸਾ, ਬਲਵੰਤ ਸਿੰਘ ਬੈਂਸ, ਚਰਨਜੀਤ ਰਿਆਤ, ਮਾਸਟਰ ਕ੍ਰਿਸ਼ਨ ਕੁਮਾਰ ਚੌਹਾਨ, ਗ਼ਜ਼ਲਗੋ ਭੂਪਿੰਦਰ ਸੱਗੂ, ਅਮਰ ਜੋਤੀ ਹੀਰ, ਸੁਰਿੰਦਰ ਸਿੰਘ ਸਾਗਰ (ਰੇਡੀਓ ਪਰਜੈਂਟਰ), ਮੁਹਿੰਦਰ ਸਿੰਘ ਦਿਲਬਰ, ਸਤਿੰਦਰਪਾਲ ਸਿੰਘ, ਸੰਤੋਖ ਸਿੰਘ ਹੇਅਰ, ਅਛਰ ਖਰਲਵੀਰ, ਰਜਿੰਦਰ ਸਿੰਘ ਰਾਣਾਕੰਗਾਂਵਾਲਾ ਆਦਿ ਨੇ ਆਪਣੀਆਂ ਮਾਸਟਰ ਪੀਸ ਗ਼ਜ਼ਲਾਂ ਸੁਣਾਈਆਂ।

ਗ਼ਜ਼ਲਗੋ ਭੂਪਿੰਦਰ ਸਿੰਘ ਸੱਗੂ ਨੇ ਪਹਿਲੇ ਭਾਗ ਦੀ ਸਟੇਜ ਦੀ ਕਾਰਵਾਈ ਬਾਖੂਬੀ ਨਿਭਾਈ ਅਤੇ ਦੂਜੇ ਭਾਗ ਸਮੇਂ ਡਾ: ਰਤਨ ਰੀਹਲ ਜੀ ਨੇ ਸਿਲਸਿਲੇਵਾਰ ਹਾਜਰ ਸਾਹਿਤਕਾਰਾਂ ਨੂੰ ਯੋਗ ਦਰਜਾ ਦਿੰਦਿਆਂ ਸਟੇਜ ਸੰਚਾਲਨ ਕੀਤਾ। ਸਵਾਦਿਸ਼ਟ ਖਾਣੇ ਨਾਲ ਇਹ ਸਮਾਗਮ ਬੜੀ ਗਹਿਮਾਂ ਗਹਿਮੀ ਨਾਲ ਸਮਾਪਤ ਹੋਇਆ।

ਡਾ: ਰਤਨ ਰੀਹਲ
ਸਕੱਤਰ ਪ੍ਰਗਤੀਸ਼ੀਲ ਲਿਖਾਰੀ ਸਭਾ