ਭਾਰਤ ਦੇ ਨੇਤਾ
- ਸਾਥੀ ਲੁਧਿਆਣਵੀ – ਲੰਡਨ

ਸਾਥੀ ਲੁਧਿਆਣਵੀ – ਲੰਡਨ

ਨੇਤਾ ਜੀ ੋਪਰ ਲੱਡੂ ਖ਼ਾ ਕੇ ਹਿੰਦ ਨੂੰ ਤਾਰਨਗੇ ।
=ਭਾਰਤ ਮਾਤਾ ਖ਼ਾਤਰ ਸੂਲ਼ੀ ਚੜ੍ਹਨਾ ਪੈਣਾ ਹੈ,
ਮੁੰਡਿਆਂ ਕੁੜੀਆਂ ਨੂੰ ਉਕਸਾਅ ਕੇ ਹਿੰਦ ਨੂੰ ਤਾਰਨਗੇ ।
=ਕਿਸੇ ਵਿਦੇਸ਼ੀ ਔਰਤ ਨੂੰ ਗੱਦੀ ਤੋਂ ਲਾਹੁਣ ਲਈ,
ਸਿਰ ਦੇ ਲੰਮੇ ਵਾਲ਼ ਮੁੰਨਾਕੇ ਹਿੰਦ ਨੂੰ ਤਾਰਨਗੇ ।
=ਜਿੱਥੇ ਜੰਮਿਆਂ ਰਾਮ ਹੈ, ਉਥੇ ਮਸਜਦ ਕਾਹਨੂੰ ਹੈ,
ਅੱਲਾ ਦੇ ਇਕ ਘਰ ਨੂੰ ਢਾ ਕੇ ਹਿੰਦ ਨੂੰ ਤਾਰਨਗੇ ।
=ਰੱਥ ਯਾਤਰਾ,ਪਦ ਯਾਤਰਾ ਪੂਰਬ ਪੱਛਮ ਤੀਕ,
ਕੁਝ ਦਿਨ ਮੋਟਰ ਕਾਰ ਭੁਲਾ ਕੇ ਹਿੰਦ ਨੂੰ ਤਾਰਨਗੇ ।
=ਆਤਮ ਹੱਤਿਆ ਕਰਦੇ ਪਏ ਨੇ ਵਾਰਸ ਧਰਤੀ ਦੇ,
ਨੇਤਾ ਕਾਲ਼ੀ ਐਨਕ ਲਾਕੇ ਹਿੰਦ ਨੂੰ ਤਾਰਨਗੇ।
=ਰਿਸ਼ਵਤ ਖ਼ਾ ਕੇ ਨੇਤਾ ਢਿੱਡ ਵਧਾਈ ਫ਼ਿਰਦੇ ਨੇ,
ਸੰਮਾਂ ਵਾਲ਼ੀ ਡਾਂਗ ਚਲਾਕੇ ਹਿੰਦ ਨੂੰ ਤਾਰਨਗੇ ।
=ਸੌ ਕਰੋੜ ਲੋਗ਼ੋਂ ਕਾ ਭਾਰਤ ਦੇਸ਼ ਹਮਾਰਾ ਹੈ,
ਇਸ ਦੀ ਗਿਣਤੀ ਹੋਰ ਵਧਾ ਕੇ ਹਿੰਦ ਨੂੰ ਤਾਰਨਗੇ ।
=ਕਹਿੰਦੇ ਸੱਤਰ ਲੱਖ ਭਾਰਤੀ ਸਾਧੂ ਬਣ ਗਏ ਨੇ,
ਪਿੰਡੇ ਉੱਤੇ ਧੂੜ ਨਮਾ ਕੇ ਹਿੰਦ ਨੂੰ ਤਾਰਨਗੇ ।
“ਸਾਥੀ” ਵਰਗਾ ਸ਼ਾਇਰ ਲੋਕਾਂ ਨਾਲ਼ ਖ਼ੜੋਤਾ ਹੈ,
ਉਸ ਨੂੰ ਲੋਕਾਂ ਤੋਂ ਤੁੜਵਾ ਕੇ ਹਿੰਦ ਨੂੰ ਤਾਰਨਗੇ।