ਸ਼੍ਰੋਮਣੀ ਅਕਾਲੀ ਦਲ, ਆਸਟ੍ਰੇਲੀਆ ਦੇ ਵਰਕਰਾਂ ਦੀ ਇਕੱਤਰਤਾ, ਸਿਡਨੀ ਵਿਚ ਹੋਈ। ਇਸ ਵਿਚ ਸ਼੍ਰੋਮਣੀ ਅਕਾਲੀ ਦਲ ਦੇ ਸਰਗਰਮ ਵਰਕਰਾਂ ਤੋਂ ਇਲਾਵਾ ਭਾਰਤੀ ਜਨਤਾ ਪਾਰਟੀ ਦੇ ਵਰਕਰਾਂ ਨੇ ਵੀ ਭਰਪੂਰ ਹਿੱਸਾ ਲਿਆ।

ਚਾਹ ਪਾਣੀ ਛਕਣ ਉਪ੍ਰੰਤ ਸਾਰਿਆਂ ਨੂੰ "ਜੀ ਆਇਆਂ ਨੂੰ" ਪ੍ਰਸਿਧ ਪੰਥਕ ਆਗੂ ਸ. ਕੰਵਲਜੀਤ ਸਿੰਘ ਸਿੱਧੂ ਜੀ ਨੇ ਆਖ ਕੇ, ਦੋਹਾਂ ਜਥੇਬੰਦੀਆਂ ਦੇ ਬੁਲਾਰਿਆਂ ਨੂੰ, ਵਾਰੀ ਵਾਰੀ ਸਟੇਜ ਉਪਰ ਬੁਲਾ ਕੇ ਆਪਣੇ ਵਿਚਾਰ ਪਰਗਟ ਕਰਨ ਲਈ ਬੇਨਤੀ ਕੀਤੀ।

ਸਭ ਤੋਂ ਪਹਿਲਾਂ, ਏਥੋਂ ਦੀ ਸਟੇਟ ਦੇ ਦਲ ਦੇ ਮੁਖ ਬੁਲਾਰੇ, ਸ. ਹਰਜੀਤ ਸਿੰਘ ਸਲ੍ਹਣ ਨੇ, ਖੁੰਬਾਂ ਵਾਂਗੂੰ ਉਠਣ ਤੇ ਫਿਰ ਬਹਿ ਜਾਣ ਵਾਲ਼ੀਆਂ ਪਾਰਟੀਆਂ ਤੇ ਵਿਅੰਗ ਕੱਸਦਿਆਂ ਕਿਹਾ ਕਿ ਸ਼੍ਰੋਮਣੀ ਅਕਾਲੀ ਦਲ ਇਤਿਹਾਸਕ ਜਥੇਬੰਦੀ ਹੈ ਜੇਹੜੀ ੧੯੨੦ ਤੋਂ ਪੰਜਾਬੀਆਂ ਦੀ ਸਰਬਪੱਖੀ ਅਗਵਾਈ ਕਰਦੀ ਆ ਰਹੀ ਹੈ।
ਰਾਹੁਲ ਜੇਠੀ ਜੀ ਨੇ ਭਾਰਤੀ ਜਨਤਾ ਪਾਰਟੀ ਦੇ ਵਰਕਰਾਂ ਦੀ ਅਗਵਾਈ ਕਰਦੇ ਹੋਏ, ਦੋਹਾਂ ਦਲਾਂ ਦੀ ਆਪਸੀ ਸਾਂਝ ਉਪਰ ਉਪਰ ਜੋਰ ਦਿਤਾ ਤੇ ਕਿਹਾ ਕਿ ਅਜਿਹੇ ਇਕੱਠ ਗਾਹੇ ਬਗਾਹੇ ਕਰਦੇ ਰਹਿਣਾ ਚਾਹੀਦਾ ਹੈ।

ਇਸ ਤੋਂ ਬਾਅਦ ਦਿੱਲੀ ਨਿਵਾਸੀ, ਸ਼੍ਰੋਮਣੀ ਅਕਾਲੀ ਦੇ ਹਰਾਵਲ ਦਸਤਾ ਕਰਕੇ ਜਾਣੀ ਜਾਂਦੀ ਜਥੇਬੰਦੀ 'ਸਿੱਖ ਸਟੂਡੈਂਟ ਫੈਡ੍ਰੇਸ਼ਨ' ਦੇ ਪੁਰਾਣੇ ਅਤੇ ਸ਼੍ਰੋਮਣੀ ਅਕਾਲੀ ਦਿੱਲੀ ਦੀ ਕੋਰ ਕਮੇਟੀ ਦੇ ਮੈਂਬਰ, ਸ. ਪ੍ਰਤਿਪਾਲ ਸਿੰਘ ਕਪੂਰ ਜੀ ਨੇ, ਮੌਜੂਦਾ ਪੰਥਕ ਹਾਲਾਤ ਉਪਰ ਵਿਸਥਾਰ ਸਹਿਤ ਚਾਨਣਾ ਪਾਇਆ।

ਸਿਡਨੀ ਨਿਵਾਸੀ ਪੰਥਕ ਵਿੱਦਵਾਨ ਅਤੇ ਮੁਖ ਸਲਾਹਕਾਰ ਅਤੇ ਸਰਪ੍ਰਸਤ ਸ਼੍ਰੋਮਣੀ ਅਕਾਲੀ ਦਲ ਆਸਟ੍ਰੇਲੀਆ, ਗਿਆਨੀ ਸੰਤੋਖ ਸਿੰਘ ਜੀ ਨੇ, ਸ਼੍ਰੋਮਣੀ ਅਕਾਲੀ ਦਲ ਦੇ ਇਤਿਹਾਸਕ ਪਿਛੋਕੜ ਉਪਰ ਪ੍ਰਭਾਵਸ਼ਾਲੀ ਭਾਸ਼ਨ ਰਾਹੀਂ ਚਾਨਣਾ ਪਾਇਆ। ਇਸ ਤੋਂ ਇਲਾਵਾ ਗਿਆਨੀ ਜੀ ਨੇ ੧੯੬੨ ਤੋਂ ਲੈ ਕੇ ਹੁਣ ਤੱਕ ਸ਼੍ਰੋਮਣੀ ਅਕਾਲੀ ਦਲ ਅਤੇ ਪਹਿਲਾਂ ਜਨਸੰਘ ਅਤੇ ਫਿਰ ੧੯੮੦ ਤੋਂ ਲੈ ਕੇ ਹੁਣ ਤੱਕ, ਭਾਰਤੀ ਜਨਤਾ ਪਾਰਟੀ ਦੇ ਆਪਸੀ ਸਬੰਧਾਂ ਬਾਰੇ, ਭਰਪੂਰ ਜਾਣਕਾਰੀ ਦਿਤੀ, ਜੇਹੜੀ ਕਿ ਹੁਣ ਤੱਕ ਕਿਸੇ ਲਿਖਤ ਵਿਚ ਨਹੀਂ ਸੀ ਆਈ। ਇਸ ਦੇ ਨਾਲ਼ ਹੀ ਗਿਆਨੀ ਜੀ ਨੇ ਦੱਸਿਆ ਕਿ ਕਿਵੇਂ ਕਾਂਗਰਸ ਪੰਜਾਬ ਦੇ ਹਿੰਦੂ ਸਿੱਖਾਂ ਨੂੰ ਆਪਸ ਵਿਚ ਲੜਾ ਕੇ ਰਾਜ ਕਰਦੀ ਰਹੀ। ਕਦੀ ਹਿੰਦੀ ਪੰਜਾਬੀ ਦਾ ਰੌਲ਼ਾ ਪਵਾਇਆ, ਕਦੀ ਹਿੰਦੂ ਸਿੱਖਾਂ ਨੂੰ ਆਪਸ ਵਿਚ ਲੜਾਇਆ ਤੇ ਕਦੀ ਪੰਜਾਬੀ ਸੂਬੇ ਦੇ ਮਸਲੇ ਤੇ ਦੋਹਾਂ ਧਿਰਾਂ ਨੂੰ ਇਕ ਦੂਜੇ ਦੇ ਵਿਰੁਧ ਵਰਤਣ ਦਾ ਕੋਝਾ ਯਤਨ ਕਰਦੀ ਰਹੀ।

ਦੋਹਾਂ ਜਥੇਬੰਦੀਆਂ ਦੇ ਆਗੂਆਂ ਦੀ ਸਿਆਣਪ ਸਦਕਾ, ੧੯੬੬ ਤੋਂ ਪੰਜਾਬ ਦੇ ਲੋਕਾਂ ਨੂੰ ਇਸ ਗੱਲ ਦੀ ਸਮਝ ਆ ਗਈ ਤਾਂ ਹੁਣ ਕਾਂਗਰਸ ਕੋਈ ਨਾ ਕੋਈ ਹੋਰ ਮਸਲਾ ਖੜ੍ਹਾ ਕਰਕੇ, ਦੋਹਾਂ ਧਰਮਾਂ ਦੇ ਲੋਕਾਂ ਵਿਚ ਮੱਤਭੇਦ ਪੈਦਾ ਕਰਨ ਦਾ ਯਤਨ ਕਰਦੀ ਰਹਿੰਦੀ ਹੈ। "ਪਾੜੋ ਤੇ ਰਾਜ ਕਰੋ" ਉਸ ਦੀ ਨੀਤੀ ਦਾ ਸਭ ਤੋਂ ਵਡੇਰਾ ਹਿੱਸਾ ਹੈ।

ਇਹਨਾਂ ਤੋਂ ਇਲਵਾ ਹੋਰ ਵੀ ਬੁਲਾਰਿਆਂ ਨੇ ਆਪੋ ਆਪਣੇ ਵਿਚਾਰ ਪਰਗਟ ਕੀਤੇ ਜਿੰਨ੍ਹਾਂ ਵਿਚੋਂ ਕੁਝ ਦੇ ਨਾਂ ਇਸ ਪ੍ਰਕਾਰ ਹਨ: ਬੀ.ਜੇ.ਪੀ. ਤੋਂ ਅੰਕੁਰ ਪਟੇਲ, ਦਿਵਿਆਂਗ ਸ਼ਰਮਾ, ਰਮਈਆ ਵਰਨ ਵਾਸੂ, ਮੰਜੂ ਨਾਥ, ਅਮਿਤ ਵਿਆਸ, ਰਣਧੀਰ। ਸ਼੍ਰੋਮਣੀ ਅਕਾਲੀ ਦਲ ਵੱਲੋਂ: ਰਾਜ ਮਹਿੰਦਰ ਸਿੰਘ ਮੰਡ, ਚਰਨ ਪ੍ਰਤਾਪ ਸਿੰਘ, ਗੁਰਦੇਵ ਸਿੰਘ ਗਿੱਲ, ਜਸਕੀਰਤ ਸਿੰਘ, ਅਨਮੋਲਕ ਸਿੰਘ, ਦਲਬੀਰ ਸਿੰਘ ਆਦਿ ਦੇ ਨਾਂ ਵਰਨਣ ਯੋਗ ਹਨ।

ਇਸ ਤੋਂ ਇਲਾਵਾ ਯੂਥ ਅਕਾਲੀ ਦਲ ਦੇ ਸਟੇਟ ਪ੍ਰਧਾਨ, ਸ. ਸੁਖਬੀਰ ਸਿੰਘ ਗਰੇਵਾਲ ਨੇ ਆਏ ਹੋਏ ਸੱਜਣਾਂ ਦਾ ਧੰਨਵਾਦ ਕੀਤਾ।