ਇੰਗਲੈਂਡ ਦੇ ਗਾਇਕ ਵੀ ਕਿਸਾਨ ਮੋਰਚੇ ਦੇ ਹੱਕ ਵਿੱਚ ਨਿੱਤਰੇ 
 ਸਰਦੂਲ ਸਿੰਘ ਮਾਰਵਾ, ਯੂ ਕੇ       (28/12/2020)

ਭਾਰਤ ਦੇ ਮੌਜੂਦਾ ਇਤਿਹਾਸ ਵਿੱਚ ਦਿੱਲੀ ਦੇ ਕਿਸਾਨ ਮੋਰਚੇ ਨੇ ਨਵਾਂ ਇਤਿਹਾਸ ਸਿਰਜ ਕੇ ਰੱਖ ਦਿੱਤਾ ਹੈ ਜਿਸ ਦੇ ਚੱਲਦਿਆਂ, ਪੋਹ ਮਾਘ ਦੇ ਪਾਲ਼ੇ ਵਿੱਚ ਸੱਪਾਂ ਦੀਆਂ ਸਿਰੀਆਂ ਮਿੱਧਣ ਵਾਲ਼ੇ ਕਿਸਾਨ ਦੀਆਂ ਪੈੜਾਂ ਤੇ ਚੱਲਦਿਆਂ ਇੰਗਲੈਂਡ ਦੇ ਪੰਜਾਬੀ ਗਾਇਕਾਂ ਵਿੱਚ ਵੀ ਅਥਾਹ ਜੋਸ਼ ਉਮਡਿਆ। ਕਹਿਰ ਦੇ ਪਾਲ਼ੇ ਵਿੱਚ ਵੀ ਪਾਣੀ ਚਿੱਕੜ ਦੀ ਵੀ ਪ੍ਰਵਾਹ ਨਾ ਕਰਦੇ ਹੋਏ, ਅੱਧੀ ਦਰਜਨ ਹਰਮਨ ਪਿਆਰੇ, ਚੋਟੀ ਦੇ ਗਾਇਕਾਂ ਨੇ ਪਹਿਲੀ ਵਾਰ ਨਵੀਂ ਪਿਰਤ ਤੋਰੀ ਹੈ। ਉਨ੍ਹਾਂ ਨੇ ਰਲ਼ ਕੇ ਕਿਸਾਨ ਸੰਘਰਸ਼ ਨੂੰ ਸਮਰਪਿਤ ਸਾਂਝਾ ਗੀਤ ਗਾ ਕੇ, ਅਤੇ ਫਿਰ ਉਸ ਦੀ ਯਾਦਗਾਰੀ ਵੀਡੀਓ ਬਣਾ ਕੇ ਨਵਾਂ ਇਤਿਹਾਸ ਸਿਰਜਿਆ ਹੈ। ਇਹ ਵੀਡੀਓ ਇੱਕ ਦੋ ਦਿਨਾਂ ਵਿੱਚ ਹੀ ਸੰਸਾਰ ਦੇ ਸਮੂਹ ਦਰਸ਼ਕਾਂ ਦੇ ਸਨਮੁੱਖ ਹੋਣ ਜਾ ਰਹੀ ਹੈ।
 
ਸ਼ਿੰਦਰਪਾਲ ਸਿੰਘ ਮਾਹਲ ਦੇ ਲਿਖੇ ਇਸ ਗੀਤ ਮੇਰੇ ਦੇਸ਼ ਦੇ ਕਿਸਾਨ ਸੂਰਬੀਰ ਓਏ, ਹੱਕ ਸੱਚ ਵਾਲ਼ੀ ਵਾਹ ਦਿਓ ਲਕੀਰ ਓਏ !  ਨੂੰ ਇੱਕ ਪੰਜਾਬੀ ਫ਼ਾਰਮ ਤੇ ਫਿਲਮਾਇਆ ਗਿਆ। ਗੀਤ ਦੇ ਬੋਲਾਂ ਨੂੰ ਸ੍ਵਰਬੱਧ ਇੰਗਲੈਂਡ ਦੇ ਮਹਾਨ ਸੰਗੀਤਕਾਰ ਅਤੇ ਗਾਇਕ ਕੁਲਵੰਤ ਸਿੰਘ ਭਮਰਾ ਨੇ ਕੀਤਾ ਹੈ। ਗੀਤ ਦੇ ਜਜਬਾਤਾਂ ਦੀ ਗਰਜ ਨੂੰ ਮਹਿਸੂਸਦਿਆਂ ਹਰ ਗਾਇਕ ਨੇ ਜ਼ੋਰਦਾਰ ਤੇ ਬੁਲੰਦ ਅਵਾਜ਼ ਵਿੱਚ ਗਾ ਕੇ ਕਿਸਾਨ ਮੋਰਚੇ ਪ੍ਰਤੀ ਆਪਣਾ ਬਣਦਾ ਫਰਜ਼ ਅਦਾ ਕੀਤਾ ਹੈ। ਗੀਤ ਗਾਉਣ ਵਾਲ਼ੀਆਂ ਦਮਦਾਰ ਅਵਾਜ਼ਾਂ ਵਿੱਚ ਕੁਲਵੰਤ ਸਿੰਘ ਭਮਰਾ, ਸਰਦਾਰਾ ਸਿੰਘ ਗਿੱਲ (ਬ੍ਰਮਿੰਘਮ) ਸ਼ਿੰਦਾ ਸੁਰੀਲਾ, ਪਰਗਣ ਸਿੰਘ ਭੰਡਾਲ (ਕਵੈਂਟਰੀ) ਕੇਬੀ ਸਿੰਘ ਢੀਂਡਸਾ ਅਤੇ ਦੀਪੀ ਸਿੰਘ (ਲੈੱਸਟਰ) ਆਦਿ ਦੇ ਨਾਮ ਜ਼ਿਕਰਯੋਗ ਹਨ।
 
ਗੀਤ ਦੀ ਫਿਲਮਸਾਜ਼ੀ ਲਈ ਮੰਨੇ ਪ੍ਰਮੰਨੇ ਕੈਮਰਾਮੈਨ ਸ. ਵੀਰਭਾਨ ਸਿੰਘ ਨੇ ਆਪਣੀ ਵੀਡੀਓਗ੍ਰਾਫੀ ਦੇ ਕਮਾਲ ਦਿਖਾਏ ਹਨ। ਇਸ ਉੱਦਮੀ ਉਪ੍ਰਾਲੇ ਨੂੰ ਹਿੰਮਤੀ ਹੱਲਾਸ਼ੇਰੀ ਦੇਣ ਵਾਲ਼ੀ ਸੰਸਥਾ ਪੰਜਾਬੀ ਵਿਕਾਸ ਮੰਚ ਯੂ.ਕੇ. ਦੇ ਮੀਡੀਆ ਡਾਇਰੈਕਟਰ ਸ. ਸਰਦੂਲ ਸਿੰਘ ਮਾਰਵਾ ਨੇ ਕਿਹਾ ਕਿ ਇਹ ਪਹਿਲੀ ਵਾਰ ਹੈ ਕਿ ਦਿੱਲੀ ਵਿੱਚ ਚੱਲ ਰਹੇ ਮਹਾਨ ਕਿਸਾਨ ਏਕਤਾ ਸੰਘਰਸ਼ ਨੇ ਸੰਸਾਰ ਦੇ ਹਰ ਸੁਹਿਰਦ ਪੰਜਾਬੀ ਨੂੰ ਝੰਜੋੜਿਆ ਹੈ ਤੇ ਜਾਗਰੂਕ ਕੀਤਾ ਹੈ। ਇਸ ਸੰਘਰਸ਼ ਦਾ ਹਰ ਪੰਜਾਬੀ ਜੀਵਨ, ਪੰਜਾਬੀ ਸੋਚ ਅਤੇ ਸਿਆਸਤ ਉੱਤੇ ਪ੍ਰਤੱਖ ਅਤੇ ਸਾਕਾਰਤਮਿਕ ਅਸਰ ਜ਼ਰੂਰ ਪਵੇਗਾ। ਉਨ੍ਹਾਂ ਆਸ ਪ੍ਰਗਟ ਕੀਤੀ ਕਿ ਪ੍ਰਦੇਸਾਂ ਵਿੱਚ ਹੋਣ ਦੇ ਬਾਵਜੂਦ ਵੀ ਪੰਜਾਬ ਦੇ ਲੇਕਾਂ ਨਾਲ਼ ਮੋਹ ਪਿਆਰ ਰੱਖਣ ਵਾਲ਼ੇ ਪੰਜਾਬੀ ਜੁਸ਼ੀਲੇ ਨੌਜਵਾਨਾਂ ਦੀ ਇਸ ਵਿਲੱਖਣ ਪੇਸ਼ਕਸ਼ ਨੂੰ ਸੰਸਾਰ ਭਰ ਦੇ ਪੰਜਾਬੀ ਜ਼ਰੂਰ ਸਰਾਹੁਣਗੇ ਅਤੇ ਹੱਲਾਸ਼ੇਰੀ ਦੇਣਗੇ ।