ਇਟਲੀ - ਗੁਰੂ ਗੋਬਿੰਦ ਸਿੰਘ ਜੀ ਦੇ ਸਮੇਂ ਦੀ ਹੱਥ ਲਿਖਤ ਪੋਥੀ ਸਾਹਿਬ ਦੇ ਦਰਸ਼ਨ ਇਟਲੀ ਵਿਖੇ ਕਰਵਾਏ ਗਏ ਦਸਤਾਰ ਦਿਵਸ ਸਮੇਂ ਸਿੱਖ ਸੰਗਤਾਂ ਨੂੰ ਕਰਵਾਏ ਗਏ। ਜ਼ਿਕਰਯੋਗ ਹੈ ਕਿ ਇਹ ਪੋਥੀ ਸਾਹਿਬ ਗੁਰੂ ਜੀ ਨੇ 1705 ਈ: ਵਿੱਚ ਭਾਈ ਦਇਆ ਸਿੰਘ ਜੀ ਕੋਲੋਂ ਆਪ ਲਿਖਵਾਈ ਸੀ। ਇਸ ਪੋਥੀ ਦੇ ਪਹਿਲੇ ਅੰਗ ਉੱਪਰ ਭਾਈ ਦਇਆ ਸਿੰਘ ਜੀ ਨੇ ਆਪਣੀ ਸਹੀ ਵੀ ਪਾਈ ਹੋਈ ਹੈ ਅਤੇ ਇਸ ਪੋਥੀ ਵਿੱਚ ਗੁਰੂ ਗੋਬਿੰਦ ਸਿੰਘ ਜੀ ਦੀਆਂ ਬਾਣੀਆਂ ਦਰਜ ਹਨ। ਇਹ ਵੀ ਦੱਸਣਾ ਬਣਦਾ ਹੈ ਕਿ ਸਵਿਟਜ਼ਰਲੈਂਡ ਦੀ ਬੈਰਨ ਯੂਨੀਵਰਸਿਟੀ ਦੇ ਅਰਕਿਆਲੋਜੀ ਡਿਪਾਰਟਮੈਂਟ ਵੱਲੋਂ ਇਸ ਗੱਲ ਦੀ ਪੁਸ਼ਟੀ ਕੀਤੀ ਗਈ ਹੈ ਕਿ ਇਹ ਪੋਥੀ ਸਾਹਿਬ 300 ਸਾਲ ਤੋਂ ਵੱਧ ਪੁਰਾਣੀ ਹੈ ਅਤੇ ਇਸ ਵਿੱਚ ਜੋ ਕਾਗਜ਼ ਵਰਤਿਆ ਗਿਆ ਹੈ ਉਹ ਮੁਗਲ ਕਾਲ ਸਮੇਂ ਵਰਤਿਆ ਜਾਂਦਾ ਸੀ।

ਇਸ ਪੋਥੀ ਸਾਹਿਬ ਨੂੰ ਲਾਗਿਨਥਾਲ ਗੁਰਦਵਾਰਾ ਸਾਹਿਬ ਦੇ ਪ੍ਰਬੰਧਕਾਂ ਭਾਈ ਕਰਨ ਸਿੰਘ ਜੀ ਅਤੇ ਭਾਈ ਹਰਵਿੰਦਰ ਸਿੰਘ ਜੀ ਨੇ ਅਣਥੱਕ ਮਿਹਨਤ ਦੁਆਰਾ ਪਾਕਿਸਤਾਨ ਦੇ ਇੱਕ ਮੁਸਲਿਮ ਪਰਿਵਾਰ ਕੋਲੋਂ ਪ੍ਰਾਪਤ ਕੀਤਾ ਅਤੇ ਸਟਿਜ਼ਰਲੈਂਡ ਲਿਆਂਦਾ ਗਿਆ। ਹੁਣ ਇਸ ਪੋਥੀ ਸਾਹਿਬ ਨੂੰ ਡਿਜ਼ੀਟਲ ਕਰਵਾਉਣ ਦੀ ਸੇਵਾ ਸਵਿਟਜ਼ਲੈਂਡ ਦੀ ਸਭ ਤੋਂ ਵੱਡੀ ਡਿਜ਼ੀਟਲ ਫਰਮ ਦੁਆਰਾ ਚੱਲ ਰਹੀ ਹੈ, ਜਿਸ ਉੱਪਰ ਕਾਫ਼ੀ ਜਿਆਦਾ ਖਰਚਾ ਆਵੇਗਾ। ਡਿਜ਼ੀਟਲ ਕਰਨ ਤੋਂ ਬਾਅਦ ਇਸ ਪੋਥੀ ਸਾਹਿਬ ਦੇ ਦਰਸ਼ਨ ਇਲੈਕਟ੍ਰਾਨਿਕ ਮੀਡੀਆ ਦੁਆਰ ਸੰਗਤਾਂ ਨੂੰ ਕਰਵਾਏ ਜਾ ਸਕਦੇ ਹਨ। ਇਸ ਪੋਥੀ ਸਾਹਿਬ ਨੂੰ ਸਵਿਟਜ਼ਲੈਂਡ ਤੋਂ ਭਾਈ ਸੰਤੋਖ ਸਿੰਘ ਜੀ, ਭਾਈ ਗੁਰਦੀਪ ਸਿੰਘ ਜੀ, ਡਾ: ਕੁਲਵੰਤ ਸਿੰਘ ਜੀ, ਭਾਈ ਬਿਕਰਮਜੀਤ ਸਿੰਘ ਅਤੇ ਸਿੱਖੀ ਸੇਵਾ ਸੋਸਾਇਟੀ ਦੁਆਰਾ ਇਟਲੀ ਵਿੱਚ ਲਿਆ ਕੇ ਸੰਗਤਾਂ ਨੂੰ ਦਰਸ਼ਨ ਕਰਵਾਏ ਗਏ।

ਇਸ ਪੋਥੀ ਸਾਹਿਬ ਦੇ ਦਰਸ਼ਨ ਕਰਨ ਲਈ ਸਿੱਖ ਸੰਗਤਾਂ ਗੁਰਦਵਾਰਾ ਲਾਗਿਨਥਾਲ ਦੇ ਪ੍ਰਬੰਧਕ ਭਾਈ ਕਰਨ ਸਿੰਘ ਜੀ ਨਾਲ ਫੋਨ ਨੰਬਰ 0041 76 4271316 ਉੱਪਰ ਸੰਪਰਕ ਕੀਤਾ ਜਾ ਸਕਦਾ ਹੈ।