WWW 5abi.com  ਪੰਨਿਆ ਵਿੱਚ ਸ਼ਬਦ ਭਾਲ

5_cccccc1.gif (41 bytes)

       ਪੰਜਾਬੀ ਕਵਿਤਾ

ਹੋਰ ਪੰਜਾਬੀ ਕਵੀ >>

>> 1 2 3 4 5 6 7             hore-arrow1gif.gif (1195 bytes)

ਜਨਮੇਜਾ ਸਿੰਘ ਜੌਹਲ
ਲੁਧਿਆਣਾ

janmeja

janmejaਅੱਜ ਤੇ ਕੱਲ
ਜਨਮੇਜਾ ਸਿੰਘ ਜੌਹਲ, ਲੁਧਿਆਣਾ

ਕਰੋਨਾ ਪਿੱਛੇ ਛੱਡ ਆਏ ਹਾਂ, 
ਖੋਤਾ ਆਪਣਾ ਕੱਢ ਆਏ ਹਾਂ । 
 
ਅੱਗੇ ਜੀਵਨ ਬੜਾ ਹੀ ਔਖਾ , 
ਪਹਿਲੋਂ ਵੀ ਸੀ ਕਿਹੜਾ ਸੌਖਾ । 
 
ਧੋਖਾ ਸਾਡੇ ਨਾਲ ਹੋਇਆ ਹੈ । 
ਘਰ ਘਰ ਦੇ ਵਿਚ ਜੀਅ ਮੋਇਆ ਹੈ । 
 
ਅੱਗ ਦੀਆਂ ਲਾਟਾਂ ਅੰਬਰੋਂ ਉੱਚੀਆਂ, 
ਲੀਡਰਾਂ ਦੀਆਂ ਜਿਵੇਂ ਨੀਤਾਂ ਲੁੱਚੀਆਂ । 
 
ਹੁਣ ਘਰਾਂ ਨੂੰ ਪਰਤ ਨੀ ਹੋਣਾ, 
ਡਿੱਗਿਆ ਹੰਝੂ ਵਰਤ ਨੀ ਹੋਣਾ । 
 
ਪੜ੍ਹ ਲੈ 'ਮੇਜਰਾ' ਕੰਧ ਤੇ ਲਿਖਿਆ , 
ਕੱਲ ਨੂੰ ਤੇਰਾ ਧਰਤ ਨੀ ਹੋਣਾ।
22/06/2021


ਉਹ ਮੁਕਰ ਜਾਂਦੇ ਨੇ

 ਜਨਮੇਜਾ ਸਿੰਘ ਜੌਹਲ, ਲੁਧਿਆਣਾ

ਕਰਕੇ ਕਰਾਰ ਉਹ ਮੁਕਰ ਜਾਂਦੇ ਨੇ , 
'ਕਦ ਕਿਹਾ?' ਕਹਿ ਉਹ ਮੁਕਰ ਜਾਂਦੇ ਨੇ ।
 
ਲੰਬੇ ਸੁਫ਼ਨੇ ਸਿਰਜ ਦੇਂਦੇ ਨੇ ਉਹ, 
'ਰਾਤ ਸੀ', ਕਹਿ ਉਹ ਮੁਕਰ ਜਾਂਦੇ ਨੇ । 
 
ਕਰ ਜਾਂਦੇ ਨੇ ਇੰਤਹਾ ਗੁੱਸੇ 'ਚ, 
'ਯਾਦ ਨੀਂ',  ਕਹਿ ਉਹ ਮੁਕਰ ਜਾਂਦੇ ਨੇ ।
 
ਜੇ ਗਿਲਾ ਹੈ ਉਸ ਦੇ ਬੋਲਾਂ ਤੇ , 
'ਨਾ ਬੋਲੋ', ਕਹਿ ਉਹ ਮੁਕਰ ਜਾਂਦੇ ਨੇ 
29/05/2021


ਕਵਿਤਾ
ਸਮਰੱਥ ਸਾਹਿਤਕਾਰ
ਜਨਮੇਜਾ ਸਿੰਘ ਜੌਹਲ, ਲੁਧਿਆਣਾ

ਉਹ
ਐਨੇ ਸਨਮਾਨ
ਬਟੋਰ ਚੁੱਕਾ ਹੈ
ਕਿ
ਹਰ ਅੰਦੋਲਨ ਸਮੇਂ
ਇਕ ਇਕ ਕਰਕੇ
ਵਾਪਸ
ਕਰ ਸਕਦਾ ਹੈ,
ਮਹਿਮਾ
ਖੱਟਣ ਲਈ ।
ਹੋਰ
ਇਹਨਾਂ ਨੇ
ਕੰਮ ਵੀ
ਕਿਸ
ਆਉਣਾ ਹੈ ?
08/12/2020


ਕਵਿਤਾ

ਜਨਮੇਜਾ ਸਿੰਘ ਜੌਹਲ, ਲੁਧਿਆਣਾ

ਜਦ ਚੀਸ ਦੀ ਪੀੜ ਵੱਧ ਜਾਵੇ,
ਯਾਦ ਕਰੀਂ , ਮੈਂ ਆ ਜਵਾਂਗਾ।
ਜਦ ਬ੍ਰਹਿਮੰਡ ਖਾਲੀ ਖਾਲੀ ਲੱਗੇ,
ਯਾਦ ਕਰੀਂ , ਮੈਂ ਆ ਜਵਾਂਗਾ।
ਜਦ ਰਸਤੇ ਸੁੰਨ ਮਸਾਣ ਲੱਗਣ, ਯਾਦ ਕਰੀਂ, ਮੈਂ ਆ ਜਵਾਂਗਾ।
ਜਦ ਅੰਦਰ ਤੇ ਉਦਾਸੀ ਛਾਵੇ, ਯਾਦ ਕਰੀਂ, ਮੈਂ ਆ ਜਵਾਂਗਾ।
ਜਦ ਨੈਣਾਂ ਦੇ ਦਰਿਆ ਵੱਗਣ, ਯਾਦ ਕਰੀਂ ਮੈਂ ਆ ਜਵਾਂਗਾ ।
ਜਦ ਮਨ ਦਾ ਖੂਹ ਡੂੰਘਾ ਜਾਪੇ, ਯਾਦ ਕਰੀਂ, ਮੈਂ ਆ ਜਵਾਂਗਾ।
ਜਦ ਤੇਜ਼ ਹਵਾ ਪੁਰੇ ਦੀ ਜਕੜੇ,
ਯਾਦ ਕਰੀਂ, ਮੈਂ ਆ ਜਵਾਂਗਾ।
ਜਦ ਮਨ ਲਹਿਰਾਉਣ ਨੂੰ ਕਰੋ,
ਯਾਦ ਕਰੀਂ, ਮੈਂ ਆ ਜਵਾਂਗਾ।
01/12/2020


ਪਿਆਸੀ ਤੂੰ

ਜਨਮੇਜਾ ਸਿੰਘ ਜੌਹਲ, ਲੁਧਿਆਣਾ
 
ਸਮੁੰਦਰ
ਕਿਨਾਰੇ ਆਕੇ ਵੀ
ਰਹੀ ਪਿਆਸੀ ਤੂੰ

ਖਾਰਾ ਹੈ ਹਾਂ ਮਿੱਠਾ
ਗਈ ਕਿਆਸੀ ਤੂੰ

ਡਰਦੀ ਰਹੀ
ਮੈਂਨੂੰ ਮਿਲਣੋਂ
ਵਾਂਗ ਕਿਸੇ
ਪਰਵਾਸੀ ਤੂੰ

ਪੀ ਜਾਣੀ ਸੀ
ਭਾਵੇਂ ਦੇ ਦੇਂਦੀ
ਜ਼ਹਿਰ ਦੀਂ
ਭਰੀ ਗਲਾਸੀ ਤੂੰ

ਘੁੱਟ ਜੇ ਮੇਰਾ
ਪੀਤਾ ਹੁਂਦਾ
ਰਹਿ ਨਾ ਜਾਂਦੀ
ਉਦਾਸੀ ਤੂੰ

ਲਹਿਰਾਂ ਉੱਤੇ
ਰਾਜ ਸੀ ਕਰਨਾ
ਕੋਈ ਨਾ
ਕਹਿੰਦਾ ਦਾਸੀ ਤੂੰ

ਪਰ
ਸਮੁੰਦਰ
ਕਿਨਾਰੇ ਆਕੇ ਵੀ
ਰਹੀ ਪਿਆਸੀ ਤੂੰ
27/10/2020


ਇਕ ਕਵਿਤਾ

ਜਨਮੇਜਾ ਸਿੰਘ ਜੌਹਲ, ਲੁਧਿਆਣਾ 
 
ਸਮੁੰਦਰ ਕਿਨਾਰੇ
ਡਿਗੀ ਕਣੀ ਨੂੰ,
ਕੀ ਪਤਾ ?
 
ਦਰਿਆ ਦੀ
ਰਵਾਨਗੀ
ਕੀ ਹੁੰਦੀ ਏ ?
 
ਧਰਤੀ ਦੀ
ਪਿਆਸ
ਕੀ ਹੁੰਦੀ ਏ ?
 
ਜੀਵਨ ਦੀ
ਆਸ
ਕੀ ਹੁੰਦੀ ਏ ?
 
ਪੱਥਰਾਂ ਦੀ
ਖ਼ੋਰ
ਕੀ ਹੁੰਦੀ ਏ ?
 
ਪਾਣੀ ਖਾਤਰ
ਖੂਨ ਦੀ ਧਾਰ
ਕੀ ਹੁੰਦੀ ਏ ?
 
ਪਹਾੜਾਂ ਚ 
ਕਲ਼ ਕਲ਼
ਕੀ ਹੁੰਦੀ ਏ ?
 
ਸਿਖ਼ਰ ਤੋਂ
ਵਾਪਸੀ
ਕੀ ਹੁੰਦੀ ਏ ?
08/08/2020


ਧੋਖਾ

ਜਨਮੇਜਾ ਸਿੰਘ ਜੌਹਲ, ਲੁਧਿਆਣਾ

ਧੋਖਾ ਮੇਰੇ ਨਾਲ ਹੀ ਨਹੀਂ ਹੋਇਆ ,
ਧੋਖਾ ਤੁਹਾਡੇ ਨਾਲ ਵੀ ਹੋਇਆ ਹੈ ।

ਡਰਿਆ ਮੈਂ ਹੀ ਨਹੀਂ ਹਾਂ,
ਡਰਾ ਤੁਹਾਨੂੰ ਵੀ ਦਿੱਤਾ ਗਿਆ ਹੈ ।

ਖਾਲ਼ੀ ਮੈਂ ਹੀ ਨਹੀਂ ਹੋਇਆ ਹਾਂ,
ਖਾਲ਼ੀ ਤੁਹਾਨੂੰ ਵੀ ਕਰ ਦਿੱਤਾ ਗਿਆ ਹੈ ।

ਮੂਰਖ ਮੈਂ ਹੀ ਆਪਣੇ ਨੂੰ ਨਹੀਂ ਸਮਝਦਾ,
ਮੂਰਖ ਤੁਹਾਨੂੰ ਵੀ ਬਣਾ ਦਿੱਤਾ ਗਿਆ ਹੈ ।

ਕੌਣ ਕਹਿੰਦਾ ਕਿ ਕੱਲਾ ਮੈਂ ਹੀ ਬੇਵੱਸ ਹੋਇਆ।
ਬੇਵੱਸ ਤੁਹਾਨੂੰ ਵੀ ਕਰ ਦਿੱਤਾ ਗਿਆ ਹੈ ।

ਠੀਕਰ ਮੇਰਾ ਹੀ ਨਹੀਂ ਭੰਨਿਆ, 
ਚੌਰਾਹੇ ਚ ਤੁਹਾਨੂੰ ਵੀ ਭੰਨ ਦਿੱਤਾ ਗਿਆ ਹੈ ।

ਹੁਣ ਤਾਂ ਮੈਂ ਵੀ 'ਮੈਂ' ਨਹੀਂ ਰਿਹਾ ,
ਤੁਹਾਨੂੰ ਵੀ 'ਮੈਂ' ਹੀ ਬਣਾ ਦਿੱਤਾ ਗਿਆ ਹੈ ।

ਚਲੋ ਹੁਣ ਨੰਗੀਆਂ ਦਹਿਲੀਜ਼ਾਂ ਨੂੰ ਟੱਪੀਏ ,
ਸਾਡੀਆਂ ਸਰਦਲਾਂ ਨੂੰ ਤਾਂ ਢਾਅ ਦਿੱਤਾ ਗਿਆ ਹੈ ।
07/07/2020


ਮੂਰਖ

ਜਨਮੇਜਾ ਸਿੰਘ ਜੌਹਲ, ਲੁਧਿਆਣਾ

ਕਿੰਨ੍ਹੇ ਮੂਰਖ ਹਾਂ ਅਸੀਂ
ਵਾਜਾਂ ਮਾਰਦੇ ਹਾਂ
'ਐ ਭਗਤ ਸਿੰਘ
ਇਕ ਵਾਰ ਫੇਰ ਆਜਾ
ਤੈਂਨੂੰ ਆਉਣਾ ਹੀ ਪਊ '

ਇਓਂ ਮਾਰਦੇ ਹਾਂ ਵਾਜਾਂ
ਜਿਵੇਂ ਭਗਤ ਸਿੰਘ ਨੇ
ਅਲਾਦੀਨ ਦੇ ਚਿਰਾਗ ਵਿਚੋਂ
ਸਾਬਤ ਸਬੂਤ ਹੀ
ਪ੍ਰਗਟ ਹੋਣਾ ਹੁੰਦਾ ਹੈ
ਇਕ ਹੱਥ ਪਸਤੌਲ ਫੜੀ
ਦੂਜੇ ਹੱਥ ਕਿਤਾਬ ਫੜੀ

ਸਾਨੂੰ ਮੁਰਖਾਂ ਨੂੰ
ਇਹ ਵੀ ਪਤਾ ਹੈ ਕਿ
ਭਗਤ ਸਿੰਘ
ਜੰਮਣਾ ਤਾਂ
ਕਿਸੇ ਮਾਂ ਨੇ ਹੀ ਹੈ
ਸਮੇਂ ਦੇ ਹਾਕਮਾਂ ਨੂੰ
ਚੁਣੌਤੀ ਤਾਂ ਦੇਵੇਗਾ
ਜਵਾਨੀ ਦੀ ਦਹਿਲੀਜ਼
ਟੱਪਦਿਆਂ ਹੀ
ਤੇ ਫੇਰ ਹਾਕਮਾਂ ਦੀ
ਸੂਲੀ ਇਤਿਹਾਸ
ਦੁਹਰਾਵੇਗੀ

ਪਰ ਸਾਨੂੰ
ਨਹੀਂ ਦਿਸੇਗਾ
ਉਹ ਕਦੇ ।

ਪਾ ਸਮਾਂ ਜਦ
ਹਾਕਮ ਚਾਹੁਣਗੇ
ਉਸਦਾ ਮੁੱਲ ਵੱਟਣਾ
ਪਾ ਦੇਣਗੇ ਉਸਦੇ
ਕੇਸਰੀ ਚੋਲਾ
ਤੇ ਬਣਾ ਦੇਣਗੇ
ਸਾਨੂੰ ਮੂਰਖ

ਅਸੀਂ ਐਨੇ ਮੂਰਖ ਹਾਂ
ਤੇ ਨਹੀਂ ਸਮਝਦੇ ਕਿ
ਭਗਤ ਸਿੰਘ ਤਾਂ
ਹਰ ਯੁੱਗ 'ਚ
ਪੈਦਾ ਹੁੰਦੇ ਰਹਿੰਦੇ ਹਨ,
ਸੂਲੀਆਂ ਚੁੰਮਦੇ ਰਹਿੰਦੇ ਹਨ

ਬਸ ਅਸੀਂ ਹੀ
ਨਹੀਂ ਦੇਖ ਸਕਦੇ
ਤੇ ਉਡੀਕਦੇ ਰਹਿੰਦੇ ਹਾਂ
ਅਲਾਦੀਨ ਦੇ ਚਿਰਾਗ ਨੂੰ

ਮੂਰਖ ਕਿਸੇ ਥਾਂ ਦੇ
04/11/2016

 

ਸਾਡੇ ਸਮਿਆਂ ਦਾ ਰਾਵਣ
ਜਨਮੇਜਾ ਸਿੰਘ ਜੌਹਲ

ਸਾਡੇ ਸਮਿਆਂ ਦਾ ਰਾਵਣ
ਤਾਂ ਸਾਡੇ ਕੋਲ ਹੀ ਰਹਿੰਦਾ ਹੈ
ਉਸਦੇ ਦਸ ਸਿਰ ਨਹੀਂ ਹਨ
ਉਸਦੇ ਤਾਂ ਦਸ ਹੱਥ ਹਨ
ਜਨਤਾ ਨੂੰ ਲੁੱਟਣ ਲਈ
ਉਸ ਕੋਲ ਤਾਂ ਦਸ ਤਰੀਕੇ ਹਨ
ਲੋਕਾਂ ਨੂੰ ਪਾੜਨ ਲਈ
ਉਸ ਕੋਲ ਤਾਂ ਦਸ ਤੀਲੀਆਂ ਹਨ
ਲੋਕਾਂ ਨੁੰ ਸਾੜਨ ਲਈ
ਉਸ ਦੇ ਤਾਂ ਦਸ ਸਾਥੀ ਹਨ
ਝੂਠ ਨੂੰ ਸ਼ਿੰਗਾਰਨ ਲਈ
ਅੱਖਰਾਂ ਦੀ ਟਕਸਾਲ ਦਾ ਮਾਲਕ ਹੈ
ਸਾਡੇ ਜ਼ਖਮਾਂ ਤੇ ਲੂਣ ਖਿਲਾਰਨ ਲਈ
ਸਾਡੇ ਸਮਿਆਂ ਦਾ ਰਾਵਣ
ਤਾਂ ਸਾਡੇ ਕੋਲ ਹੀ ਰਹਿੰਦਾ ਹੈ
22/10/15

 

ਕੁੜੀਆਂ ਚਿੜੀਆਂ
ਜਨਮੇਜਾ ਸਿੰਘ ਜੌਹਲ, ਲੁਧਿਆਣਾ

ਇਕ ਚਿੜੀ ਨੇ
ਕੁੜੀ ਨੂੰ ਪੁਛਿਆ

ਤੇਰੇ ਨਾਲ
ਮੇਰਾ ਨਾਓਂ
ਕਿਓਂ ਲਾਉਂਦੇ ਨੇ

ਮੈਂ ਤਾਂ ਉਡਦੀ
ਵਿਚ ਅਸਮਾਨੀਂ
ਤੇਰੇ ਬੰਧਨ
ਲਾਉਂਦੇ ਨੇ

ਮੇਰੇ ਗੀਤ ਤਾਂ
ਮਿੱਠੇ ਮਿੱਠੇ
ਤੇਰੇ ਦੁੱਖ
ਕਿਉਂ ਗਾਉਂਦੇ ਨੇ

ਮੇਰੇ ਖੰਭ ਤਾਂ
ਭੂਰੇ ਕੂਲ਼ੇ
ਤੇਰੇ ਕੁਤਰ
ਦਬਾਉਂਦੇ ਨੇ

ਐਨੀ ਜ਼ਾਲਮ
ਤੇਰੀ ਦੁਨੀਆਂ
ਪਰ ਤੈਨੂੰ
ਮੇਰ ਨਾਲ
ਮਿਲਾਉਂਦੇ ਨੇ

ਇਕ ਚਿੜੀ ਨੇ
ਕੁੜੀ ਨੂੰ ਪੁਛਿਆ

ਤੇਰੇ ਨਾਲ
ਮੇਰਾ ਨਾਓਂ
ਕਿਓਂ ਲਾਉਂਦੇ ਨੇ

18/07/2013

ਐ ਕਵਿਤਾ
ਜਨਮੇਜਾ ਸਿੰਘ ਜੌਹਲ, ਲੁਧਿਆਣਾ

ਐ ਕਵਿਤਾ
ਮੈਨੂੰ ਪਤਾ ਲੱਗਾ ਏ
ਤੇਰੀ ਕਿਤਾਬ ਛਪੀ ਹੈ
ਤੂੰ ਸਭ ਨੂੰ ਭੇਜੀ ਹੈ
ਪਰ ਮੈਨੂੰ ਨਹੀਂ

ਇਹ ਤੂੰ ਚੰਗਾ ਕੀਤਾ
ਮੈਨੂੰ ਕਿਤਾਬ ਨਹੀਂ ਭੇਜੀ

ਜੇ ਭੇਜ ਦਿੰਦੀ ਤਾਂ
ਮੈਨੂੰ ਪਤਾ ਲੱਗ ਜਾਣੇ ਸਨ

ਤੇਰੇ ਦੁੱਖਾਂ ਦੇ
ਵਗਦੇ ਦਰਿਅਵਾਂ
ਦੇ ਸਿਰਨਾਵੇ

ਤੇਰੇ ਤੋਂ ਅਪਹੁੰਚ ਹੋਈ
ਗੋਦੀ ਦਾ ਨਿੱਘ

ਦਿਸ ਪੈਣੇ ਸਨ
ਤੇਰੇ ਖਾਰੇ
ਹੰਝੂਆਂ ਦੇ ਲੂਣ

ਕਿੱਥੇ ਸਹਿ ਹੋਣਾ ਸੀ
ਮੈਥੋਂ ਇੰਨਾਂ
ਦਰਦ ਦਾ ਜਵਾਰ ਭਾਟਾ

ਜੇ ਹੋਇਆ
ਚੰਗਾ ਹੀ ਹੋਇ

14/07/2013

ਏਸੇ ਲਈ ਹਾਂ ਮੈਂ ਪੰਜਾਬੀ
ਜਨਮੇਜਾ ਸਿੰਘ ਜੌਹਲ, ਲੁਧਿਆਣਾ

 

 

Mai Punjabi1
 

ਮੇਰੇ ਵਿਚ ਵੱਸਦਾ ਪੰਜਾਬ
ਏਸੇ ਲਈ ਹਾਂ ਮੈਂ ਪੰਜਾਬੀ

ਮਹਿਕਾਂ ਵੰਡੇ ਮਿੱਟੀ ਵਿਚ ਪੰਜਾਬ
ਏਸੇ ਲਈ ਹਾਂ ਮੈਂ ਪੰਜਾਬੀ

ਆਵੇ ਖੁਸ਼ੀ, ਨੱਚੇ ਪੂਰਾ ਪੰਜਾਬ
ਏਸੇ ਲਈ ਹਾਂ ਮੈਂ ਪੰਜਾਬੀ

ਪਵੇ ਦੁੱਖ, ਰੋਵੇ ਜ਼ਾਰੋ ਜ਼ਾਰ ਪੰਜਾਬ
ਏਸੇ ਲਈ ਹਾਂ ਮੈਂ ਪੰਜਾਬੀ

ਸੱਥਾਂ ਕਰਨ ਲੇਖਾ ਜੋਖਾ ਵਿਚ ਪੰਜਾਬ
ਏਸੇ ਲਈ ਹਾਂ ਮੈਂ ਪੰਜਾਬੀ

ਭਲਾ ਸਰਬੱਤ ਦਾ ਮੰਗੇ ਸਦਾ ਪੰਜਾਬ
ਏਸੇ ਲਈ ਹਾਂ ਮੈਂ ਪੰਜਾਬੀ

ਹਿਮਾਲੇ ਦੀਆਂ ਪੌਣਾਂ ਥੱਲੇ ਵਸੇ ਪੰਜਾਬ
ਏਸੇ ਲਈ ਹਾਂ ਮੈਂ ਪੰਜਾਬੀ

ਲੋਰੀਆਂ ਦੇਣ ਮਾਵਾਂ ਵਿਚ ਪੰਜਾਬ
ਏਸੇ ਲਈ ਹਾਂ ਮੈਂ ਪੰਜਾਬੀ

ਆਏ ਗਏ ਨੂੰ ਝੱਲਦਾ ਰਹੇ ਪੰਜਾਬ
ਏਸੇ ਲਈ ਹਾਂ ਮੈਂ ਪੰਜਾਬੀ

ਕੁੱਲ ਦੁਨੀਆ ਵਿਚ ਝੰਡੇ ਗੱਡੇ ਪੰਜਾਬ
ਏਸੇ ਲਈ ਹਾਂ ਮੈਂ ਪੰਜਾਬੀ
15/02/2013

ਹਾਇਕੂ

ਰੱਬ ਨੂੰ ਪਾਵੋ
ਐਵੇ ਨਾ ਕੁਰਲਾਵੋ
ਆਪੇ ਬੁਲਾਵੇ

ਪੱਤਾ ਨਾ ਹਿੱਲੇ
ਸਿੱਖਰ ਦੁਪਹਿਰਾ
ਖੁਰਪਾ ਚੱਲੇ

ਹਵਾ ਰੁਮਕੇ
ਦੇਖ ਨਹੀਂ ਸਕਦੇ
ਏ.ਸੀ. ਕਮਰੇ

ਹਾਇਕੂ ਫੁੱਲ
ਬੰਦਾ ਅੱਕਲੋਂ ਗੁੱਲ
ਠੋਕਦਾ ਟੁੱਲ

ਕੁੱਤੇ ਵੀ ਫੇਲ
ਸਾਇਕਲ ਨਕਾਰਾ
ਹੱਸਣ ਬੱਚੇ

ਮੀਂਹ ਆਇਆ
ਚਿੱਠੀ ਭਿੱਜੜ ਹੋਈ
ਸੁਨੇਹਾ ਚੁੱਪ

ਅੱਕ ਦੇ ਫੁੱਲ
ਨਹੀਂ ਕੌੜੇ ਲੱਗਦੇ
ਬੱਕਰੀਆਂ ਨੂੰ

ਆਪਣਾ ਸੱਚ
ਧੁਰ ਅੰਦਰ ਤੀਕ
ਕੂੜ ਕੰਬਾਵੇ

ਘੜੀ ਦੀ ਟਿੱਕ
ਨੀਂਦਰ ਕਿੰਝ ਆਵੇ
ਕੰਮ ’ਤੇ ਜਾਣਾ

ਪੱਗ ਬੰਨਣੀ
ਸਿੱਖਣ ਦੀ ਕੀ ਲੋੜ
ਆਪੇ ਲੁਹਾਈ

ਹੱਕ ਮੰਗੀਏ
ਹਰ ਯੁੱਗ ਨੇ ਦਿੱਤੇ
ਪੁਲਸੀ ਡੰਡੇ

ਕਿਰਤੀ ਭੁੱਖਾ
ਹੜਤਾਲ ਲਮਕੀ
ਕਲਰਕਾਂ ਦੀ

ਕੁੱਤੇ ਭੌਂਕਣ
ਚੋਰਾਂ ਨੇ ਲਾਈ ਸੰਨ
ਚਾਕਰ ਸੁੱਤੇ

ਹੱਥ ਨਾ ਆਵੇ
ਰੰਗ ਜੋ ਅਸਮਾਨੀ
ਨਕੰਮਾ ਬੰਦਾ

ਕੈਂਚੀ ਸੈਂਕਲ
ਹੁਣ ਨਹੀਂ ਚੱਲਦਾ
ਵਧੀ ਉਮਰ

ਸੁਪਨੇ ਵਿੱਚ
ਸੁਪਨਾ ਇੱਕ ਵੇਖਾਂ
ਕਿੱਧਰ ਜਾਵਾਂ

ਧੀਦੋ ਆਇਆ
ਨੈੱਟ ਗਰਮਾਇਆ
ਖੁਸ਼ੀਆਂ ਵੰਡੇ

ਭਿੱਜਿਆ ਖ਼ਤ
ਮਨੋ ਜੋੜ ਕੇ ਪੜੇ
ਘੁੱਲ਼ੇ ਅੱਖਰ

ਕਾਰਜ ਪੂਰਾ
ਸੌਖਾ ਜਿਹਾ ਲੱਗਦਾ
ਮੁਰਝਾਉਣਾ

ਕੁੱਤੇ ਝਾਕਣ
ਓ ਲੰਗਰ ਸੁੱਟਦਾ
ਖੁਸ਼ੀ ’ਚ ਖੀਵੇ

ਕੰਮਪੂਟਰ
ਨਾ ਹੱਸੇ ਨਾ ਰੋਆਵੇ
ਚੱਲਦਾ ਜਾਵੇ

ਗੁਸਲ ਬੈਠੇ
ਅਖਬਾਰਾਂ ਪੜੀਆਂ
ਪਾਣੀ ਛਡਿਆ

ਗੀਤ ਨਾ ਗਾਵੀਂ
ਚਿੜੀਏ ਪਿਆਰੀਏ
ਕਾਂ ਨੇ ਸੁਣਦੇ

ਮੂੰਹ ਹਨੇਰੇ
ਕੁੱਤੇ ਪਏ ਭੌਂਕਣ
ਚੋਰ ਫੜਿਆ
ਮਲਾਲਾ ਬੋਲੀ
ਦਹਿਸ਼ਤੀ ਕੰਬਣ
ਮੱਛੀ ਤੜਫੇ

ਦੀਵੇ-ਚਾਨਣ
ਨਾ ਰੋਸ਼ਨ ਕਰਿਆ
ਕੰਧਾਂ ਓਹਲੇ

ਇਕੋ ਫਰੇਮ
ਹਰ ਬੰਦਾ ਬੰਨਿਆ
ਛੋਟੀਆਂ ਸੋਚਾਂ

ਜੰਮੇ ਹਾਇਕੁ
ਪਾਵੇ ਰੋਜ਼ ਪੁਆੜੇ
ਭਿੜੇ ਲੇਖਕ

ਰਾਂਝਾ ਬੋਲਿਆ
ਇਹ ਨਹੀਂ ਤਾਂ ਹੋਰ
ਖੱਚਰ ਤੋਰ

ਫੁੱਲ ਖਿੜਿਆ
ਟਾਹਣੀ ਝੁੱਕ ਗਈ
ਖੁਸ਼ਬੂ ਅੱਗੇ

ਵਿਦੇਸ਼ੀ ਪੁੱਤ
ਸਵੇਰਿਆਂ ਦੇ ਸੁੱਤੇ
ਰਾਤੀਂ ਜਾਗਣ

ਅਮਲੀ ਰੋਵੇ
ਡੱਬੀ ਖੜਕੇ ਖਾਲੀ
ਜਾਗੂ ਤੜਕੇ

ਵਿਦੇਸ਼ੀਂ ਬੈਠਾ
ਰੂੜੀਆਂ ਨੂੰ ਤਰਸੇ
ਪੋਂਡ ਕਮਾਵੇ

ਅੰਦਰ ਬੈਠਾ
ਅਬਦਾਲੀ ਆਪਣੇ
ਲੁੱਟਦਾ ਜਾਵੇ

ਹਾਇਕੂ ਕੀ ਹੈ
ਛਿਣ ਦੀ ਹੀ ਗੱਲ ਹੈ
ਮਨ ਦਾ ਖੂਹ

ਹਾਇਕੂ ਆਇਆ
ਗੱਭਣ ਹੋਈ ਸੋਚ
ਜਨਮੇ ਤਾਰ

 

5_cccccc1.gif (41 bytes)

>> 1 2 3 4 5 6 7             hore-arrow1gif.gif (1195 bytes)

Terms and Conditions
Privacy Policy
© 1999-2015, 5abi.com

www.5abi.com
[ ਸਾਡਾ ਮਨੋਰਥ ][ ਈਮੇਲ ][ ਹੋਰ ਸੰਪਰਕ ][ ਅਨੰਦ ਕਰਮਨ ][ ਮਾਨਵ ਚੇਤਨਾ ]
[ ਵਿਗਿਆਨ ][ ਕਲਾ/ਕਲਾਕਾਰ ][ ਫਿਲਮਾਂ ][ ਖੇਡਾਂ ][ ਪੁਸਤਕਾਂ ][ ਇਤਿਹਾਸ ][ ਜਾਣਕਾਰੀ ]

darya1.gif (3186 bytes)
©1999-2015, 5abi.com