ਪਿਛਲੇ ਕੁਝ ਸਮੇਂ ਤੋਂ ਆਪਣੇ ਭਾਈਚਾਰੇ ਵਿਚ ਪੰਜਾਬੀ ਵਿਚ ਲਿਖੀਆਂ ਹੋਈਆਂ ਸੂਚਨਾਪੱਟੀਆਂ ਜਾਂ ਇਨ੍ਹਾਂ ਦੀ ਕਮੀ ਬਾਰੇ ਕਾਫੀ ਚਰਚਾ ਚੱਲ ਰਹੀ ਹੈ। ਵੈਨਕੂਵਰ ਹਵਾਈ ਅੱਡੇ ਉੱਪਰ ਲੱਗੇ ਹੋਏ ਪੰਜਾਬੀ ਚਿਨ੍ਹਾਂ ਬਾਰੇ ਵੀ ਕੁਝ ਸਵਾਲ ਉੱਠੇ ਹਨ। ਇਸ ਗੱਲ ਨੂੰ ਧਿਆਨ ਵਿਚ ਰੱਖ ਕੇ ਪੰਜਾਬੀ ਲੈਂਗੂਏਜ ਐਜੂਕੇਸ਼ਨ ਐਸੋਸੀਏਸ਼ਨ (ਪਲੀਅ) ਨੇ ਸਰ੍ਹੀ ਨਿਊਟਨ ਦੇ ਐਮ ਐਲ ਏ ਹੈਰੀ ਬੈਂਸ ਦੇ ਸਹਿਯੋਗ ਨਾਲ ਵੈਨਕੂਵਰ ਹਵਾਈ ਅੱਡੇ ਦੇ ਪ੍ਰਬੰਧਕਾਂ ਨਾਲ ਇਕ ਮੁਲਾਕਾਤ ਕੀਤੀ। ਇਹ ਮੁਲਾਕਾਤ ਵੀਰਵਾਰ, ਸੱਤ ਅਗਸਤ ਨੂੰ ਏਅਰਪੋਰਟ ਦੇ ਪ੍ਰਬੰਧਕੀ ਦਫਤਰ ਵਿਚ ਹੋਈ। ਸਾਡੇ ਵਫਦ (ਡੈਲੀਗੇਸ਼ਨ) ਵਿਚ ਤਿੰਨ ਪਲੀਅ ਦੇ ਮੈਂਬਰ ਸਾਧੂ ਬਿਨਿੰਗ, ਪਰਵਿੰਦਰ ਧਾਰੀਵਾਲ ਅਤੇ ਮੈਂ (ਬਲਵੰਤ ਸੰਘੇੜਾ) ਸ਼ਾਮਲ ਸਨ। ਤਿੰਨ ਸਥਾਨਕ ਗੁਰਦਵਾਰਿਆਂ ਦੇ ਨੁਮਾਇੰਦੇ ਸੋਹਣ ਸਿੰਘ ਦਿਓ, ਪ੍ਰਧਾਨ ਖਾਸਲਾ ਦਿਵਾਨ ਸੁਸਾਇਟੀ ਵੈਨਕੂਵਰ, ਚੈਨ ਸਿੰਘ ਬਾਠ, ਪ੍ਰਧਾਨ ਗੁਰਦਵਾਰਾ ਨਾਨਕ ਨਿਵਾਸ (#5 ਰੋਡ) ਰਿਚਮੰਡ, ਨਰਿੰਦਰ ਸਿੰਘ ਵਾਲੀਆ, ਪ੍ਰਧਾਨ ਗੁਰਦਵਾਰਾ ਦੁੱਖ ਨਿਵਾਰਨ ਅਤੇ ਮੈਟਰੋ ਵੈਨਕੂਵਰ ਦੇ ਅੱਠ ਗੁਰਦਵਾਰਿਆਂ ਦੇ ਵਕਤਾ (ਸਪੋਕਸਪਰਸਨ) ਸਨ। ਇਸ ਤੋਂ ਇਲਾਵਾ ਵਫਦ ਵਿਚ ਵਰਲਡ ਸਿੱਖ ਆਰਗੇਨਾਈਜ਼ੇਸ਼ਨ ਦੇ ਰਹਿ ਚੁੱਕੇ ਪ੍ਰਧਾਨ ਅਤੇ ਭਾਈਚਾਰੇ ਵਿਚ ਸਰਗਰਮ ਪ੍ਰੇਮ ਸਿੰਘ ਵਿਨਿੰਗ ਅਤੇ ਐਮ ਐਲ ਏ ਹੈਰੀ ਬੈਂਸ ਵੀ ਸ਼ਾਮਲ ਸਨ। ਵੈਨਕੂਵਰ ਹਵਾਈ ਅੱਡੇ ਦੀ ਨੁਮਾਇੰਦਗੀ ਰਿੱਜ ਕਰਾਕੇ, ਡਾਇਰੈਕਟਰ ਕਸਟਮਰ ਕੇਅਰ ਅਤੇ ਕੈਥੀ ਨੀਫੋਰਸ, ਮੈਨੇਜਰ ਕਸਟਮਰ ਕੇਅਰ ਕਰ ਰਹੇ ਸਨ।

ਇਹ ਮੀਟਿੰਗ ਬਹੁਤ ਸਤਿਕਾਰ ਭਰੇ ਅਤੇ ਮਿਲਾਪੜੇ ਮਾਹੌਲ ਵਿਚ ਹੋਈ। ਹੈਰੀ ਬੈਂਸ ਨੇ ਅਤੇ ਮੈਂ ਹਵਾਈ ਅੱਡੇ ਉੱਪਰ ਪੰਜਾਬੀ ਸਾਈਨਾਂ ਦੀ ਘਾਟ ਬਾਰੇ ਆਪਣਾ ਫਿਕਰ ਉਨ੍ਹਾਂ ਨਾਲ ਸਾਂਝਾ ਕੀਤਾ। ਅਸੀਂ ਇਹ ਅਪੀਲ ਕੀਤੀ ਕਿ ਉਹ ਇਸ ਗੱਲ ਵਲ ਧਿਆਨ ਦੇਣ ਅਤੇ ਪੱਕ ਕਰਨ ਕਿ ਵੈਨਕੂਵਰ ਦੇ ਹਵਾਈ ਅੱਡੇ ’ਤੇ ਪੰਜਾਬੀ ਭਾਸ਼ਾ ਨੂੰ ਉਸ ਦੇ ਬਣਦੇ ਹੱਕ ਅਨੁਸਾਰ ਯੋਗ ਥਾਂ ਮਿਲੇ। ਪੰਜਾਬੀ ਇਸ ਵੇਲੇ ਕਨੇਡਾ ਵਿਚ ਵੀ ਤੇ ਮੈਟਰੋ ਵੈਨਕੂਵਰ ਵਿਚ ਵੀ ਤੀਜੀ ਸਭ ਤੋਂ ਵੱਧ ਬੋਲੀ ਜਾਣ ਵਾਲੀ ਬੋਲੀ ਹੈ। ਵਫਦ ਦੇ ਦੂਜੇ ਮੈਂਬਰਾਂ ਨੇ ਵੀ ਇਸ ਗੱਲ ਦੀ ਪ੍ਰੋੜਤਾ ਕੀਤੀ ਅਤੇ ਬੇਨਤੀ ਕੀਤੀ ਕਿ ਇਸ ਪਾਸੇ ਵਲ ਛੇਤੀ ਤੋਂ ਛੇਤੀ ਧਿਆਨ ਦਿੱਤਾ ਜਾਣਾ ਚਾਹੀਦਾ ਹੈ। ਹਵਾਈ ਅੱਡੇ ਦੇ ਨੁਮਾਇੰਦਿਆਂ ਨੇ ਸਾਡੀ ਗੱਲਬਾਤ ਬਹੁਤ ਧਿਆਨ ਨਾਲ ਸੁਣੀ ਅਤੇ ਸਾਨੂੰ ਭਰੋਸਾ ਦਿਵਾਇਆ ਕਿ ਉਹ ਇਸ ਮਸਲੇ ਵੱਲ ਬਣਦਾ ਧਿਆਨ ਦੇਣਗੇ। ਇਸ ਵਿਚਾਰ ਵਟਾਂਦਰੇ ਦੇ ਸਿੱਟੇ ਵਜੋਂ ਸੰਭਵ ਹੈ ਕਿ ਨੇੜ ਭਵਿੱਖ ਵਿਚ ਮੈਨੂੰ ਅਤੇ ਸਾਧੂ ਬਿਨਿੰਗ ਨੂੰ ਏਅਰ ਪੋਰਟ ਵਲੋਂ ਸੱਦਾ ਆਵੇ ਇਹ ਦੇਖਣ ਤੇ ਵਿਚਾਰਨ ਲਈ ਕਿ ਪਹਿਲਾਂ ਲੱਗੇ ਕੁਝ ਸਾਈਨਾਂ ਦੇ ਨਾਲ ਨਾਲ ਹੋਰ ਕਿੱਥੇ ਅਤੇ ਢੁੱਕਵੇਂ ਸਾਈਨ ਲਾਏ ਜਾ ਸਕਦੇ ਹਨ। ਇਸ ਦੇ ਨਾਲ ਹੀ ਪਲੀਅ ਕੈਨੇਡਾ ਬਾਰਡਰ ਸਰਵਿਸ ਏਜੰਸੀ ਐਂਡ ਡੈਸਟੀਨੇਸ਼ਨ (ਟੂਰਿਜ਼ਮ) ਬੀ ਸੀ ਨਾਲ ਵੀ ਇਸ ਗੱਲ ਬਾਰੇ ਸੰਪਰਕ ਕਰੇਗੀ ਕਿ ਅਲਾਸਕਾ, ਅਲਬਰਟਾ ਅਤੇ ਵਾਸ਼ਿੰਗਟਨ ਵਲੋਂ ਬੀ ਸੀ ਵਿਚ ਦਾਖਲੇ ਵਾਲੀਆਂ ਥਾਵਾਂ ’ਤੇ ਵੀ ਹੋਰਨਾਂ ਜ਼ੁਬਾਨਾਂ ਦੇ ਨਾਲ ਨਾਲ ਪੰਜਾਬੀ ਵਿਚ ਸਾਈਨ ਹੋਣ।

ਪਿਛਲੇ ਕੁਝ ਸਮੇਂ ਤੋ ਅੰਗ੍ਰੇਜ਼ੀ ਤੋਂ ਪੰਜਾਬੀ ਵਿਚ ਹੋਣ ਵਾਲੇ ਅਨੁਵਾਦ ਵਿਚ ਪਾਈਆਂ ਜਾਂਦੀਆਂ ਕਮੀਆਂ ਸੰਬੰਧੀ ਵੀ ਕੁਝ ਲੋਕਾਂ ਨੇ ਪਲੀਅ ਨਾਲ ਸੰਪਰਕ ਕੀਤਾ ਹੈ। ਇਸ ਵਿਚ ਤਿੰਨਾਂ ਹੀ ਪੱਧਰਾਂ ਦੀਆਂ - ਸਥਾਨਕ, ਸੂਬਾਈ ਅਤੇ ਕੇਂਦਰੀ - ਸਰਕਾਰਾਂ ਵਲੋਂ ਕਰਵਾਏ ਜਾਂਦੇ ਅਨੁਵਾਦ ਸ਼ਾਮਲ ਹਨ। ਇਹ ਗੱਲ ਧਿਆਨ ਵਿਚ ਆਈ ਹੈ ਕਿ ਕਈ ਵਾਰੀ ਇਨ੍ਹਾਂ ਅਨੁਵਾਦਾਂ ਵਿਚ ਬਹੁਤ ਕੁਝ ਗਲਤ ਤੇ ਘਟੀਆ ਪੱਧਰ ਦਾ ਹੁੰਦਾ ਹੈ। ਇਸ ਸੰਬੰਧ ਵਿਚ ਮੈਂ ਪਲੀਅ ਵਲੋਂ ਤਿੰਨਾਂ ਹੀ ਪੱਧਰਾਂ ਦੀਆਂ ਸਰਕਾਰਾਂ ਨੂੰ ਬੇਨਤੀ ਕਰਨੀ ਚਾਹੁੰਦਾ ਹਾਂ ਕਿ ਉਹ ਯੋਗ ਅਤੇ ਸਰਟੀਫਾਈਡ ਅਨੁਵਾਦਕਾਂ ਤੋਂ ਹੀ ਅਨੁਵਾਦ ਕਰਾਉਣ। ਇਸ ਕੰਮ ਵਿਚ ਲੋੜ ਅਨੁਸਾਰ ਪਲੀਅ ਮਦਦ ਕਰਨ ਲਈ ਤਿਆਰ ਹੈ। ਨਾਲ ਹੀ ਮੈਂ ਸਮੁੱਚੇ ਪੰਜਾਬੀ ਭਾਈਚਾਰੇ ਨੂੰ ਅਪੀਲ ਕਰਦਾ ਹਾਂ ਕਿ ਸਾਨੂੰ ਸਾਰਿਆਂ ਨੂੰ ਇਸ ਗੱਲ ਬਾਰੇ ਚੇਤਨ ਰਹਿਣਾ ਚਾਹੀਦਾ ਹੈ ਅਤੇ ਪੰਜਾਬੀ ਵਿਚ ਉਪਲੱਬਧ ਜਾਣਕਾਰੀ ਨੂੰ ਦੇਖਣਾ ਵਾਚਣਾ ਚਾਹੀਦਾ ਹੈ ਕਿ ਇਹ ਕੰਮ ਯੋਗ ਵਿਅਕਤੀਆਂ ਵਲੋਂ ਕੀਤਾ ਹੋਇਆ ਹੋਵੇ।

ਅਖੀਰ ਵਿਚ, ਪਲੀਅ ਵਲੋਂ ਮੈਂ ਪੰਜਾਬੀ ਦੇ ਸ਼ੁੱਭਚਿੰਤਕਾਂ ਨੂੰ ਸੱਦਾ ਦਿੰਦਾ ਹਾਂ ਕਿ ਉਹ ਖੁਦ ਪੰਜਾਬੀ ਦੇ ਹੱਕ ਵਿਚ ਬੋਲਣ ਵਾਲੇ ਅਤੇ ਇਹਦੇ ਨੁਮਾਇੰਦੇ ਬਣਨ। ਇਸ ਤਰ੍ਹਾਂ ਹੀ ਅਸੀਂ ਆਪਣੀ ਮਾਤ ਭਾਸ਼ਾ ਨੂੰ ਇਸ ਦਾ ਬਣਦਾ ਸਥਾਨ ਦਿਵਾ ਸਕਦੇ ਹਾਂ।

ਬਲਵੰਤ ਸੰਘੇੜਾ
ਪ੍ਰਧਾਨ, ਪੰਜਾਬੀ ਲੈਂਗੂਏਜ ਐਸੋਸੀਏਸ਼ਨ (ਪਲੀਅ)

14/08/2014

ਖੱਬੇ ਤੋਂ ਸੱਜੇ: ਨਰਿੰਦਰ ਸਿੰਘ ਵਾਲੀਆ, ਰੈਜ ਕਰਕੇ, ਹੈਰੀ ਬੈਂਸ, ਬਲਵੰਤ ਸੰਘੇੜਾ, ਕੈਥੀ ਨਾਈਫੌਰਸ, ਪ੍ਰੇਮ ਸ. ਵਿਨਿੰਗ,
ਚੈਨ ਸਿੰਘ ਬਾਠ, ਸੋਹਣ ਸਿੰਘ ਦੀਓ, ਸਾਧੂ ਬਿੰਨਿੰਗ ਅਤੇ ਪਰਵਿੰਦਰ ਧਾਰੀਵਾਲ