WWW 5abi.com  ਪੰਨਿਆ ਵਿੱਚ ਸ਼ਬਦ ਭਾਲ

5_cccccc1.gif (41 bytes)

       ਪੰਜਾਬੀ ਕਵਿਤਾ

ਹੋਰ ਪੰਜਾਬੀ ਕਵੀ >>

>> 1 2 3 4 5 6 7             hore-arrow1gif.gif (1195 bytes)

ਅਮਰਦੀਪ ਕੌਰ
 
ਪੰਜਾਬ

ਸੱਤ ਅਜੂਬੇ
ਅਮਰਦੀਪ ਕੌਰ, ਪੰਜਾਬ

ਰੱਬ ਨੇ ਜਦੋਂ ਇਹ ਧਰਤ ਬਣਾਈ
ਫੁੱਲਾਂ, ਬੂਟਿਆਂ ਦੇ ਨਾਲ ਸਜਾਈ
ਧਰਤੀ, ਸਮੁੰਦਰ ਤੇ ਪਹਾੜ
ਕਲਾ ਸੀ ਉਸ ਦੀ ਬਾਕਮਾਲ
ਹੁਣ ਕਰੇਗਾ ਕੌਣ ਇਸ ਦੀ ਸੰਭਾਲ
ਇਹ ਵੀ ਸੀ ਇੱਕ ਵੱਡਾ ਸਵਾਲ
ਹੱਲ ਕੱਢਿਆ ਫਿਰ ਉਸ ਨੇ ਭਾਈ
ਮਨੁੱਖ ਨਾਮ ਦੀ ਇੱਕ ਜਾਤ ਬਣਾਈ
ਮਨੁੱਖੀ ਦਿਮਾਗ ਨੇ ਕੀਤਾ ਕਮਾਲ
ਧਰਤੀ ਨੂੰ ਦਿੱਤਾ ਉਸ ਨੇ ਸ਼ਿੰਗਾਰ
ਦੁਲਹਨ ਵਾਂਗ ਧਰਤੀ ਸਜਾ ਕੇ
ਹੈਰਾਨੀਜਨਕ ਅਜੂਬੇ ਬਣਾ ਕੇ
ਕਰ ਦਿੱਤੀ ਕਾਇਨਾਤ ਹੈਰਾਨ
ਰੱਬ ਨੂੰ ਵੀ ਹੋਇਆ ਇਸ ਤੇ ਮਾਣ
ਆਓ ਤੁਹਾਨੂੰ ਵੀ ਦੁਨੀਆਂ ਵਿਖਾਵਾਂ
ਸੱਤ ਅਜੂਬਿਆਂ ਦੇ ਦਰਸ਼ਨ ਕਰਾਵਾਂ
ਪਹਿਲਾ ਅਜੂਬਾ ਤਾਜ ਮਹਿਲ ਕਮਾਲ
ਸ਼ਾਹਜਹਾਂ ਦੇ ਪਿਆਰ ਦੀ ਮਿਸਾਲ
ਭਾਰਤ ਦੀ ਸ਼ਾਨ ਵਧਾਉਂਦਾ ਹੈ
ਵਿਰਾਸਤ ਨੂੰ ਚਾਰ ਚੰਨ ਲਾਉਂਦਾ ਹੈ
ਦੂਜਾ ਅਜੂਬਾ ਹੈ ਚੀਚਨ ਇਤਸਾ
ਬਣਾਇਆ ਜਿਸ ਨੂੰ ਮਾਯਾ ਸੱਭਿਅਤਾ
ਪਤਝੜ ਤੇ ਬਸੰਤ ਵਿੱਚ ਕਰਦਾ ਕਮਾਲ
ਸੂਰਜ ਦੀਆਂ ਕਿਰਨਾਂ ਦੇ ਮਿਲ ਕੇ ਨਾਲ
ਜਦੋਂ ਇਹ ਕਿਰਨਾਂ ਉੱਤਰ ਪੱਛਮੀ ਕਾਰਨਰ ਤੇ ਪੈਂਦੀਆਂ
ਤਾਂ ਤਿਕੋਣੀ ਜਿਹੀ ਇੱਕ ਪਰਛਾਈ ਬਣਾਂਦੀਆਂ
ਇਸ ਪਰਛਾਈ ਤੋਂ ਇੰਝ ਹੈ ਲੱਗਦਾ
ਜਿਵੇਂ ਕੋਈ ਪੰਖ ਪਿਰਾਮਿਡ ਤੋਂ ਉਤਰਦਾ
ਤੀਜਾ ਅਜੂਬਾ ਹੈ ਯੀਸੂ ਮੁਕਤੀਦਾਤਾ
ਦੁਨੀਆਂ ਦੀ ਸਭ ਤੋਂ ਵੱਡੀ ਕਲਾਤਮਕਤਾ
98 ਫੁੱਟ ਉੱਚਾ, 635 ਟਨ ਭਾਰਾ
ਤਿਹੂਕਾ ਜੰਗਲ ਚਂ ਲਓ ਇਸ ਦਾ ਨਜ਼ਾਰਾ
ਇਹ ਚਿੰਨ ਰਿਓ ਡੀ ਜਨੇਰੋ ਈਸਾਈ ਮੱਤ ਦੀ ਜਾਨ
ਬ੍ਰਾਜ਼ੀਲ ਦੇਸ਼ ਦੀ ਬਣ ਗਿਆ ਹੈ ਪਛਾਣ
ਚੌਥਾ ਅਜੂਬਾ ਹੈ ਇਟਲੀ ਦਾ ਕਲੋਜ਼ੀਅਮ
ਬਣਾਉਣ ਵਾਲਾ ਹੈ ਵੈਸਪੈਸੀਅਨ
ਇਸ ਅਜੂਬੇ ਦਾ ਇਹ ਹੈ ਕਮਾਲ
80 ਹਜ਼ਾਰ ਦਰਸ਼ਕਾਂ ਨੂੰ ਲੈਂਦਾ ਹੈ ਸੰਭਾਲ
ਪੰਜਵਾਂ ਅਜੂਬਾ ਹੈ ਚੀਨ ਦੀ ਦੀਵਾਰ
ਕਿਨ, ਹੈਨ, ਮਿੰਗ ਵੰਸ਼ ਨੇ ਕੀਤੀ ਤਿਆਰ
6700ਕਿਲੋਮੀਟਰ ਦਾ ਸਫ਼ਰ ਤੈਅ ਕਰਦੀ
ਚੀਨੀਆਂ ਦੇ ਲੋਕ ਗੀਤਾਂ ਚਂ ਵਿਸ਼ੇਸ਼ ਥਾਂ ਹੈ ਰੱਖਦੀ
ਛੇਵਾਂ ਅਜੂਬਾ ਹੈ ਮਾਚੂ ਪਿਕਚੂ, ਪੇਰੂ ਦਾ
ਜਿਸ ਵਿੱਚੋਂ ਉਰੂਬਾਂਬਾ ਦਰਿਆ ਹੈ ਵਗਦਾ
ਉਰੂਬਾਂਬਾ ਘਾਟੀ ਉੱਤੇ ਪਹਾੜੀ ਉਭਾਰ ਹੈ
ਜਿਸ ਉੱਤੇ ਵੱਸਿਆ ਇਹ ਇੰਕਿਆਂ ਦਾ ਸ਼ਹਿਰ ਹੈ
ਸੱਤਵਾਂ ਅਜੂਬਾ ਹੈ ਜਾਰਡਨ ਦਾ ਪੇਤਰਾ 
ਜੋ ਮਾਆਨ ਸੂਬੇ ਦੇ ਵਿੱਚ ਸਥਿਤ ਹੈ
ਵਿਲੱਖਣ ਪੱਥਰਾਂ ਨੂੰ ਕੱਟ ਕੇ ਬਣਾਈ ਵਿਰਾਸਤ ਦੀ ਇਹ ਬਹੁਤ ਸੁਹਣੀ ਕਲਾਕ੍ਰਿਤ ਹੈ
ਇਹ ਸੱਤ ਅਜੂਬੇ ਨੇ ਵਿਰਾਸਤ ਦੀ ਸ਼ਾਨ
ਸਾਰੀ ਦੁਨੀਆਂ ਜਿਸ ਤੇ ਕਰਦੀ ਹੈ ਮਾਣ
'ਅਮਰ' ਰਲ਼ ਕੇ ਕਰੀਏ ਇਸ ਦੀ ਦੇਖ ਭਾਲ
ਵਿਰਾਸਤ ਨੂੰ ਆਪਣੀ ਲਈਏ ਸੰਭਾਲ
17/04/2019


ਮੰਜੇ ਪੀੜੀਆਂ

ਅਮਰਦੀਪ ਕੌਰ, ਪੰਜਾਬ

ਪੁੱਤਰ ਨੇ ਬੜੇ ਚਾਵਾਂ ਦੇ ਨਾਲ ਸੁਹਣੀ ਕੋਠੀ ਪਾਈ।
ਮਹਿੰਗਾ ਲੈ ਫਰਨੀਚਰ ਉਸ ਨੇ ਦੁਲਹਨ ਵਾਂਗ ਸਜਾਈ।
ਬੈੱਡ ਵੀ ਵਾਹਵਾ ਸੁਹਣੇ ਲੈ ਲਏ ਉੱਤੇ ਨਰਮ ਗੱਦੇ ਵਿਛਾਏ।
ਬਾਪੂ ਪਲਸੇਟੀਆਂ ਰਿਹਾ ਮਾਰਦਾ ਕਹਿੰਦਾ ਨੀਂਦ ਨਾ ਆਏ।
ਇੱਕ ਦਿਨ ਉੱਠਿਆ ਸਵੇਰੇ ਤਾਂ ਜਾ ਪਹੁੰਚਿਆ ਬਜ਼ਾਰ।
ਉੱਥੋਂ ਜਾ ਕੇ ਲਿਆਇਆ ਸੁਹਣੀ ਜਾਮਣੀ ਰੰਗ ਦੀ ਨੁਆਰ।
ਆ ਕੇ ਕਹਿੰਦਾ ਭਾਗਵਾਨੇ ਚੱਲ, ਮੰਜਾ ਨਵਾਂ ਬਣਾਉਂਦੇ ਆ।
ਆ ਬੈੱਡਾਂ ਬੂੱਡਾਂ ਤੇ ਨੀਂਦ ਨਹੀਂ ਆਉਂਦੀ
ਐਂਵੇ ਲੱਕ ਤੁੜਵਾਉਂਦੇ ਆ।
ਬੇਬੇ ਕਹਿੰਦੀ ਜੇ ਮੰਜਾ ਬੁਣਨਾ, ਤੁਰ ਚੱਲ ਤੂੰ ਫਿਰ ਕੋਠੇ ।
ਮੈਂ ਹੌਲੀ ਹੌਲੀ ਆਉਣੀ ਆ, ਮੇਰੇ ਦੁਖਦੇ ਪਏ ਨੇ ਗੋਡੇ।
ਬਾਪੂ ਚੁੱਕਿਆ ਸਟੋਰ ਚਂ ਮੰਜਾ ਪੁਰਾਣਾ, ਜਾ ਕੋਠੇ ਤੇ ਡਾਇਆ।
ਫਟੀ ਪਈ ਸੀ ਨੁਆਰ ਉਸ ਦੀ, ਲਾਹ ਕੇ ਸਾਫ਼ ਕਰਵਾਇਆ।
ਇੰਨੇ ਨੂੰ ਬੇਬੇ ਵੀ ਪਹੁੰਚ ਗਈ ਬਹਿ ਗਈ ਪਲੱਥਾ ਮਾਰ।
ਕਹਿੰਦੀ ਵੇ ਬਾਹੀਆਂ ਸੇਰੂ ਤਾਂ ਵੇਖ ਲੈ ਕਿਤੇ ਸਿਓਂਕ ਨਾ ਲਏ ਹੋਣ ਖਾ।
ਬਾਪੂ ਕਹਿੰਦਾ ਬਾਹੀਆਂ, ਸੇਰੂ ਟਾਹਲੀ ਦੇ ਨੇ, ਤੂਤ ਦੇ ਮੁੱਢ ਦੇ ਪਾਵੇ।
ਇਹ ਨਾ ਹੁੰਦੇ ਖ਼ਰਾਬ ਕਦੀ ਹੁਣ ਕਾਹਤੋਂ ਸਿਰ ਤੂੰ ਖਾਵੇਂ।
ਹੁਣ ਫੜ ਨੁਆਰ ਤੇ ਉਣੀਏ ਮੰਜਾ ਕਿਤੇ ਧੁੱਪ ਢਲ ਨਾ ਜਾਵੇ।
ਆਪਾਂ ਤੇ ਰਾਤੀਂ ਇਸੇ ਤੇ ਸੌਣਾ ਚਾਹੇ ਕੋਈ ਗੁੱਸਾ ਮਨਾਵੇ।
ਬੇਬੇ ਬਾਪੂ ਨੂੰ ਸਮਝਾਵੇ ਵੇ ਨਾ ਕਰਿਆ ਕਰ ਤੂੰ ਅੜੀਆਂ।
ਨੂੰਹ ਪੁੱਤ ਨਹੀਂ ਅੱਜ ਕੱਲ ਦੇ ਜਰਦੇ ਮੈਂ ਤਾਂ ਭਾਵੇਂ ਜਰੀਆਂ।
ਖੱਟੀਆਂ ਮਿੱਠੀਆਂ ਗੱਲਾਂ ਕਰਦੇ ਹੋ ਗਿਆ ਮੰਜਾ ਤਿਆਰ।
ਬਾਪੂ ਤੋਂ ਖੁਸ਼ੀ ਸਾਂਭੀ ਨਾ ਜਾਵੇ ਕਹਿੰਦਾ ਹੁਣ ਬਣੀ ਗੱਲਬਾਤ।
ਇਹ ਮੰਜੇ, ਪੀੜੀਆਂ ਹੀ ਤਾਂ ਜੋੜ ਦਿੰਦੀਆਂ ਨੇ ਦਿਲਾਂ ਦੇ ਤਾਰ।
ਇਹਨਾਂ ਨਾਲ ਹੀ ਜਿਊਂਦਾ ਰਹਿਣਾ ਸਾਡਾ ਪੰਜਾਬੀ ਸੱਭਿਆਚਾਰ।
10/01/2019


ਨਿਵੇਕਲੀ ਕੁਰਬਾਨੀ
ਅਮਰਦੀਪ ਕੌਰ, ਪੰਜਾਬ
 
amardeepਜਿੱਥੇ ਪਿਤਾ ਭੇਜੇ ਪੁੱਤਾਂ ਨੂੰ
ਜਾਓ ਮੇਰੇ ਪਿਆਰਿਓ
ਦੇਸ਼ ਕੌਮ ਦਾ ਕਰਜ਼ਾ
ਸਿਰ ਦੇ ਕੇ ਉਤਾਰਿਓ
ਕੋਈ ਤਾਂ ਕੁਰਬਾਨੀ ਮੈਨੂੰ
ਇਹੋ ਜਿਹੀ ਵਿਖਾ ਦਿਓ
 
ਜਿੱਥੇ ਦਾਦੀ ਕਹੇ ਲਾਲਾਂ ਨੂੰ
ਸੁਣੋ ਮੇਰੇ ਦੁਲਾਰਿਓ
ਸ਼ਹੀਦ ਭਾਵੇਂ ਹੋ ਜਾਇਓ
ਸਿੱਖੀ ਨੂੰ ਦਾਗ਼ ਨਾ ਲਾ ਦਿਓ
ਕੋਈ ਤਾਂ ਕੁਰਬਾਨੀ ਮੈਨੂੰ
ਇਹੋ ਜਿਹੀ ਵਿਖਾ ਦਿਓ
 
ਜਿੱਥੇ ਨਿੱਕੇ ਨਿੱਕੇ ਬਾਲ ਜਾ
ਸੂਬਾ ਸਰਹੰਦ ਨੂੰ ਲਲਕਾਰਦੇ
ਕਹਿੰਦੇ ਸਿੱਖੀ ਨਹੀਂ ਛੱਡਣੀ
ਚਾਹੇ ਫਾਹੇ ਸਾਨੂੰ ਲਾ ਦਿਓ
ਕੋਈ ਤਾਂ ਕੁਰਬਾਨੀ ਮੈਨੂੰ
ਇਹੋ ਜਿਹੀ ਵਿਖਾ ਦਿਓ
 
ਨੀਹਾਂ ਵਿੱਚ ਚਿਣੇ ਜਾਂਦੇ
ਮੂੰਹੋਂ ਸੀ ਨਾ ਉਚਾਰਦੇ
ਲਾਉਂਦੇ ਸੀ ਜੈਕਾਰੇ ਇਓਂ
ਸ਼ੇਰ ਨੇ ਦਹਾੜਦੇ ਜਿਓਂ
ਕੋਈ ਤਾਂ ਕੁਰਬਾਨੀ ਮੈਨੂੰ
ਇਹੋ ਜਿਹੀ ਵਿਖਾ ਦਿਓ
27/12/20118

ਗਿੱਦ ਰਾਜ
ਅਮਰਦੀਪ ਕੌਰ, ਪੰਜਾਬ

ਗਿੱਦ ਰਾਜ ਵਿੱਚ
ਭੁੱਖ ਮਰੀ ਦਾ ਇੰਤਜਾਰ ਹੁੰਦਾ ਹੈ
ਫਿਰ ਉਸ ਦੇ ਮਰਨ ਤੋਂ ਮਗਰੋਂ
ਮੁਰਦਿਆਂ ਦਾ ਸ਼ਿਕਾਰ ਹੁੰਦਾ ਹੈ
 
ਗਿੱਦ ਰਾਜ ਵਿੱਚ
ਪਹਿਲਾਂ ਬੁਰਕੀ ਬੋਈ ਜਾਂਦੀ ਹੈ
ਫਿਰ ਉਹੀ ਬੁਰਕੀ ਦੇਵਣ ਲਈ
ਸਾਰੀ ਪੂੰਜੀ ਖੋਈ ਜਾਂਦੀ ਹੈ
 
ਗਿੱਦ ਰਾਜ ਵਿੱਚ
ਧੀਆਂ ਭੈਣਾਂ ਨੂੰ ਚੂੰਡਿਆਂ ਜਾਂਦਾ
ਫਿਰ ਚਲਾ  ਕੇ ਰਾਜਨੀਤੀ
ਇਸ ਗੰਦਗੀ ਨੂੰ ਹੂੰਝਿਆਂ ਜਾਂਦਾ
 
ਗਿੱਦ ਰਾਜ ਵਿੱਚ
ਸਰਮਾਏਦਾਰ ਰਾਜ ਚਲਾਉਂਦੇ ਨੇ
ਬੰਦੇ ਨੂੰ ਬੰਨ੍ਹ ਸੰਗਲੀ ਰੱਖਦੇ
ਕੁੱਤਿਆਂ ਨੂੰ ਮਾਸ ਖਵਾਉਂਦੇ ਨੇ
 
ਗਿੱਦ ਰਾਜ ਵਿੱਚ
ਧਰਮ ਵੀ ਨਿਸ਼ਾਨਾ ਬਣਦਾ ਹੈ
ਲੜਦਾ ਹੈ ਬੰਦੇ ਨਾਲ ਬੰਦਾ
ਭਾਂਡਾ ਰੱਬ ਦੇ ਸਿਰ ਤੇ ਭੰਨਦਾ ਹੈ
 
ਗਿੱਦ ਰਾਜ ਵਿੱਚ
ਹਰ ਕੋਈ ਲੁੱਟਦਾ ਖੋਂਹਦਾ ਹੈ
ਬੇਸ਼ਰਮੀ ਦੀਆਂ ਹੱਦਾਂ ਟੱਪ ਕੇ
ਜਾ ਮੁਰਦੇ ਨਾਲ ਸੌਂਦਾ ਹੈ
 
ਗਿੱਦ ਰਾਜ ਵਿੱਚ
ਝੂਠਿਆਂ ਦਾ ਹੀ ਡੰਕਾ ਵੱਜਦਾ ਹੈ
ਨੇਕੀ ਲੁਕ ਕੇ ਜਾ ਬੈਠੀ 'ਅਮਰ'
ਸੱਚਾ ਸੱਚ ਬੋਲਣ ਤੋਂ ਡਰਦਾ ਹੈ
ਸੱਚਾ ਸੱਚ ਬੋਲਣ ਤੋਂ ਡਰਦਾ ਹੈ
31/12/2018


ਵਿਰਸੇ ਦੀ ਚੱਕੀ

ਅਮਰਦੀਪ ਕੌਰ, ਪੰਜਾਬ

amardipKਹੱਥੀਂ ਚੂੜੀਆਂ, ਮੱਥੇ ਟਿੱਕਾ ਗਲ 'ਚ ਤਵੀਤੜੀ ਪਾਈ
ਹਰੀ ਕੁੜਤੀ ਤੇ ਲਾਲ ਫੁਲਕਾਰੀ ਰੂਪ ਪਾਉਂਦਾ ਦੁਹਾਈ
 
ਗੋਰੇ ਮੁਖੜੇ ਦੀ ਲਾਲੀ ਨੇ ਸੂਰਜ ਨੂੰ ਮਾਤ ਹੈ ਪਾਈ
ਤੜਕ ਸਾਰ ਉਠਾ ਸੱਸ ਨੇ ਬਹੂ ਚੱਕੀ ਝੋਣ ਨੂੰ ਲਾਈ
 
ਉੱਧਰੋਂ ਮਾਹੀ ਵਾਜ਼ਾਂ ਮਾਰੇ ਇੱਧਰੋਂ ਸੱਸ ਨੇ ਕੋਲ ਬਹਾਈ
ਦੋ ਧਿਰਾਂ ਚਂ ਫਸ ਗਈ ਜਿੰਦੜੀ ਪੇਸ਼ ਨਾ ਜਾਵੇ ਕਾਈ
 
ਸੱਸ ਦੀ ਸੁਣੇ ਜਾਂ ਮਾਹੀ ਦੀ ਮੰਨੇ ਜਾਨ ਮੁੱਠੀ 'ਚ ਆਈ
ਜਿਵੇਂ ਮਾਨੀ ਨੇ ਦੋਹਾਂ ਪੁੜਾਂ ਵਿਚਾਲੇ ਹੋਵੇ ਜਿੰਦ ਫਸਾਈ
 
ਸੋਚ ਸੋਚ ਮਾਹੀ ਦੇ ਬਾਰੇ ਜਾਵੇ ਬੁੱਲਾਂ ਵਿੱਚ ਮੁਸਕਾਈ
ਨਾਲੇ ਪਾ ਚੱਕੀ ਵਿੱਚ ਦਾਣੇ ਹੱਥੇ ਨਾਲ ਜਾਏ ਘੁਮਾਈ
 
ਗ੍ਰੰਡ ਵਿੱਚੋਂ ਕਰਕੇ ਆਟਾ ਇਕੱਠਾ ਜਾਵੇ ਪਰਾਤ 'ਚ ਪਾਈ
ਫਿਰ ਪਰੋਲੇ ਨਾਲ ਗ੍ਰੰਡ ਦੀ ਉਸ ਕੀਤੀ ਚੰਗੀ ਸਫ਼ਾਈ
 
ਸੱਸ ਨੇ ਵੀ ਆ ਕੋਲ ਬੈਠ ਚਾਟੀ ਦੀ ਲੱਸੀ ਬਣਾਈ
ਨੂੰਹ ਨੇ  ਗੁੰਨ ਕੇ ਆਟਾ ਸਾਰੇ ਟੱਬਰ ਲਈ ਰੋਟੀ ਲਾਈ
 
ਸਭ ਨੇ ਖਾਧੀ ਮਿਲ ਕੇ ਰੋਟੀ ਬਹੂ ਦੀ ਕੀਤੀ ਵਡਿਆਈ
ਇਸ ਤਰ੍ਹਾਂ ਵਿਰਸੇ ਦੀ ਚੱਕੀ ਨੇ ਘਰ ਚਂ ਬਰਕਤ ਪਾਈ।
18/12/18


ਮੈਂ ਸੋਚਦੀ ਹਾਂ...

ਅਮਰਦੀਪ ਕੌਰ, ਪੰਜਾਬ

ਜੇ ਸਾਡੀਆਂ ਮਾਵਾਂ ਵੀ ਮੋਬਾਈਲ  ਚਲਾਂਦੀਆਂ
ਵਟਸ ਐਪ ਫੇਸਬੁਕ ਤੇ ਹੀ ਸਮਾਂ ਬਿਤਾਂਦੀਆਂ
ਕਿੱਟੀ ਪਾਰਟੀਆਂ ਵਿੱਚ ਗੱਪਸ਼ੱਪ ਲੜਾਂਦੀਆਂ 
ਫਿਰ ਸੋਸ਼ਲ ਸਾਈਟ ਤੇ ਸੈਲਫੀਆਂ ਪਾਉਂਦੀਆਂ
ਘਰ ਦੇ ਕੰਮਾਂ ਲਈ ਨੌਕਰਾਣੀਆਂ ਆਉਂਦੀਆਂ
ਕਰਦੀਆਂ ਸਫਾਈ ਨਾਲੇ ਰੋਟੀਆਂ ਪਕਾਂਦੀਆਂ
ਸਕੂਲ ਦੇ ਕੰਮ ਲਈ ਟਿਊਸ਼ਨ ਭਿਜਵਾਂਦੀਆਂ
ਨਾ ਕਦੇ ਡਾਂਟਦੀਆਂ, ਨਾ ਚੰਗਾ ਸਮਝਾਂਦੀਆਂ
ਨਾ ਦੁੱਖ ਸੁਣਦੀਆਂ, ਨਾ ਗਲ ਨਾਲ ਲਾਂਦੀਆਂ
ਰਾਜੇ ਰਾਣੀਆਂ ਦੀਆਂ ਨਾ ਬਾਤਾਂ ਸੁਣਾਂਦੀਆਂ
ਤਾਂ ਅੱਜ ਅਸੀਂ ਸਭ ਨੈਤਿਕ ਗੁਣਾਂ ਤੋਂ ਵਾਂਝੇ ਹੁੰਦੇ
ਦੁੱਖ ਸੁੱਖ ਸਾਡੇ ਕਿਸੇ ਨਾਲ ਨਾ ਕਦੇ ਸਾਂਝੇ ਹੁੰਦੇ
ਭੈਣਾਂ ਭਰਾਵਾਂ ਦਾ ਵੀ ਆਪਸ ਚਂ ਮੋਹ ਨਾ ਹੁੰਦਾ
ਜ਼ਿੰਮੇਵਾਰੀਆਂ ਸਿਖਾਉਣ ਵਾਲਾ ਪਿਓ ਨਾ ਹੁੰਦਾ
ਔਖੇ ਸਮੇਂ ਵਿੱਚ ਫਿਰ ਕੋਈ ਨਾ ਫੜਦਾ ਬਾਂਹਵਾਂ
ਕੋਈ ਨਾ ਕਹਿੰਦਾ ਜਗ ਤੇ ਮਾਵਾਂ ਠੰਢੀਆਂ ਛਾਵਾਂ
ਮਾਵਾਂ ਠੰਢੀਆਂ ਛਾਵਾਂ
15/08/2018


ਗਿੱਧਾ

ਅਮਰਦੀਪ ਕੌਰ, ਪੰਜਾਬ

amardipਪੈਰਾਂ ਦੀ ਤਾਲ ਤੇ
ਹੱਥਾਂ ਦੀ ਥਾਪ ਤੇ
ਸਭ ਨੂੰ ਨਚਾਵਾਂ
ਰੌਣਕਾਂ ਮੈਂ ਲਾਵਾਂ
ਜਦੋਂ ਗਿੱਧੇ ਵਿੱਚ ਆ
ਬੋਲੀਆਂ ਮੈਂ ਪਾਵਾਂ
 
ਦਿਲਾਂ ਦੇ ਵਲਵਲੇ
ਭਰ ਭਰ ਉਛਲੇ
ਤਾਂ ਹੇਕਾਂ ਮੈਂ ਲਾਵਾਂ
ਉੱਚੀ ਉੱਚੀ ਗਾਵਾਂ
ਜਦੋਂ ਗਿੱਧੇ ਵਿੱਚ ਆ
ਬੋਲੀਆਂ ਮੈਂ ਪਾਵਾਂ
 
ਦੇਵਰ, ਜੇਠ, ਸੱਸ ਤੇ
ਮਾਹੀ ਦੀ ਹਰ ਗੱਲ ਤੇ
ਤਵਾ ਹੱਸ ਹੱਸ ਲਾਵਾਂ
ਖੁਸ਼ੀਆਂ ਬਿਖਰਾਵਾਂ
ਜਦੋਂ ਗਿੱਧੇ ਵਿੱਚ ਆ
ਬੋਲੀਆਂ ਮੈਂ ਪਾਵਾਂ
 
ਲੋਕ ਨਾਚਾਂ ਦਾ ਨਜਾਰਾ 
ਲੱਗੇ ਸਭ ਤੋਂ ਪਿਆਰਾ
ਨੱਚ ਪੈਂਦੇ ਸਾਰੇ
ਰਹਿੰਦਾ ਟਾਵਾਂ ਟਾਵਾਂ
ਜਦੋਂ ਗਿੱਧੇ ਵਿੱਚ ਆ
ਬੋਲੀਆਂ ਮੈਂ ਪਾਵਾਂ
 
ਮੇਲੇ, ਤਿੱਥ, ਤਿਓਹਾਰ
ਤੀਆਂ ਦਾ ਸ਼ਿੰਗਾਰ
ਸੱਭਿਆਚਾਰਕ ਸਟੇਜਾਂ
ਤੇ ਭੜਥੂ ਮੈਂ ਪਾਵਾਂ
ਜਦੋਂ ਗਿੱਧੇ ਵਿੱਚ ਆ
ਬੋਲੀਆਂ ਮੈਂ ਪਾਵਾਂ
 
ਅੱਜ ਡੀ.ਜੇ.ਦੇ ਬੋਲ
ਰਹੇ ਜ਼ਹਿਰ ਨੇ ਘੋਲ
ਕਿੱਥੋਂ ਜਾ ਕੇ ਲੱਭੀਏ
ਉਹ ਮਾਹੌਲ ਸੁਖਾਵਾਂ
ਜਦੋਂ ਗਿੱਧੇ ਵਿੱਚ ਆ
ਬੋਲੀਆਂ ਮੈਂ ਪਾਵਾਂ
27/05/2018


ਵਿਸਾਖੀ ਦਾ ਮੇਲਾ

ਅਮਰਦੀਪ ਕੌਰ, ਪੰਜਾਬ

janmejaਪੁੱਤਾਂ ਵਾਗੂੰ ਪਾਲੀ ਜੱਟ ਦੀ ਫਸਲ ਹੋਈ ਜਦ ਜਵਾਨ,
ਸੋਨੇ ਵਰਗਾ ਰੂਪ ਦੇਖ ਕੇ ਉਸ ਮੁੱਛਾਂ ਲਈਆਂ ਤਾਣ।

ਭੈਣ ਵਿਆਹੁਣੀ, ਕੋਠੀ ਪਾਉਣੀ ਸੁਪਨੇ ਕਈ ਸਜਾਏ,
ਹੱਥ ਜੋੜ ਅਰਦਾਸਾਂ ਕਰਦਾ ਸ਼ੁਕਰ ਰੱਬ ਦਾ ਮਨਾਏ ।

ਆਈ ਵਿਸਾਖੀ ਮੇਲੇ ਚੱਲੀਏ ਜੱਟ ਜੱਟੀ ਨੂੰ ਵਾਜਾਂ ਮਾਰੇ,
ਸਾਲ ਬਾਅਦ ਫੇਰ ਮੌਕਾ ਆਉਣਾ ਚੱਲ ਚੱਲੀਏ ਮੁਟਿਆਰੇ ।

ਸੰਧੂਰੀ ਪੱਗ, ਚਿੱਟਾ ਚਾਦਰਾ, ਜੱਟ ਨੇ ਰੂਪ ਵਟਾਇਆ,
ਮੱਥੇ ਟਿੱਕਾ, ਪੈਰੀਂ ਝਾਂਜਰ ਜੱਟੀ ਨੇ ਕਹਿਰ ਹੈ ਢਾਇਆ।

ਮੀਣਾ ਤੇ ਕਾਲੂ ਵੀ ਚੱਲੇ ਨੇ,ਗਲ਼ ਵਿੱਚ ਪਾ ਕੇ ਟੱਲੀਆਂ,
ਧੂੜਾਂ ਪੱਟਣੀਆਂ ਅੱਜ ਤਾਂ, ਦੌੜਾਂ ਚਂ ਮੱਲਾਂ ਮੱਲਣੀਆਂ।

ਭੰਗੜੇ ਪਾਉਂਦਾ, ਬੱਕਰੇ ਬੁਲਾਉਂਦਾ ਜੱਟ ਮੇਲੇ ਨੂੰ ਜਾਵੇ,
ਜੱਟੀ ਦਾ ਵੀ ਮੇਲੇ ਵਿੱਚ ਚਾਅ ਚੱਕਿਆ ਨਾ ਜਾਵੇ।

ਕਿਤੇ ਜਲੇਬੀ, ਕਿਤੇ ਪਕੌੜੇ, ਕਿਤੇ ਪੰਘੂੜਿਆ ਰੰਗ ਜਮਾਏ,
 ਸੱਭਿਆਚਾਰਕ ਅਖਾੜਿਆਂ ਨੇ ਚਾਰ ਚੰਨ ਨੇ ਲਾਏ।

ਛੈਲ ਛਬੀਲੇ ਗੱਭਰੂ ਫਿਰਦੇ, ਸਰੂ ਵਰਗੀਆਂ ਮੁਟਿਆਰਾਂ,
ਇੱਕ ਦੂਜੇ ਨੂੰ ਕਰਨ ਇਸ਼ਾਰੇ, ਰੰਗ ਬੰਨੇ ਦਿਲਦਾਰਾਂ।

ਕਿਸੇ ਜਾ ਮੱਲਿਆ ਅਖਾੜਾ,ਕਿਤੇ ਗਿੱਧੇ ਪਾਉਂਦੀਆਂ ਨਾਰਾਂ
ਖਾਲਸੇ ਦੇ ਜਨਮ ਦਿਹਾੜੇ ਤੇ ਢਾਡੀ ਗਾਉਂਦੇ ਵਾਰਾਂ।

ਕਿਤੇ ਨੱਟਾਂ ਨੇ ਰੰਗ ਜਮਾਇਆ, ਕਰਦੇ ਫਿਰਨ ਤਮਾਸ਼ੇ,
ਕੋਈ ਵੇਖਦਾ ਏ ਰੌਣਕ ਮੇਲੇ ਦੀ, ਕੋਈ ਆਸੇ ਪਾਸੇ ਝਾਕੇ।

ਖੜਕ ਪਈਆਂ ਨੇ ਡਾਂਗਾ, ਦਾਰੂ ਨੇ ਰੰਗ ਵਿਖਾਇਆ,
ਲਹੂ ਲੁਹਾਨ ਹੋ ਗਈ ਇੱਕ ਟੋਲੀ, ਪੁਲਸ ਨੇ ਆਣ ਛੁਡਾਇਆ।

ਜੱਟ ਨੂੰ ਜੱਟੀ ਤਰਲੇ ਕਰਦੀ, ਮਾਹੌਲ ਹੋ ਗਿਆ ਮਾੜਾ,
ਚੱਲ ਹੁਣ ਘਰ ਨੂੰ ਤੁਰ ਚੱਲੀਏ ਵੱਧ ਨਾ ਜਾਏ ਖਲਾਰਾ।

ਮਾਣ ਮੇਲੇ ਦੀਆਂ ਰੌਣਕਾਂ ਘਰਾਂ ਨੂੰ ਪਰਤ ਪਏ ਸਾਰੇ,
ਮੀਣੇ ਤੇ ਕਾਲੂ ਦੀਆਂ ਮੱਲਾਂ ਜੱਟ ਮਸਾਲੇ ਲਾ ਲਾ ਸੁਣਾਵੇ।

ਜ਼ਿੰਦਗੀ ਨੂੰ ਹੁਲਾਰਾ ਦਿੰਦੇ ਇਹ ਮੇਲੇ, ਤੇ ਤਿਓਹਾਰ,
ਅਮਰ ਮਨਾਉਂਦੇ ਰਹੀਏ ਇੰਝ ਹੀ ਵਿਸਾਖੀ ਹਰ ਸਾਲ।
05/04/2018


ਦਿਲ ਕਰਦਾ

ਅਮਰਦੀਪ ਕੌਰ, ਪੰਜਾਬ

ਹਰ ਜ਼ਖਮ ਨੂੰ ਮਿਲ ਜਾਏ ਮੱਲ੍ਹਮ
ਅਜਿਹੇ ਸ਼ਬਦਾਂ ਦਾ ਜਾਮਾ ਪਹਿਨਾਵਾ
ਦਿਲ ਕਰਦਾ ਕਿਸੇ ਸ਼ਾਇਰ ਦੀ
ਅਮਰ ਕਵਿਤਾ ਮੈਂ ਬਣ ਜਾਵਾਂ
 
ਹਰ ਬੇਸਹਾਰੇ ਮਾਸੂਮ ਨੂੰ
ਮਮਤਾ ਦੀ ਗੂੜ੍ਹੀ ਨੀਂਦ ਸੁਲਾਵਾਂ
ਦਿਲ ਕਰਦਾ ਕਿਸੇ ਮਾਂ ਦੀ ਗਾਈ
ਬੱਚੇ ਲਈ ਲੋਰੀ ਬਣ ਜਾਵਾਂ
 
ਵਿਹੜੇ ਦੀ ਰੌਣਕ ਮੈਂ ਹੋਜਾਂ
ਨੱਚ ਨੱਚ ਕੇ ਮੈਂ ਧਰਤ ਹਿਲਾਵਾਂ
ਦਿਲ ਕਰਦਾ ਹਰ ਧੀ ਖੁਸ਼ ਕਰਦਾਂ
ਗਿੱਧੇ ਦੀ ਬੋਲੀ ਬਣ ਜਾਵਾਂ
 
ਬੰਦ ਹੋਈਆਂ ਸਭ ਅੱਖਾਂ ਖੁੱਲ ਜਾਣ
ਐਸਾ ਕੋਈ ਸੰਗੀਤ ਬਣਾਵਾਂ
ਦਿਲ ਕਰਦਾ ਜੋ ਕੋਈ ਨਾ ਭੁੱਲੇ
'ਅਮਰ' ਲੋਕ ਗੀਤ ਬਣ ਜਾਵਾਂ
05/02/2018
 

ਮੇਰੀ ਹੋਂਦ
ਅਮਰਦੀਪ ਕੌਰ, ਪੰਜਾਬ

ਮੇਰੀ ਹੋਂਦ ਨੂੰ ਨੋਚਣ ਵਾਲਿਓ
ਕਿਵੇਂ ਮਾਂ ਨੂੰ ਮੂੰਹ ਦਿਖਾਵੋਗੇ
ਜਨਮ ਦਾਤੀ ਦਾ ਸਿਰ ਝੁਕ ਜਾਊ
ਕਿੱਥੇ ਆਪਣਾ ਆਪ ਛੁਪਾਵੋਗੇ
 
ਮੇਰੀ ਹੋਂਦ ਨੂੰ ਤਾਰ ਤਾਰ ਕਰਨ ਵਾਲਿਓ
ਭੈਣ ਤੋਂ ਰੱਖੜੀ ਕਿੰਝ ਬੰਨਵਾਵੋਗੇ
ਕਿਵੇਂ ਬਣੋਗੇ ਇੱਜ਼ਤਾਂ ਦੇ ਰਾਖੇ
ਜਦੋਂ ਆਪ ਹੀ ਲੁਟੇਰੇ ਬਣ ਜਾਵੋਗੇ
 
ਮੇਰੀ ਹੋਂਦ ਨੂੰ ਝਰੀਟਣ ਵਾਲਿਓ
ਕਿਵੇਂ ਧੀ ਨੂੰ ਤੁਸੀਂ ਸੰਭਾਲੋਗੇ
ਆਪਣੇ ਵਹਿਸ਼ੀ ਤੇ ਜੰਗਲੀਪੁਣੇ ਤੋਂ
ਉਸ ਮਾਸੂਮ ਨੂੰ ਕਿਵੇਂ ਬਚਾਵੋਗੇ
 
ਮੇਰੀ ਹੋਂਦ ਨੂੰ ਲਹੂ ਲੁਹਾਨ ਕਰਨ ਵਾਲਿਓ
ਕਿਸ ਮੂੰਹ ਨਾਲ ਪਤਨੀ ਕੋਲ ਜਾਵੋਗੇ
ਤੋੜ ਕੇ ਆਪਣੀਆਂ ਸਾਰੀਆਂ ਹੱਦਾਂ
ਕਿਹੜੀ ਵਫਾ ਤੁਸੀਂ ਨਿਭਾਵੋਗੇ
 
ਔਰਤ ਨੂੰ ਸ਼ਰਮਸਾਰ ਕਰਾਉਣ ਵਾਲਿਓ
ਸ਼ਰਮਸਾਰ ਹੈ  ਤੁਹਾਡੀ ਭੈਣ ਤੇ ਮਾਂ
ਸ਼ਰਮਸਾਰ ਹੈ ਤੁਹਾਡੀ ਧੀ ਤੇ ਪਤਨੀ
ਸ਼ਰਮਸਾਰ ਹੈ ਸਾਰੀ ਦੁਨੀਆਂ
 
'ਅਮਰ' ਦੀ ਰੱਬਾ ਕਬੂਲ ਕਰੀਂ
ਇੱਕ ਨਿਮਾਣੀ ਜਿਹੀ ਅਰਦਾਸ
ਉਸ ਔਰਤ ਨੂੰ ਬਾਂਝ ਹੀ ਰੱਖੀਂ
ਜੇ ਨਿਕਲਣੀ ਹੋਵੇ ਅਜਿਹੀ ਔਲਾਦ

21/01/2018


ਆਓ ਇੱਕ ਨਵੀਂ ਲੋਹੜੀ ਮਨਾਈਏ
ਅਮਰਦੀਪ ਕੌਰ, ਪੰਜਾਬ

ਨਸ਼ਿਆਂ ਦਾ ਕਰੀਏ ਬਾਲਣ ਕੱਠਾ
ਈਰਖਾ ਸਾੜਾ ਵਿੱਚ ਰਲਾਈਏ
ਗਿਆਨ ਦਾ ਜਲਾ ਕੇ ਦੀਪਕ
ਸਭ ਬੁਰਾਈਆਂ ਅਗਨ ਭੇਟ ਚੜਾਈਏ
ਆਓ ਇਸ ਵਾਰ ਸਾਰੇ ਰਲ਼ ਕੇ
ਲੋਹੜੀ ਦਾ ਤਿਓਹਾਰ ਮਨਾਈਏ

ਗਿਲੇ ਸ਼ਿਕਵੇ ਸਭ ਭੁੱਲ ਭੁਲਾ ਕੇ
ਪਿਆਰ ਦੀ ਗਲਵੱਕੜੀ ਪਾਈਏ
ਮਿਠਾਸ ਨਾਲ ਗੜੁੰਦ ਰਿਓੜੀ ਲੈ ਕੇ
ਇੱਕ ਦੂਜੇ ਦੇ ਮੂੰਹ ਵਿੱਚ ਪਾਈਏ
ਆਓ ਇਸ ਵਾਰ ਸਾਰੇ ਰਲ਼ ਕੇ
ਲੋਹੜੀ ਦਾ ਤਿਓਹਾਰ ਮਨਾਈਏ

ਗਲੀ ਮੁਹੱਲਾ ਸਭ ਕੱਠਾ ਕਰੀਏ
ਗਿੱਧੇ, ਭੰਗੜੇ, ਕਿੱਕਲੀਆਂ ਪਾਈਏ
ਸੱਭਿਆਚਾਰ ਦਾ ਜੋ ਨਾਂ ਨਹੀਂ ਜਾਣਦੇ
ਰੀਤ ਰਿਵਾਜਾਂ ਸਭ ਕਰ ਦਿਖਾਈਏ
ਆਓ ਇਸ ਵਾਰ ਸਾਰੇ ਰਲ਼ ਕੇ
ਲੋਹੜੀ ਦਾ ਤਿਓਹਾਰ ਮਨਾਈਏ

ਸੜਕਾਂ ਤੇ ਲੰਗਰ ਲਾਵਣ ਨਾਲੋਂ
ਮਾਂ ਬਾਪ ਦੇ ਮੂੰਹ ਚਂ ਬੁਰਕੀ ਪਾਈਏ
ਵਰਤ ਸਰਾਧ ਕਰਨ ਤੋਂ ਚੰਗਾ
ਬਿਰਧ ਆਸ਼ਰਮ ਸਭ ਖਤਮ ਕਰਾਈਏ
ਆਓ ਇਸ ਵਾਰ ਸਾਰੇ ਰਲ਼ ਕੇ
ਲੋਹੜੀ ਦਾ ਤਿਓਹਾਰ ਮਨਾਈਏ

ਧੀਆਂ ਦੀ ਲੋਹੜੀ ਚੰਗੀ ਗੱਲ ਹੈ
ਪਰ ਬਣਦੇ ਅਧਿਕਾਰ ਵੀ ਦਵਾਈਏ
ਧੀਆਂ ਪੁੱਤਰ ਸਭ ਬਰਾਬਰ
ਰੌਲਿਆਂ ਵਿੱਚ ਹੀ ਨਾ ਗੱਲ ਮੁਕਾਈਏ
ਆਓ ਇਸ ਵਾਰ ਸਾਰੇ ਰਲ਼ ਕੇ
ਲੋਹੜੀ ਦਾ ਤਿਓਹਾਰ ਮਨਾਈਏ
10/01/18

 

ਇੱਕੋ ਧਰਮ-ਮਨੁੱਖਤਾ
ਅਮਰਦੀਪ ਕੌਰ, ਪੰਜਾਬ

ਭੁੱਖਾ ਕਦੇ ਕੋਈ ਸੋਵੇ ਨਾ
ਅਨਾਥ ਕਦੇ ਕੋਈ ਹੋਵੇ ਨਾ

ਸੁੱਕ ਜੇ ਨਸ਼ਿਆਂ ਦਾ ਦਰਿਆ
ਰੰਢੇਪਾ ਕਦੇ ਕੋਈ ਢੋਵੇ ਨਾ

ਹਰੀਆਂ ਭਰੀਆਂ ਹੋਵਣ ਫਸਲਾਂ
ਪਾਪ ਦੇ ਬੀਜ ਕੋਈ ਬੋਵੇ ਨਾ

ਧੀ ਹਰ ਇੱਕ ਦੀ ਹੋਵੇ ਸਾਂਝੀ
ਇੱਜ਼ਤ ਕਦੇ ਕੋਈ ਰੋਲੇ ਨਾ

ਇਨਸਾਫ਼ ਅੱਖਾਂ ਤੋਂ ਪੱਟੀ ਖੋਲ੍ਹੇ
ਤਾਂ ਹੱਕ ਕੋਈ ਕਿਸੇ ਦਾ ਖੋਵੇ ਨਾ

ਬੰਦ ਹੋ ਸਕਦਾ ਖੂਨ ਖ਼ਰਾਬਾ
ਜੇ ਧਰਮ ਅਧਰਮ ਕਦੇ ਹੋਵੇ ਨਾ

ਸਭ ਦਾ ਧਰਮ ਜੇ ਮਨੁੱਖਤਾ ਹੋਵੇ
ਤਾਂ ' ਅਮਰ 'ਖੂਨ ਦੇ ਹੰਝੂ ਕੋਈ ਰੋਵੇ ਨਾ
05/01/2018
 

 

ਅਮਰਦੀਪ ਕੌਰ ਪੰਜਾਬ
kauramardip@gmail.com

05/01/2018


5_cccccc1.gif (41 bytes)

>> 1 2 3 4 5 6 7             hore-arrow1gif.gif (1195 bytes)

Terms and Conditions
Privacy Policy
© 1999-2018, 5abi.com

www.5abi.com
[ ਸਾਡਾ ਮਨੋਰਥ ][ ਈਮੇਲ ][ ਹੋਰ ਸੰਪਰਕ ][ ਅਨੰਦ ਕਰਮਨ ][ ਮਾਨਵ ਚੇਤਨਾ ]
[ ਵਿਗਿਆਨ ][ ਕਲਾ/ਕਲਾਕਾਰ ][ ਫਿਲਮਾਂ ][ ਖੇਡਾਂ ][ ਪੁਸਤਕਾਂ ][ ਇਤਿਹਾਸ ][ ਜਾਣਕਾਰੀ ]

darya1.gif (3186 bytes)
©1999-2017, 5abi.com