ਝੂਠ ਉਹਦਾ ਵਿਕੀ ਜਾਂਦਾ ਏ
ਬਿੱਟੂ ਖੰਗੂੜਾ, ਲੰਡਨ

ਬੇਈਮਾਨ ਮਖੌਟਿਆ ਦਾ ਰੂਪ
ਸਮੇਂ ਦੇ ਹੱਥੀ ਟਿਕੀ ਜਾਂਦਾ ਏ
ਸੱਚ ਮੇਰਾ ਸੁਣਦਾ ਨਾ ਕੋਈ
ਤੇ ਝੂਠ ਉਹਦਾ ਵਿਕੀ ਜਾਂਦਾ ਏ

ਜਹਾਲਤ ਦੀ ਜਿੱਤ ਦਾ ਸੂਰਜ 
ਭਰ ਜੋਬਨ ਤੇ ਆਇਆ
ਅਕਲਾਂ ਦੇ ਚੰਨ ਨੇ ਖੌਰੇ
ਮੂੰਹ ਕਿਉਂ ਹੈ ਛੁਪਾਇਆ
ਨਪੁੰਸਕ ਸੋਚਾ ਦਾ ਪੱਥਰ
ਨੀਹਾਂ ਵਿੱਚ ਟਿਕੀ ਜਾਂਦਾ ਏ
ਸੱਚ ਮੇਰਾ ਸੁਣਦਾ ਨਾ ਕੋਈ
ਤੇ ਝੂਠ ਉਹਦਾ ਵਿਕੀ ਜਾਂਦਾ ਏ


ਉੱਚੀਆਂ ਬੇਸੁਰੀਆਂ ਅਵਾਜਾਂ 
ਗਲਾ ਦੱਬਿਆ ਹੈ ਸੁਰਾ ਦਾ
ਹੋਰ ਕਿੰਨੀ ਕੁ ਦੇਰ ਪੰਜਾਬ 
ਵਸਦਾ ਰਹੇਗਾ ਗੁਰਾਂ ਦਾ
ਨਕਸ਼ਾ ਖੈਬਰ ਤੋਂ ਤਿੱਬਤ ਤੱਕ 
ਟੋਟੇ ਟੋਟੇ ਹੋ ਮਿਟੀ ਜਾਂਦਾ ਏ
ਸੱਚ ਮੇਰਾ ਸੁਣਦਾ ਨਾ ਕੋਈ
ਤੇ ਝੂਠ ਉਹਦਾ ਵਿਕੀ ਜਾਂਦਾ ਏ

ਸਾਡੀ ਪੱਗ ਰੰਗੀ ਏ ਵੱਖੋ ਵੱਖਰੀ
ਉਹਨਾਂ ਦਾ ਸਾਰਾ ਲਿਬਾਸ ਇੱਕੋ 
ਜੋਸ਼ ਨਾਲ ਨਾ ਜਿੱਤ ਹੋਵਣ ਜੰਗਾ
ਕੁਝ ਤਾਂ ਤੁਸੀ ਵੀ ਹੁਣ ਹੋਸ਼ ਸਿੱਖੋ
ਲੋਕਤੰਤਰ ਵੱਧ ਸਿਰਾਂ ਦੇ ਸਿਰ ਤੇ
ਬਹੁਗਿਣਤੀ ਹੱਥੋਂ ਪਿੱਟੀ ਜਾਂਦਾ ਏ
ਸੱਚ ਮੇਰਾ ਸੁਣਦਾ ਨਾ ਕੋਈ
ਤੇ ਝੂਠ ਉਹਦਾ ਵਿਕੀ ਜਾਂਦਾ ਏ

ਟੇਕਦੇ ਮੱਥੇ ਸਾਰੀ ਉਮਰ ਗੁਜਰੀ
ਨਾ ਸਨਮੁੱਖ ਤੇ ਨਾ ਮਨਮੁੱਖ ਹੋਇਆ
ਪੂਜਾ ਕਰਦਾ ਕਰਦਾ ਬੁੱਤਾਂ ਦੀ 
ਮੈਂ ਵੀ ਬੇਜਾਨ ਇੱਕ ਬੁੱਤ ਹੋਇਆ
ਨਗਾਰਖਾਤੇ ਚ ਤੂਤੀ ਦੀ ਕੌਣ ਸੁਣਦਾ
ਬਿੱਟੂ ਐਂਵੇ ਕਵਿਤਾ ਲਿਖੀ ਜਾਂਦਾ ਏ
ਸੱਚ ਮੇਰਾ ਸੁਣਦਾ ਨਾ ਕੋਈ
ਤੇ ਝੂਠ ਉਹਦਾ ਵਿਕੀ ਜਾਂਦਾ ਏ
26/05/2019

ਬਿੱਟੂ ਖੰਗੂੜਾ
khangurha.bittu@gmail.com
+447877792555

ਬੁਢਾਪਾ

ਦੁਪਹਿਰ ਹੁੰਦੀ ਸਿਖਰਾ ਵਾਲੀ
ਡੂੰਘੀ ਸ਼ਾਮ ਠਰੰਮਾ ਹੁੰਦਾ ਏ

ਖੇਤ ਅੜਿਕਾ ਸੁੱਕੀ ਟਾਹਲੀ
ਪਿਛਲੀ ਉਮਰ ਨਿਕੰਮਾ ਹੁੰਦਾ ਏ

ਸਰੀਰ ਹੋ ਜਂਾਦਾ ਲਹੂ ਤੋ ਖਾਲੀ
ਵਹਿਣ ਦਿਲਾ ਦਾ ਲੰਮਾ ਹੁੰਦਾ ਏ

ਨੀਂਦ ਦੀ ਛੋਟੀ ਜਿਹੀ ਪਿਆਲੀ
ਸੁਪਨਾ ਲੰਮ ਸਲੰਮਾ ਹੁੰਦਾ ਏ

ਸੁਕੇ ਪੱਤਰ ਟੁੱਟੇ ਤਰਕਾਲੀ
ਹਰਾ ਕਚੂਰ ਬੇਰੰਗਾ ਹੁੰਦਾ ਏ

ਖੜੋਤ ਚ ਹੋਵੇ ਕਾਈ ਕਾ਼ਲੀ
ਵਗਦਾ ਪਾਣੀ ਚੰਗਾ ਹੁੰਦਾ ਏ

ਸ਼ਮਾ ਬੁਝੇ ਰੌਸ਼ਨੀ ਤੋ ਖਾਲੀ
ਸੜਕੇ ਵੀ ਨਾ ਪਤੰਗਾ ਹੁੰਦਾ ਏ

ਬਿੱਟੂ ਚੇਤੇ ਆਵੇ ਚੂਰੀ ਵਾਲੀ
ਬੁੱਢੇ ਵਾਰੇ ਖਾਲੀ ਛੰਨਾ ਹੂੰਦਾ ਏ

06/03/2013
+44 7877792555
bittulatala@hotmail.co.uk