ਇਟਲੀ - ਸਿੱਖੀ ਸੇਵਾ ਸੋਸਾਇਟੀ ਵੱਲੋਂ ਆਪਣੀ ਚੌਥੀ ਵਰ੍ਹੇਗੰਢ ਨੂੰ ਸਮਰਪਿਤ ਕੀਰਤਨ ਮੁਕਾਬਲਿਆਂ ਦਾ ਸਮਾਗਮ ਕਰਵਾਇਆ ਗਿਆ ਜਿਸ ਵਿੱਚ ਇਟਲੀ ਅਤੇ ਯੂਰਪ ਦੇ ਵੱਖ ਵੱਖ ਗੁਰਦਵਾਰਾ ਸਾਹਿਬ ਤੋਂ ਬੱਚਿਆਂ ਦੇ ਕੀਰਤਨੀ ਜਥਿਆਂ ਨੇ ਬੜੇ ਉਤਸ਼ਾਹ ਨਾਲ ਭਾਗ ਲਿਆ। ਸਵੇਰ ਵੇਲੇ ਤੋਂ ਹੀ ਕੀਰਤਨੀ ਜਥੇ ਪੁੱਜਣੇ ਸ਼ੁਰੂ ਹੋ ਗਏ ਸਨ। ਨਿੱਕੇ ਨਿੱਕੇ ਬੱਚੇ ਕੇਸਰੀ ਅਤੇ ਨੀਲੇ ਦੁਮਾਲੇ ਸਜਾਏ ਹੋਏ ਬਹੁਤ ਫਬ ਰਹੇ ਸਨ। ਬੱਚਿਆਂ ਵਿੱਚ ਕੀਰਤਨ ਮੁਕਾਬਲਿਆਂ ਨੂੰ ਲੈ ਕੇ ਇੱਕ ਵੱਖਰੀ ਤਰਾਂ ਦਾ ਜੋਸ਼ ਅਤੇ ਉਤਸ਼ਾਹ ਦੇਖਣ ਨੂੰ ਮਿਲ ਰਿਹਾ ਸੀ।

ਸੰਗਤਾਂ ਵੀ ਬਹੁਤ ਵੱਡੀ ਗਿਣਤੀ ਵਿੱਚ ਗੁਰਦਵਾਰਾ ਸਾਹਿਬ ਵਿਖੇ ਪਹੁੰਚੀਆਂ। ਜਿਹਨਾਂ ਨੇ ਬਹੁਤ ਸ਼ਾਂਤਮਈ ਹੋ ਕੇ ਕੀਰਤਨ ਮੁਕਾਬਲਿਆਂ ਦੌਰਾਨ ਕੀਰਤਨ ਸਰਵਣ ਕੀਤਾ। ਸਭ ਜਥੇ ਪੂਰੀ ਤਿਆਰੀ ਨਾਲ ਆਏ ਸਨ। ਜਿਸ ਕਰਕੇ ਮੁਕਾਬਲੇ ਬਹੁਤ ਸਖਤ ਸਨ। ਇਸ ਕੀਤਰਨ ਮੁਕਾਬਲੇ ਦਿਨ ਦੇ 11 ਵਜੇ ਅਰਦਾਸ ਉਪਰੰਤ ਹੁਕਮਨਾਮਾ ਸਰਵਣ ਕਰਨ ਤੋਂ ਬਾਅਦ ਸ਼ੁਰੂ ਹੋ ਰਾਤ ਦੇ ਅੱਠ ਵਜੇ ਤੱਕ ਚੱਲੇ। ਇਟਲੀ ਦੇ ਵੀਹ ਤੋਂ ਵੱਧ ਗੁਰਦਵਾਰਾ ਸਾਹਿਬ ਅਤੇ ਗਤਕਾ ਅਕੈਡਮੀਆਂ ਇਸ ਸਮਾਗਮ ਵਿੱਚ ਹੁੰਮ ਹੁੰਮਾ ਕੇ ਪੁੱਜੇ। ਜਰਮਨੀ ਅਤੇ ਸਪੇਨ ਤੋਂ ਵੀ ਦੋ ਜਥੇ ਕੀਰਤਨ ਮੁਕਾਬਲੇ ਵਿੱਚ ਭਾਗ ਲੈਣ ਲਈ ਵਿਸ਼ੇਸ਼ ਤੌਰ ‘ਤੇ ਪੁੱਜੇ। ਕੀਰਤਨ ਮੁਕਾਬਲਿਆਂ ਵਿੱਚ ਇਸ ਸਾਲ ਕੀਰਤਨੀ ਜਥਿਆਂ ਦੀ ਗਿਣਤੀ ਜਿਆਦਾ ਹੋਣ ਕਰਕੇ ਅਤੇ ਬੱਚਿਆਂ ਦੀ ਕੀਤੀ ਮਿਹਨਤ ਕਰਕੇ ਮੁਕਾਬਲਾ ਬਹੁਤ ਜਿਆਦਾ ਸਖਤ ਸੀਜਥੇਦਾਰ ਗੁਰਦਿਆਲ ਸਿੰਘ ਫ੍ਰਾਂਸ ਵੀ ਇਸ ਮੌਕੇ ਪੈਰਿਸ ਤੋਂ ਉਚੇਚੇ ਤੌਰ ‘ਤੇ ਹਾਜ਼ਰ ਹੋਏ। ਜਿਸ ਕਰਕੇ ਸਾਰਾ ਦਿਨ ਦੇਰ ਰਾਤ ਤੱਕ ਗੁਰਦਵਾਰਾ ਸਿੰਘ ਸਭਾ ਨੋਵੇਲਾਰਾ ਵਿਖੇ ਸੰਗਤਾਂ ਦੀਆਂ ਰੌਣਕਾਂ ਲੱਗੀਆਂ ਰਹੀਆਂ।

ਸਿੱਖੀ ਸੇਵਾ ਸੋਸਾਇਟੀ ਵੱਲੋਂ ਆਈਆਂ ਹੋਈਆਂ ਸੰਗਤਾਂ, ਕੀਰਤਨੀ ਜਥੇ ਅਤੇ ਹੋਰ ਪੰਥਕ ਸ਼ਖਸ਼ੀਅਤਾਂ ਅਤੇ ਗੁਰਦਵਾਰਾ ਸਾਹਿਬ ਨੋਵੇਲਾਰਾ ਦਾ ਇਹਨਾਂ ਸਮਾਂਗਮਾਂ ਵਿੱਚ ਸਹਿਯੋਗ ਦੇਣ ਲਈ ਵਿਸ਼ੇਸ਼ ਧੰਨਵਾਦ ਕੀਤਾ ਗਿਆ।