ਕਾਮਰੇਡ ਜਗਜੀਤ ਸਿੰਘ ਆਨੰਦ

ਲੰਡਨ: ਪੰਜਾਬੀ ਸਾਹਿਤ ਕਲਾ ਕੇਂਦਰ ਯੂ ਕੇ  ਨਵਾਂ ਜ਼ਮਾਨਾ, ਜਲੰਧਰ ਦੇ ਮੁੱਖ ਸੰਪਾਦਕ ਕਾਮਰੇਡ ਜਗਜੀਤ ਸਿੰਘ ਆਨੰਦ ਦੀ ਮੌਤ ਉਤੇ ਡੂੰਘੇ ਦੁੱਖ ਦਾ ਪਰਗਟਾਵਾ ਕਰਦਾ ਹੈ। ਸਭਾ ਦੇ ਪ੍ਰਧਾਨ ਡਾਕਟਰ ਸਾਥੀ ਲੁਧਿਆਣਵੀ ਨੇ ਆਨੰਦ ਜੀ ਨਾਲ਼ ਲੰਮੀ ਜਾਣ ਪਛਾਣ ਦਾ ਜ਼ਿਕਰ ਕੀਤਾ ਤੇ ਕਿਹਾ ਕਿ ਕਾਮਰੇਡ ਆਨੰਦ ਸਰਦਾਰ ਗੁਰਬਖ਼ਸ਼ ਸਿੰਘ ਪ੍ਰੀਤ ਲੜੀ ਦੇ ਦਾਮਾਦ ਸਨ ਤੇ ਨਵਤੇਜ ਸਿੰਘ ਦੇ ਬਹਿਨੋਈ ਸਨ। ਇੰਝ ਉਹ ਪ੍ਰੀਤ ਲੜੀ ਪਰਵਾਰ ਦੇ ਹੀ ਇਕ ਹਸਤਾਖ਼ਰ ਸਨ। ਸਾਥੀ ਜੀ ਨੇ ਕਿਹਾ ਕਿ ਉਹ ਨਵਤੇਜ ਸਿੰਘ ਰਾਹੀਂ ਵੀ ਉਨ੍ਹਾਂ ਨੂੰ ਤੇ ਉਨ੍ਹਾਂ ਦੀ ਸੁਚੱਜੀ ਪਤਨੀ ਉਰਮਿਲਾ ਜੀ ਨੂੰ ਮਿਲਦੇ ਰਹਿੰਦੇ ਸਨ। ਕਾਮਰੇਡ ਅਵਤਾਰ ਉੱਪਲ ਨੇ ਕਿਹਾ ਕਿ ਕਮਿਉਨਸਿਟ ਲਹਿਰ ਨਾਲ ਜਗਜੀਤ ਸਿੰਘ ਆਨੰਦ ਦਾ ਨਾਮ ਬੜੇ ਸਤਕਾਰ ਨਾਲ ਜੁੜਿਆ ਹੋਇਆ ਹੈ। ਕੁਲਵੰਤ ਕੌਰ ਢਿਲ੍ਹੋ ਨੇ ਵੀ ਉਨ੍ਹਾਂ ਦੇ ਵਿਛੋੜੇ ਨੁੰ ਬੜੇ ਦੁਖ ਨਾਲ ਲਿਆ। ਅਜ਼ੀਮ ਸ਼ੇਖ਼ਰ ਨੇ ਕਿਹਾ ਕਿ ਆਨੰਦ ਜੀ ਨੇ ਹਮੇਸ਼ਾ ਹੀ ਨਵੇਂ ਲੇਖ਼ਕਾਂ ਨੂੰ ਬੜੀ ਹੱਲਾ ਸ਼ੇਰੀ ਦਿੱਤੀ ਸੀ। ਮਨਪ੍ਰੀਤ ਸਿੰਘ ਬਧਨੀਕਲਾਂ ਨੇ ਕਿਹਾ ਕਿ ਬਤੌਰ ਪੱਤਰਕਾਰ ਦੇ ਮੈਂ ਆਨੰਦ ਜੀ ਦੇ ਵਿਛੋੜੇ ਨੂੰ ਪੱਤਰਕਾਰੀ ਦੇ ਭਾਈਚਾਰੇ ਲਈ ਬੜਾ ਵੱਡਾ ਨੁਕਸਾਨ ਗਿਣਦਾ ਹਾਂ। ਗੁਰਨਾਮ ਗਰੇਵਾਲ ਨੇ ਕਿਹਾ ਕਿ ਆਨੰਦ ਜੀ ਆਪਣੇ ਦੌਰ ਦੇ ਆਖ਼ਰੀ ਕਾਮਰੇਡ ਸਨ ਜਿਨ੍ਹਾਂ ਦਾ ਕਮਿਉਨਿਸਟ ਲਹਿਰ ਨਾਲ ਪੱਕਾ ਵਿਸ਼ਵਾਸ ਜੁੜਿਆ ਰਿਹਾ ਸੀ। ਮਨਜੀਤ ਕੌਰ ਪੱਡਾ ਨੇ ਕਿਹਾ ਕਿ ਇਹ ਇਕ ਨਾ ਪੂਰਾ ਹੋਣ ਵਾਲਾ ਘਾਟਾ ਹੈ। ਯਸ਼ ਸਾਥੀ ਨੇ ਕਿਹਾ ਕਿ ਜਗਜੀਤ ਸਿੰਘ ਆਨੰਦ ਅਤੇ ਉਰਮਿਲਾ ਜੀ ਜਦੋਂ ਵੀ ਲੰਡਨ ਆਉਂਦੇ ਸਨ ਤਾਂ ਆਪਣਿਆਂ ਵਾਂਗ ਹੀ ਮਿਲਦੇ ਹੁੰਦੇ ਸਨ।

ਪੰਜਾਬੀ ਸਾਹਿਤ ਕਲਾ ਕੇਂਦਰ ਨੇ ਦਿੱਲੀ ਵਾਲੇ ਸਰਦਾਰ ਗੁਰਬਚਨ ਸਿੰਘ ਦੀ ਮੌਤ ਉਤੇ ਵੀ ਦੁਖ ਦਾ ਪ੍ਰਗਟਾਵਾ ਕੀਤਾ। ਗੁਰਬਚਨ ਸਿੰਘ ਜੀ ਆਰਸੀ ਪਬਲਿਸ਼ਰਜ਼ ਦੇ ਮੈਨੇਜਿੰਗ ਡਾਇਰੈਕਟਰ ਸਨ ਤੇ ਨਵਯੁਗ ਪਬਲਿਸ਼ਰਜ਼ ਦੇ ਭਾਪਾ ਪ੍ਰੀਤਮ ਸਿੰਘ ਦੇ ਭਤੀਜੇ ਸਨ। ਡਾਕਟਰ ਸਾਥੀ ਲੁਧਿਆਣਵੀ ਨੇ ਕਿਹਾ ਕਿ ਉਨ੍ਹਾਂ ਦੀਆਂ ਚਾਰ ਪੁਸਤਕਾਂ ਆਰਸੀ ਅਤੇ ਨਵਯੁਗ ਪਰੈਸ ਨੇ ਛਾਪੀਆਂ ਸਨ। ਸਰਦਾਰ ਗੁਰਬਚਨ ਸਿੰਘ ਦਾ ਵਿਛੋੜਾ ਪੰਜਾਬੀ ਪਬਲਿਸ਼ੰਗ ਦੇ ਅਦਾਰਿਆਂ ਲਈ ਬਹੁਤ ਵੱਡਾ ਧੱਕਾ ਹੈ। ਸਭਾ ਨੇ ਇਕ ਸ਼ੋਕ ਮਤੇ ਰਾਹੀਂ ਕਾਮਰੇਡ ਜਗਜੀਤ ਸਿੰਘ ਆਨੰਦ ਅਤੇ ਸਰਦਾਰ ਗੁਰਬਚਨ ਸਿੰਘ ਦੇ ਪਰਵਾਰਾਂ ਨਾਲ ਸਹਾਨੁਭੂਤੀ ਦਰਸਾਈ ਤੇ ਪਰਾਰਥਨਾ ਕੀਤੀ ਕਿ ਵਾਹਿਗੁਰੂ ਵਿਛੜੀਆਂ ਰੂਹਾਂ ਨੂੰ ਆਪਣੇ ਚਰਨਾਂ ਵਿਚ ਜਗ੍ਹਾ ਦੇਵੇ। ਆਮੀਨ!

22/06/2015