ਸਊਥਾਲ
- ਸਾਥੀ ਲੁਧਿਆਣਵੀ –ਲੰਡਨ

ਕੌਣ ਭੁੱਲ ਸਕੇਗਾ ਨਜ਼ਾਰੇ ਸਊਥਾਲ ਦੇ ।
ਝੱਜੂ ਵਾਲੇ ਸੁੱਖਾਂ ਦੇ ਚੁਬਾਰੇ ਸਊਥਾਲ ਦੇ ।

 =ਟਾਹਲੀ ਵਾਲਾ ਪੱਬ ਤੇ ਗਲਾਸੀ ਵਾਲ਼ਾ ਜੰਕਸ਼ਨ,
ਦੇਸੀਆਂ ਦੇ ਹੱਥ ਠੇਕੇ ਸਾਰੇ ਸਊਥਾਲ ਦੇ ।

 =ਕੈਫ਼ੇ, ਲਾਇਬਰੇਰੀ, ਨਾ ਕੋਈ ਪੱਬ ਹੈ ਫ਼ਰੰਗੀ ਦਾ,
ਫਿਰਦੇ ਨੇ ਗੋਰੇ ਮਾਰੇ ਮਾਰੇ ਸਊਥਾਲ ਦੇ ।

 =ਦਾਰੂ ਨਾਲ਼ ਰੱਜੇ ਹੋਏ ਦਮਾਮੇ ਜੱਟ ਮਾਰਦੇ,
ਖ਼ੂੰਜੇ ਲੱਗੇ ਹੋਏ ਗੋਰੇ ਸਾਰੇ ਸਊਥਾਲ ਦੇ ।

 =ਆਲੂ, ਛੋਲੇ, ਡੋਸੇ ਤੇ ਕਬਾਬਾਂ ਦਾ ਇਹ ਗੜ੍ਹ ਹੈ,
ਗੋਲ਼ ਗੱਪੇ ਬੜੇ ਨੇ ਕਰਾਰੇ ਸਊਥਾਲ ਦੇ ।

 =ਮੱਕੀ ਦੀ ਹੈ ਰੋਟੀ ਅਤੇ ਸਰ੍ਹੋਂ ਦਾ ਹੈ ਸਾਗ਼ ਇੱਥੇ,
ਲੱਸੀ ਵੀ ਨੇ ਦਿੰਦੇ ਢਾਬੇ ਸਾਰੇ ਸਊਥਾਲ ਦੇ ।

 =ਚੁੰਨੀਆਂ, ਦੁਪ੍‍ੱਟੇ, ਨੱਥ, ਲਹ੍ਹਿੰਗੇ ਅਤੇ ਡੋਰੀਏ,
ਬੜੇ ਹੀ ਮਸ਼ਹੂਰ ਨੇ ਗ਼ਰਾਰੇ ਸਊਥਾਲ ਦੇ ।

 =ਬਰਾਡਵੇ “ਤੇ ਲੱਗਾ ਰਹਿੰਦਾ ਮੇਲਾ ਹੈ ਛੱਪਾਰ ਦਾ,
ਹਾਸਿਆਂ ਦੇ ਉੱਡਦੇ ਗੁਬਾਰੇ ਸਊਥਾਲ ਦੇ ।

 =ਦੂਰੋਂ ਦੂਰੋਂ ਆਉਂਦੇ ਨੇ ਵਿਉਪਾਰੀ ਅਤੇ ਬਾਣੀਏਂ,
ਲੱਖ਼ਾਂ ਦੇ ਨੇ ਵਾਰੇ ਤੇ ਨਿਆਂਰੇ ਸਊਥਾਲ ਦੇ ।

 =ਜਹਿਰ ਮੁਹਰਾ ਸੂਟ ਤੇ ਦੁਪੱਟਾ ਤੇਰਾ ਲਹਿਰੀਆ,
ਕੁੜੀਏ ਤੂੰ ਜੀਂਦੇ ਮੁੰਡੇ ਮਾਰੇ ਸਊਥਾਲ ਦੇ ।

 =ਨਵੀਂ ਨਵੀਂ ਆਈ ਹੈ ਕੋਈ ਨਾਰ ਲੁੱਦੇਹਾਣੇ ਤੋਂ,
ਬੇਚੈਨ ਹੋ ਗਏ ਨੇ ਕੁਆਰੇ ਸਊਥਾਲ ਦੇ ।

 =ਪੈਰਾਂ ਵਿਚ ਝਾਂਜਰਾਂ ਤੇ ਨੱਕ ਵਿਚ ਤੀਲੀ ਹੈ,
ਪੁੱਟ ਲਏ ਨੇ ਮੁੰਡੇ ਈਹਨੇਂ ਸਾਰੇ ਸਊਥਾਲ ਦੇ ।

 =ਅੱਖਾਂ ਨਾਲ਼ ਗੱਲਾਂ ਕਰ ਜਾਂਦੇ ਬੇਹਿਸਾਬੀਆਂ,
ਐਸੇ ਮਿਹਰਬਾਨ ਨੇ ਪਿਆਰੇ ਸਊਥਾਲ ਦੇ ।

 =ਜੱਟਾਂ ਦਾ ਹੈ ਟੋਨੀ ਤੇ ਕਰਾੜਾਂ ਦੀ ਹੈ ਸੀਤਲੋ,
ਜ੍‍ੱਫੀ ਪਾ ਖ਼ੜੋਤੇ ਨੇ ਪਿਆਰੇ ਸਊਥਾਲ ਦੇ ।

 =ਹਿੰਦੀ, ਪਾਕੀ, ਨੀਗਰੋ, ਸੋਮਾਲੀ, ਫ਼ਿੰਨਲੈਂਡੀਏ,
ਕਿੰਨਿਆਂ ਹੀ ਰੰਗਾਂ ਦੇ ਨਜ਼ਾਰੇ ਸਊਥਾਲ ਦੇ ।

=ਜਾਹਲੀ ਬੰਦੇ ਭਾਲਦੇ ਕੁਆਰੀਆਂ ਵਲੈਤਣਾਂ,
ਪੱਕੇ ਹੋਣਾ ਚਾਹੁੰਦੇ ਨੇ ਵਿਚਾਰੇ ਸਊਥਾਲ ਦੇ ।

 =ਪੱਬਾਂ ਨਾਲ਼ੋਂ ਵੱਧ ਨੇ ਅਦਾਰੇ ਇੱਥੇ ਰੱਬ ਦੇ,
ਇਨ੍ਹਾਂ ਨੇ ਹੀ ਸ਼ਾਇਦ ਲੋਕੀਂ ਤਾਰੇ ਸਊਥਾਲ ਦੇ ।

 =ਕਾਜ਼ੀ, ਮੁੱਲਾਂ, ਭਾਈ ਅਤੇ ਟਿੱਲੇ ਵਾਲ਼ੇ ਸਾਧ ਸੱਭ,
ਆਣ ਬੈਠੇ ਬਣ ਕੇ ਸਹਾਰੇ ਸਊਥਾਲ ਦੇ ।

 =ਊੜਾ,ਐੜਾ, ਕਾ, ਖਾ ਤੇ ਅਲਫ਼, ਬੇ, ਪੇ ਬੋਲਦੇ,
ਬਦਲ ਗਏ ਤਾਲੀਮ ਦੇ ਅਦਾਰੇ ਸਊਥਾਲ ਦੇ ।

 =ਦੇਸੋਂ ਆਇਆ ਮੰਤਰੀ ਤਾਂ ਆਖ਼ਦਾ ਹੈ ਵਾਰ ਵਾਰ,
ਦੁਨੀਆਂ “ਚ ਵੱਜੇ ਨੇ ਨਗਾਰੇ ਸਊਥਾਲ ਦੇ । 

=ਗੋਰਿਆਂ ਦੇ ਗੈਂਗ ਇਥੇ ਆਉਣ ਤੋਂ ਤ੍ਰਹਿਕਦੇ,
ਜਾਣਦੇ ਨੇ ਹੱਥ ਨੇ ਕਰਾਰੇ ਸਊਥਾਲ ਦੇ ।

 =ਗੋਰਿਆਂ ਦੇ ਕੀ ਨੇ ਡਰੰਮ ਜਿਥੇ ਸਿੰਘਾਂ ਦੇ,
ਵੱਜਦੇ ਨੇ ਢੋਲ ਤੇ ਨਗ਼ਾਰੇ ਸਊਥਾਲ ਦੇ ।

 =ਆਪੂੰ ਸਜੇ ਬੈਠੇ ਨੇ ਕਈ ਘੜੰਮ ਚੌਧਰੀ,
ਲੀਡਰੀ ਦੇ ਭੁੱਖੇ ਨੇ ਵਿਚਾਰੇ ਸਊਥਾਲ ਦੇ ।

 =”ਦੇਸ ਪਰਦੇਸ” ਹੈ ਚੁਬਾਰੇ ਵਿਚ ਵਾਕਿਆ,
ਸਮਾਚਾਰ ਛਾਪਦੈ ਕਰਾਰੇ ਸਊਥਾਲ ਦੇ ।

 =ਹਵਾ ਵਿਚੋਂ ਬੋਲਦੇ ਨੇ ਕਈ ਦੇਸੀ ਰੇਡੀਓ,
ਦੂਰ ਤਾਈਂ ਟਹਿਕਦੇ ਸਿਤਾਰੇ ਸਊਥਾਲ ਦੇ ।

 =ਚਲੇ ਜਾਈਏ ਭਾਵੇਂ ਦਿੱਲੀ, ਰੋਮ ਅਤੇ ਟੋਕੀਓ,
ਯਾਦ ਸਾਨੂੰ ਆਉਂਦੇ ਨੇ ਨਜ਼ਾਰੇ ਸਊਥਾਲ ਦੇ ।

 =ਲੋਕਾਂ ਦਾ ਹੈ ਸ਼ਾਇਰ ਯਾਰੋ “ਸਾਥੀ ਲੁਧਿਆਣਵੀ”,
ਲੋਕੀਂ ਇਹਨੂੰ ਬੜੇ ਨੇ ਪਿਆਰੇ ਸਊਥਾਲ ਦੇ ।