ਅੰਦਰ ਬਾਹਰ
ਨਰਿੰਦਰ ਗਿੱਲ, ਵੈਨਕੂਵਰ

ਮੇਰੇ ਅੰਦਰ ਅਤੇ ਬਾਹਰ ਦੀ ਜੰਗ ਜਾਰੀ ਹੈ ,
ਫਿਲਹਾਲ ਬਾਹਰ ਭਾਰੀ ਹੈ |
ਮੇਰੇ ਬਾਹਰ ਇੱਕ ਅੰਦਰ ਵਸਦਾ ਹੈ ,
ਅੰਦਰ ਇੱਕ ਬਾਹਰ ਹੱਸਦਾ ਹੈ |
ਦੁਮੇਲ ਤੇ ਖੜ੍ਹਾ ਹੈ ਸੂਰਜ ਲਾਲ ਹੈ ਫ਼ਲਕ ,
ਅੰਦਰ ਆਥਣ ਜਿਹਾ ਤੇ ਬਾਹਰ ਹੈ ਭਲਕ |
ਨਿੱਜ ਤੇ ਬੇਗਾਨਗੀ ਦੀ ਕਸ਼ਮਕਸ਼ 'ਚ
ਅੰਦਰ ਦੇ ਮਜ਼ਹਬ ਦਾ ਬਾਹਰ ਦੇ ਇਖਲਾਕ ਨਾਲ ਹੋ ਰਿਹਾ ਹੈ ਘੋਲ |
ਵਿਰਾਸਤੀ ਚੋਲੇ ਨੂੰ ਇੱਕੀਵੀਂ ਸਦੀ ਦੇ ਫੈਸ਼ਨ ਨੇ ਦਿੱਤਾ ਹੈ ਰੋਲ਼ |
ਯਮਲੇ ਤੇ ਸਦੀਕ ਨੂੰ ਬਥੇਰੀ ਹੁੰਦੀ ਏ ਪੌਪ ਦੀ ਕਲੀ ,
ਫਿਰ ਵੀ ਜੈਕਸਨ ਨੂੰ ਢਾਹ ਰਹੀ ਮਾਣਕ ਦੀ ਕਲੀ |
ਊੜਾ ਊਠ ਦਾ ਕੱਦ 'ਏ' ਐੱਪਲ ਦੇ ਸੇਬ ਨਾਲੋਂ ਕਿਤੇ ਸੀ ਵੱਡਾ ,
ਜਦੋਂ ਮੈਂ ਭਾਸ਼ਾਵਾਂ ਦਾ ਸਬਕ ਲਿਆ |
ਪਰ ਐੱਪਲ ਦੇ ਲੈਪਟਾਪ ਨੇ ਸਣੇ ਊਠ ਮੈਨੂੰ ਵੀ ਹੜੱਪ ਲਿਆ |
ਮੇਰੇ ਅੰਦਰ ਚੋਰੀ ਠੱਗੀ ਤੇ ਧੌਂਸ ਦਾ ਨਦੀਨ ,
ਉੱਠਣ ਦਵੇ ਨਾ ਸੋਚ ਅਤੇ ਸੱਚ ਦੀ ਫ਼ਸਲ |
ਮੇਰੇ ਬਾਹਰ ਦੇ ਇਖਲਾਕ 'ਚ ਛੁਪਿਆ ਪਦਾਰਥੀ ਦੈਂਤ ,
ਚੁਰਾਈ ਜਾ ਰਿਹਾ ਏ ਮੇਰੀ ਨਸਲ ਤੇ ਅਸਲ |
ਫਿਲਹਾਲ ਬਾਹਰ ਭਾਰੀ ਹੈ ,
ਜੰਗ ਅਜੇ ਜਾਰੀ ਹੈ |
01/02/2018