ਬੀਤੇ ਸ਼ਨੀਵਾਰ ੧੧ ਅਗਸਤ 2018 ਨੂੰ ਲੀਡਜ਼, ਯੂ ਕੇ ਵਿਖੇ ਗੁਰਦਵਾਰਾ ਸ਼੍ਰੀ ਗੁਰੂ ਨਾਨਕ ਨਿਸ਼ਕਾਮ ਸੇਵਕ ਵਲੋਂ 'ਪੰਜਾਬੀ ਭਾਸ਼ਾ ਲਈ ਕੰਪਿਊਟਰ ਦੀ ਵਰਤੋਂ' ਦੇ ਵਿਸ਼ੇ ਤੇ ਵਿਚਾਰ ਵਟਾਂਦਰਾ ਕੀਤਾ ਗਿਆ। ਪੰਜਾਬੀ ਅਧਿਆਪਕਾਂ ਨੇ ਬੜੇ ਚਾਅ ਅਤੇ ਉਤਸ਼ਾਹ ਨਾਲ ਸਵਾਲਾਂ ਤੇ ਜਵਾਬਾਂ ਵਿੱਚ ਹਿੱਸਾ ਲਿਆ।

ਡਾ. ਬਲਦੇਵ ਸਿੰਘ ਕੰਦੋਲਾ ਜੀ ਨੇ ਯੂਨੀਕੋਡ ਬਾਰੇ ਬੜੀ ਮਹੱਤਵ ਪੂਰਨ ਜਾਣਕਾਰੀ ਦਿੱਤੀ। ਇੱਕ ਅਧਿਆਪਕਾ, ਬੀਬੀ ਰਾਣੋ ਜੀ ਦੀ ਗੱਲ ਦਿੱਲ ਨੂੰ ਛੂ ਗਈ ਕਿ ਕਿਸੇ ਤੋਂ ਖ਼ਬਰ ਮਿਲਣ ਤੇ ਕਈ ਕੰਮ ਛੱਡ ਕੇ ਪੰਜਾਬੀ ਭਾਸ਼ਾ ਦੇ ਮੋਹ ਨੇ ਇੱਥੇ ਲਿਆ ਖੜਾ ਕੀਤਾ। ਅਸਲ ਵਿੱਚ ਗੱਲ ਹੀ ਤਾਂ ਬਣਨੀ ਹੈ ਜਦੋ ਦਿਮਾਗ ਵਿੱਚ ਹਲਚੱਲ ਤੇ ਸੀਨੇ 'ਚ ਅੱਗ ਬਲਣ ਲੱਗ ਪਵੇ। ਬੀਬੀ ਇੰਦਰਾ ਕੌਰ ਸਹਿੰਬੀ,  ਬੀਬੀ ਇੰਦਰਾ ਕੌਰ ਹੂੰਜਣ, ਵੀਰ ਕੇਵਲ ਸਿੰਘ ਜਗਪਾਲ, ਵੀਰ ਹਰਫੁੱਮਣ ਸਿੰਘ, ਹਰਦਿਆਲ ਸਿੰਘ, ਸਰਦਾਰਾ ਸਿੰਘ, ਪ੍ਰੇਮ ਸਿੰਘ, ਬੀਬੀ ਬੇਦੀ ਜੀ, ਕੁਲਦੀਪ ਕੌਰ ਸੱਗੂ, ਰਾਜਿੰਦਰ ਕੌਰ ਮਠਾਰੂ, ਲਖਵਿੰਦਰ ਕੌਰ ਰਾਇਤ, ਜਸਪ੍ਰੀਤ ਕੌਰ ਵਿਰਦੀ, ਸੁਰਿੰਦਰ ਕੌਰ ਜਗਪਾਲ ਅਤੇ ਹੋਰ ਵੀ ਕਈ ਸਰੋਤਿਆਂ ਨੇ ਹਿੱਸਾ ਲਿਆ।

ਪੰਜਾਬੀ ਯੂਨੀਕੋਡ ਕੀਬੋਰਡ  ਬਾਰੇ ਵੀ ਵਿਸਤਾਰ ਨਾਲ ਜਾਣਕਾਰੀ ਦਿੱਤੀ ਗਈ। ਬੜੀ ਸ਼ਿੱਦਤ ਨਾਲ ਅੰਬਰ ਵਲ ਢੀਮ ਤਾਂ ਸੁੱਟੀ ਹੈ, ਦੇਖਿਏ ਕਿ ਮੋਰੀ ਹੁੰਦੀ ਹੈ ਕਿ ਨਹੀਂ। ਬਾਦ ਵਿੱਚ ਸਭ ਨੇ ਰੱਲ ਲੰਗਰ ਵਿੱਚ ਪ੍ਰਸ਼ਾਦਾ ਛਕਿਆ। ਯੋਗਦਾਨ ਪਾਉਣ ਵਾਲੇ ਵੀਰਾਂ ਦਾ ( ਖਾਸ ਕਰ ਦਲਵੀਰ ਸਿੰਘ ਸੱਗੂ ਦਾ ਸਹੂਲਤਾਂ ਦਾ ਪ੍ਰਬੰਧ ਕਰਨਾ), ਪ੍ਰਬੰਧ ਕਾਬਿਲ-ਏ- ਤਾਰੀਫ਼ ਸੀ ਅਤੇ ਸਾਰੇ ਆਏ ਸੱਜਣਾਂ ਨੇ ਉਨ੍ਹਾਂ ਦਾ ਧੰਨਵਾਦ ਕੀਤਾ ਅਤੇ ਇਹ ਇੱਛਾ ਜ਼ਾਹਰ ਕੀਤੀ ਕਿ ਅਗਲੇ ਕੋਰਸ ਵਿੱਚ ਨੌਜੁਆਨ ਵਿਦਿਆਰਥੀਆਂ ਨੂੰ ਵੀ ਸ਼ਾਮਲ ਕੀਤਾ ਜਾਵੇਗਾ। ਇਸ ਕੋਰਸ ਨੇ ਚਿੰਗਾਰੀ ਤਾਂ ਲਾਈ ਹੈ, ਤੇ ਜੋਤਿ ਪਰਜਵਲਿਤ ਹੋਣ ਦੀ ਆਸ ਵਿੱਚ ਪੰਜਾਬੀ ਭਾਸ਼ਾ ਤੇ ਜਨੂੰਨੀ ਰਸੀਏ ਸਫ਼ਲਤਾ ਦੀ ਉਮੀਦ ਵਿੱਚ ਰਹਿਣਗੇ।