ਮੁੱਦਤ ਹੋਈ, ਨਹੀਂ ਹੋਈ ਗੱਲਬਾਤ ਦੋਸਤਾ
ਘੁੱਪ ਹਨੇਰੀ ਲਗਦੀ ਏ ਪ੍ਰਭਾਤ ਦੋਸਤਾ

ਇੰਜ ਤਾਂ ਕਿਸ ਦਿਨ ਨਹੀਂ ਤੈਨੂੰ ਮੈਂ ਸੋਚਿਆ
ਯਾਦ ਆਇਆ ਤੂੰ ਬਹੁਤ ਕਲ ਰਾਤ ਦੋਸਤਾ

ਅੱਖਾਂ ਵਿਚੋਂ ਪਾਣੀ ਬਣ ਕੇ ਵਹਿ ਤੁਰੇ ਮੋਤੀ
ਚੇਤੇ ਆਈ ਆਖਰੀ ਮੁਲਾਕਾਤ ਦੋਸਤਾ

ਸਾਰੀ ਗੱਲ ਦੱਸੇ ਬਿਨਾ ਨਾ ਨੀਂਦ ਪੈਂਦੀ ਸੀ
ਹੁਣ ਕਿਵੇਂ ਛੁਪ ਜਾਂਦੀ ਏ ਹਰ ਬਾਤ ਦੋਸਤਾ

ਤੂੰ ਗਲਤ ਹੈਂ ਜਾਂ ਕਿਤੇ ਮੇਰੀ ਹੀ ਹੈ ਗਲਤੀ
ਕੁਝ ਵੀ ਹੋਵੇ, ਹੋਵੇ ਤਾਂ ਸ਼ੁਰੂਆਤ ਦੋਸਤਾ

ਕੋਈ ਮੋਮ ਤੇ ਕੋਈ ਪਥਰਦਿਲ ਹੋ ਜਾਂਦਾ ਏ
ਆਪੋ ਆਪਣੀ ਹੁੰਦੀ ਏ ਔਕਾਤ ਦੋਸਤਾ

ਤੂੰਹੀਓ ਕਹਿੰਦਾ ਸੀ ਕਿ ਨਾ ਬਦਲਾਂਗੇ ਕਦੇ ਵੀ
ਬਦਲ ਗਏ ਨੇ ਸ਼ਾਇਦ ਹੁਣ ਹਾਲਾਤ ਦੋਸਤਾ

02/06/2014

ਗ਼ਜ਼ਲ
ਪਰਮਿੰਦਰ ਸਿੰਘ 'ਅਜ਼ੀਜ਼'

ਤੇਰੇ ਦਿਲ ਦੀਆਂ ਸੱਜਣਾਂ ਤੂੰ ਜਾਣੇਂ ਸਾਥੋਂ ਪਿਆਰ ਛੁਪਾਇਆ ਜਾਂਦਾ ਨਹੀਂ
ਤੂੰ ਸਮਝੇਂ ਜਾਂ ਨਾ ਸਮਝੇਂ ਸਾਥੋਂ ਦਿਲ ਨੂੰ ਸਮਝਾਇਆ ਜਾਂਦਾ ਨਹੀਂ

ਕੀ ਜਾਦੂ ਅਸਾਂ ਤੇ ਹੋਇਆ ਏ ਜਦ ਦਾ ਤੂੰ ਦਿਲ ਨੂੰ ਛੋਹਿਆ ਏ
ਇਕ ਸਾਦਾ ਜਿਹੇ ਤੇਰੇ ਚਿਹਰੇ ਤੋਂ ਨਜ਼ਰਾਂ ਨੂੰ ਹਟਾਇਆ ਜਾਂਦਾ ਨਹੀਂ

ਦਿਲੋਂ ਹਰ ਇਕ ਭੇਦ ਮਿਟਾ ਦਿੱਤਾ ਸਭਨਾਂ ਨਾਲ ਪਿਆਰ ਸਿਖਾ ਦਿੱਤਾ
ਰੱਬ ਵਰਗਾ ਜਾਪੇ ਪਿਆਰ ਤੇਰਾ ਤੈਨੂੰ ਪਾ ਕੇ ਗਵਾਇਆ ਜਾਂਦਾ ਨਹੀਂ

ਦੋ ਚਾਰ ਸੁਹਾਨੇ ਪਲ ਦੇ ਜਾ ਖੇਡਣ ਹੱਸਣ ਦਾ ਵੱਲ ਦੇ ਜਾ
ਹੰਝੂਆਂ ਨੂੰ ਲੁਕਾ ਕੇ ਚਿਹਰੇ ਤੇ ਇੰਞ ਹਾਸਾ ਸਜਾਇਆ ਜਾਂਦਾ ਨਹੀਂ

ਜਿੱਥੇ ਬਹਿ ਜਾਂ ਬੈਠਾ ਰਹਿੰਦਾ ਹਾਂ ਯਾਰਾਂ ਤੋਂ ਛੁਪਦਾ ਰਹਿੰਦਾ ਹਾਂ
'ਕੱਲ੍ਹਿਆਂ ਰਹਿਣਾ ਚੰਗਾ ਲੱਗਦੈ ਕਿਤੇ ਆਇਆ ਜਾਇਆ ਜਾਂਦਾ ਨਹੀਂ

ਇਹ ਕੈਸਾ ਵਸਲ ਇਹ ਕੈਸਾ ਮਿਲਨ ਮਿਲ ਕੇ ਵੀ 'ਅਜ਼ੀਜ਼' ਹੈ ਪਿਆਸਾ ਮਨ
ਤੈਥੋਂ ਸ਼ਰਮ ਘਟਾਈ ਜਾਂਦੀ ਨਹੀਂ ਸਾਥੋਂ ਕਦਮ ਵਧਾਇਆ ਜਾਂਦਾ ਨਹੀਂ