ਸਾਵੀ ਤੂਰ

ਪਿਛਲੇ ਦਿਨੀਂ ਪੰਜਾਬੀ ਕਵਿਤਰੀ ਸਾਵੀ ਤੂਰ ਦੇ ਦੇਹਾਂਤ ਉਤੇ ਪੰਜਾਬੀ ਸਾਹਿਤ ਕਲਾ ਕੇਂਦਰ ਦੇ ਮੈਂਬਰਾਂ ਨੇ ਡੂੰਘੇ ਦੁੱਖ ਦਾ ਪਰਗਟਾਵਾ ਕੀਤਾ।

ਸਾਵੀ ਤੂਰ ਬੜੀ ਵਧੀਆਂ ਖ਼ੁੱਲੀ ਕਵਿਤਾ ਲਿਖ਼ਿਆ ਕਰਦੇ ਸਨ। ਆਪ ਸਕੌਟਲੈਂਡ ਵਿਖ਼ੇ ਰਹਿੰਦੇ ਸਨ। ਯੂ ਕੇ 'ਚ ਉਹ ਥੋੜ੍ਹੇ ਹੀ ਸਮੇਂ ਤੋਂ ਰਹਿ ਰਹੇ ਸਨ। ਸਭਾ ਦੇ ਪਰਧਾਨ ਡਾਕਟਰ ਸਾਥੀ ਲੁਧਿਆਣਵੀ ਨੇ ਕਿਹਾ ਕਿ ਸਾਵੀ ਤੂਰ ਨਾਲ ਉਨ੍ਹਾਂ ਦਾ ਰਾਵਤਾ ਉਦੋਂ ਹੋਇਆ ਜਦੋਂ ਉਹ ਭਾਰਤ ਵਿਚ ਗਏ ਹੋਏ ਸਨ। ਸਾਵੀ ਤੂਰ ਨੇ ਇੱਛਾ ਜ਼ਾਹਰ ਕੀਤੀ ਸੀ ਕਿ ਉਹ ਉਨ੍ਹਾਂ ਦੇ ਲਾਈਵ ਟੀ ਵੀ ਸ਼ੋਅ  'ਸਾਥੀ ਕੇ ਸੰਗ ਸੰਗ' ਉਤੇ ਆਉਣਾ ਚਾਹੁੰਣਗੇ। ਡਾਕਟਰ ਸਾਥੀ ਨੇ ਕਿਹਾ ਸੀ ਕਿ ਉਹ ਉਨ੍ਹਾਂ ਦੇ ਫੋਨ ਦੀ ਉਡੀਕ ਕਰਨਗੇ ਪਰ ਇਹ ਇੰਟਰਵਿਊ ਸਾਵੀ ਅਤੇ ਐਮ ਏ ਟੀ ਵੀ  ਦੇ ਭਾਗਾਂ ਵਿਚ ਨਹੀਂ ਸੀ।

ਪੰਜਾਬੀ ਸਾਹਿਤ ਕਲਾ ਕੇਂਦਰ ਦੇ ਜਨਰਲ ਸਕੱਤਰ ਅਜ਼ੀਮ ਸ਼ੇਖਰ ਨੇ ਕਿਹਾ ਕਿ ਉਹ ਉਨ੍ਹਾਂ ਨੂੰ ਬਹੁਤ ਚੰਗੀ ਤਰ੍ਹਾਂ ਜਾਣਦੇ ਸਨ ਤੇ ਉਨ੍ਹਾਂ ਨੂੰ ਸਕੌਟਲੈਂਡ ਵਿਖ਼ੇ ਮਿਲ ਵੀ ਚੁੱਕੇ ਸਨ। ਉਨ੍ਹਾਂ ਨੂੰ ਸਾਵੀ ਤੂਰ ਦੇ ਦੇਹਾਂਤ ਦਾ ਬਹੁਤ ਦੁੱਖ ਹੋਇਆ ਹੈ। ਮਨਪਰੀਤ ਸਿੰਘ ਬਧਨੀਕਲਾਂ ਨੇ ਕਿਹਾ ਕਿ ਸਾਵੀ ਤੂਰ ਅਜੇ ਬਹੁਤ ਛੋਟੀ ਉਮਰ ਦੇ ਸਨ ਤੇ ਉਨ੍ਹਾਂ ਦਾ ਇੰਝ ਚਲੇ ਜਾਣਾ ਚੰਗਾ ਨਹੀਂ ਲੱਗਾ। ਕੁਲਵੰਤ ਕੌਰ ਢਿੱਲੋਂ ਨੇ ਕਿਹਾ ਕਿ ਇੰਗਲੈਂਡ ਦੇ ਥੋੜ੍ਹੇ ਜਿਹੇ ਲੇਖ਼ਕਾਂ ਚੋਂ ਜਦੋਂ ਕੋਈ ਮਨਫੀ ਹੋ ਜਾਂਦਾ ਹੈ ਤਾਂ ਬਹੁਤ ਦੁੱਖ ਹੁੰਦਾ ਹੈ। ਮਨਜੀਤ ਕੌਰ ਪੱਡਾ ਨੇ ਕਿਹਾ ਕਿ ਇੰਗਲੈਂਡ ਵਿਚ ਇਸਤ੍ਰੀ ਕਵਿਤਰੀਆਂ ਤਾਂ ਪਹਿਲਾਂ ਹੀ ਬਹੁਤ ਥੋੜ੍ਹੀਆਂ ਸਨ ਤੇ ਹੁਣ ਸਾਵੀ ਦੇ ਟੁਰ ਜਾਣ ਨਾਲ ਤਾਂ ਹੋਰ ਵੀ ਘਟ ਗਈਆਂ ਹਨ। ਗੁਰਨਾਮ ਸਿੰਘ ਗਰੇਵਾਲ ਨੇ ਕਿਹਾ ਕਿ ਸਭਾ ਵਲ੍ਹੋ ਸਾਵੀ ਤੂਰ ਦੇ ਪਰਵਾਰ ਨਾਲ ਬਹੁਤ ਡੂੰਘੇ ਦੁੱਖ ਦਾ ਇਜ਼ਹਾਰ ਕਰਨਾ ਚਾਹੀਦਾ ਹੈ। ਯਸ਼ ਸਾਥੀ ਨੇ ਕਿਹਾ ਕਿ ਪੰਜਾਬੀ ਸਾਹਿਤ ਕਲਾ ਕੇਂਦਰ ਹਰ ਉਸ ਲੇਖ਼ਕ ਪਰਵਾਰ ਨਾਲ ਹਮੇਸ਼ਾ ਸਹਾਨੁਭੂਤੀ ਜ਼ਾਹਰ ਕਰਦੀ ਰਹਿੰਦੀ ਹੈ ਜਿਨ੍ਹਾਂ ਨੂੰ ਮੌਤ ਵਰਗੀ ਭਿਆਨਕ ਖ਼ਬਰ ਨੇ ਪ੍ਰਭਾਵਤ ਕੀਤਾ ਹੋਇਆ ਹੁੰਦਾ ਹੈ।

ਸਮੁੱਚੇ ਤੌਰ 'ਤੇ ਸਾਰੇ ਹੀ ਮੈਂਬਰਾਂ ਨੇ ਸਾਵੀ ਤੂਰ ਦੇ ਟੁਰ ਜਾਣ ਦਾ ਬਹੁਤ ਦੁਖ ਮਨਾਇਆ। ਸਭਾ ਵਲ੍ਹੋਂ ਮਤਾ ਪਾਸ ਕੀਤਾ ਗਿਆ ਕਿ ਸਾਵੀ ਤੂਰ ਦੇ ਪਰਵਾਰ ਨਾਲ਼ ਰਾਬਤਾ ਕਰਕੇ ਹਮਦਰਦੀ ਦਾ ਸੁਨੇਹਾ ਪੁੰਚਾਇਆ ਜਾਵੇ।

21/10/2017