ਗ਼ਜ਼ਲ
- ਸਾਥੀ ਲੁਧਿਆਣਵੀ ਲੰਡਨ

ਫੁੱਲ ਬਨਾਉਟੀ, ਖ਼ਾਰ ਬਨਾਉਟੀ ।
ਅੱਜ ਕਲ ਦਾ ਹੈ ਪਿਆਰ ਬਨਾਉਟੀ ।
=ਦਿਲ ਵਿਚ ਰਤਾ ਪਿਆਰ ਨਹੀਂ ਹੈ,
ਬਾਹਵਾਂ ਦਾ ਹੈ ਹਾਰ ਬਨਾਉਟੀ ।
=ਬਿਸਤਰ ਵਿਚ ਸਾਹਾਂ ਦੀ ਗ਼ਰਮੀ,
ਹਉਕੇ ਭਰਦਾ ਯਾਰ ਬਨਾਉਟੀ ।
=ਗ਼ਰਮ ਜਾਮ ਨੂੰ ਬਰਫ਼ ਦੇ ਟੁੱਕੜੇ,
ਕਰਦੇ ਠੰਡਾ ਠਾਰ ਬਨਾਉਟੀ ।
=ਪੀਨਾ ਏਂ ਤਾਂ ਚੁੱਕ ਪੈਮਾਨਾ,
ਨਾ ਕਰ ਤੂੰ ਇਨਕਾਰ ਬਨਾਉਟੀ ।
=ਏਸ ਨਗਰ ਦੀ ਫੋਕੀ ਰੌਣਕ,
ਇਸ ਦੇ ਚੱਜ ਆਚਾਰ ਬਨਾਉਟੀ।
=ਫ਼ੋਕੇ ਹਾਸੇ, ਨਕਲੀ ਹੰਝੂੰ,
ਪਿਆਰ ਦਾ ਹੈ ਇਜ਼ਹਾਰ ਬਨਾਉਟੀ ।
=ਸਾਡੇ ਹਨ ਰੂਹਾਂ ਦੇ ਰਿਸ਼ਤੇ,
ਨਾ ਕਰ ਤੂੰ ਸ਼ਿੰਗਾਰ ਬਨਉਟੀ ।
=ਮੇਰੀ ਉਮਰ ‘ਚ ਵਾਧਾ ਕਰ ਦੇਹ,
ਕਰ ਭਾਵੇਂ ਇਕਰਾਰ ਬਨਾਉਟੀ ।
=ਜੀਵਨ ਵਿਚ ਰੰਗੀਨੀ ਆਵੇ,
ਬੇਸ਼ੱਕ ਕਰ ਤੂੰ ਪਿਆਰ ਬਨਾਉਟੀ ।
=ਅੱਜ ਕਲ ਅੰਬਰੀਂ ਕੂੰਜਾਂ ਕਿੱਥੇ,
ਪੇਂਟਿੰਗ ਵਿਚਲੀ ਡਾਰ ਬਨਾਉਟੀ ।
=ਜਦ ਇਨਸਾਨ ਪੁਲਾੜ “ਚ ਪੁੱਜਦੈ,
ਹੁੰਦਾ ਉਸ ਦਾ ਭਾਰ ਬਨਾਉਟੀ ।
=ਲੜਦਾ ਵੀ ਏਂ ਅੱਖ ਵੀ ਭਰਦੈਂ,
ਲੱਗਣ ਸੱਭ ਤਕਰਾਰ ਬਨਾਉਟੀ ।
=ਲੰਡਨ ਸ਼ਹਿਰ “ਚ ਜਾਹਲੀ ਬੰਦੇ,
ਲੱਭਦੇ ਫਿਰਦੇ ਨਾਰ ਬਨਾਉਟੀ ।
=ਇਸ ਨੂੰ ਆਪਣਾ ਕਹਿ ਕੇ ਦੇਖੋ,
“ਸਾਥੀ” ਨਹੀਓਂ ਯਾਰ ਬਨਾਉਟੀ ।