ਪ੍ਰਧਾਨਗੀ ਲਈ ਬਿਨੇ ਪੱਤਰ
ਰੁਪਿੰਦਰ ਹੁੰਦਲ. ਇਟਲੀ 
 
ਵੱਡੀ ਜਿਹੀ ਤਸਵੀਰ ਮੇਰੀ ਇੱਕ
ਪਹਿਲੇ ਪੰਨੇ ਉੱਤੇ ਲਵਾ ਦਿਓ
ਵੇਖਿਓ ਕੰਮ ਹੋਣਗੇ ਸਾਰੇ,
ਮੈਨੂੰ ਬਸ ਪ੍ਰਧਾਨ ਬਣਾ ਦਿਓ!
ਵੇਖਿਓ ਕੰਮ ਹੋਣਗੇ ਸਾਰੇ,
ਮੈਨੂੰ ਬਸ ਪ੍ਰਧਾਨ.....
 
ਲੱਭੋ ਕੁੱਝ ਇੱਕ ਏਸੇ ਬੰਦੇ
ਬੰਦੇ ਨਹੀਂ ਜੋ ਚਮਚੇ ਹੋਵਣ,
ਮੈਂ ਹੱਸਾਂ ਤਾਂ ਹੱਸਣ ਉਹ ਵੀ,
ਮੈਂ ਰੋਵਾਂ ਤਾਂ ਉਹ ਵੀ ਰੋਵਣ
ਮੇਰੇ ਨਾਂਮ ਦੀ ਜੱਪਣ ਮਾਲਾ,
ਬਾਕੀ ਸਾਰੇ ਕੰਮ ਭੁਲਾ ਦਿਓ!
ਵੇਖਿਓ ਕੰਮ ਹੋਣਗੇ ਸਾਰੇ,
ਮੈਨੂੰ ਬਸ ਪ੍ਰਧਾਨ.....
 
ਮੈਂ ਕੁਰਸੀ ਤੇ ਬੈਠਾ ਹੋਵਾਂ
ਬਾਕੀ ਸਾਰੇ ਹੋਵਣ ਥੱਲੇ
ਪੱਲੇ ਭਾਵੇਂ ਕੱਖ ਨਾਂ ਹੋਵੇ,
ਫਿਰ ਵੀ ਹਰ ਥਾਂ ਮੇਰੀ ਚੱਲੇ
ਰਾਉਲੀ ਵਾਲਿਆ "ਕਰਾਂ ਬੇਨਤੀ
ਇਹ ਅਹੁਦਾ ਮੇਰੀ ਝੋਲੀ ਪਾ ਦਿਓ!
ਵੇਖਿਓ ਕੰਮ ਹੋਣਗੇ ਸਾਰੇ,
ਮੈਨੂੰ ਬਸ ਪ੍ਰਧਾਨ.....
30/11/2021

ਨਹੀਂ ਮਿਲਦੀ ਤਰੱਕੀ
ਰੁਪਿੰਦਰ ਹੁੰਦਲ. ਇਟਲੀ 

ਇਹ ਗੱਲ ਵੀ ਜਾਣਨੀ ਪੈਂਦੀ ਏ,
ਸ਼ੋਹਰਤ ਦੀ ਬੁਲੰਦੀ, ਪਾਵਣ ਲਈ
ਬੜੀ ਧੂੜ, ਛਾਨਣੀ ਪੈਂਦੀ ਏ !
ਨਹੀਂ ਮਿਲਦੀ ਤਰੱਕੀ......

ਕਿਸਮਤ ਦੇ ਬੰਦ,  ਦਰਵਾਜੇ ਵੀ, 
ਕਦੇ ਆਪ ਮੁਹਾਰੇ ਖੁੱਲਦੇ ਨਹੀਂ
ਇਹ ਝੰਡੇ ਯਾਰ, ਤਰੱਕੀਆਂ ਦੇ,
ਬਿਨ ਕੀਤੇ ਕੁੱਝ ਤਾਂ, ਝੁਲਦੇ ਨਹੀਂ
ਸਦਾ ਚਮਕੇ ਪਸੀਨਾ, ਹੀਰਾ ਬਣ
ਜਦ ਰੂਹ ਦੀ ਚਾਨਣੀ ਪੈਂਦੀ ਏ !
ਨਹੀਂ ਮਿਲਦੀ ਤਰੱਕੀ......

ਪਹਿਲੇ ਨੰਬਰ ਉੱਤੇ,  ਆਵਣ ਲਈ
ਬੜਾ ਜ਼ੋਰ ਲਗਾਉਣਾ ਪੈਂਦਾ ਹੈ
ਹੋਰਾਂ ਨੂੰ ਹਰਾਵਣ ਤੋਂ ਪਹਿਲਾਂ,
ਸਾਨੂੰ ਖੁੱਦ ਨੂੰ ਹਰਾਉਣਾ ਪੈਂਦਾ ਹੈ
ਰਾਉਲੀ ਵਾਲਿਆ "ਸ਼ਮਾ ਜਨੂਨ ਵਾਲੀ,
ਪਹਿਲਾਂ ਦਿੱਲ' ਚ ਬਾਲਣੀ ਪੈਂਦੀ ਏ !
ਨਹੀਂ ਮਿਲਦੀ ਤਰੱਕੀ......
26/04/2020

ਨਵੇਂ ਸਾਲ ਨੂੰ, ਜੀ ਆਇਆਂ ਜੀ
ਰੁਪਿੰਦਰ ਹੁੰਦਲ. ਇਟਲੀ 

ਇਹ ਸਭ ਲਈ ਭਾਗਾਂ ਭਰਿਆ ਹੋਵੇ,
ਸਭ ਦੇ ਵੇਹੜੇ, ਖੁਸ਼ੀਆਂ ਭਰਿਆ
ਕੱਲ ਤੋਂ, ਸੂਰਜ, ਚੜਿਆ  ਹੋਵੇ !
ਨਵੇਂ ਸਾਲ ਨੂੰ, ਜੀ ਆਇਆਂ......

ਪਿਆਰ, ਮਹੁੱਬਤ,  ਤੇ ਭਾਈਚਾਰਾ
ਸਭ ਦਾ ਹੋਵੇ, ਇੱਕੋ ਨਾਅਰਾ
ਅਮਨ, ਏਕਤਾ, ਤੇ ਖੁਸ਼ਹਾਲੀ,
ਨਵੇਂ ਸਾਲ ਵਿੱਚ, ਮਿਲਣ ਦੁਬਾਰਾ
ਹਿੰਦੂ, ਮੁਸਲਿਮ, ਸਿੱਖ, ਈਸਾਈ,
ਇੱਕ ਦੂਜੇ ਸੰਗ, ਖੜਿਆ ਹੋਵੇ !
ਨਵੇਂ ਸਾਲ ਨੂੰ, ਜੀ ਆਇਆਂ ਜੀ...

ਧਰਮ ਦੇ ਨਾਂ ਤੇ, ਵੰਡ ਨਾਂ  ਹੋਵੇ
ਹੁਣ ਕਿੱਧਰੇ ਕੋਈ, ਜੰਗ ਨਾਂ ਹੋਵੇ
ਸਭਨਾਂ ਦੇ ਚਾਅ, ਸਾਂਝੇ ਹੋਵਣ,
ਭੇਦ -ਭਾਵ ਦੀ, ਕੰਧ  ਨਾਂ ਹੋਵੇ
ਰਾਉਲੀ ਵਾਲਿਆ "ਨਵੇਂ ਸਾਲ ਵਿੱਚ
ਸਭ ਕੁੱਝ ਹਰਿਆ -ਭਰਿਆ ਹੋਵੇ !
ਨਵੇਂ ਸਾਲ ਨੂੰ, ਜੀ ਆਇਆਂ ਜੀ....

ਨਵੇਂ ਸਾਲ ਨੂੰ, ਜੀ ਆਇਆਂ ਜੀ
ਇਹ ਸਭ ਲਈ ਭਾਗਾਂ ਭਰਿਆ ਹੋਵੇ,
01/01/2020

ਹਾਸਿਆਂ ਦੀ ਫ਼ੀਸ
ਰੁਪਿੰਦਰ ਹੁੰਦਲ. ਇਟਲੀ

ਹੁਣ  ਨਹੀਂ  ਹੋਰ  ਲੁਕਾਈ  ਜਾਂਦੀ ,
ਦਿਲ ਵਿੱਚ ਜਿਹੜੀ ਚੀਸ ਭਰੀ  ਏ 
ਏਥੇ ਤੱਕ ਵੀ ਪੁਹੰਚਣ ਦੇ ਲਈ ,
ਹਾਸਿਆਂ ਦੀ ਮੈਂ ਫ਼ੀਸ ਭਰੀ ਏ |
....................
ਰੋਟੀ ਬਿਨ ਵੀ  ਫ਼ਿਕਰ  ਬਥੇਰੇ ,
ਪਾਈ ਰੱਖਦੇ  ਰਹੇ ਜੋ ਘੇਰੇ  
ਟੰਗ ਕੇ ਸਾਰੀਆਂ ਸਧਰਾਂ ਸੂਲੀ ,
ਹਰ ਦਿਨ ਹੀ, ਤਕਲੀਫ਼ ਜਰੀ ਏ |
....................
ਸਫ਼ਰ ਰਹਿ ਗਿਆ ,ਘਰ ਤੋਂ ਕੰਮ ਦਾ ,
ਬੋਝ ਨਾਂ ਹਲਕਾ ਹੋਇਆ ਗ਼ਮ ਦਾ 
 ਦੁੱਖ, ਤਕਲੀਫ਼ਾਂ ਵਾਲੀ ਬੱਦਲੀ ,
ਸਾਡੇ ਸਿਰ  ਤੇ ਖੂਬ  ਵਰੀ  ਏ |
.......................
ਕੰਡਿਆਂ ਭਰੇ ,ਇਹ ਰਾਹਵਾਂ ਉੱਤੇ ,
ਨਹੀਂ  ਭਰੋਸਾ  ਸਾਹਾਂ ਉੱਤੇ  
ਬੇ -ਜਾਨ ਇਸ ਜਿਸਮ ਦੇ ਅੰਦਰ ,
ਹਰ ਇੱਕ ਮੇਰੀ ਰੀਝ ਮਰੀ ਏ |
...................
ਰਾਉਲੀ ਵਾਲਿਆ " ਸੁਣ ਵੇ ਯਾਰਾ ,
ਲੈ ਚੱਲ ਫ਼ਿਰ, ਉਸ ਸ਼ਹਿਰ ਦੁਬਾਰਾ 
ਜਿੱਥੇ ਕੁੱਝ ਇੱਕ ਰਿਸ਼ਤਿਆਂ ਵਾਲੀ ,
ਹਾਲੇ  ਵੀ ਕੋਈ ਵੇਲ  ਹਰੀ  ਏ |
17/12/2019

ਸੱਚੇ ਮਾਰਗ ਗੁਰਮਤਿ ਦੇ
ਰੁਪਿੰਦਰ ਹੁੰਦਲ. ਇਟਲੀ
ਆਪਣੇ ਘਰ ਵਿੱਚ ਲੱਖ ਲਗਾਇਓ ,ਬੂਟੇ ਤੁਸੀਂ ਕ੍ਰਿਸਮਿਸ ਦੇ 
ਪਰ ਸਿੱਖੋ ਕਿਰਦਾਰ ਨਾ ਭੁੱਲਿਓ ,ਹੁੰਦੇ ਨੇ ਜੋ ਗੁਰਸਿੱਖ ਦੇ 
ਆਪਣੇ ਘਰ ਵਿੱਚ ਲੱਖ ਲਗਾਇਓ..............
 
ਭੁੱਲਿਓ ਨਾਂ ਤੁਸੀਂ ਲਾਲਾਂ ਨੂੰ ,ਜੋ ਆਪਣਾ ਸਿੱਦਕ ਨਾਂ ਹਾਰੇ ਸੀ 
ਧਰਮ ਪਿਆਰਾ ਸੀ ਓਹਨਾ ਨੂੰ ,ਨਾ ਲਾਲਚ ਕਦੇ ਪਿਆਰੇ ਸੀ 
ਕਦੇ ਦਲੇਰ ਕੌਮਾਂ ਦੇ ਵਾਰਿਸ਼ ,ਹੋਰਾਂ ਅੱਗੇ ਨਹੀਂ ਵਿਕਦੇ ,
ਆਪਣੇ ਘਰ ਵਿੱਚ ਲੱਖ ਲਗਾਇਓ..............
 
ਚੇਤੇ ਰੱਖਿਓ ਸਿੰਘਾਂ ਨੇ ਬੰਦ ,ਬੰਦ ਕਿੱਦਾਂ ਕਟਵਾਏ ਸੀ 
ਭਾਈ ਮਤੀ ਦਾਸ ਨੇ ਖੁਦ੍ਹ ਤੇ ,ਆਰੇ ਕਿੰਝ  ਚਲਵਾਏ  ਸੀ 
 ਲੱਖ ਤਸੀਹੇ ਝੱਲ ਕੇ ਵੀ  ਸਿੰਘ ਜੰਗਾਂ ਆਏ ਨੇ ਜਿੱਤਦੇ ,
ਆਪਣੇ ਘਰ ਵਿੱਚ ਲੱਖ ਲਗਾਇਓ..............
 
ਰਾਉਲੀ ਵਾਲਿਆ ,ਸਿਦਕ ਨਾ ਛੱਡਿਓ ,ਦੁੱਖਾਂ ਵਿੱਚ ਘਬਰਾਇਓ ਨਾ 
ਮਹਿੰਗੇ ਮੁੱਲ ਮਿਲੀ ਸਰਦਾਰੀ ,ਹੁੰਦਲਾ ਵੇ ਭੁੱਲ ਜਾਇਓ ਨਾ 
ਆਪਣੇ ਬੱਚਿਆਂ ਨੂੰ ਵੀ ਦੱਸਿਉ ,ਸੱਚੇ ਮਾਰਗ ਗੁਰਮਤਿ ਦੇ ,
ਆਪਣੇ ਘਰ ਵਿੱਚ ਲੱਖ ਲਗਾਇਓ..............
26/12/2018

ਏਤਬਾਰ
ਰੁਪਿੰਦਰ ਹੁੰਦਲ. ਇਟਲੀ

ਤੇਰੇ ਉੱਤੇ ਅਸੀਂ ਕੀਤਾ ਏਤਬਾਰ 
ਅਸਾਂ ਤੋਂ ਬੱਸ ਇਹੀ ਭੁੱਲ ਹੋਈ 
ਅਸੀਂ ਕਰ ਬੈਠੇ ਤੇਰੇ ਨਾਲ ਪਿਆਰ 
ਅਸਾਂ ਤੋਂ ਬੱਸ ਇਹੀ ਭੁੱਲ ਹੋਈ 
ਤੇਰੇ ਉੱਤੇ ਅਸੀਂ ਕੀਤਾ......
 
ਕੀਤਾ ਵਿਸਵਾਸ਼ ਤੇਰੇ ਲਾਰਿਆਂ ਦੇ ਉੱਤੇ ਨੀ 
ਡੋਬ ਸਾਨੂੰ ਆ ਗਈ , ਕਿਨਾਰਿਆਂ ਦੇ ਉੱਤੇ ਨੀ 
ਖਾਦੀ ਜਿੰਦਗੀ ਖ਼ਤਾ ਪਹਿਲੀ ਵਾਰ 
ਅਸਾਂ ਤੋਂ ਬੱਸ ਇਹੀ ਭੁੱਲ ਹੋਈ 
ਤੇਰੇ ਉੱਤੇ ਅਸੀਂ ਕੀਤਾ......
 
ਤੇਰੇ ਉੱਤੇ ਦਿੱਲ ਸਾਡਾ ਹੁੰਦਾ ਜੇ ਫ਼ਿਦਾ ਨਾ 
ਜਿੰਦਗੀ ,ਚ ਖਾਂਦੇ ਅਸੀਂ ਕਦੇ ਵੀ ਖ਼ਤਾ ਨਾ 
ਅਸੀਂ ਸਭ ਕੁੱਝ ਗਏ ਹਾਂ ਅੱਜ ਹਾਰ 
ਅਸਾਂ ਤੋਂ ਬੱਸ ਇਹੀ ਭੁੱਲ ਹੋਈ 
ਤੇਰੇ ਉੱਤੇ ਅਸੀਂ ਕੀਤਾ......
 
ਰਾਉਲੀ ਵਾਲਾ ,ਲਿਖਦਾ ਏ ਸੱਚੇ ਸਦਾ ਗੀਤ ਨੀ 
ਸੱਚੇ ਪਿਆਰਾਂ ਵਾਲੇ ਨੇ ,ਜਮਾਨੇ ਗਏ ਬੀਤ ਨੀ 
ਅਸੀਂ ਸਮਝੇ ਨਾਂ ਇਹੋ ਗੱਲ ਯਾਰ 
ਅਸਾਂ ਤੋਂ ਬੱਸ ਇਹੀ ਭੁੱਲ ਹੋਈ 
ਤੇਰੇ ਉੱਤੇ ਅਸੀਂ ਕੀਤਾ......
 
ਤੇਰੇ ਉੱਤੇ ਅਸੀਂ ਕੀਤਾ ਏਤਬਾਰ 
ਅਸਾਂ ਤੋਂ ਬੱਸ ਇਹੀ ਭੁੱਲ ਹੋਈ। ...........
25/09/2018

ਯਾਰੋ ਜਾਗੋ, ਨਸ਼ੇ ਤਿਆਗੋ
ਰੁਪਿੰਦਰ ਹੁੰਦਲ, ਇਟਲੀ

ਕਹਿੰਦਾ ਅਜੇ ਲੱਤ ਮੈਨੂੰ ,ਲੱਗੀ ਨਹੀਂ ਨਸ਼ਿਆਂ ਦੀ 
ਭਾਵੇਂ ਨਿੱਤ ਸ਼ਾਮ ਨੂੰ ,ਗਲਾਸੀ ਰੋਜ਼ ਲਾਂਦਾ ਹਾਂ 
ਪੈਗ -ਪੈਗ ਲਾ ਕੇ ਪੂਰੀ ਬੋਤਲ ਮੈਂ ਚਾੜ ਜਾਵਾਂ 
ਸਰੂਰ ਜਿਹਾ ਬਣਾ ਕੇ ,ਮੈਂ ਫਿਰ ਰੋਟੀ ਖਾਂਦਾ ਹਾਂ |
ਕਹਿੰਦਾ ਅਜੇ ਲੱਤ ਮੈਨੂੰ ..............
 
ਕਦੇ -ਕਦੇ ਜਰਦੇ ਦੀ ਪੁੜੀ ਜੇਬੋਂ  ਕੱਢ  ਕੇ 
ਬੁੱਲਾਂ ਥੱਲੇ ਰੱਖ ਲਵਾਂ ,ਮੂੰਹ ਪੂਰਾ ਅੱਡ ਕੇ 
ਜੁੜ ਜਾਂਦੀ ਤਾਰ ਮੇਰੀ ,ਖੌਰੇ ਕਿੱਥੇ ਜਾ ਕੇ ਫਿਰ ?
ਵੱਖਰੀ ਹੀ ਦੁਨੀਆਂ ,ਚ ਖੁਦ ਨੂੰ ਮੈਂ ਪਾਂਦਾ ਹਾਂ |
ਕਹਿੰਦਾ ਅਜੇ ਲੱਤ ਮੈਨੂੰ .............
 
ਭੰਗ ਦਿਆਂ ਪੱਤਿਆਂ ਨੂੰ ਚੰਗੀ ਤਰਾਂ ਕੁੱਟ ਕੇ 
ਸੁੱਕੇ ਹੀ ਮੈਂ ਖਾ ਜਾਵਾਂ ਚਾਹ ਵਿੱਚ ਸੁੱਟ ਕੇ 
ਹਰ ਚੀਜ਼ ਆਸੇ -ਪਾਸੇ ਦਿਸੇ ਫਿਰ ਘੁੰਮਦੀ 
ਆਪਣੇ ਮੈਂ ਆਪ ਉੱਤੇ ਮਸਾਂ ਕਾਬੂ ਪਾਂਦਾ ਹਾਂ 
ਕਹਿੰਦਾ ਅਜੇ ਲੱਤ ਮੈਨੂੰ ................
 
ਰਾਉਲੀ ਵਾਲਾ ,ਆਖੇ ਨਾਮ ਜੱਪੋ ਸਾਰੇ  ਰੱਬ ਦਾ 
ਨਾਮ ਦਾ ਸਰੂਰ ਕਿਸੇ ਨਸ਼ੇ, ਚੋਂ ਨਹੀਂ ਲੱਭਦਾ 
ਭੁਲਿਆ ਸਵੇਰ ਦਾ ਜੇ ,ਸ਼ਾਮ ਨੂੰ ਕੋਈ ਘਰੇ ਆ ਜੇ ,
ਹੁੰਦਲਾ ,ਮੈਂ ਉਸ ਨੂੰ  ਵੀ ,ਭੁਲਿਆ ਨਾਂ ਆਂਦਾ ਹਾਂ |
ਕਹਿੰਦਾ ਅਜੇ ਲੱਤ ਮੈਨੂੰ ................
16/09/2018

ਅੱਗਾਂ ਲਾਵਣ ਵਾਲੇ
ਰੁਪਿੰਦਰ ਹੁੰਦਲ, ਇਟਲੀ

ਅੱਗਾਂ ਲਾਵਣ ਵਾਲੇ ਬਹੁਤੇ 
ਪਾਣੀ ਪਾਵਣ ਵਾਲੇ ਥੋੜੇ ।

ਹੱਦਾਂ ਬੰਨਣ ਵਾਲੇ ਲੱਖਾਂ ,
ਹੱਦਾਂ ਢਾਵਣ ਵਾਲੇ  ਥੋੜੇ ।

ਨਫ਼ਰਤ ਬਹੁਤ ਦਿਲਾਂ ਦੇ ਅੰਦਰ ,
ਗਲ ਨਾਲ ਲਾਵਣ ਵਾਲੇ ਥੋੜੇ ।

ਲਾਰੇ ਲੱਖਾਂ ,ਲੋਕੀਂ ਲਾਉਂਦੇ ,
ਤੋੜ ਨਿਭਾਵਣ ਵਾਲੇ ਥੋੜੇ ।

ਅੱਧ ਵਿਚਕਾਰ ਤਾਂ ਡੋਬਣ ਕਿੰਨੇ ,
ਸਿਰੇ ਪੁਚਾਵਣ ਵਾਲੇ ਥੋੜੇ ।

ਬਹੁਤ ਨੇ ਮਸਜ਼ਿਦ ,ਢਾਵਣ ਵਾਲੇ ,
ਮੰਦਿਰ ਜਾਵਣ ਵਾਲੇ ਥੋੜੇ  ।

ਕਸਮਾਂ ਖਾਵਣ ਵਾਲੇ ਹਰ ਥਾਂ ,
ਸਾਥ ਨਿਭਾਵਣ ਵਾਲੇ ਥੋੜੇ  ।

ਰੰਗ ਬਦਲਦੀ ਦੁਨੀਆਂ ਅੰਦਰ ,
ਦੁੱਖ ਵੰਡਾਵਣ  ਵਾਲੇ ਥੋੜੇ ।

ਮਾਰਨ ਵਾਲੇ ਫਿਰਨ ਹਜ਼ਾਰਾਂ ,
ਪਰ ਬਚਾਵਣ  ਵਾਲੇ ਥੋੜੇ ।

ਰਾਉਲੀ ਵਾਲਿਆ "ਦੁਸਮਣ ਬਹੁਤੇ ,
ਤੈਨੂੰ ਚਾਹਵਣ  ਵਾਲੇ ਥੋੜੇ ।
 23/06/2018
 

ਦਿਲ ਦੀ ਗੱਲ
ਦਿਲ ਦੀ ਗੱਲ ਬੁੱਲਾਂ ਤੇ ਆਈ 
ਪਰ ਅਲਫਾਜ ਮਿਲੇ ਨਾ ਸਾਨੂੰ 
ਐਸਾ ਸਾਥੋਂ ,ਵਿਛੜ ਗਏ ਉਹ 
ਉਦੋਂ ,ਬਾਦ ਮਿਲੇ ਨਾ ਸਾਨੂੰ ।
ਦਿਲ ਦੀ ਗੱਲ। ........
 
ਨਾ ਉਹ ਅੱਖਾਂ ਤੱਕੀਆਂ ਕਿਧਰੇ 
ਨਾ ਉਹ ਜ਼ੁਲਫ਼ਾਂ ਉੱਡੀਆਂ ਕਿਧਰੇ 
ਉਸ ਦੇ ਬੁੱਲਾਂ ਦੇ ਰੰਗ ਵਰਗੇ ,
ਕਿਤੇ ਗੁਲਾਬ ਮਿਲੇ ਨਾ ਸਾਨੂੰ ।
ਦਿਲ ਦੀ ਗੱਲ। ........
 
ਜਿਸਨੂੰ ਸਾਡੇ ਦਿਲ ਨੇ ਚਾਹਿਆ 
ਉਹ ਸਾਨੂੰ ਕਿਤੇ ਨਜ਼ਰ ਨਾ ਆਇਆ 
ਮਿਲਦੇ ਰਹੇ ਲੱਖ ਚੇਹਰੇ ਹਰ ਥਾਂ ,
ਮਗਰ ਜਨਾਬ ਮਿਲੇ ਨਾ ਸਾਨੂੰ ।
ਦਿਲ ਦੀ ਗੱਲ। ........
 
ਰਾਉਲੀ ਵਾਲਿਆ ,ਵੇ ਕੀ ਦੱਸੀਏ ?
ਲਿਖ -ਲਿਖ ਪੱਤਰ ਕਿੰਨੇ ਪਾਏ 
ਪਾਏ ਖਤਾਂ ਦੇ ਅੱਜ ਤੱਕ ਹੁੰਦਲਾ 
ਕਦੇ ਜਵਾਬ ਮਿਲੇ ਨਾ ਸਾਨੂੰ ।
ਦਿਲ ਦੀ ਗੱਲ। ........
 17/06/2018

ਮੋਹ ਦੇ ਰਿਸ਼ਤੇ
ਰੁਪਿੰਦਰ ਹੁੰਦਲ, ਇਟਲੀ

ਮੋਹ ਦੇ ਰਿਸ਼ਤੇ ਨਾਜੁਕ ਹੁੰਦੇ 
ਗ਼ਲਤ ਨਾ ਤਾਰ ਵਜਾ ਬੈਠੀਂ ,
ਆਪਣੇ ਆਖਿਰ ,ਆਪਣੇ ਹੁੰਦੇ 
ਦਿਲਾ ਨਾ ਰੰਗ ਵਟਾ  ਬੈਠੀਂ  ।
ਮੋਹ ਦੇ ਰਿਸ਼ਤੇ।.......

ਮਾਪੇ ਝਿੜਕਣ ,ਮੱਤਾਂ ਦੇਵਣ 
ਅਕਸਰ ਸਾਡੇ ਭਲੇ ਲਈ ,
ਵੇਖੀ ਉਏ ਤੂੰ ਭਲਿਆ ਲੋਕਾ 
ਗੱਲ ਨਾ ਦਿੱਲ ਤੇ ਲਾ  ਬੈਠੀਂ ।
ਮੋਹ ਦੇ ਰਿਸ਼ਤੇ।......

ਜਦ ਬੇਗਾਨੇ, ਪਾਸਾ ਵੱਟਣ 
ਆਪਣੇ ਤੱਦ ਕੰਮ ਆਉਂਦੇ ਨੇ ,
ਆਪਣਿਆਂ ਤੋਂ ਵੇਖੀਂ ਕਿਧਰੇ 
ਦੂਰ ਨਾ ਜਿੰਦੇ ਜਾ ਬੈਠੀਂ ।
ਮੋਹ ਦੇ ਰਿਸ਼ਤੇ।......

ਰਾਉਲੀ ਵਾਲਿਆ ਖੂਨ ਦੇ ਰਿਸ਼ਤੇ 
ਆਖਰੀ ਸਾਹ ਤੱਕ ਨਿਭਦੇ ਨੇ ,
ਹੁੰਦਲਾ , ਤੂੰ ਅਣਜਾਣ ਪੁਣੇ ਵਿੱਚ 
ਕਿਤੇ ਨਾ ਠੋਕਰ ਖਾ ਬੈਠੀਂ ।
ਮੋਹ ਦੇ ਰਿਸ਼ਤੇ। ........
 11/05/2018

ਯਾਰੋ ਜਾਗੋ, ਨਸ਼ੇ ਤਿਆਗੋ
ਰੁਪਿੰਦਰ ਹੁੰਦਲ, ਇਟਲੀ

ਪਾਰਕ ਦੇ ਵਿੱਚ ਬੈਠੇ ,ਕਿੱਦਾਂ ਦੰਦੀਆਂ ਕੱਢਦੇ ਨੇ 
ਮੈਨੂੰ ਤਾਂ ਇਹ ਮੁੰਡੇ ਸਾਰੇ ,ਇੰਡੀਅਨ ਲੱਗਦੇ ਨੇ ,
ਸਿਰੇ ਦੇ ਅਮਲੀ ,ਸਾਰੇ ਰੌਲਾ ਪਾਈ  ਜਾਂਦੇ ਨੇ 
ਜਿਧਰੋਂ ਜੋ ਵੀ ਮਿਲਦਾ, ਸਭ ਕੁੱਝ ਖਾਈ ਜਾਂਦੇ ਨੇ ।
 
ਕਿਸੇ ਦੇ ਹੱਥ  ਵਿੱਚ ਬੀਅਰ ,ਕਿਸੇ ਨੇ ਪੱਕੀ ਲਾਈ ਏ 
ਕਿਸੇ ਨੇ ਸਿਗਟਾਂ ਦੀ ਪਈ ਪੂਰੀ ਰੇਲ ਬਣਾਈ ਏ ,
ਅੰਬਰਾਂ ਦੇ ਵਿੱਚ ਧੂਆਂ ਕਿਵੇਂ ਉਡਾਈ ਜਾਂਦੇ ਨੇ 
ਜਿਧਰੋਂ ਜੋ ਵੀ ਮਿਲਦਾ।...........
 
ਇੱਕ ਨੇ ਜਰਦਾ ਮਲਿਆ ,ਦੂਜੇ ਕਾਹਲੇ ਪੈ ਗਏ ਨੇ 
ਆਪਣਾ -ਆਪਣਾ ਹਿੱਸਾ ਕਿੱਦਾਂ ਖੋਹ ਕੇ ਲੈ ਗਏ ਨੇ 
ਪਲ ਵਿੱਚ ਚੰਗੇ ,ਪਲ ਵਿੱਚ ਹੋ ਸੁਦਾਈ ਜਾਂਦੇ ਨੇ 
ਜਿਧਰੋਂ ਜੋ ਵੀ ਮਿਲਦਾ।..........
 
ਇੱਕ ਆਖਦਾ ਮੈਂ ਤਾਂ ਸਾਰੀ ਰਾਤ ਜਾਗਣੀ ਏਂ 
ਤਾਹੀਉਂ ਜੇਬ 'ਚ ਰੱਖੀ ਯਾਰੋ ਤੇਜ਼ ਨਾਗਣੀ ਏਂ 
ਜੋ ਵੀ ਪੈਸੇ ਮਿਲਦੇ ,ਇੰਙ ਗਵਾਈ ਜਾਂਦੇ ਨੇ 
ਜਿਧਰੋਂ ਜੋ ਵੀ ਮਿਲਦਾ।......
 
ਕੋਈ ਕਹਿੰਦਾ ਮੇਰੇ ਯਾਰੋ ,ਚੱਲਦੇ ਨਹੀਂ ਗੋਡੇ 
ਇਕ ਹਫਤੇ ਤੋਂ ਭੋਰਾ ਵੀ ,ਮੈਂ ਖਾਦੇ ਨਹੀਂ ਡੋਡੇ 
ਸੁੱਕੇ ਪੱਤਿਆਂ ਵਾਂਗੂ ਸਭ ਮੁਰਝਾਈ ਜਾਂਦੇ ਨੇ 
ਜਿਧਰੋਂ ਜੋ ਵੀ ਮਿਲਦਾ।...........
 
ਰਾਉਲੀ ਵਾਲਾ ਸਬਨਾਂ ਨੂੰ ਸਮਝਾਈ ਜਾਂਦਾ ਏ 
ਕਹਿੰਦੇ ਇਹ ਤਾਂ , ਐਵੇਂ ਰੌਲਾ ਪਾਈ ਜਾਂਦਾ ਏ 
ਸਾਰੇ ਉਸਦੀ ਗੱਲ ਤੇ ,ਪਰਦਾ ਪਾਈ ਜਾਂਦੇ ਨੇ 
ਜਿਧਰੋਂ ਜੋ ਵੀ ਮਿਲਦਾ।.........
26/04/2018 
(ਸੁੱਚੇ ਮੋਤੀ ਕਾਵ ਸੰਗ੍ਰਹਿ ਵਿੱਚੋਂ )
 ਰੁਪਿੰਦਰ ਹੁੰਦਲ 

ਅਸਿਫ਼ਾ ਦੀ ਅਵਾਜ਼ 
ਰੁਪਿੰਦਰ ਹੁੰਦਲ, ਇਟਲੀ

ਫੇਰ ਸਿਆਸਤ, ਦੇ ਹੱਥਾਂ ਵਿੱਚ 
ਫਸਕੇ ਰਹਿ ਗਈ ,ਕੂੰਜ ਨਿਮਾਣੀ 
ਤੁਰ ਗਈ ਰੋਂਦੀ ,ਇਸ ਦੁਨੀਆਂ  ਤੋਂ ,
ਅੱਖਾਂ ਦੇ ਵਿੱਚ  ਭਰ ਕੇ ਪਾਣੀ ।
 
ਕਿਉਂ ਜਾਲਮ ਦੇ ਪੈਰਾਂ ਥੱਲੇ 
ਕੁਚਲੀ ਗਈ ,ਕਲੀ ਖਿਲਣ ਤੋਂ ਪਹਿਲਾਂ 
ਪਾਪੀ ਛੁੱਟ ਕੇ ,ਆ ਜਾਵਣਗੇ ,
ਇਕ ਦਿਨ ਸਜਾ ,ਮਿਲਣ ਤੋਂ ਪਹਿਲਾਂ 
ਫਿਰ ਉਹੀ ਦੋਹਰਾਵਣ ਗੇ  ਉਹ ,
ਆਦਤ ਆਪਣੀ ਉਹੀ  ਪੁਰਾਣੀ ।
 
ਜਾਲਮ ਦੇ ਹੱਥਾਂ ਵਿਚ ਕਿੱਦਾਂ ,
ਹਾਉਕੇ ਭਰਦੀ ,ਹੋਊ ਵਿਚਾਰੀ 
ਹੱਥ ਜੋੜਦੀ ,ਮਿੰਨਤਾਂ ਕਰਦੀ ,
ਰੋਂਦੀ ਹੋਊ ,ਕਿਸਮਤ ਦੀ ਮਾਰੀ 
ਤੜਫ -ਤੜਫ ਕੇ ਮਰ ਗਈ ਹੋਣੀ ,
ਛੋਟੀ ਜਹੀ ,ਉਹ ਧੀ -ਧਿਆਣੀ।
 
ਰਾਉਲੀ ਵਾਲਿਆ ,ਦਿਲ ਇਹ ਮੇਰਾ ,
ਇੱਕੋ -ਬੱਸ ਨਿਆਂ ਇਹ ਮੰਗੇ ,
ਜੋ ,ਵੀ ਨੇ ਇਸ ਧੀ ਦੇ ਦੋਸ਼ੀ 
ਫਾਂਸੀ ਉਤੇ ਜਾਵਣ ਟੰਗੇ 
ਸਬਕ ਲਵੇ ਕੋਈ ਇਸ ਤੋਂ ਦੁਨੀਆ 
ਹੋਵੇ ਸਾਡੀ, ਸੋਚ ਸਿਆਣੀ ।
17/04/2018

ਕਦੇ ਕਾਸ਼
ਰੁਪਿੰਦਰ ਹੁੰਦਲ, ਇਟਲੀ

ਕਦੇ ਕਾਸ਼ ਅਸੀਂ ਮਿਲ ਬੈਠਾਂਗੇ 
ਤਾਂ ਆਪਣੇ ਦੁੱਖ ਫਰੋਲਾਂਗੇ ,
ਤੇਰੇ ਨਾਲ ਦਿਲਾਂ ਦੀਆਂ ਵੇ ਯਾਰਾ 
ਅਸੀਂ  ਸਾਰੀਆਂ  ਰਮਜ਼ਾਂ ਖੋਲਾਂਗੇ ।
ਕਿੰਨੇ ਵਕਫ਼ੇ ਬਾਅਦ ਅਸੀਂ ਫਿਰ 
ਕੁੱਝ ਕਰ -ਕਰ ਸ਼ਿਕਵੇ ਰੁੱਸਾਂਗੇ ,
ਇਕ ਦੂਜੇ ਦੇ ਗਲ ਫਿਰ ਲੱਗਕੇ 
ਕਿੰਞ ਗੁਜਰੀ ,ਜਿੰਦਗੀ ਪੁੱਛਾਂਗੇ ।
ਕੁੱਝ  ਆਪਣੇ ਬਾਰੇ  ਦੱਸਾਂਗੇ 
ਕੁੱਝ ਤੇਰੇ ਬਾਰੇ ਜਾਣਾ ਗੇ ,
ਚੇਤੇ ਕਰ ਵਕ਼ਤ ਪੁਰਾਣੇ ਨੂੰ 
ਅਤੀਤ ਦੀ ਮਿੱਟੀ ਛਾਣਾਂਗੇ ।
ਜੋ ਤੁਰ ਗਏ ਹੱਥ ਛੁਡਾ ਸਾਥੋਂ
ਉਨ੍ਹਾਂ ਦੀਆਂ ਗੱਲਾਂ ਤੋਰਾਂਗੇ ,
ਕੁੱਝ ਧੁਁਦਲੀਆਂ ਪਈਆਂ ਯਾਦਾਂ ਨੂੰ 
ਗੱਲਾਂ ਕਰ -ਕਰ ਕੇ ਮੋੜਾਂਗੇ ।
ਕੁੱਝ ਤੇਰੇ ਦਿਲ ਵਿੱਚ ਹੋਣਗੀਆਂ 
ਕੁੱਝ ਮੇਰੇ ਦਿਲ ਵਿੱਚ ਹੋਣਗੀਆਂ ,
ਫਿਰ ਵਕ਼ਤ ਦੀਆਂ ਦਹਿਲੀਜਾਂ ਤੇ 
ਦੋਵਾਂ ਦੀਆਂ ਅੱਖੀਆਂ ਰੋਣਗੀਆਂ ।
ਫਿਰ ਉਸੇ ਪਿੰਡ ਦੀ ਧਰਤੀ ਤੇ 
ਉਹ ਵਕ਼ਤ ਪੁਰਾਣਾ ਲੱਭਾਂਗੇ ,
ਇਕ ਦੂਜੇ ਨੂੰ ਅਸੀਂ ਦੋਵੇਂ 
ਬਚਪਨ ਦੇ ਨਾ ਲੈ ਸਁਦਾਂਗੇ ।
ਰਾਉਲੀ ਵਾਲਿਆ ਆਪਣੇ ਜਖਮਾਂ ਨੂੰ 
ਅਸੀਂ ਪਿਆਰ ਦੀ ਮਰਹਮ ਲਾਵਾਂਗੇ ,
ਫਿਰ ਆਪੋ ਆਪਣੇ ਘਰ ਨੂੰ ਵੇ ,
ਹੁੰਦਲਾ ਆਪਾਂ ਮੁੜ ਆਵਾਂਗੇ ।
14/02/2018

ਧੀਆਂ
ਰੁਪਿੰਦਰ ਹੁੰਦਲ, ਇਟਲੀ

ਦੀਵਾ ਬਲੇ ਤਾਂ ਚਾਨਣ ਕਰਦਾ 
ਧੀ ਜੰਮੇ ਤਾਂ ,ਘਰ ਰੁਸ਼ਨਾਉਂਦੀ ,
ਫਿਰ ਵੀ ਲੋਕੀ ਧੀਆਂ  ਮਾਰਨ 
ਮੈਨੂੰ  ਇਹ ਗੱਲ ਸਮਝ ਨੀ ਆਉਂਦੀ ।  
 
ਪੁੱਤ  ਹੁੰਦੇ  ਨੇ   ਮਿੱਠੜੇ  ਮੇਵੇ 
ਜੀ ਸਦਕੇ ਰੱਬ ਸਭ ਨੂੰ ਦੇਵੇ ,
ਪਰ ਧੀ ਵੀ ਤਾਂ ਸਦਾ ਨਿਮਾਣੀ 
ਮਾਪਿਆਂ  ਦੇ ਰਹੀ ਦੁੱਖ ਵੰਡਾਉਂਦੀ ।
 
ਇਕ  ਘਰ ਛੱਡਕੇ ,ਦੂਜੇ  ਜਾਂਦੀ 
ਦੋ ਪਰਿਵਾਰਾਂ ਨੂੰ ਇਹ  ਜੋੜੇ ,
ਕਦੇ ਵੀਰਾਂ ਦੇ ਬੰਨਦੀ  ਰੱਖੜੀ 
ਬੱਚਿਆਂ ਨਾਲ ਇਹ ਲਾਡ ਲਡਾਉਂਦੀ ।
 
ਪੁੱਤਰ  ਸਾਂਭਣ  ਸਦਾ  ਜਮੀਨਾਂ 
ਧੀ ਸਾਂਭੇ ਪਿਓ ਦੀ ਸਰਦਾਰੀ ,
ਸਭ ਰਿਸ਼ਤੇ ਤਾਂ  ਧੀ ਤੋਂ ਬਣਦੇ 
ਵੱਖਰੇ -ਵੱਖਰੇ  ਨਾਂਮ ਧਰਾਓਂਦੀ ।
 
ਰਾਉਲੀ ਵਾਲਾ ਰੁਪਿੰਦਰ ਆਖੇ 
ਧੀਆਂ ਦੀ ਵੀ ਖ਼ੁਸ਼ੀ ਮਨਾਈਏ ,
ਕੁੱਖ ਵਿਚ ਹੋਰ ਨਾ ਮਾਰੀਏ ਹੁੰਦਲਾ 
ਇਹ ਵੀ ਜਾਨ ਤਾਂ ,ਜੀਣਾ ਚਾਹੁੰਦੀ ।
 06/02/2018
 
ਮਾਪੇ 
ਰੁਪਿੰਦਰ ਹੁੰਦਲ, ਇਟਲੀ

ਉਂਗਲੀ ਫੜ ਕੇ ਜਿਨ੍ਹਾਂ ਨੂੰ ਮਾਪੇ 
ਚੱਲਣਾ ਕਦੇ ਸਖਾਉਦੇਂ ਨੇ ,
ਲੋੜ  ਪੈਣ ਤੇ  ਉਹੀ  ਬੱਚੇ 
ਕਾਹਤੋਂ ਰੰਗ ਵਟਾਉਂਦੇ ਨੇ ।
 
ਸੀਨੇ ਉੱਤੇ ਸਹਿ -ਸਹਿ ਚੀਸਾਂ 
ਕਰਜ਼ਾ ਚੱਕ ਕੇ ਭਰਦੇ ਫੀਸਾਂ,
ਜਿਨਾਂ ਦੀ ਖਾਤਿਰ ਰਾਤ-ਰਾਤ ਤੱਕ 
ਜਾਗ ਕੇ ਵਕ਼ਤ ਲੰਘਾਉਦੇਂ ਨੇ ।
 
ਭਾਵੇਂ ਕਰ ਮੇਹਨਤ ਮਜ਼ਦੂਰੀ 
ਕਰਦੇ ਬੱਚਿਆਂ ਦੀ ਮੰਗ ਪੂਰੀ ,
ਬੱਚਿਆਂ ਦੇ ਭਵਿੱਖ  ਦੀ ਖਾਤਿਰ 
ਸਭ ਕੁਝ ਦਾਅ ਤੇ ਲਾਓੁਦੇ ਨੇਂ ।
 
ਬੱਚਿਆਂ ਦੀ ਹਰ ਜਿੱਦ  ਦੀ ਖਾਤਿਰ 
ਲੱਖਾਂ  ਹੀ  ਦੁੱਖ  ਜਰਦੇ  ਨੇ ,
ਦੁੱਖ ਸਹਿ ਲੈਂਦੇ, ਸੀ ਨਾ ਕਰਦੇ 
ਹਰ ਇੱਕ ਫਰਜ਼ ਨਿਭਾਓੁਦੇਂ ਨੇਂ ।
 
ਰਾਉਲੀ ਵਾਲਿਆ, ਮਾਪੇ  ਹੁੰਦੇ 
ਸਿਰ ਤੇ  ਸੰਘਣੀਆਂ ਛਾਵਾਂ ਵਰਗੇ,
ਪਤਾ ਉਦੋ ਲੱਗ ਜਾਂਦਾ ,ਹੁੰਦਲਾ 
ਜਦ ਇਹ ਫੁੱਲ ਮੁਰਝਾਉਦੇਂ ਨੇ ।
3/02/2018